1. Hi swini swilo swin’wana leswi hi nga ha swi fikelelaka?

 LESWI hi nga Vakreste va ntiyiso hi mu rhandza hintamu Yehovha naswona hi lava ku yentxa hinkwaswu leswi nga ka matimba ya hina swaku hi mu tirhela. Leswaku leswo swi koteka, hi fanele hi va ni swilo leswi hi lavaka ku swi fikelela swa ku fana ni ku lwela ku va ni wumunhu la Wukreste, ku djondza ku yentxa mintirho yin’wana ni ku lava tindlela ta ku pfuna van’wana.

2. Hi mhaka muni hi fanele hi tama hi yampsisa ndlela leyi hi mu tirhelaka hi yona Yehovha?

² Hi mhaka muni hi fanele hi tama hi yampsisa ndlela leyi hi mu tirhelaka hi yona Yehovha? Hi mhaka hi lava ku dzunisa Yehovha Papayi wa hina wa le matilweni. Yehovha a tsaka hintamu loko a hi vona hi tirhisa ntamu wa hina ni wutlharhi la hina swaku hi mu tirhela. Naswona hi lava ku tama hi yampsisa ndlela leyi hi mu tirhelaka hi yona leswaku hi kota ku pfuna vamakwerhu van’wana. (1 Tes. 4:9, 10) Ku nga na mhaka swaku hi ni nkama muni na hi li ka nhlengeletanu ya Yehovha, hinkwerhu hi fanele hi tama hi yampsisa ndlela leyi hi mu tirhelaka hi yona. Swoswi a hi voneni swaku hi nga swi yentxisa ku yini leswo.

3. Hi ku ya hi 1 Timotiyu 4:12-16, impsini leswi Pawulo a nga byela Timotiyu swaku a swi yentxa?

³ Nkama lowu mupostolo Pawulo a nga tsalela Timotiyu karta la yena la ku sungula, hambileswi a ha li jovhem se a a li doda. Kambe Pawulo a byele Timotiyu swaku a tama a yampsisa ndlela leyi a mu tirhelaka hi yona Yehovha. (Lerha 1 Timotiyu 4:12-16.) Nkama lowu u pimisaka hi marito lawa Pawulo a nga ma tsalela Timotiyu, u ta tsumbula swaku Pawulo a a lava swaku Timotiyu a yampsisa hi tindlela timbirhi: Ya ku sungula, a a fanele a lwela ku va ni wumunhu la Wukreste la ku fana ni lirhandzu,  lipfumelo ni ku basa. Ya wumbirhi, a a fanele a yampsisa ndlela leyi a va lerhelaka hi yona van’wana, leswi a va layisaka xiswona van’wana a tlhela a yampsisa madjondziselo ya yena. Na ha ha pimisa hi xikombiso xa Timotiyu, a hi voneni swaku hi nga yentxa yini swaku hi yengetela ntirho wa hina ka Yehovha ka nkama lowu taka, leswi nga ta hi pfuna ku yampsisa ndlela leyi hi mu tirhelaka hi yona Yehovha. Hi ta tlhela hi vona swaku hi nga yentxa yini swaku hi yengetela ntirho wa hina wa ku chumayela.

4. Hi ku ya hi Vafilipiya 2:19-22, i yini xi nga yentxa swaku Timotiyu a tama a tirhisiwa hi Yehovha?

⁴ Timotiyu a tame a tirhisiwa hi Yehovha hileswi a nga tikarhatela ku va ni wumunhu la Wukreste. (Lerha Vafilipiya 2:19-22.) Leswi Pawulo a nga swi vula hi Timotiyu, swi kombisa swaku yena a a li munhu wa ku tiveka hansi, wa ku tshembeka, lweyi a a rhandza ku tirha naswona a tshembiwaka hi vamakwerhu. A a rhandza vamakwerhu hi mbilu hinkwayu naswona a a tinyimisele ku va pfuna. Leswo swi yentxe swaku Pawulo a mu rhandza a tlhela a mu tshemba. Hi mhaka leyo, a nga pimisanga kambirhi swaku a mu nyika mintirho leyi a yi tikomba ingi ya karhata. (1 Kor. 4:17) Na hina, loko hi tikarhatela ku va ni wumunhu la Wukreste, Yehovha a ta hi rhandza naswona hi ta tirhisiwa abandleni. —  Pis. 25:9; 138:6.

