1. Khu yevbini misuwo nya liphuvbo hi nga dzi vegeyago?

 KHA NGA Makristo nya lisine, hi ngu mu haladza ngudzu Jehovha. Ethu ho vbweta gu gira satshavbo hi si kodzago thumoni gwaye. Ha gu vbweta gu gireya nya singi Jehovha, hi yede gu dzi vegeya misuwo nya liphuvbo, nya nga gu haguleya makhalelo nya Wukristo, hi hevbula mithumo yi na phasago ni gu vbwetedzeya dzindziya nyo phase vambe. *

2. Khu ginani hi yedego gu dzi vegeya misuwo nya liphuvbo, ni gu dzi garadzeya gu yi vboheya?

² Khu ginani hi yedego gu dandra khu liphuvboni? Nyo pheye, khu gu tepo hi girago isoso, ha gu tsakisa Papayi wathu ndzadzini. Jehovha a ngu tsaka tepo a hi wonago na hi gu thumisa makodzelo yathu thumoni gwaye. Nigu ha gu vbweta gu dandra khu liphuvboni gasi hi phasa vandriyathu. (1 Tes. 4:9, 10) Gani hi na ni myaga nya yingi lisineni, hatshavbo hi nga dandra khu liphuvboni. Hongoleni hi wona edzi hi nga girago khidzo isoso.

3. Guya khu 1 Thimoti 4:12-16, ginani egi mupostoli Pawulo a kutsidego Thimoti gu gira?

³ Tepo mupostoli Pawulo a nga loveya lidangaliya laye nyo pheye Thimoti, Thimoti a diri lidhota li vidzidwego. Ambari  ulolo, Pawulo a mu kutside gu simama gu dandra khu liphuvboni. (Leri 1 Thimoti 4:12-16.) Tepo u lerigo malito ya Pawulo u na wona gu khuwe, uye a di gu vbweta gu khuye Thimoti a haguleya makhalelo nya Wukristo nya nga lihaladzo, gukhodwa ni gu manega ni mavbanyelo nya yadi; gu tshukwadzisa marelelo yaye, gu tiyisa ni gu hevbudza. Na hi gu dundrugeya khu giyeyedzo gya Thimoti, hongoleni hi dzi vegeya misuwo yi na hi phasago gu dandra khu liphuvboni. Hi na wona gambe dzindziya nyo khaguri hi nga andrisago khidzo thumo nyo tshumayele.

4. Guya khu Vafilipi 2:19-22, ginani gi nga gira Thimoti a khala githumi nya gyadi gya Jehovha?

⁴ Ginani gi nga gira gu Thimoti a khala githumi nya gyadi gya Jehovha? Khu kotani nya makhalelo nya Wukristo a nga ba ari nawo. (Leri Vafilipi 2:19-22.) Esi Pawulo a ganedego khu Thimoti, ha gu wona gu khethu Thimoti a diri muthu nya gu dzi nogise, nya gu tumbege ni sighingi. Uye a di gu haladza ni gu khathala ngudzu khu vandriyaye. Kha nga handro wakone, Pawulo a di gu haladza ngudzu Thimoti nigu a ningide mithumo nya yingi Thimoti, nyo garadze. (1 Kor. 4:17) Khu ndziya nyo fane, Jehovha a ngu hi haladza nigu a na hi thumisa libandlani ha gu haguleya makhalelo a ma vbwetago. — Ndzi. 25:9; 138:6.

5. a) U nga gira kharini gasi gu haguleya likhalelo nyo khaguri nya Wukristo? b) Kha nga hi si wonago avba nya fotu ndriyathu nya nyamayi a gu dzi garadza kharini gasi gu yeyedza gu khathala khu vambe?

