1. Bigendererwa ki eby’omwoyo eby’osobora kweteraho?

 NK’ABAKRISTAAYO ab’amananu, nitugonza muno Yahwe. Nitugonza kumuha ekirukukirayo oburungi omu buheereza bwaitu. Baitu kusobora kukorra Yahwe byona ebyorukusobora, noyetaaga kweteraho ebigendererwa eby’omwoyo, nk’oku kurakuraniza emiringo ey’Ekikristaayo, kutunga obukugu obw’okukora ebintu ebimu, kandi n’okuserra emiringo osobora kuheereza abandi. *

2. Habwaki tusemeriire kweteraho ebigendererwa eby’omwoyo kandi n’okwekamba kubihikiiriza?

² Habwaki tusemeriire kugonza kukurakurana omu by’omwoyo? Ensonga erukukirayo obukuru niyo ey’okugonza kusemeza Isiitwe ow’omu iguru ow’okugonza. Yahwe asemererwa obwarora nitukozesa omu bwijwire ebisembo ebitwine kumuheereza. Ekindi, nitugonza kukurakurana nukwo tweyongere kukonyera Abakristaayo bagenzi baitu. (1 Bas. 4:9, 10) Obwire obutumazire omu mananu tikiri kikuru, itwena nitusobora kukurakurana omu by’omwoyo. Leka turole omulingo tusobora kukikoramu.

3. Kusigikirra ha 1 Timoseo 4:12-16, Paulo akekambisa Timoseo kukora ki?

³ N’obukiraaba ngu Timoseo akaba akyali muto nambere omukwenda Paulo yamuhandiikire ebbaruha ye ey’okubanza, Timoseo akaba amazire akasumi naheereza nk’omugurusi w’ekitebe. Baitu, Paulo akamwekambisa kwikara nakurakurana  omu by’omwoyo. (Soma 1 Timoseo 4:12-16.) Obworukutekerezaaho ebigambo bya Paulo, noija kukyetegereza ngu akaba nagonza Timoseo akurakurane omu miringo ebiri: Ogw’okubanza, kukurakuraniza emiringo ey’Ekikristaayo nk’okugonza, okwikiriza, hamu n’okwera. Kandi ogwakabiri, kwongera kusemezaamu obukugu bwe omu kusoma omu rwijwire, kutererra, hamu n’okwegesa. Nitugenda kubazaaho ekyokurorraho kya Timoseo, nukwo turole nk’oku kweteraho ebigendererwa ebiturukusobora kiratukonyera kukurakurana omu by’omwoyo. Nitwija n’okubazaaho emiringo emu tusobora kwongera ha buheereza bwaitu.

4. Kusigikirra ha Abafiripi 2:19-22, kiki ekyafoire Timoseo omuheereza wa Yahwe ow’omugaso?

⁴ Kiki ekyafooire Timoseo omuheereza wa Yahwe ow’omugaso? Emiringo ye enungi ey’Ekikristaayo. (Soma Abafiripi 2:19-22.) Kusigikirra ha mulingo Paulo yabalizeeho Timoseo, nitukirora ngu akaba ali mwebundaazi, mwesigwa, kandi mwekambi. Akaba aine okugonza kandi yafaahoga muno ab’oruganda. Ekyarugiremu, Paulo akagonza Timoseo, kandi atatiine kumuha obujunanizibwa obugumire. (1 Kol. 4:17) Omu mulingo nugwo gumu, Yahwe naija kutugonza kandi tweyongere kuba b’omugaso omu kitebe obuturakurakuraniza emiringo eyarukugonza.​—Zab. 25:9; 138:6.

5. (a) N’osobora ota kumanya omulingo ogw’Ekikristaayo ogw’osemeriire kukurakuraniza? (b) Nk’oku kyolekerwe omu kisisani, munyaanya itwe nahikiriza ata ekigendererwa kye eky’okwongera kwoleka abandi embabazi?

⁵ Komamu omulingo ogw’Ekikristaayo ogw’orukugonza kukurakuraniza. Saba kandi otekerezeeho kiki ekiwakugondeze kusemezaamu omu miringo yaawe. Komamu omulingo gumu oguwakugondeze kusemezaamu. Ekyokurorraho, noyetaaga kweyongera kwoleka embabazi rundi kugonza kukonyera Abakristaayo bagenzi baawe kukira nk’oku obaire nokora? Noyetaaga kweyongera kuba muntu ow’obusinge kandi ow’arukuganyira? Nikisobora kukugasira kakuba okaguza munywani wawe nfe na nfe kukugambira emiringo osemeriire kusemezaamu.​—Nfu. 27:6.

