1. Hi nga tiyimisela ku fikelela yini entirhweni wa Xikwembu?

 TANIHI Vakreste va ntiyiso, hi rhandza Yehovha swinene. Hi lava ku nyika Yehovha leswinene ngopfu. Leswaku hi kota ku endla tano, hi fanele hi tiyimisela ku fikelela swo karhi entirhweni wakwe, swo tanihi ku antswisa vumunhu bya hina tanihi Vakreste, hi dyondza vuswikoti lebyintshwa ni ku lava tindlela to pfuna van’wana. *

2. Hikwalahokayini hi fanele hi hlela leswi hi lavaka ku swi fikelela entirhweni wa Xikwembu ni ku tlhela hi tikarhatela ku swi fikelela?

² Hikwalahokayini hi fanele hi ya emahlweni hi antswisa vuxaka bya hina na Yehovha? Nchumu wa nkoka swinene eka hina i ku tsakisa Tata wa hina wa le tilweni la nga ni rirhandzu. Yehovha wa tsaka loko a hi vona hi tirhisa tinyiko ni vuswikoti bya hina entirhweni wakwe hilaha ku heleleke. Nakambe hi lava ku va vanhu vo antswa leswaku hi ta kota ku pfuna vamakwerhu. (1 Tes. 4:9, 10) Hinkwerhu hi nga swi kota ku antswisa swi nga ri na mhaka leswaku hi ni nkarhi wo tanihi kwihi hi ri entiyisweni. A hi voneni leswaku hi nga swi endla njhani sweswo.

3. Hilaha swi tsariweke hakona eka 1 Timotiya 4:12-16, muapostola Pawulo u khutaze Timotiya ku endla yini?

³ Loko muapostola Pawulo a tsalela Timotiya papila ro sungula, jaha leri se a ri ri nkulu la nga ni ntokoto. Kambe Pawulo u ri khutaze ku ya emahlweni ri antswisa. (Hlaya 1 Timotiya 4:12-16.) Loko u ehleketa hi marito ya Pawulo u ta swi xiya leswaku a a lava Timotiya a antswisa eka swilo swimbirhi: xo sungula a antswisa vumunhu byakwe tanihi Mukreste, a va ni rirhandzu, ripfumelo ni mahanyelo lamanene. Xa vumbirhi a antswisa  ndlela leyi a hlayaka hayona emahlweni ka vanhu, a khongotela ni ku dyondzisa. Loko ha ha ehleketa hi xikombiso xa Timotiya, a hi voneni leswaku swi nga hi pfuna njhani ku antswisa loko hi hlela leswi hi lavaka ku swi fikelela entirhweni wa Xikwembu. Hi ta tlhela hi vona ku hi nga endla yini leswaku hi katseka hi xitalo entirhweni wo chumayela.

4. Hi ku ya hi Vafilipiya 2:19-22, i yini leswi endleke Yehovha a tirhisa Timotiya?

⁴ I yini leswi endleke Yehovha a tirhisa Timotiya? Hileswi a a ri ni vumunhu lebyinene bya Vukreste. (Hlaya Vafilipiya 2:19-22.) Hi ku ya hi ndlela leyi Pawulo a n’wi hlamuseleke hayona Timotiya, swa vonaka leswaku a a titsongahata, a a tshembekile, a a tirha hi matimba naswona a a nga jiki kwala na kwala. A a rhandza vamakwerhu ni ku tlhela a khathala ha vona. Sweswo hi swona swi nga endla leswaku Pawulo a rhandza Timotiya naswona a nga kanakananga ku n’wi nyika swiavelo swo tika. (1 Kor. 4:17) Hilaha ku fanaka, loko hi tikarhatela ku va ni vumunhu lebyi Yehovha a byi rhandzaka, u ta ya a hi rhandza naswona hi ta tlhela hi tirhisiwa evandlheni.—Ps. 25:9; 138:6.