⁵ Hatha likhalelo nyo khaguri u vbwetago gu li haguleya. Gombeya u bwe u dundrugeya khu gipandre nyo khaguri nya makhalelo yago u vbwetago gu tshukwadzisa. Hatha likhalelo nyo khaguri u yedego gu li tshukwadzisa. Khu giyeyedzo, u nga hunga gu hevbuleya gu khathala khu vambe mwendro gu manega ni gu dogoreya nya gu phase vandriyago. Mwendro u nga zama gu andrisa gurula ni vandriyago u bwe u khala muthu nyo divaleye. Adzina u nga lomba giphaso ga pari nyo khaguri gasi gu mana dzindziya nya gu tshukwadzise. — Mav. 27:6.

6. Ginani u nga girago gasi gu haguleya likhalelo nyo khaguri?

⁶ Dzigaradzeye gu vboheya misuwo yago. U nga gira kharini isoso? Mweyo nya ndziya u nga girago khiyo isoso, khu gu hevbula khu likhalelo u vbwetago gu li vboheya. Adzina u nga hunga gu tshukwadzisa likhalelo nya gu divaleye vambe. Gasi gu gira isoso, u yede gu hevbula ni  gu dudrugeya khu siyeyedzo sa omu nya Bhibhiliya sa ava va divaledego vambe ni ava va nga ne gu divaleya vambe. Wona giyeyedzo gya Jesu. Uye a di gu divaleya vambe. (Luka 7:47, 48) Uye kha nga ba a vega gupima avba nya sihoso sawe, ganiolu a di gu vega gupima avba nya esi va nga ba va si kodza gu gira. Gu hambana ni Vafarisi va matshigoni ga Jesu avo va di gu “nyenya vakwawe.” (Luka 18:9) Hwane nya gu dundrugeye khu siyeyedzo soso dzi wudzise esi: ‘Ginani nyi gi wonago ga vambe? Ga makhalelo va gu nawo nya gu hatha gu vega gupima avba nya yavbi makhalelo? Sa gu ba si gu garadzeya gu divaleya vambe, zama gu gira sasamedzo nya makhalelo nya yadi ya muthu yoyo. Hwane nya isoso, dzi wudzisi esi: ‘Jesu a gu mu wona kharini muthu yoyo? Ina uye a di hadzi gu mu divaleya?’ Ha gu gira isoso, hi na si kodza gu vbindrugedza esi hi pimisago. Gupheyani, si nga hi garadzeya gu divaleya muthu nyo khaguri a hi gandridego ginyalana. Ganiolu ha gu gira isoso, khu gu gimbiya nya tepo hi na si kodza gu divaleya vambe.

7. Kha nga si yeyedzwago umo ga Mavingu 22:29, Jehovha a gu thumisa kharini vandriyathu va gu na ni makodzelo muhuno?

⁷ Yimbe misuwo hi nga dzi vegeyago khu gu hevbuleya mithumo yi phasago. Dundrugeya khu vandriyathu va vbwetegago gasi gu vbaha Dzibheteli, Dzisalawu nya dzi asembheleya ni Dzisalawu nya Mufumo. Vandriyathu va girago mithumo yeyi va si kodzide gu thuma gwadi khu gu thuma ni vandriyathu va wutigo gwadi thumo. Kha nga si yeyedzwago avba nya fotu, vandriyathu va ngu hevbuleya mithumo yi na phasago avba nya gu longiselongise silo nyo khaguri omu nya Dzisalawu nya dzi asembheleya mwendro Dzisalawu nya Mufumo. Dzindziya dzedzi ni dzimbe, khidzo Jehovha Nungungulu, “Pfhumu nya gupindruge,” ni Jesu Kristo “pfhumu nya dzipfhumu,” va dzi thumisago gasi gu thumisa makhodzelo ya vandriyathu gasi gu gira mithumo nya yikhongolo. (1 Thim. 1:17; 6:15; leri Mavingu 22:29.) Ethu ha gu vbweta gu thumisa makodzelo yathu gasi gu rungudza Jehovha, nasiri ethu vamune. — Joh. 8:54.

