1. ¿Tuku kililakkaxwilitkan xlakata kintakanajlakan?

 XAXLIKANA kstalaninanin Cristo lu paxkiyaw Jehová chu tlakg tlan la skujnaniputunaw. Pero xlakata namakgantaxtiyaw kililakkaxwilitkan tuku lakgchamputunaw xlakata kintakanajlakan, la nakgalhiyaw tayat nema xlikgalhitkan kstalaninanin Cristo, wi tuku nakatsiniyaw tlawayaw chu nalakputsayaw la nakamakgtayayaw amakgapitsin. b

2. ¿Tuku xlakata wi tuku nalakkaxwiliyaw xlakata kintakanajlakan chu naliskujaw nalakgchanaw?

² ¿Tuku xlakata wi tuku nalakkaxwiliyaw xlakata kintakanajlakan chu naliskujaw nalakgchanaw? Xlakata makgapaxuwaputunaw xapaxkina kinTlatkan, Jehová. Xla paxuwa pi kamaklakaskiw putum tuku katsiniyaw tlawayaw xlakata naskujnaniyaw. Nachuna, chuntiya liskujputunaw tlakg tlan kstalaninanin Cristo nalitaxtuyaw xlakata tlan nakamakgtayayaw amakgapitsi natalan (1 Tes. 4:9, 10). Maski makgasa o nina makgas la skujnaniyaw Jehová, kimputumkan chuntiya talakaskin namastakayaw kintakanajlakan. Kaʼakxilhwi la natlawayaw.

3. ¿Tuku tastakyaw maxkilh Pablo Timoteo? (1 Timoteo 4:12-16).

³ Timoteo kgawasaku xwanit akxni Pablo tsokgnanilh xapulana carta nema lin xtukuwani, pero xlina kilhtamaku la kgolotsin xlitaxtu kcongregación. Maski chuna, Pablo makgpuwantinilh chuntiya naliskuja namatliwakglha xtakanajla (kalikgalhtawakga 1 Timoteo 4:12-16). Komo kuenta natlawayaw xtachuwin Pablo, naʼakxilhaw pi makgpuwantinilh  Timoteo pulaktiy tuku naliskuja. Pulaktum, xkgalhilh tayat nema xlikgalhitkan kstalaninanin Cristo, la tapaxkit, takanajla chu nitu nalixkajwankan. Chu xlipulaktiy, makgpuwantinilh tlakg tlan xkgalhtawakgalh kxlakatinkan lhuwa latamanin, kstakyawanalh chu xmasiyalh. Kʼuma artículo, nalichuwinanaw xliʼakxilhtit Timoteo chu naʼakxilhaw pi komo nalakkaxwiliyaw tuku nalakgchamputunaw kinkamakgtayayan chuntiya nastaka kintakanajlakan. Na naʼakxilhaw makgapitsi tuku tlan natlawayaw xlakata tlakg naskujnaniyaw Jehová.

4. Chuna la wan Filipenses 2:19-22, ¿tuku xlakata Jehová lu maklakaskilh Timoteo?

⁴ ¿Tuku xlakata Jehová maklakaskilh Timoteo? Xlakata xkgalhi laktlan tayat (kalikgalhtawakga Filipenses 2:19-22). Xlakata tuku Pablo wa xpalakata Timoteo, akxilhaw pi xtaktuju, ni xmakgxtakgnan, xaskujni xwanit chu tlan xlipawankan. Tlan xkalikatsini natalan chu xkalilakgaputsa. Wa xlakata, Pablo lu xpaxki chu lakgayawalh laktuwa taskujut (1 Cor. 4:17). Komo akinin nakgalhiyaw tayat nema lakgati Jehová, xla nakinkapaxkiyan, chu tlakg nakinkamaklakaskinan kcongregación (Sal 25:9; 138:6).

5. 1) ¿La nakatsiyaw tuku tayat tlakg talakaskin naliskujaw? 2) ¿Tuku tlawa tala tsumat tiku tasiya kdibujo xlakata nalimasiya pi kaʼakgatekgsni amakgapitsin tuku makgkatsikgo?