5. (a) I yini lexi nga ku pfunaka ku tiva vumunhu lebyi u faneleke u byi antswisa tanihi Mukreste? (b) Hilaha swi kombisiweke hakona exifanisweni, makwerhu waxisati la ha riki muntshwa u endla yini leswaku a antswisa ndlela leyi a kombaka van’wana ntwelavusiwana hayona?

⁵ Hlawula leswi u lavaka ku swi fikelela. Khongela u tikambisisa laha u faneleke u antswisa kona eka vumunhu bya wena. Hlawula nchumu wun’we lowu u lavaka ku wu antswisa eka vumunhu bya wena. Hi xikombiso, xana u nga antswisa ndlela leyi u kombaka van’wana ntwelavusiwana ni ndlela leyi u va pfunaka hayona? Kumbexana u nga tikarhatela ku va ni ku rhula ni van’wana ni ku tlhela u va rivalela. Swi ta ku pfuna ku vutisa munghana loyi u n’wi tshembaka leswaku a ku byela laha u faneleke u antswisa kona.—Swiv. 27:6.

6. U nga endla yini leswaku u va ni vumunhu lebyinene?

⁶ Tirha hi matimba leswaku u fikelela leswi u lavaka ku swi antswisa. U nga swi endlisa ku yini sweswo? Ndlela yin’wana i ku tinyika nkarhi wo dyondza hi vumunhu lebyi u lavaka ku byi antswisa. A hi nge u lava ku va munhu la rivalelaka. U nga ha sungula hi ku hlaya ni ku anakanyisisa hi vanhu va le Bibeleni lava a va rivalela ni lava a va nga rivaleli van’wana. Ehleketa hi Yesu. U rivalele van’wana hi ku tshunxeka. (Luka 7:47, 48) U swi be hi makatla  swihoxo swa vona ivi a languta leswinene leswi a va kota ku swi endla kahle. Ku hambana na Yesu, Vafarisi “a va tekela van’wana ehansi.” (Luka 18:9) Endzhaku ko anakanyisisa hi swikombiso leswi, tivutise: ‘Ndzi va teka njhani van’wana? Ndzi languta yini eka van’wana?’ Loko u tsandzeka ku rivalela munhu wo karhi, ringeta ku tsala swilo hinkwaswo leswinene leswi a swi endlaka kahle. Kutani tivutise leswi: ‘Xana Yesu u n’wi languta njhani munhu loyi? Xana a a ta n’wi rivalela?’ Loko hi endla leswi swi ta hi pfuna leswaku hi cinca ndlela leyi hi langutaka swilo hayona. Eku sunguleni swi nga ha lava hi kulula hi n’watseka leswaku hi kota ku rivalela munhu loyi a hi khunguvanyiseke. Kambe loko hi ya emahlweni hi antswisa, hi ku famba ka nkarhi hi ta swi kota ku rivalela van’wana.

7. Hi ku ya hi Swivuriso 22:29, Yehovha u va tirhisa hi tindlela tihi vanhu lava nga ni vuswikoti namuntlha?

⁷ Swin’wana leswi u nga tiyimiselaka ku swi fikelela i ku dyondza ku va ni vuswikoti byo karhi. Ehleketa hi vatirhi vo tala lava lavekaka leswaku va pfuneta ku aka miako ya Bethele, Tiholo ta Tinhlengeletano ni Tiholo ta Mfumo. Vo tala va vatirhi lava, va ve ni vuswikoti byolebyo byo aka hileswi va tirheke ni vamakwerhu lava nga ni ntokoto. Hilaha swi kombisiweke hakona eka xifaniso, vamakwerhu lava va dyondza ku va ni vuswikoti leswaku va ta pfuneta ku lunghisa Tiholo ta Tinhlengeletano ni Tiholo ta Mfumo. Hi ku tirhisa tindlela leti ni tin’wana, Yehovha Xikwembu, “Hosi ya hilaha ku nga heriki” na Yesu Kreste “Hosi ya . . . tihosi,” va endla swilo swo hlamarisa hi ku tirhisa vatirhi lava nga ni vuswikoti. (1 Tim. 1:17; 6:15; hlaya Swivuriso 22:29.) Hi lava ku tirha hi matimba ni ku tirhisa vuswikoti bya hina leswaku hi dzunisa Yehovha ku nga ri hina vini.—Yoh. 8:54.