5. a) U nga yentxa yini loko u lava ku tiva swaku hi lini wumunhu leli u faneleke u li yampsisa? b) Hi ku ya hi mufoto, makwerhu waxisati a swi kombisisa ku yini swaku a tikarhatela ku fikelela leswi a swi lavaka, swa ku fana ni ku kombisa timpsalu?

⁵ Pimisa hi wumunhu leli u lavaka ku li fikelela. Khongela u tlhela u pimisa hi wumunhu leli swi lavaka u yampsisa ka lona. Langa lin’we u gama u tirhela ka lona. Hi xikombiso, u nga ha djondza ku kombisa timpsalu u tlhela u djondza ku navela ku pfuna vamakwerhu. Kumbe u nga ha zama ku va munhu wa ku rhula loko u tirha ni van’wana u tlhela u rivalela. Kombela munghanu wa wena lweyi u mu tshembaka swaku a ku byela lani u nga yampsisaka kona. —  Swi. 27:6.

6. U nga yentxa yini swaku u yampsisa wumunhu leli u nga tivekisela lona?

⁶ Zama ku fikelela wumunhu leli u nga tivekisela lona. U nga swi yentxisa ku yini swoleswo? Swin’wana leswi u nga swi yentxaka, i ku djondza hi wumunhu leli u lavaka ku li yampsisa. Hi xikombiso, u nga ha lava ku djondza ku rivalela vanhu van’wana. U nga ha rhanga hi ku lerha u tlhela u pimisa hi swikombiso swi nga ka  Bibele swa vanhu lava va nga rivalela van’wana ni lava kalaka va nga va rivalelanga van’wana. Pimisa hi xikombiso xa Yesu, yena a rivalele van’wana hi ku chunseka. (Luk. 7:47, 48) Yesu a a nga tshameli ku pimisa hi swihoxo swa vanhu, kambe a a pimisa hi swilo swa swinene leswi a va swi yentxa. Ku hambana na Yesu, Vafarisi a “va va vonela hansi van’wana”. (Luk. 18:9) Loko se u pimisile hi swikombiso leswi, tivutisi leswi: ‘I yini leswi ni swi vonaka ka van’wana? Hi lini wumunhu la linene va nga na lona leli ni nga pimisaka hi lona?’ Loko swi ku karhatela ku rivalela munhu, yentxa lixta la wumunhu la linene leli munhu yelweyo a nga na lona, u gama u tivutisa leswi: ‘Yesu a mu vonisa ku yini munhu lweyi? Ku nga va swaku a a ta mu rivalela?’ Ku yentxa leswo swi ta hi pfuna ku txintxa mapimiselo ya hina. Ku sunguleni swi ta lava hi tirha hi matimba swaku hi rivalela munhu lweyi a nga hi kwatisa. Kambe loko hi zama ku yampsisa wumunhu la hina swi ta ya swi hi vevukela ku rivalela van’wana.

7. Hi ku ya hi Swivuriso 22:29, Yehovha a va tirhisisa ku yini vamakwerhu lava va swi kotaka ku wu yentxa kahle ntirho?

⁷ Swin’wana leswi u nga tikarhatelaka ku swi fikelela i ku djondza ku yentxa mintirho yin’wana. Pimisa hi vanhu va vanyingi lava lavekaka swaku va yaka Mabetele, va yaka tindhawu leti hi yentxelaka ka tona masembleya va tlhela va yaka Tiyindlo ta Wugandzeli. Vanyingi lava va yentxaka mintirho leyi, va yi djondze ka vamakwerhu van’wana lava se a va wu tiva kahle ntirho lowu. Hilani swi kombisiwaka hi kona ka mufoto, vamakwerhu vavanuna ni vamakwerhu vavasati va djondza ku yentxa mintirho leyi lavekaka swaku ku lunghisiwa tindhawu leti ku yentxeliwaka ka tona masembleya ku tlhela ku lunghisiwa Tiyindlo ta Wugandzeli. Leswaku Yehovha “Hosi leyi nga kona hi masiku ni masiku,” na Yesu Kreste, “Hosi ya . . . tihosi,” va hetisisa ntirho lowu ni yin’wana, va tirhisa vamakwerhu lava swi kotaka ku wu yentxa kahle ntirho. (1 Tim. 1:17; 6:15; lerha Swivuriso 22:29.) Mintirho hinkwayu leyi hi kotaka ku yi yentxa, hi lava ku yi yentxa kahle swaku ku dzunisiwa Yehovha ku nga li hina vinyi. —  Yoh. 8:54.

