1. Nimbaakani nzi zyakumuuya nzyotukonzya kulibikkila?

 MBOTULI Banakristo bakasimpe, tulamuyanda kapati Jehova. Tuyanda kumubelekela kusikila mpotugolela. Pele kutegwa tumucitile zyoonse nzyotukonzya, tweelede kulibikkila mbaakani zyakumuuya, mbuli kuba abube bwa Bunakristo, kwiiya milimo iigwasya, alimwi akujana nzila zyakugwasya bamwi.

2. Nkaambo nzi ncotweelede kulibikkila mbaakani zyakumuuya alimwi akubeleka canguzu kuzizuzikizya?

² Nkaambo nzi ncotweelede kukukkomanina kuyaambele kumuuya? Nkaambo tuyanda kukkomanisya Taateesu wakujulu siluyando. Jehova ulakkomana ciindi natubona katubelesya zipego alimwi abusongo bwesu mumulimo wakwe. Kuyungizya waawo, tuyanda kuyaambele kumuuya kutegwa tubagwasye kapati bakwesu abacizyi. (1Tes. 4:9, 10) Tacikwe makani abulamfwu bwaciindi ncitwakkala mukasimpe, toonse tulakonzya kuyaambele kumuuya. Lino atulange-lange mbotukonzya kucita boobo.

3. Kweelana a 1 Timoteyo 4:12-16, ncinzi mwaapostolo Paulo ncaakakulwaizya Timoteyo kucita?

³ Ciindi mwaapostolo Paulo naakalembela Timoteyo lugwalo lwakusaanguna, ooyu mwaalumi uucili mwana-mwana wakali kale mwaalu uusimide. Nokuba boobo, Paulo wakamukulwaizya kuzumanana kuyaambele kumuuya. (Amubale 1 Timoteyo 4:12-16.) Ciindi nomuyeeya majwi aa Paulo, mulakonzya kuzyiba kuti Timoteyo wakali kuyanda kuyaambele  munzila zyobilo: kuba abube bwa Bunakristo mbuli luyando, lusyomo, bukkale busalala alimwi akuzumanana kulitakata kubala kubuleya akuyiisya. Katuciciyeeyede cikozyanyo ca Timoteyo, atubone kulibikkila mbaakani nzyotukonzya kuzuzikizya mbokukonzya kutugwasya kuyaambele kumuuya. Alimwi tulalanga-langa nzila zikonzya kutugwasya kuyungizya mulimo wesu.

4. Kweelana a Bafilipi 2:19-22, ncinzi cakapa Timoteyo kuti abelesyegwe kapati a Jehova?

⁴ Ncinzi cakapa kuti Timoteyo abelesyegwe kapati a Jehova? Mbube bwa Bunakristo mbwaakajisi. (Amubale Bafilipi 2:19-22.) Kweelana ambwaakamupandulula Paulo, tulakonzya kubona kuti Timoteyo wakali kulicesya, kusyomeka, munkutwe, alimwi wakali kusyomwa. Wakajisi luyando alimwi wakali kubabikkila maano kapati bakwesu. Akaambo kaceeci, Paulo wakamuyanda Timoteyo alimwi kunyina naakawaya-waya kumupa mikuli mipati-pati. (1Kor. 4:17) Mbubwenya buyo, kuti twaba abube mbwayanda, Jehova uyootuyanda alimwi tuyoobelesyegwa kapati mumbungano.—Int. 25:9; 138:6.

5. (a) Mbuti mbomukonzya kulibikkila mbaakani yakuba abube bwa Bunakristo? (b) Kweelana ambokutondezyedwe mucifwanikiso, mbuti mucizyi uucili mwana-mwana mbwazuzikizya mbaakani yakwe yakuba alweetelelo kuli bamwi?

⁵ Amulibikkile mbaakani iigaminide. Amupaile alimwi akubona bube mbomuyanda ikutondezya kapati. Amusale bube bugaminide mbomuyanda kubikkila maano. Mucikozyanyo, sena muyanda kutondezya lweetelelo kwiinda mbomucita lino naa muyanda kuba aluyandisisyo kapati lwakugwasya bakombinyoko? Sena muyanda kuba basiluumuno naa bantu balekelela kapati? Mulakonzya kugwasyigwa kwiinda mukubuzya mulongwe uusyomeka kuti amwaambile mbomukonzya kubutondezya kapati bube oobo.—Tus. 27:6.