8. I yini lexi nga ku pfunaka ku tiva vuswikoti lebyi u nga byi dyondzaka?

⁸ Hlawula leswi u lavaka ku swi fikelela. Hi byihi vuswikoti lebyi u nga byi dyondzaka? Kumbexana u nga vutisa mulanguteri wa muganga kumbe vakulu va le vandlheni ra n’wina leswaku va ku byela laha u faneleke u antswisa kona. Hi xikombiso, loko vo ringanyeta leswaku u antswisa vuswikoti bya wena byo vulavula ni ku dyondzisa, va kombele va ku byela hi ku kongoma laha u faneleke u antswisa kona. Endzhaku endla swo karhi leswaku u antswisa. U nga swi endla njhani leswi?

9. U nga endla yini leswaku u tidyondzisa ku va ni vuswikoti?

⁹ Tirha hi matimba leswaku u fikelela leswi u lavaka ku swi antswisa. A hi nge u lava ku antswisa vuswikoti bya wena byo dyondzisa. U nga ha tinyika nkarhi wo dyondza broxara leyi nge, Tinyiketele Eku Hlayeni Ni Le Ku Dyondziseni. Loko u averiwe mbulavulo eka nhlengeletano ya le xikarhi ka vhiki, u nga ha kombela makwerhu la nga ni ntokoto leswaku a ku yingisela ni ku tlhela a ku nyika swiringanyeto swa ndlela leyi u nga antswisaka hayona. Lunghiselela swiavelo swa wena ka ha ri ni nkarhi leswaku vamakwerhu va ta swi vona leswaku u tirha hi matimba ni leswaku wa swi endla swiavelo swa wena.—Swiv. 21:5; 2 Kor. 8:22.

10. Vula xikombiso xa ndlela leyi hi nga antswisaka hayona loko hi ri karhi hi dyondza ku va ni vuswikoti byo karhi.

¹⁰ Ku vuriwa yini loko u lava ku va ni vuswikoti lebyi u nga riki na byona hi ntumbuluko? U nga wi mapa! Makwerhu la vuriwaka Garry a a nga swi koti ku hlaya kahle. U tsundzuka ndlela leyi a swi n’wi khomisa tingana hayona loko a hlaya a twiwa hi mani na mani etinhlengeletanweni ta vandlha. Kambe u tirhe hi matimba leswaku a antswisa. Sweswi u vula leswaku hikwalaho ka ndzetelo lowu a wu kumeke, u kota ku nyikela mivulavulo eHolweni ya Mfumo  ni le tinhlengeletanweni ta muganga ni ta xifundzha!

11. I yini leswi nga ta hi pfuna leswaku hi endla leswi engetelekeke entirhweni wa Yehovha ku fana na Timotiya?

¹¹ Xana Timotiya u ve xivulavuri lexi nga ni vuswikoti kumbe mudyondzisi la nga ni vutshila? Bibele a yi hi byeli. Kambe a swi kanakanisi leswaku hi ku famba ka nkarhi Timotiya u antswise ndlela leyi a a swi endla hayona swiavelo swakwe hileswi a yingiseke xitsundzuxo xa Pawulo. (2 Tim. 3:10) Hilaha ku fanaka, loko hi ya hi va ni vuswikoti hi ta kota ku endla mitirho leyi engetelekeke entirhweni wa Yehovha.