⁵ Kalakkaxwiliw nakgalhiputunaw akgtum tlan tayat. Katlawaniw oración Jehová xlakata nakinkamakgtayayan nakatsiyaw tuku tayat tlakg talakaskin naliskujaw. Kalaksakwi pulaktum chu wa kaliskujwi. ¿Talakaskin tlakg nalimasiyayaw pi kaʼakgatekgsniyaw tuku makgkatsikgo amakgapitsin o tlakg nakamakgtayaputunaw? ¿Talakaskin ni lakapala nasitsiyaw o talakaskin tlakg nakatapatiyaw amakgapitsin? Komo ni liwana katsiyaw, kakgalhskiw chatum amigo tiku lipawanaw xlakata nakinkawaniyan la kinkaʼakxilhan (Prov. 27:6).

6. ¿Tuku militlawat xlakata nakgalhiya tlan tayat?

⁶ Kaliskujwi nalakgchanaw tuku lakkaxwilinitaw. ¿La natlawayaw? Kaputsaw tuku nakinkamakgtayayan xlakata nakgalhiyaw tayat nema lakaskinaw. Akgtum liʼakxilhtit, kalilakpuwaw pi naʼakxilhaw pi tlakg kilitapatinatkan. Nakinkamakgtayayan komo nalikgalhtawakgayaw tiku kalichuwinankan kBiblia tiku xatapaxuwan katapatikgolh  amakgapitsi latamanin chu amakgapitsi tiku ni tapatinankgolh, chu nalilakpuwanaw tuku tlawakgolh. Kalilakpuwaw Jesús. Xla xatapaxuwan katapatilh latamanin (Luc. 7:47, 48). Ni wa x’akxilha tuku nitlan xtlawakgo, wata wa tuku tlan xtlawakgo. Pero fariseos «nitu xkaliʼakxilhkgo amakgapitsin» (Luc. 18:9). Akxni kalilakpuwanitaw nawan umakgolh liʼakxilhtit, kalilakpuwaw umakgolh takgalhskinin: ¿Tuku atanu tlan natlawayaw? Max tlan nalilakpuwanaw umakgolh takgalhskinin: «¿La kkaʼakxilha amakgapitsin? ¿Tuku xtayatkan kkuenta ktlawa?». Komo tuwa makgkatsiyaw wi tiku natapatiyaw, katlawaw akgtum lista chu katsokgwiliw laktlan xtayat nema kgalhi, chu kalilakpuwaw umakgolh takgalhskinin: «¿La akxilha Jesús? ¿Xtapatilh?». Komo chuna natlawayaw nakinkamakgtayayan nalakgpaliyaw la lakpuwanaw. Max xapulana tuwa namakgkatsiyaw natapatiyaw tiku kinkatlawanin tuku nitlan. Pero, komo naliskujaw, tlakg ni tuwa katimakgkatsiw natapatinanaw.

7. ¿La kamaklakaskin Jehová la uku tiku wi tuku katsinikgo tlawakgo? (Proverbios 22:29).

⁷ Atanu tuku na tlan nalakkaxwiliyaw nalakgchanaw wa wi tuku nakatsiniyaw tlawayaw. Akgtum liʼakxilhtit, kakalilakpuwanti putum natalan tiku makgtayanankgo niku tlawakan xalaksasti sucursales, Salones de Asambleas chu Pukgalhtawakga. Lhuwa umakgolh natalan katsinikgolh tuku tlawakgo xlakata akxtum kataskujkgolh tiku lhuwa tuku xkatsinikgo. Chuna la tasiya kdibujo, lakchixkuwin chu lakpuskatin katsinimakgolh tuku xlitatlawat xlakata nakaxtlawakan Salones de Asambleas chu Pukgalhtawakga. Chuna la uma chu atanu Jehová, «tiku putum kilhtamaku Mapakgsina», chu Jesús, «xMapakgsinakan mapakgsinanin», kalimaklakaskinkgo umakgolh latamanin xlakata wi tuku natlawakgo (1 Tim. 1:17; 6:15; kalikgalhtawakga Proverbios 22:29). Lu skujputunaw chu maklakaskimputunaw tuku katsiniyaw xlakata namalankiyaw Jehová, chu ni akinin (Juan 8:54).