6. Mbuti mbomukonzya kuzuzikizya mbaakani yakuba abube bumwi?

⁶ Amubeleke canguzu kuzuzikizya mbaakani yanu. Mbuti mbomukonzya kucita oobo? Nzila imwi nkwiinda mukubala cakulomya kujatikizya bube mbomuyanda kutondezya kapati. Atwaambe kuti muyanda kuyungizya bube bwakulekelela bamwi. Mulakonzya kutalika kubala akuzinzibala kuyeeya zikozyanyo zyamu Bbaibbele izyabaabo bakalekelela bamwi kuzwa ansi amoyo alimwi abaabo  ibatakacita oobo. Amubone cikozyanyo ca Jesu. Wakalyaaba kulekelela bamwi. (Lk. 7:47, 48) Kunyina naakabikkila maano kukulubizya kwabo, pele wakabikkila maano kuzintu zibotu nzyobakali kukonzya kucita. Mukwiimpana, ba Farisi bamumazuba aa Jesu “bakali kubona bamwi kuti mbabuyo.” (Lk. 18:9) Mwamana kuzinzibala kuyeeya zikozyanyo eezyi, amulibuzye kuti: ‘Ncinzi ncondibona muli bamwi? Mbube nzi mbobajisi mbondisala kubikkila maano?’ Kuti naa cilamuyumina kulekelela muntu umwi, amulembe bube bubotu boonse mbwajisi muntu ooyo. Mwamana amulibuzye kuti: ‘Ino Jesu umubona buti muntu ooyu? Sena inga wamulekelela?’ Kuti twacita oobu, cilakonzya kutugwasya kucinca mbotuyeeya. Kumatalikilo, ambweni inga twayandika kubeleka canguzu kutegwa tumulekelele muntu wakatulubizyila. Pele kuti twazumanana kusololekesya, ciyootubila kulekelela.

7. Kweelana a Tusimpi 22:29, muunzila nzi Jehova mwabelesya babelesi bacibwene mazuba aano?

⁷ Mbaakani imwi njomukonzya kulibikkila, nkwiiya milimo iigwasya. Amuyeeye buyo mweelwe wababelesi uuyandika kuti bayake mitabi, Maanda Aakucitila Miswaangano Mipati, a Maanda aa Bwami. Bunji bwababelesi aaba balajana luzyibo kwiinda mukubeleka abakwesu bajisi luzyibo mumilimo imwi. Kweelana ambokutondezyedwe mucifwanikiso, bakwesu abacizyi aaba balaiya milimo iiyandika kutegwa bagwasyilizye mukubambulula Maanda Aakucitila Miswaangano Mipati alimwi a Maanda aa Bwami. Munzila eezyi azimwi, Jehova Leza “Mwami walyoonse alyoonse,” alimwi a Kristo Jesu, ‘Mwami wabami,’ bali mukucita zintu zipati-pati kwiinda mukubelesya babelesi bacibwene. (1Tim. 1:17; 6:15; amubale Tusimpi 22:29.) Tuyanda kubeleka canguzu alimwi akubelesya luzyibo lwesu kutembaula Jehova, kutali kulijanina mpuwo.—Joh. 8:54.

8. Mbuti mbomukonzya kulibikkila mbaakani yakuba aluzyibo mumbazu imwi?

⁸ Amulibikkile mbaakani iigaminide. Nimbazu nzi momuyanda kuyungizya luzyibo? Amubabuzye baalu bambungano alimwi ambweni amulangizi wanu wabbazu kutegwa bamwaambile mbazu momukonzya kuyungizya luzyibo. Mucikozyanyo, kuti kamuyanda kuyungizya luzyibo mukwaambaula alimwi akuyiisya kabotu, amubalombe kuti bamwaambile bube bugaminide mbomweelede kubelekela mpawo. Mwamana amubweze ntaamu zigwasya kutegwa muyaambele. Mbuti mbomukonzya kucita boobo?

9. Mbuti mbomukonzya kubeleka canguzu kutegwa muzuzikizye mbaakani yanu yakuba aluzyibo?

⁹ Amubeleke canguzu kutegwa muzuzikizye mbaakani yanu. Atwaambe kuti muyanda kuba mwiiyi uucibwene. Cakulomya mulakonzya kubala broshuwa yakuti Amusungwaale Kubala Alimwi Akuyiisya. Ciindi nomwapegwa makani kumuswaangano wamukati kansondo, mulakonzya kulomba mukwesu weelela kuti aaswiilile makani aanu kamutanaapa kumbungano kutegwa amugwasye kubona mpomweelede kubelekela. Kuyungizya waawo, amube basungu, ikutali buyo kuba aluzyibo.—Tus. 21:5; 2Kor. 8:22.