12. Vamakwerhu va ku pfune njhani?

¹² Hinkwerhu ka hina hi tshame hi pfuniwa hi vamakwerhu. Loko hi ri exibedlhele ha swi tlangela loko hi endzeriwa hi vakulu lava nga eka Komiti yo Vulavurisana ni Swibedlhele kumbe lava nga eka Mitlawa yo Endzela Vavabyi. Loko swilo swi hi fambela ximatsi, ha tsaka loko nkulu a hi yingisela ni ku hi chavelela loko hi tiphofula. Loko hi lava mpfuno wo dyondzisa xichudeni xa Bibele, ha tsaka loko phayona leri nga ni ntokoto ri famba na hina ni ku tlhela ri hi nyika swiringanyeto. Vamakwerhu lava va swi tsakela ku hi pfuna. Na hina hi nga kuma ntsako lowu fanaka loko hi pfuna vamakwerhu. Yesu u te: “Ku nyika swi tisa ntsako lowukulu ku tlula ku amukela.” (Mit. 20:35) Loko u lava ku pfuna hi tindlela leti kumbe tin’wana, i yini leswi nga ta ku pfuna leswaku u swi fikelela?

13. U fanele u tsundzuka yini loko u ri karhi u hlela leswi u lavaka ku swi fikelela?

¹³ Swi tive hi ku kongoma leswi u lavaka ku swi fikelela. Hi xikombiso, u nga ha tibyela u ku: ‘Ndzi lava ku endla leswi engetelekeke evandlheni.’ Kambe sweswo swi nga ha ku tikela ku swi fikelela nakambe swi nga ha ku tikela ku tiva niloko se u swi fikelerile. U nga mbambeli, swi tive hi ku kongoma leswi u lavaka ku swi fikelela. U nga ha swi tsala ehansi ni ku pulana ku u ta swi fikelela njhani.

14. Hikwalahokayini hi fanele hi fambisana na swiyimo loko hi hlela leswi hi lavaka ku swi fikelela?

¹⁴ Hi fanele hi fambisana na swiyimo loko hi hlela leswi hi lavaka ku swi fikelela. Hikwalahokayini? Hikuva a hi mikarhi hinkwayo hi kotaka ku lawula swiyimo swa hina. Hi lexi xikombiso: muapostola Pawulo u hoxe xandla leswaku ku sunguriwa vandlha emutini wa Tesalonika. A swi kanakanisi leswaku Pawulo a a  tiyimisele ku tshama kwalaho a pfuna vanhu lava a va ha ku va Vakreste. Kambe vakaneti va endle leswaku Pawulo a boheka ku suka emutini wolowo. (Mit. 17:1-5, 10) Loko Pawulo a lo hlawula ku tshama a a ta va a veke vamakwavo ekhombyeni. Kambe a nga helanga matimba. Ku ri na sweswo u fambisane ni xiyimo. Hi ku famba ka nkarhi, u rhumele Timotiya eTesalonika leswaku a ya tiyisa vamakwerhu. (1 Tes. 3:1-3) Swi fanele swi va tsakisile Vatesalonika leswi Timotiya a tshikeke hinkwaswo leswaku a ya laha ku nga ni xilaveko!

15. Swiyimo leswi hi nga kotiki ku swi lawula swi nga swi khumba njhani leswi hi tiyimiseleke ku swi fikelela? Kombisa.

¹⁵ Hi nga dyondza swo karhi eka leswi endlekeleke Pawulo eTesalonika. Hi nga ha va hi ri karhi hi wa hi pfuka leswaku hi kuma vutihlamuleri lebyi engetelekeke entirhweni wa Xikwembu, kambe swiyimo leswi hi nga kotiki ku swi lawula swa hi sivela. (Ekl. 9:11) Loko swi ri tano ni le ka wena, hlawula swin’wana leswi u nga kotaka ku swi fikelela. Ted na nsati wakwe Hiedi na vona va endle tano. Va boheke ku suka eBethele hikwalaho ka mavabyi. Kambe leswi va n’wi rhandzaka ngopfu Yehovha va lave tindlela tin’wana to endla leswi engetelekeke entirhweni wo chumayela. Va rhange hi ku va maphayona ya nkarhi hinkwawo. Hi ku famba ka nkarhi va ve maphayona yo hlawuleka naswona Ted u leteriwe ku va mulanguteri wa muganga la khomelaka. Hi ku famba ka nkarhi, ku fike nkarhi laha valanguteri va muganga va nga yimisiwa hikwalaho ka malembe. Ted na Hiedi va xiyile leswaku a swi nga ha ta koteka leswaku va ya emahlweni na xiavelo xa vona hileswi a tidya ti ya emagoveni. Hambileswi swi nga va tikela ku swi amukela kambe va swi xiyile leswaku va nga tirhela Yehovha hi tindlela tin’wana. Ted u ri: “Hi dyondze leswaku hi nga tirhela Yehovha hi tindlela to hambanahambana.”