8. Hi yini ndlela ya ku tiva leswi u faneleke u swi yampsisa?

⁸ Langa nchumu lowu u lavaka ku wu fikelela. Hi wini nchumu lowu u nga ha wu fikelelaka? Vutisa madoda ya bandla la wena kumbe mudjikelezi swaku impsini leswi va vonaka swaku u nga ha swi yampsisa. Hi xikombiso, va nga ha ku byela swaku u yampsisa mavulavulelo ya wena kumbe madjondziselo ya wena. Va kombeli swaku va ku byela swaku hi wani marito ya ku kongoma lawa u faneleke u ma yampsisa, u gama u zama ku yentxa leswi va nga ta ku byela swona. Se u nga swi yentxisa ku yini leswo?

9. U nga yentxa yini swaku u fikelela leswi u nga tivekisela swona?

⁹ Zama ku fikelela leswi u nga tivekisela swona. A hi nge u lava ku yampsisa madjondziselo ya wena. U nga ha li lerha kahle broxura leli nge Tinyiketeli Kulerheni ni le Kudjondziseni. Loko u nyikiwa xiyenge ka mintlhanganu ya xikarhi ka vhiki, u nga ha kombela makwerhu lweyi a nga xikombiso swaku a ku yingisela kahle nkama lowu u lunghiselelaka xiyenge lexi u nga nyikiwa xona. A ta gama a ku byela lani u faneleke u yampsisa kona. Loko u lunghiselela swiyenge swa wena hi nkama, vamakwerhu va ta swi vona swaku u tirha hi matimba naswona wa tshembeka. —  Swi. 21:5; 2 Kor. 8:22.

10. Nyikela xikombiso xa ndlela leyi hi nga djondzaka hi yona nchumu lexi hi lavaka ku xi fikelela.

¹⁰ U nga yentxa yini loko swi lava u yampsisa nchumu lowu swi ku karhatelaka ku wu yentxa? U nga godoli! Makwerhu lweyi a vitaniwaka Gerry, a a nga swi koti ku lerha kahle. A khumbuka swaku a danile nkama a nga zama ku lerha  amintlhanganwini, kambe a tame a yampsisa. A tlhela a vula swaku kuva a trenariwile hi vamakwerhu ni mabuku ya nhlengeletanu swi mu pfunile hikusa se a ma veka kahle madixkursu amintlhanganwini ni masembleya ni makongresu.

11. Ku fana na Timotiyu, i yini lexi nga ta hi pfuna ku kota ku yengetela mintirho leyi hi yi yentxelaka Yehovha?

¹¹ Ku nga va swaku Timotiyu a a veka madixkursu lawa a ma hlamalisa vanhu hinkwavu? Bibele a li swi vuli leswo. Kambe ha tiyiseka swaku kuva a yingisile switsundzuxu swa Pawulo, a swi kotile ku yampsisa a tlhela a yi yentxa kahle mintirho ya yena. (2 Tim. 3:10) Hi ku fana, loko na hina hi tama hi yampsisa ndlela leyi hi swi yentxaka hi yona swilo, hi ta swi kota ku yentxa swa swinyingi ka ntirho wa Yehovha.