6. N’osobora ota kukurakuraniza omulingo omurungi?

⁶ Wekambe kuhikiriza ekigendererwa kyawe. Eki n’osobora kukikora ota? Omulingo gumu ogw’okukikoramu, nugwo ogw’okwesomesaaho n’obwegendereza omulingo oguwakugondeze kusemezaamu. Ekyokurorraho, kakuba ocwamu ngu noyetaaga kweyongera kuba muntu arukuganyira. N’osobora kubanza kusoma  n’okwecumiitirizaaho ebyokurorraho kuruga omu Baibuli eby’abantu abaganyiire kandi naabo abayangire kuganyira. Tekerezaaho ekyokurorraho kya Yesu. Yaganyiraga abandi. (Luk. 7:47, 48) Tiyateekaga muno omutima ha nsobi zaabo baitu hali ebi ebibarukusobora kukora. Baitu Abafalisaayo omu kasumi ka Yesu ‘bagayaga abantu abandi boona.’ (Luk. 18:9) Hanyuma y’okwecumiitirizaaho ebyokurorraho binu, wekaguze: ‘Kiki ekindora omu bandi? Miringo ki ei baine ei ncwamu kuteekaho omutima?’ Kakuba kiba nikikugumira kuganyira omuntu, lengaho kuhandiika orukarra rw’emiringo ye enungi. Hanyuma oyekaguze: ‘Yesu narora ata omuntu onu? Yakugumanyiire?’ Kwesomesa nka kunu nikusobora kutukonyera kuhindura entekereza yaitu. Ha kubanza nikisobora kutwetaagisa kuteekamu amaani kuganyira omuntu ow’atubiihize. Baitu kakuba twikara nitwekamba, hanyuma y’akasumi nikiija kweyongera kutwanguhira kuganyira.

7. Miringo ki Yahwe eyarukukukozesaamu abakozi abakugu omu kasumi kanu? (Enfumo 22:29)

⁷ Ekigendererwa ekindi ekitusobora kweteeraho nikyo eky’okutunga obukugu obuturukwetaaga. Tekerezaaho abakozi abaingi abarukwetaagwa kusobora kwombeka ebyombeko bya Beseri, eby’Ensorrokano Enkooto, hamu n’Ebyombeko Byobukama. Baingi h’abakozi banu, beega kukora emirimo enu kurabira omu kukorra hamu n’ab’oruganda abaine obukugu omu mirimo enu. Nk’oku kyolekerwe omu kisisani, ab’oruganda n’abanyaanya itwe baingi nibeega emiringo basobora kukonyera omu kurolerra Ebyombeko eby’Ensorrokano Enkooto, hamu n’Ebyombeko by’Obukama. Omu miringo enu hamu n’endi, Yahwe Ruhanga, “Omukama owobusinge bwona,” hamu na Kristo Yesu, “Omukama wabakama,” nibakozesa abakozi banu abakugu kukora ebintu eby’amaani. (1 Tim. 1:17; 6:15; soma Enfumo 22:29.) Nitugonza kukora n’amaani n’okukozesa obukugu obutwine kuhaisa Yahwe ekitiinisa hatali kwenyumiza.​—Yoh. 8:54.

8. N’osobora ota kucwamu kiki ekyorayega?

⁸ Cwamu kyonyini ekyorukugonza kwega. Kiki eky’osobora kwega? Wekaguzeeho abagurusi omu kitebe kyawe rundi omuroleerezi w’ekicweka kiki eky’osobora kwega. Ekyokurorraho, kakuba bakugambira ngu osemeriire kusemezaamu omulingo obaza kandi oyegesaamu, bakaguze bakukonyere kumanya honyini nambere osemeriire kusemezaamu. Hanyuma okole n’amaani kusemezaamu. Kinu n’osobora kukikora ota?

9. N’osobora ota kuhikiiriza ekigendererwa kyawe eky’okwega ekintu ekihyaka?

⁹ Kora n’amaani kuhikiiriza ekigendererwa kyawe. Katugambe ngu nogonza kusemezaamu omulingo oyegesaamu. N’osobora kwesomesa n’obwegendereza burocuwa Wekambire Okusoma n’Okwegesa. Kakuba oheebwa ekicweka omu rusorrokano orwa hagati omu wiiki, n’osobora kusaba ow’oruganda omukugu kukuhuliiriza obworaaba noha ekicweka kyawe kandi hanyuma akuhe amagezi nk’oku osobora kusemezaamu. Tekaniza kara ekicweka kyawe nukwo abantu bakirole ngu oli mwekambi kandi noyesigwa.​—Nfu. 21:5; 2 Kol. 8:22.

10. Bazaaho ekyokurorraho ekirukwoleka nk’oku tusobora kutunga obukugu.

¹⁰ Kiki eky’osobora kukora kakuba ekigendererwa kyawe kiba ky’okukora ekintu ekikugumira kukora? Otahwamu amaani! Ow’oruganda Gary akaba atarukusobora kusoma kurungi. Naijuka omulingo yaswairemu muno obuyalengereho kusoma omu nsorrokano. Baitu akagumizaamu nayekamba kusemezaamu. Nagamba ngu habw’okutendekwa okuyatungire, hati nasobora kuha embazo omu nsorrokano ez’ekitebe hamu n’enkooto!