16. Hi nga dyondza yini eka Vagalatiya 6:4?

¹⁶ A hi nge swi koti ku lawula swilo hinkwaswo leswi endlekaka evuton’wini bya hina. Hikwalaho, hi fanele papalata ku tibyela leswaku hi va nkoka eka Yehovha hikwalaho ka mitirho leyi hi yi endlelaka Xikwembu kumbe hi tiringanisa ni van’wana. Hiedi u ri: “A wu nge he vi na ku rhula loko u tiringanisa na van’wana.” (Hlaya Vagalatiya 6:4.) I swa nkoka ku lava tindlela to gandzela Yehovha ni ku pfuna van’wana. *

17. Hi nga endla yini leswaku hi fanelekela ku kuma vutihlamuleri lebyi engetelekeke?

¹⁷ Papalata swilo leswi ku dyelaka nkarhi evuton’wini bya wena ni ku endla swikweleti leswi  nga bohiki leswaku u ta kota ku endla leswi engetelekeke entirhweni wa Xikwembu. Sungula hakatsongotsongo leswaku u ta kota ku fikelela leswi u swi navelaka. Hi xikombiso, loko ku ve u lava ku va phayona ra nkarhi hinkwawo, xana u nga sungula hi ku teka bya nkarhinyana sweswi? Loko u navela ku va nandza wa vutirheli, swi nga va njhani loko wo heta nkarhi lowu engetelekeke ensin’wini ni ku endzela lava vabyaka ku katsa ni vadyuhari evandlheni ra n’wina? Ntokoto lowu u nga ta wu kuma sweswi, wu nga ku pfulela njombo ya ku tirhisiwa enkarhini lowu taka. Tiyimisele ku endla leswi u nga swi kotaka eka swiavelo swa wena.—Rhom. 12:11.

18. Hilaha swi kombisiweke hakona exifanisweni, u dyondza yini eka Beverley?

¹⁸ Hinkwerhu hi nga hlela ni ku fikelela leswi hi lavaka ku swi endla entirhweni wa Xikwembu. Xiya xikombiso xa makwerhu wa xisati Beverley loyi a nga ni malembe ya 75. U vabye ngopfu lerova a a nga ha koti ku famba. Kambe a a swi navela hi mbilu hinkwayo ku katseka eka tsima ra Xitsundzuxo. U hlele ku endla swo karhi. Loko a kote ku fikelela leswi a hleleke ku swi endla hi nkarhi wa tsima, sweswo swi n’wi tsakise ngopfu. Matshalatshala yakwe ma khutaze ni van’wana leswaku va endla leswi fanaka ensin’wini. Yehovha u wu teka wu ri wa nkoka ntirho lowu endliwaka hi vadyuhari hambiloko swiyimo swi nga ha va pfumeleli ku endla swo tala.—Ps. 71:17, 18.

19. I yini leswi u tiyimiseleke ku swi fikelela entirhweni wa Xikwembu?

¹⁹ Pulana leswi u nga kotaka ku swi fikelela. Loko u ya emahlweni u antswisa vumunhu bya wena, u ta tsakisa Yehovha. Dyondza ku va ni vuswikoti byo karhi lebyi nga ta endla leswaku u tirhisiwa hi Xikwembu ni nhlangano wa xona. Lava tindlela to pfuna vamakwerhu hilaha u nga kotaka hakona. * Ku fana na Timotiya, Yehovha u ta ku katekisa naswona “vanhu hinkwavo va ta swi vona leswaku u Mukreste loyi a wupfeke.”—1 Tim. 4:15.