8. ¿Tuku nakinkamakgtayayan nalaksakaw tuku nakatsiniyaw?

⁸ Kalakkaxwiliw wi tuku nakatsiniyaw. ¿Tuku tlan xkatsiniw? Kakatachuwinaw lakgkgolotsin xalak congregación o superintendente de circuito xlakata nakinkawanikgoyan tuku tlan natlawayaw. Akgtum liʼakxilhtit, komo nakinkawanikgoyan pi tlakg kakatsiniw la namastayaw akgtum taʼakgchuwin o la namasiyayaw, tlan nakakgalhskinaw tuku talakaskin naliskujaw. Alistalh, katlawaw tuku kinkawanikgon. ¿La natlawayaw?

9. ¿La tlan nalakgchanaw tuku lakkaxwilinitaw?

⁹ Kaliskujwi nalakgchanaw tuku lakkaxwilinitaw. Kalilakpuwaw pi tlakg tlan makgalhtawakgena litaxtupunaw. Tlan nalikgalhtawakgayaw folleto Tlakg tlan kakgalhtawakga chu kamasiya. Chu, akxni nina matitaxtiyaw tuku kinkalakgchanan ktamakxtumit xla itat semana, max tlan nakgalhskinaw chatum tala tiku lu katsini pi kakinkakgaxmatnin chu kakinkawanin tuku tlakg tlan natlawayaw. Komo alisokg nalakkaxwiliyaw tuku kinkalakgchanan, tlakg tlan makgalhtawakgena nalitaxtuyaw chu amakgapitsi naʼakxilhkgo pi tlan nakinkalipawankanan chu pi lu skulujwa akinin (Prov. 21:5; 2 Cor. 8:22).

10. Kalichuwinanti akgtum liʼakxilhtit niku masiya tuku kilitlawatkan xlakata wi tuku nakatsiniyaw tlawayaw.

¹⁰ ¿Chu komo liskujputunaw pulaktum tuku lu tuwa makgkatsiyaw? ¡Ni kataxlajwaniw! Kaʼakxilhwi xliʼakxilhtit chatum tala tiku wanikan Garry, xla lu tuwa xmakgkatsi nakgalhtawakga.  Xla lakapastaka pi lu xmaxanan akxni wi tuku xlikgalhtawakga ktamakxtumit. Pero ni taxlajwanilh; chuntiya liskujli xlakata tlakg tlan natlawa. Xlakata makgtayakgolh amakgapitsi natalan chu likgalhtawakga, la uku xla matitaxti taʼakgchuwin ktamakxtumit, kʼasambleas de circuito chu kʼasambleas regionales.

11. Chuna la Timoteo, ¿tuku nakinkamakgtayayan tlakg lhuwa tuku natlawayaw chuna la skujnaniyaw Jehová?

¹¹ ¿Tlan makgalhtawakgena chu tlan akgchuwina litaxtulh Timoteo? Biblia ni lichuwinan, pero liwana katsiyaw pi xla tlawalh tuku wanilh Pablo. Wa xlakata tsinu tsinu wi tuku katsinilh chu tlan makgantaxtilh tuku xlakgayawakanit (2 Tim. 3:10). Chuna la Timoteo, komo wi tuku nakatsiniyaw tlawayaw, tlakg lhuwa tuku natlawayaw chuna la skujnaniyaw Jehová.

12. ¿La makgtayakgon wix amakgapitsin?