11. Kusisanaho na Timoseo, kiki ekiratukonyera kutunga obujunanizibwa oburukukiraho?

 ¹¹ Timoseo akafooka omuhi w’embazo rundi omwegesa omurungi muno? Baibuli terukutugambira. Baitu busaho kugurukyagurukya Timoseo akeyongera kuhikiiriza kurungi obujunanizibwa bwe obuyahondiire obuhabuzi bwa Paulo. (2 Tim. 3:10) Omu mulingo nugwo gumu, obuturayongera ha bukugu bwaitu, nitwija kusobora kwongera ha buheereza bwaitu hali Yahwe.

12. Ogasiirwe ota omu buheereza bw’abantu abandi?

¹² Itwena tugasirwa omu buheereza obw’abantu abandi. Ekyokurorraho obutuba tuli omu irwarro, tusiima muno abagurusi abali h’akatebe aka Hospital Liaison Committees rundi Patient Visitation Groups obubaija kuturora. Obutuba twine ebizibu eby’amaani, tusiima muno omugurusi ow’arukufaayo obwatuha obwire bwe kutuhuliiriza n’okutuhuumuza. Obutuba nitwetaaga obukonyezi obw’okwegesa omuntu Baibuli, tusemererwa muno payoniya omukugu obwaikiriza kutusendekereza kandi akatuha amagezi. Ab’oruganda na banyaanya itwe banu boona, kibasemeza muno kutukonyera. Naitwe nitusobora kutunga okusemererwa kakuba twehayo kukonyera ab’oruganda. Yesu akagamba ati: “Okugaba kwomugisa okukira okuhebwa.” (Eng. 20:35) Kakuba oba nogonza kwongera ha buheereza bwawe omu miringo enu rundi endi erukusisana n’enu, kiki ekirakukonyera kuhika ha bigendererwa byawe?

13. Obuturukuba nitweteraho ekigendererwa, kiki ekitusemeriire kwijuka?

¹³ Manya ekigendererwa kyonyini eky’orukwetaaga kweteraho. Ekyokurorraho, n’osobora kuteekereza oti, ‘Ningonza kukora ekirukukiraho omu kitebe.’ Baitu nikisobora kukugumira kumanya omulingo osobora kuhikiiriza ekigendererwa eki. Kandi n’osobora n’okulemwa kumanya obworaaba okihikiriize. Nahabweki manya ekigendererwa kyonyini ekyorayeteraho. N’osobora n’okuhandiika ekigendererwa kyawe hamu n’omulingo otekaniize kukihikaho.

14. Habwaki nitwetaaga kwikara twetegekere kuhinduramu obuturukuba nitweteraho ebigendererwa?

¹⁴ Ekindi, tusemeriire kwikara twetegekere kuhinduramu obuturukuba nitweteraho ebigendererwa. Habwaki? Habwokuba enyikara yaitu n’esobora kuhinduka akaire koona.  Ekyokurorraho: Omukwenda Paulo akaba akonyire kutandikaho ekitebe omu rubuga rwa Sesalonika. Kandi busaho kugurukyagurukya akaba aine ekigendererwa eky’okwikarayo kukonyera Abakristaayo banu abahyaka. Baitu abarukumuhakaniza bakamuhambiriza kuruga omu rubuga oru. (Eng. 17:1-5, 10) Kakuba Paulo yaikaireyo yakutaire ab’oruganda omu kabi. Baitu Paulo ataleke kulengaho kubakonyera. Oihireho akakora empindahinduka kusigikirra ha nyikara empyaka. Hanyuma akatuma Timoseo kukonyera Abakristaayo abo abahyaka omu Sesalonika kuba n’okwikiriza okugumire. (1 Bas. 3:1-3) Hataroho kugurukyagurukya Abasesalonika baine kuba basemeriirwe muno kurora ngu Timoseo akaba ayehaireyo kukonyera nambere hali obwetaago.