10. Amupe cikozyanyo citondezya mbotukonzya kuyungizya luzyibo mumbazu imwi.

¹⁰ Ino kuti muyanda kuyungizya luzyibo mukucita cintu cimwi cimukatazya? Mutatyompwi pe! Mukwesu Garry tanaakacizyi kubala kabotu. Ulayeeya mbocakali kujazya nsoni kasola kubala mubuleya lyamiswaangano yambungano. Pele wakazumanana kusolekesya. Lino waamba kuti, akaambo kalwiiyo ndwaakatambula,  ulacikonzya kupa makani mumaanda aa Bwami, mumiswaangano yabbazu ayacooko.

11. Mbubwenya mbuli Timoteyo, ncinzi ciyootugwasya kutegwa tucite zinji mumulimo wa Jehova?

¹¹ Sena Timoteyo wakaba mwaambi naa mwiiyi uucibwene? Bbaibbele talyaambi pe. Pele tacidoonekwi buya kuti Timoteyo wakazwidilila mumulimo wakwe akaambo kakutobela lulayo lwa Paulo. (2Tim. 3:10) Mbubwenya buyo, kuti twayungizya luzyibo tuyoocita zinji mumulimo wa Jehova.

12. Ino mwagwasyigwa buti amilimo yabamwi?

¹² Toonse tulagwasyigwa kumilimo njobabeleka bamwi. Ciindi notuli mucibbadela, tulakkomana kuswaigwa abaalu babelekela muma Kkomitii aa Hospital Liaison naa Mutubunga Tuswaya Balwazi. Notuli mumapenzi, tulakkomana ciindi mwaalu uubikkila maano naajana ciindi cakutuswiilila alimwi akutuumbulizya. Ciindi notuyanda lugwasyo lwakusololela ciiyo ca Bbaibbele, tulakkomana kuti mupainiya wazumina kubeleka andiswe akutupa mizeezo iigwasya. Bakwesu abacizyi boonse aaba balakkomana kutugwasya. Aboobo andiswe tulakonzya kukkomana kuti twalyaaba kubelekela bakwesu. Jesu wakaamba kuti: “Kupa kulakkomanisya kapati kwiinda kupegwa.” (Mil. 20:35) Kuti kamuyanda kuyungizya mulimo wanu munzila eeyi naa zimbi buyo, ncinzi cikonzya kumugwasya kwiizuzikizya mbaakani eeyo?

13. Ciindi nomulibikkila mbaakani, ncinzi ncomweelede kuyeeya?

¹³ Amulibikkile mbaakani iigaminide. Mucikozyanyo, mulakonzya kuyeeya kuti, ‘Ndiyanda kubeleka milimo minji mumbungano.’ Pele cilakonzya kumuyumina kwiizuzikizya mbaakani eeyo, alimwi inga camwaalila kuzyiba naa mwaizuzikizya. Aboobo amulibikkkile mbaakani iigaminide. Mulakonzya kwiilemba buya mbaakani eeyo, kubona mbomukonzya kwiizuzikizya alimwi acikonzya kumugwasya kwiizuzikizya.

14. Nkaambo nzi ncotweelede kunyoneka ciindi notulibikkila mbaakani?

¹⁴ Kuyungizya waawo, tweelede kunyoneka notulibikkila mbaakani. Nkaambo nzi? Nkaambo kakuti bukkale bulakonzya kucinca mukuya kwaciindi. Mucikozyanyo: Mwaapostolo Paulo wakagwasyilizya kupanga mbungano mpya mudolopo lya Tesalonika. Alimwi  tacidoonekwi buya kuti wakajisi mbaakani yakukkala ookuya kutegwa agwasye Banakristo aaba bapya. Pele basikukazya bakamutanda mudolopo. (Mil. 17:1-5, 10) Ikuti Paulo naakakkala, naakabikka buumi bwabakwesu muntenda. Nokuba boobo, Paulo tanaakatyompwa pe. Muciindi caboobo, wakakuzumina kucinca ooku. Kumbele, wakatuma Timoteyo ku Tesalonika kuyoolanganya nzyobakali kuyandika kumuuya basyominyina bapya. (1Tes. 3:1-3) Kweelede kuti bana Tesalonika bakakkomana kapati kubona Timoteyo mbwaakalyaabide kubeleka kufwumbwa nokwakali kuyandika.