¹² ¡Lu lipaxuwayaw akxni amakgapitsin kinkamakgtayakgoyan! Akgtum liʼakxilhtit, komo tanumaw khospital, lu kinkamakgpuwantiniyan akxni kinkalakgapaxialhnankgoyan natalan xalak Comité de Enlace con los Hospitales o Grupo de Visita a Pacientes. O, akxni titaxtumaw tuku tuwa kkilatamatkan, lu paxtikatsininanaw akxni chatum kgolotsin limaxtu kilhtamaku xlakata nakinkakgaxmatniyan chu nakinkamakgoxamixiyan. Chu, komo maklakaskinaw tamakgtay xlakata namakgalhtawakgenanaw, lu tlan kitaxtu komo kgalhiyaw xtamakgtay chatum precursor tiku tlan nakinkataʼanan akxni makgalhtawakgenanaw chu nakinkawaniyan la tlakg tlan makgalhtawakgena nawanaw. Jesús wa: «Tlakg anan tapaxuwan akxni mastakan nixawa akxni makglhtinankan» (Hech. 20:35). Putum umakgolh natalan kgalhikgo umakgolh tapaxuwan akxni kinkamakgtayakgoyan. Chu akinin na lu napaxuwayaw komo chuna natlawayaw. Komo lakkaxwilinitaw chuna tlakg naskujnaniyaw Jehová o atanu, ¿la tlan nalakgchanaw?

13. Akxni wi tuku nalakkaxwiliyaw, ¿tuku kuenta kilitlawatkan?

¹³ Ni lhuwa tuku kalakkaxwiliw nema nila katimakgantaxtiw. Akgtum liʼakxilhtit, max nalakpuwanaw: «Tlakg kmakgtayanamputun kcongregación». Pero max tuwa namakgkatsiyaw nakatsiyaw tuku natlawayaw chu max tuwa nakatsiyaw komo makgantaxtinitaw o ni. Wa xlakata tlan kitaxtu akxni liwana chu kaj pulaktum tuku laksakkan  nema lakgchamputunkan. Tlan nalhkawiliyaw chu natsokgwiliyaw tuku natlawayaw xlakata namakgantaxtiyaw.

14. ¿Tuku xlakata tlan nalakgpaliyaw tuku lakkaxwilinitaw?

¹⁴ Tlan nalakgpaliyaw tuku lakkaxwilinitaw komo natalakaskin. ¿Tuku xlakata? Xlakata nila lakgpaliyaw putum tuku la kkilatamatkan. Akgtum liʼakxilhtit, apóstol Pablo xmakgtayananit natawila congregación anta kTesalónica, chu max xlakkaxwilinit akglhuwa kilhtamaku anta natawila xlakata nakamakgtaya xalaksasti kstalaninanin Cristo. Pero xtalamakgasitsin tlawakgolh pi Pablo xtaxtulh kʼuma kachikin (Hech. 17:1-5, 10). Komo anta xtitamakgxtakgli, kalipekua xwililh congregación. Pero Pablo ni taxlajwanilh. Wata lismanilh tuku talakgpalilh kxlatamat, chu alistalh anta malakgachalh Timoteo xlakata xkamatliwakglhnilh xtakanajlakan natalan (1 Tes. 3:1-3). Natalan xalak Tesalónica max lu lipaxuwakgolh akxni akxilhkgolh Timoteo pi xatapaxuwan xmakgtayanamputun niku xtalakaskin.

15. ¿La talakgpali tuku lakkaxwilinitaw akxni wi tuku talakgpali kkilatamatkan? Kawili akgtum liʼakxilhtit.

¹⁵ Wi tuku tlan nakatsiniyaw xlakata xliʼakxilhtit Pablo chu tuku lalh kTesalónica. Max wi tuku lakkaxwilinitaw chuna la skujnanimaw Jehová, pero max xalan wi tuku natalakgpali kkilatamatkan chu nialhla chuna natlawayaw (Ecl. 9:11). ¿Tuku natlawayaw? Kalilakpuwaw atanu tuku tlan nalakgchanaw. Wa uma tuku tlawakgolh Ted chu Hiedi. Xlakata tatatlakgolh nialhla makgtayanankgolh kBetel. Pero, xlakata lu xpaxkikgo Jehová, tunkun putsakgolh atanu la naskujnanikgo. Pulana precursores regulares litaxtukgolh, alistalh precursores especiales kalimaxtuka chu Ted masiyanika xlakata superintendente de circuito sustituto xlitaxtulh. Alistalh xkatakan nialh xkamaxki talakaskin superintendente de circuito nalitaxtukgo, Ted chu Hiedi katsikgolh pi nialhla xtlawakgo uma taskujut. Maski xapulana taxlajwanikgolh, xkatsikgo pi atanu la tlan kskujnanikgolh Jehová. Ted wan: «Kkatsininitaw pi ni kaj pulaktum wi tuku tlan naktlawayaw xlakata nakskujnaniyaw Jehová».