8. U ngati kharini makhalelo nyo khaguri u yedego gu ma haguleya?

⁸ Dzi vegeye misuwo nya gu kongome. Makhalelo muni hi nga ma hevbuleyago? Wudzisa madhota ya libandlani gwago adzina saye muweneleyi nya gipandre gu khuwe khu yavbini makhalelo va ma dundrugeyago gu khuwe u yede gu ma haguleya. Khu giyeyedzo, va gu tshuka va gu embeya gu khavo u yede gu tshukwadzisa maganelelo ni ma hevbudzelo yago, va lombe giphaso gasi u wona avba u yedego gu tshukwadzisa maganelelo yago. Khavbovbo, dzi garadze gasi u tshukwadzisa. U nga gira kharini isoso?

9. U nga dzi garadzeya kharini gu khala muhevbudzi nya wadi?

⁹ Dzi garadzeye gasi gu vboheya misuwo yago. Nga dundrugeya na wu gu vbweta gu khala muhevbudzi nya wadi. U nga hevbula broxura Tshukwadzisa malerelo ni mahevbudzelo yago. Tepo u ningwago gipandre avbo nya mitshangano ya vbakari nya semana, u nga lomba ndriyathu a vidzidwego gasi a engiseya gipandre gyago a bwe a gu ninga mawonelo nya esi u yedego gu tshukwadzisa. Dongiseya gwadi gipandre gyago na yi ngo romo tepo gasi vathu va si kodza gu wona gu dzi garadza gwago ni gu tumbega gwago. — Mav. 21:5; 2 Kor. 8:22.

10. Ginani hi nga girago ha gu vbweta gu hevbuleya thumo hi wu vbwetago? Ninga giyeyedzo.

¹⁰ Ginani u nga girago wa gu ba u vbweta gu hevbuleya thumo nyo khaguri wu garadzago gu wu gira? U nga vbeyi tshivba. Ndriyathu moyo nya mwama nyo pwani khu Garry kha nga ba a kodza gu leri gwadi. Uye a gu dundrugeya khedzi  a pwidego khidzo dzitshoni tepo a zamidego gu leri khu lito nyo khugege mitshanganoni nya libandla. Ganiolu, uye a di simama gu tshukwadzisa. Uye olu o ganeya gu khuye khu kotani nya trenamento a ningidwego a ngu si kodza gu vega dziganelo Salawuni nya Mufumo, mitshanganoni nya gipandre ni omu nya dzikongresu.

11. Gu fana ni Thimoti, ginani gi na hi phasago gasi hi si kodza gu gira nya singi thumoni ga Jehovha?

¹¹ Ina Thimoti khade muvegi nya wadi nya dziganelo mwendro muhevbudzi nyo hlamadzise? Bhibhiliya kha yi ganeyi. Ganiolu, Thimoti khu lisine giride gwadi thumo waye kholu a di gu landrisa wusingalagadzi wa Pawulo. (2 Thim. 3:10) Khu ndziya nyo fane, ha gu hevbuleya mithumo hi na si kodza gu gira nya singi thumoni ga Jehovha.

12. Vandriyathu va gu hi phasa khu dzindziya muni, nigu ha gu wuyedwa kharini khu isoso?

¹² Hatshavbo hi ngu wuyedwa khu giphaso gya vambe. Tepo hi wusedwago ospitali, hi ngu bonga ngudzu tepo hi hakhago madhota ma thumago avba nya Kometi yi bhudzisanago ni dziospitali (Colihs) mwendro mitsawa yi wuseyago vadwali. Tepo hi tshanganago ni gigaradzo womini gwathu, hi ngu bonga tepo lidhota li dzi ningago tepo nya gute hi engiseye li bwe li hi thaveleya. Tepo si lombago gu hi phasa gihevbuli gyathu nya Bhibhiliya, hi ngu tsaka tepo piyonero a vidzidwego a dzi ningedzago guya gimbidzisa ni ethu gihevbulo nya Bhibhiliya a bwe a ninga mawonelo. Vatshavbo vandriyathu va ngu tsaka khu gu hi phasa. Hi nga yeyedza gu khethu hi ngu tsaka khu giphaso gyogyo khu gu hi phasa vandriyathu. Jesu ganede gu khuye: “Kategide ngudzu oyu a ningago guvbindra oyu a hakhago.” (Mith. 20:35) Wa gu ba u vbweta gu gireya nya singi Jehovha khu dzindziya dzedzi mwendro dzimbe, ginani gi nga gu phasago gu gira isoso?

