1. Ne a vaegā fakamoemoega faka-te-agaga e mafai o fakatoka ne tatou?

 E PELĀ me ne Kelisiano ‵tonu, e a‵lofa malosi tatou ki a Ieova. E ma‵nako tatou ke tuku atu a te ‵toe mea ‵lei i te ‵tou taviniga ki a ia. E ‵tau o fakatoka ne tatou a fakamoemoega faka-te-agaga, e pelā mo te atiakaga o uiga faka-Kelisiano, tauloto ki atamai aoga, kae onoono ki auala ke tavini atu ki nisi tino. *

2. Kaia e ‵tau ei o fakatoka ne tatou a fakamoemoega faka-te-agaga kae ga‵lue malosi ke fakataunu?

² Kaia e ‵tau ei o ma‵nako tatou ke momea aka te ‵tou gasolo ki mua i te feitu faka-te-agaga? A te mea muamua, me e fia fakafiafia atu tatou ki te ‵tou Tamana faka-te-lagi. E fiafia a Ieova māfai e lavea ne ia tatou e fakaaoga katoatoa ‵tou atamai mo taleni i tena taviniga. E se gata i ei, e ma‵nako tatou ke momea aka te ‵tou gasolo ki mua i te feitu faka-te-agaga ko te mea ke mafai o fesoasoani atu ki ‵tou taina mo tuagane. (1 Tesa. 4:9, 10) Faitalia me e pefea te ‵tou leva i te munatonu, koi mafai eiloa o gasolo tatou ki mua i te feitu faka-te-agaga. Ke onoono tatou ki auala e mafai ei o fai tatou penā.

3. E ‵tusa mo te 1 Timoteo 4:12-16, se a te mea ne fakamalosi atu a te apositolo ko Paulo ke fai ne Timoteo?

³ I te taimi ne tusi ei ne te apositolo ko Paulo tena tusi muamua ki a Timoteo, kae ko oti ne fai te tamataene tenā mo fai se toeaina atamai. Kae ne fakamalosi atu a Paulo ki a ia ke tumau i te gasolo ki mua i te feitu faka-te-agaga. (Faitau te 1 Timoteo 4:12-16.) Kafai e mafaufau koe ki pati a Paulo, ka iloa ne  koe me ne manako a ia ke gasolo ki mua a Timoteo i auala e lua: mai te atiakaga o uiga faka-Kelisiano e pelā mo te alofa, fakatuanaki, mo amioga ‵ma, e penā foki mo te momea aka o tena atamai i te faitau i mua o tino, i te fakamalosi atu, mo te akoako atu. Ka sau‵tala tatou ki a Timoteo, ke iloa ne tatou a te aoga ke fakatoka a fakamoemoega ‵lei ko te mea ke gasolo tatou ki mua i te feitu faka-te-agaga. Ka mafau‵fau foki tatou ki nisi auala e mafai ei o uke atu ‵tou mea e fai i te galuega talai.

4. E ‵tusa mo te Filipi 2:19-22, se a te mea ne fai ei a Timoteo ke fai mo tavini aoga a Ieova?

⁴ Se a te mea ne fai ei a Timoteo ke fai mo tavini aoga a Ieova? Ko ana uiga ‵gali faka-Kelisiano. (Faitau te Filipi 2:19-22.) Mai fakamatalaga a Paulo e uiga ki a Timoteo, e lavea ne tatou me i a ia e loto maulalo, e fakamaoni, e galue malosi, kae fakatuagagina. E loto alofa kae atafai malosi a ia ki taina. Ona ko te mea tenā, ne alofa malosi a Paulo ki a Timoteo kae ne seki taofi aka ne ia a tōfiga faiga‵ta mai i tou tagata. (1 Koli. 4:17) I se auala tai ‵pau, e alofa foki a Ieova ki a tatou kae ka aoga malosi tatou ki te fakapotopotoga māfai e ati aka ne tatou a uiga kolā e fiafia a ia ki ei.—Sala. 25:9; 138:6.

5. (a) E fakatoka pefea ne koe se fakamoemoega ke ati aka se uiga faka-Kelisiano? (e) E pelā mo te ata, e galue pefea se tuagane talavou ki tena fakamoemoega ke fakaasi atu te loto malamalama ki nisi tino?