12. Vamakwerhu va ku pfunise ku yini?

¹² Vamakwerhu va yentxa swa swinyingi swaku va hi pfuna. Hi xikombiso, loko hi li xibedlela ha khensa loko hi pfuxeliwa hi vamakwerhu va Comissão La Ku Vulavulisana Ni Swibedlela. Loko hi kumana ni swikarhatu, ha tsaka hileswi madoda ma tinyikaka nkama wa ku hi yingisa ma tlhela ma hi tiyisa. Loko hi lava ku pfuniwa ka xidjondzo xa Bibele, ha tsaka loko mupfuli wa ndlela a famba na hina ka xidjondzo xolexo a tlhela a hi komba tindlela ta ku yampsisa madjondziselo ya hina. Hinkwavu vamakwerhu lava va tsaka hi ku hi pfuna. Na hina hi nga tsaka loko hi tinyimisela ku pfuna vamakwerhu van’wana. Yesu a te: “Swi tsakisa hintamu ku nyika ku tlula ku yamukela.” (Mint. 20:35) Loko na wena u lava ku yengetela ntirho lowu u wu yentxelaka Yehovha hi tindlela leti kumbe tin’wana, i yini leswi nga ku pfunaka?

13. Hi fanele hi yentxa yini loko hi ni nchumu lexi hi lavaka ku xi fikelela?

¹³ Hi fanele hi pimisa hi minchumu ya ku kongoma leyi hi lavaka ku yi fikelela. Hi xikombiso, hi nga ha tibyela leswi: ‘Ni lava ku yentxa swa swinyingi abandleni.’ Kambe loko hi nga swi tivi hi ku kongoma leswi hi lavaka ku swi yentxa, swi nga ha hi karhatela ku tiva swaku hi ta swi fikelelisa ku yini ni swaku hi ta swi fikelela nkama muni. Se langa nchumu xa ku kongoma lexi u lavaka ku xi fikelela naswona loko swi koteka yentxa hi ku tsala u tlhela u tsala swaku u lava ku xi fikelelisa ku yini.

14. Hi mhaka muni swi lava hi titwananisa ni swiyimu loko hi pimisa hi swilo leswi hi lavaka ku swi yentxa?

¹⁴ Loko hi pimisa hi swilo leswi hi lavaka ku swi fikelela, hi fanele hi titwananisa ni swiyimu hikusa swiyimu swa txintxa. Hi xikombiso,  mupostolo Pawulo a pfunisile nkama ku nga sunguliwa bandla la le Tesalonika naswona ha tiyiseka leswaku a a ha lava ku tama a tshama na vona leswaku a va pfuna tanihi leswi a va ha li ku gama ku yamukela ntiyiso. Kambe valala va yena va yentxe swaku a boheka ku famba a siya bandla leli la nyuwani. (Mint. 17:1-5, 10) Loko Pawulo a a sindzise ku tshama a a ta va a veke wutomi la vamakwerhu a nghozini, kambe a nga tshikanga ku va pfuna. Yena a titwananise ni swiyimu leswi a a kumana na swona. Hi ku famba ka nkama a rhume Timotiyu swaku a ya tiyisa Vakreste va le Tesalonika. (1 Tes. 3:1-3) Vakreste va le Tesalonika a va tsake hintamu hileswi Timotiyu a a tinyiketela ku pfunisa kun’wana ni kun’wana.

15. Nyikela xikombiso xa leswi ku txintxa ka swiyimu ku nga ha swi khumbisaka xiswona swilo leswi hi nga tivekisela ku swi yentxa.

¹⁵ Swi kona leswi hi nga swi djondzaka ka leswi nga yentxekela mupostolo Pawulo aTesalonika. Ku nga va ni swilo leswi hi pimisaka ku swi yentxa, kambe hi mhaka ku txintxa ka swiyimu swi nga ha koteki swaku hi swi yentxa. (Ekl. 9:11) Loko ku li swaku hi swona leswi ku yentxekelaka, tinyimiseli ku langa swilo swin’wana leswi u nga swi kotaka ku swi yentxa. Leswo hi leswi Ted na Hiedi va nga swi yentxa. Vona va suke Betele hi mhaka mavabyi, kambe leswi a va mu rhandza hintamu Yehovha va lave tindlela tin’wana ta ku yengetela ntirho wa vona wa ku chumayela. Va sungule hi ku va vapfuli va ndlela va nkama hinkwawu. Hi ku famba ka nkama va vekiwe swaku va va vapfuli va ndlela va ku hlawuleka naswona Ted a sungule ku trenariwa swaku a va mudjikelezi wa ku pfaleta. Kambe swiyimu swi tlhele swi txintxa! Ntanga ya vona a yi nga ha va pfumeleli ku hetisisa ntirho lowu a va fanele va wu yentxa. Leswo a swi va tsakisanga, kambe a va swi tiva swaku a va ta tama va tirhela Yehovha hi tindlela tin’wana. Ted a li: “Hi djondze swaku ku ni tindlela ta tinyingi ta ku tirhela Yehovha.”