15. Enyikara yaitu n’esobora eta kukwataho ebigendererwa byaitu? Bazaaho ekyokurorraho.

¹⁵ Nitusobora kwega kuruga omuli ebi ebyahikireho Paulo omu Sesalonika. Nitusobora kweteraho ekigendererwa, baitu enyikara yaitu n’esobora kuhinduka kandi ekatulemesa kukihikaho. (Mug. 9:11) Kakuba oyesanga omu nyikara nk’egi, n’osobora kuhinduramu ekigenderwa kyawe nukwo okaserra eki eky’okurusobora. Kinu nikyo ow’oruganda Ted na mukazi we Hiedi bakozere. Kurwara kukabaletera kuruga ha Beseri. Baitu okugonza okubainiire Yahwe kukabaleetera kuserra emiringo endi ey’okwongera ha buheereza bwabo. Ha kubanza bakatandika kuheereza nka bapayoniya abakasumi koona. Hanyuma bakakomwa kuheereza nka bapayoniya ab’embaganiza kandi Ted akatendekwa kuba mukonyezi w’omuroleerezi w’ekicweka. Baitu hanyuma emyaka nambere abaroleerezi b’ebicweka basemeriire kugarukira kuheereza ekahinduka. Ted na Hiedi bakakyetegereza ngu bakaba bakuzire muno kugumizaamu nibaheereza Yahwe omu buheereza obu. N’obukiraaba ngu bakahwamu amaani, bakakyetegereza ngu nibasobora kuheereza Yahwe omu miringo endi. Ted nagamba ngu, “Twegere ngu titusemeriire kuteeka muno omutima ha mulingo gumu gwonka ogw’okuheereza Yahwe.”

16. Isomo ki eriturukwega kuruga omu Abagaratiya 6:4?

¹⁶ Titwine busobozi bwona ha bintu byona ebibaho omu bwomeezi bwaitu. Nahabweki kikuru muno kwerinda kuteekereza ngu tuli b’omugaso muno hali Yahwe habw’obujunanizibwa obutwine rundi kulengesaniza obujunanizibwa bwaitu n’obw’abantu abandi. Hiedi nasoborra ngu, “Nikiija kukumaraho obusinge kakuba olengesaniza obwomeezi bwawe n’obw’abantu abandi.” (Soma Abagaratiya 6:4.) Ekikuru kiri, kuserra emiringo ey’okukonyeramu abandi n’okuheereza Yahwe. *

17. Biki ebyosobora kukora kutunga obujunanizibwa oburukukiraho?

 ¹⁷ Nikiija kukwanguhira kwongera ha buheereza bwawe hali Yahwe kakuba oikaza obwomeezi bwawe bworobere, kandi okerinda amabanja agotarukwetaaga. Wetereho ebigendererwa ebitaito ebirakukonyera kuhika ha bigendererwa byawe ebikooto. Ekyokurorraho, ekigendererwa kyawe ekikooto obukiraaba ky’okufooka payoniya ow’akasumi koona, omu kasumi kanu n’osobora kutandika kuheereza nka payoniya omusagiki buli kwezi. Kakuba ekigendererwa kyawe kiba kiri eky’okufooka omuheereza omu kitebe, n’osobora kutandika kumara obwire bwingi omu buheereza, kandi n’omu kubungira abarwaire hamu n’abakuzire muno omu myaka omu kitebe kyanyu. Ebintu ebyorayega hati, nibisobora kukukingurraho emigisa endi ey’okuheereza omu kasumi ak’omu maiso. Cweramu kimu kuteekamu amaani kuhikiiriza kurungi buli bujunanizibwa bwona obworatunga.​—Bar. 12:11.

18. Kiki ekyorukwega kuruga omu kyokurorraho kya Beverley? (Rora n’ekisisani)

¹⁸ N’obuturukuba tukuzire omu myaka, nitusobora kweteraho n’okuhika ha bigendererwa eby’omwoyo. Tekerezaaho ekyokurorraho ekya munyaanya itwe Beverley ow’aine emyaka 75. Akaba aine oburwaire obw’amaani obwamuleteraga kugumirwa kurubata. Baitu akaba nagonza kwejumbira omu bwijwire omu kampaini ey’okuraaliza abantu ha Kiijukyo. Nahabweki, aketeraho ebigendererwa ebimu. Beverley obuyahikiriize ebigendererwa bye, akasemererwa muno. Amaani agayatairemu gakekambisa n’abandi nabo kuteekamu amaani omu buheereza. Yahwe nasiima muno omulimo ab’oruganda na banyaanya itwe abakuzire omu myaka ogubarukukora, n’obukiraaba ngu enyikara yabo ebalemesa kukora ekibakugondeze kukora.​—Zab. 71:17, 18.

19. Bigendererwa ki eby’omwoyo ebitusobora kweteraho?

¹⁹ Wetereho ebigendererwa ebyorukusobora kuhikiiriza. Kurakuraniza emiringo ey’erasemeza Yahwe. Tunga obukugu oburakukonyera kuba w’omugaso hali Ruhanga hamu n’ekitebe kye. Serra emiringo ey’erakukonyera kwongera kuheereza Abakristaayo bagenzi baawe omu bwijwire. * Kusisanaho na Timoseo, Yahwe naija kuha omugisa ‘okukurakurana kwawe kweyoleke hali boona.’​—1 Tim. 4:15.