16. ¿Tuku kinkamasiyaniyan Gálatas 6:4?

¹⁶ Nila lakgpaliyaw putum tuku la kkilatamatkan. Wa xlakata lu xlakaskinka nalakapastakaw pi tuku xtapalh kinkatlawayan kxlakatin Jehová ni wa tuku lakgayanaw. Na nitu litaxtu kuenta natlawayaw tuku lakgayakgo amakgapitsin chu nema max akinin ni kinkalakgayawakanitan. Hiedi wan: «Komo natamalakxtumiyaw kilatamatkan xlatamatkan amakgapitsin, ni katikgalhiw takaksni» (kalikgalhtawakga Gálatas 6:4). Wa xlakata, tuku tlakg tlan natlawayaw wa chuntiya nalakputsayaw la tlan  naskujnaniyaw Jehová chu nakamakgtayayaw amakgapitsin. c

17. ¿Tuku kilitlawatkan komo tlakg lhuwa tuku lakgatayaputunaw?

¹⁷ Komo ni lhuwa tuku nakgalhiyaw kkilatamatkan chu nitu nalaklinaw, tlan tlakg lhuwa la naskujnaniyaw Jehová. Kalakkaxwiliw tuku nakinkamakgtayayan namakgantaxtiyaw tuku tlakg lanka. Akgtum liʼakxilhtit, komo wix precursor regular litaxtuputuna, ¿tlan pulana precursor auxiliar nalitaxtuya? O, komo siervo ministerial litaxtuputuna, ¿tlan tlakg xlimaxtu kilhtamaku xlakata nalichuwinana Dios chu nakalakgapaxialhnana tiku linkgoya kata chu tiku tatatlakgo xalak congregación? Putum tuku nakatsiniya la uku tlan namakgtayayan wi tuku nalakgatayaya alistalh. Kalakkaxwili tlakg tlan naskujnaniya Jehová (Rom. 12:11).

18. ¿Tuku kinkamasiyaniyan xliʼakxilhtit Beverley? (Na kaʼakxilhti dibujo).

¹⁸ Nikxni kalakpuwaw pi lu linawa kata chu nila tuku lakkaxwiliyaw xlakata kintakanajlakan. Xliʼakxilhtit chatum puskat tiku kgalhi 75 kata nema wanikan Beverley liwana limasiya uma. Xlakata xkgalhi akgtum tajatat, nila liwana xtlawan. Pero lu xmakgtayanamputun kcampaña akxni natalakapastaka akxni tinilh Jesús. ¿Tuku tlawalh? Lakkaxwililh pulaktum tuku tlan xmakgantaxtilh, chu akxni makgantaxtilh lu paxuwalh. Tuku xla tlawalh kamakgpuwantinilh amakgapitsin tlakg naskujnanikgo Jehová. Liwana tasiya pi Jehová lanka xtapalh akxilha tuku tlawakgo natalan tiku linkgoya kata maski nialh lhuwa tuku tlawakgo (Sal. 71:17, 18).

19. ¿Tuku amakgapitsi na tlan nalakkaxwiliyaw nema tlan nalakgchanaw?

¹⁹ Kalakkaxwiliw tuku tlan nalakgchanaw. Kaliskujwi nakgalhiyaw tayat nema makgapaxuwa Jehová. Wi tuku kakatsiniw xlakata Jehová, chu xkachikin tlan nakinkamaklakaskinan. Kalakputsaw la tlakg lhuwa tuku natlawayaw xpalakata kinatalankan. d Komo natlawayaw putum uma, Jehová nakinkasikulunatlawayan chu, chuna la Timoteo, amakgapitsin naʼakxilhkgo la stakma kintakanajlakan (1 Tim. 4:15).