16. Impsini leswi hi nga swi djondzaka ka Vagalatiya 6:4?

¹⁶ A hi nge swi tivi swaku ku ta yentxeka yini hi wutomi la hina ka nkama lowu taka. Kambe xa lisima i ku kala hi nga pimisi swaku hi to va va lisima ka Yehovha hi mhaka mintirho leyi hi yi yentxaka, kumbe ku ringanisa mintirho leyi hi yi yentxaka ni leyi van’wana va yi yentxaka. Hiedi a li: “A hi nge tsaki loko hi tshamela ku ringanisa wutomi la hina ni wutomi la van’wana.” (Lerha Vagalatiya 6:4.) Xa lisima i ku tama hi pimisa hi tindlela ta ku pfuna van’wana ni ku tirhela Yehovha. *

17. I mpsini leswi u nga swi yentxaka swaku u kota ku fikelela mintirho yin’wana abandleni?

¹⁷ Leswaku u yentxa leswi yengetelekeke ka ntirho wa Yehovha, u nga titateli swilo swa swinyingi ka wutomi la wena naswona zama ku  kala u nga yentxi swikweneti. Tivekeli swilo swa switsongo leswi u nga swi fikelelaka leswi nga ta ku pfuna ku fikelela swilo swa swikulu ka nkama lowu taka. Xi xikombiso, loko u lava ku va mupfuli wa ndlela wa nkama hinkwawu, u swi vonisa ku yini loko wo rhanga hi ku va mupfuli wa ndlela wa nkamanyana hi nkama lowu kalaka wu nga pimiwanga? Loko u lava ku va mupfunisi wa bandla ka nkama lowu taka, u nga ha pfana u heta nkama wa wunyingi na u chumayela, na u pfuxela vamakwerhu lava vabyaka abandleni ka wena kumbe vamakwerhu lava nga guga. Loko u yentxa leswo swoswi, swi ta ku vevukela ku kuma mintirho yin’wana abandleni ka nkama lowu taka. Se tinyimiseli ku yi yentxa kahle mintirho hinkwayu leyi u nga na yona bandleni. —  Rom. 12:11.

18. Hilani swi nga kombisiwa hi kona ka mufoto, i yini leswi u nga swi djondza ka xikombiso xa makwerhu Beverley?

¹⁸ Hambiloko hi li vakulu, hi nga tivekela swilo leswi hi lavaka ku swi fikelela. Vona xikombiso xa makwerhu waxisati Beverley lweyi a nga ni 75 wa malembe. Yena a a ni mavabyi ya makulu lawa a ma yentxa swaku swi mu karhatela ku famba. Kambe yena a a lava ku yentxa leswi yengetelekeke ka kampanya la ku rhamba vanhu swaku va ya ka Xitsundzuxu. Se leswaku a swi kota ku yentxa leswo, a pimise hi swilo leswi a a ta swi yentxa. Nkama a nga swi kota ku fikelela swilo swoleswo, a tsake hintamu naswona minzamu ya yena yi tlhele hi pfuna van’wana swaku va tirha hintamu ka ntirho wa ku chumayela. Yehovha a wu nyika lisima ntirho lowu vamakwerhu va hina lava nga guga va wu yentxaka hambileswi swiyimu swi kalaka swi nga va pfumeleli ku yentxa swin’wana. —  Pis. 71:17, 18.

19. I yini swin’wana leswi u nga zamaka ku swi fikelela?

¹⁹ Pimisa hi swilo leswi u nga ta kota ku swi yentxa. Tikarhateli ku va ni wumunhu leli tsakisaka Yehovha naswona djondza mintirho leyi nga ta yentxa swaku u tama u tirhisiwa hi Yehovha ni hi nhlengeletanu ya yena u tlhela u lava tindlela ta ku pfuna vamakwerhu. * Ku fana na Timotiyu, loko Yehovha a ku katekisa “vanhu va ta swi vona swaku u ya u va Mukreste wa ku wupfa.” —  1 Tim. 4:15.