15. Mbuti mbaakani zyesu mbozikonzya kucinca ciindi bukkale bwesu nobwacinca? Amupe cikozyanyo.

¹⁵ Tulakonzya kwiiya kuzintu izyakamucitikila Paulo ku Tesalonika. Inga twalibikkila mbaakani mumulimo wesu, pele bukkale bulakonzya kucinca akupa kuti twaalilwe kwiizuzikizya. (Muk. 9:11) Kuti kamuli mubukkale buli boobu, amulibikkile mbaakani iimbi njomukonzya kuzuzikizya. Eeci ncobakacita banabukwetene ba Ted aba Hiedi. Akaambo kakuciswa, bakazwa a Beteli. Pele mbwaanga bakali kumuyanda Jehova, bakajana nzila zimwi zyakuyungizya mulimo wabo. Yakusaanguna, bakatalika bupainiya bwaciindi coonse. Mukuya kwaciindi bakasalwa kuba bapainiya baalubazu, kumane ba Ted bakayiisyigwa mulimo wamubbazu. Mpoonya kwakaba kucinca kujatikizya myaka mulangizi wabbazu nayelede kuleka kuba mulangizi wabbazu. Ba Ted aba Hiedi bakazyiba kuti tiibakacili kweelela mumulimo ooyu. Nokuba kuti bakatyompwa, bakalizyi kuti balakonzya kumubelekela Jehova mumbazu zimwi. Ba Ted bakaamba kuti, “Twakaiya kuti tatweelede kubikkila buyo maano kumusyobo wamulimo omwe.”

16. Ncinzi ncotukonzya kwiiya ku Bagalatiya 6:4?

¹⁶ Tatukonzyi kuzyiba zikonzya kutucitikila mubuumi. Aboobo tatweelede kuyeeya kuti tulayandika kuli Jehova akaambo buyo kamikuli njotujisi naa kweezyanisya mikuli njotujisi kumikuli njobajisi bamwi. Ba Hiedi bakaamba kuti, “Muyakuusa kuti kamulyeezyanisya abamwi.” (Amubale Bagalatiya 6:4.) Cilayandika kujana nzila mbotukonzya kubelekela Jehova akugwasya bamwi. *

17. Ncinzi ncomukonzya kucita kutegwa mweelele kupegwa mikuli?

¹⁷ Ciyoomuubila kucita zinji mumulimo wa Jehova ikuti mwaubyaubya buumi bwanu alimwi akutaba azikwelete zitayandiki. Amulibikkile mbaakani zisyoonto-syoonto iziyoomugwasya kuzuzikizya mbaakani zipati-pati.  Mucikozyanyo, kuti naa makanze aanu ngakuba mupainiya waciindi coonse, mulakonzya kubeleka bupainiya bwakugwasyilizya buzumanana. Ikuti makanze aanu ngakuba mukutausi, mulakonzya kutola ciindi cinji mumulimo wamumuunda alimwi akuswaya baciswa abacembeede mumbungano yanu. Luzyibo ndomuyoojana lulakonzya kujalula nzila zyakupegwa mikuli iimbi kumbele. Amube amakanze aakubeleka canguzu mumulimo uuli woonse ngomupedwe.—Rom. 12:11.

18. Kweelana acifwanikiso, ncinzi ncotwiiya kucikozyanyo camucizyi Beverley?

¹⁸ Nobaba bacembeede balakonzya kulibikkila mbaakani zyakumuuya akuzizuzikizya. Amubone cikozyanyo camucizyi Beverley uujisi myaka iili 75. Wakajisi bulwazi bupati ibwakali kumupa kuteenda. Pele wakajisi luyandisisyo lwakutola lubazu mumulimo wakutamba bantu ku Ciibalusyo. Aboobo wakalibikkila mbaakani zigaminide. Ciindi naakazizukizya mbaakani eezyo, wakakkomana kapati. Kusolekesya kwakwe kwakabakulwaizya bamwi kucita zinji mumulimo wa Jehova. Jehova ulaukkomanina mulimo ngobabeleka bakwesu abacizyi bacembeede, nokuba kuti bukkale bwabo tabubazumizyi kucita zyoonse nzyobayanda.—Int. 71:17, 18.

19. Nimbaakani nzi zimwi zyakumuuya nzyotukonzya kulibikkila?

¹⁹ Amulibikkile mbaakani nzyomukonzya kuzuzikizya. Amube abube buyoomupa kuyandwa a Jehova. Amwiiye milimo iigwasya, yalo iiyoomupa kubelesyegwa kapati a Leza alimwi ambunga yakwe. Amujane nzila mbomukonzya kubelekela bakwesu abacizyi cakumaninina. * Mbubwenya mbuli Timoteyo, kwiinda mukulongezyegwa a Jehova, ‘kuyaambele kwanu kuyoobonwa abantu boonse.’—1Tim. 4:15.