13. Tepo hi dzi vegeyago misuwo ginani hi yedego gu dundrugeya khigyo?

¹³ U nga digi gu dzi vegeya misuwo nya gu kongome. Khu giyeyedzo, adzina u nga pimisa gu khuwe: ‘Nyi di gu dogoreya gu gira nya singi libandlani.’ Ganiolu, adzina si nga gu garadzeya guti edzi u nga yi vboheyago khidzo misuwo yoyo, nigu adzina u nga pimisa gu khuwe kha si kodzegi guti gu khuwe lini u na si kodzago gu yi vboheya. Khu kharato, hatha misuwo nya gu kongome. Nigu u nga lova misuwo u vbwetago gu yi vboheya ni edzi u vbwetago gu yi vboheya khidzo.

14. Khu ginani hi si yeligo gu hweya gu tadzisa misuwo yathu?

 ¹⁴ Kha hi yeli gu hweya gu tadzisa misuwo yathu. Khu ginani? Kholu siemo sathu si ngu vbindrugedza. Khu giyeyedzo, Mupostoli Pawulo a di gu phaside avbo nya gu wumbe libandla nya liphya dhoropani ga Tesalonika nigu a diri ni misuwo nya gu simame eyi a bwe a phasa Makristo yale nya maphya. Ganiolu vawugeyi, va di gurumedza Pawulo gu duga khu dhoropani mule. (Mith. 17:1-5, 10) Nari khatshi Pawulo a di simamide eyi, uye na vegide mhangoni womi wa vandriyaye. Ganiolu, Pawulo kha diga gu zama gu va phasa. Wulangani nya isoso, a di dzi pwananisa ni giemo nya giphya. Khu hwane, uye rumede Thimoti gasi guya phasa Makristo nya maphya eyi Tesalonika gasi ma manega ni gukhodwa nya gu tiye. (1 Tes. 3:1-3) Vatesalonika, khu lisine va tsakide ngudzu khu kotani nya olu Thimoti a nga dzumeya gu hongola eyi a nga ba a vbwetega!

15. Misuwo yathu yi nga vbindrugedza tepo siemo sathu si vbindrugedzago khu ndziya muni? Ninga giyeyedzo.

¹⁵ Hi nga hevbula nya singi khu matshango ya Pawulo ya Tesalonika. Ethu adzina hi nga dzi vegeya misuwo, ganiolu siemo sathu adzina si nga vbindrugedza hi bwe hi tandrega gu yi vboheya. (Muh. 9:11) Abari gu khiso si gu giregeyago, vega gupima avba nya misuwo u kodzago gu yi vboheya. Khiso si giridwego khu patwa moyo, Ted ni Hiedi. Khu kotani nya madwali, si lombide gu va duga khu Bheteli. Ganiolu, lihaladzo lavo khu Jehovha li va kutside gu vbwetedzeya dzimbe dzindziya nya gu andrise thumo wawe nyo tshumayele. Gu pheya, avo va di thuma kha nga vapiyonero nya tepo yatshavbo, khu gu gimbiya nya tepo avo va di thuma kha nga vapiyonero nya gu hathege nigu Ted a di trenarwi gasi gu tshikedza muwoneleyi nya gipandre. Khu kharato, sileletelo si nga ba si ganeya khu myaga eyi muthu nyo khaguri a nga ba a yede gu thuma kha nga muwoneleyi nya gipandre si di vbindrugedza. Ted ni Hiedi va wonide gu khavo khu kotani nya tanga, kha va na nga si kodza gu gira thumo wawe. Ambari olu va nga ba va swihade, avo va pwisiside gu khavo va nga thumeya Jehovha khu dzimbe dzindziya. Ted wari khuye: “Ethu hi hevbude gu khethu hi nga thumeya Jehovha khu dzindziya nya gu hambanehambane.”

16. Ginani hi nga gi hevbulago umo ga Vagalatiya 6:4?

¹⁶ Kha hi na nga si kodza gu woneleya satshavbo si giregago womini gwathu. Khu kharato, khya lisima gu mba pimisa gu khethu Jehovha a gu hi wona na hiri ni lisima basi khu mithumo hi yi girago, nigu kha hi yeli gu dzi fananisa ni ava va gu na ni mithumo eyi ethu hi gu mwalo nayo. Hiedi a gu tshamuseya gu khuye: “Kha hi na nga tsaka ha gu fananisa womi wathu ni owu wa vambe.” (Leri Vagalatiya 6:4.) Khya lisima  gu vbwetedzeya dzimbe dzindziya nya gu phase vambe ni gu thumeya Jehovha. *

17. Ginani u yedego gu gira gasi u ninganedwa khu gu mana malungelo?

¹⁷ Sa gu kodzega, u nga gira nya singi thumoni ga Jehovha. Gira isoso khu gu vbevbugisa womi wago ni gu potsa mangava. U nga dzi vegeya misuwo u vbwetago gu yi vboheya khu tepo nyo laphe. Khu giyeyedzo, adzina u na ni misuwo nya gu thume kha nga piyonero nya tepo yatshavbo. Gasi u gira isoso, u nga pheya khu gu thuma kha nga piyonero nya gu phasedzeye nya mba ema. Abari gu u na ni misuwo nya thume kha nga muphasedzeyi nya libandla, u nga thuma ngudzu thumoni nyo tshumayele, u wuseya vandriyathu va dwalago ni gu wuseya vandriyathu va dandridego khu tanga va libandlani gwago. Esi u girago olu si na gu gira u ninganedwa khu gu mana mambe malungelo mindru wa tshigu. Dzi emiseye gu gira gwadi mithumo u ningwago olu. — Rom. 12:11.

18. Kha nga si yeyedzwago avba nya fotu, ginani hi gi hevbulago khu giyeyedzo gya Beverley?

¹⁸ Ambari na hi gu dandride khu tanga, hi nga si kodza gu dzi vegeya ni gu tadzisa misuwo yathu ya liphuvboni. Wona giyeyedzo gya ndriyathu moyo a dandridego khu tanga a gu na ni 75 myaga nyo pwani khu Beverley. Uye a diri ni gigaradzo nya madwali gi nga ba gi mu gira a si kodzi gu gimbiya. Uye a di gu vbweta gu seketeya lidima nya gu raneye vathu Gidundrugisotunu. Khu kharato, uye a di dzi vegeya misuwo nya gu kongome. Tepo Beverley a nga vboheya misuwo yaye, uye a tsakide ngudzu. Gu dzi garadza gwaye gu kutside vambe gu gira nya singi thumoni nyo tshumayele. Jehovha a ngu ninga lisima thumo wu girwago khu vandriyathu va dandridego khu tanga, ambari siemo sawe sa gu mba va vbevbugeya gu gira isoso. — Ndzi. 71:17, 18.

19. Ginani hi nga girago gasi gu dzi vegeya misuwo ya liphuvboni?

¹⁹ Dzi vegeye misuwo u na yi kodzago gu yi vboheya. Haguleya makhalelo ma na gu girago u tsakedwa khu Jehovha. Hevbuleya mithumo yi na gu girago u gireya nya singi Nungungulu wathu ni hengeledzano yaye. Vbwetedzeya dzindziya nya gu phase vandriyago. * Gu fana ni Thimoti, khu gu kategiswa khu Jehovha vatshavbo va na wona “mihandro nya gu dzi garadze gwago.” — 1 Thim. 4:15.