⁵ Filifili se fakamoemoega mautinoa. Ke ‵talo kae mafaufau ki uiga kolā e manakogina ke galue malosi koe ki ei. Ko fili ei se uiga e tasi telā e ‵tau o saga tonu koe ki ei. E pelā mo te mea tenei, e mata, e mafai o momea aka te lasi o tou loto malamalama io me ko tou manako malosi ke fesoasoani atu ki taina tapuaki? E mata, e manakogina ke momea aka ou uiga filemu kae loto fakamagalo? Ka fesoasoani malosi atu ki a koe māfai e fesili atu ki se taugasoa pili mō ne manatu ke mafai o momea aka tou ‵lei i feitu konā.—Faata. 27:6.

6. E taumafai pefea koe ke fakataunu tou fakamoemoega i te atiakaga o se uiga ‵lei?

⁶ Taumafai ke fakataunu tou fakamoemoega. E fai pefea ne koe te mea tenā? A te auala e tasi ko te sukesuke faka‵lei a te uiga telā e manako koe o galue ki ei. Kāti ko fakaiku aka ne koe ke galue ki te atiakaga o te loto fakamagalo ki nisi tino. Kāti ka kamata koe mai te faitau kae mafaufau ‵loto ki tala o tino i te Tusi Tapu kolā ne  toka o fakamagalo a nisi tino mo latou kolā ne seki fai penā. Mafaufau ki te tala o Iesu. Ne loto fiafia a ia o fakamagalo a nisi tino. (Luka 7:47, 48) Ne seki kilo atu a ia ki olotou mea ‵se kae ne kilo atu ki mea e mafai ne latou o fai. E ‵kese mai i a ia, a Falesaio i aso o Iesu ne “mafau‵fau me e seai se aoga o nisi tino.” (Luka 18:9) Kafai ko oti ne mafaufau ‵loto ki tala konei, ke fesili ifo: ‘Ne a mea e lavea ne au i nisi tino? Ne a olotou uiga e fakaiku aka ne au ke saga tonu atu ki ei?’ Kafai e faigata ki a koe ke fakamagalo se tino, taumafai o tusi ki lalo a uiga ‵lei o te tino tenā. Ko fesili ifo ei: ‘E pefea te kilokiloga a Iesu ki te tino tenei? E mata, ka fakamagalo ne ia?’ A vaegā sukesukega penā ka fesoasoani mai ke fai a ‵fuliga ki ‵tou mafaufauga. Muamua la, kāti e ‵tau o taumafai malosi tatou ke fakamagalo se tino telā ne fai ne ia ke ita tatou. Kae kafai e tumau tatou i te ga‵lue ki ei, fakamuli loa ka toka tatou o fakamagalo atu.

7. E ‵tusa mo te Faataoto 22:29, i auala fea e fakaaoga ei ne Ieova a tino ga‵lue apo i aso nei?

⁷ A te suā fakamoemoega e mafai o fakatoka ne koe, ko te tauloto ki se atamai aoga. Mafaufau ki te tokouke o tino e manakogina ke faite a fale Peteli, Fale Fai Fono, mo Fale Tapuaki. E tauloto ne tino ga‵lue konei a atamai e uke mai te ga‵lue fakatasi mo taina kolā e apo i galuega penā. E pelā mo te ata, e tauloto ne taina mo tuagane a ata‵mai kolā e manakogina ke tausi faka‵lei a Fale Fai Fono mo Fale Tapuaki. I auala konei mo nisi auala aka, ko fakataunu eiloa ne Ieova te Atua, “te Tupu o te se-gata-mai,” mo Keliso Iesu, “te Tupu o . . . tupu,” a mea fakaofoofogia e auala i tino ga‵lue apo konei. (1 Timo. 1:17; 6:15; faitau te Faataoto 22:29.) E ma‵nako tatou o ga‵lue malosi o fakaaoga ‵tou atamai ke fakaaloalo ei ki a Ieova, kae e se ko tatou.—Ioa. 8:54.

8. E fakatoka pefea ne koe se fakamoemoega ke fakaakoako ki se atamai fakapito?

⁸ Filifili se fakamoemoega mautinoa. Se a te atamai e mafai o fakaakoako malosi koe ki ei? Fesili atu ki toeaina i tau fakapotopotoga io me ko te otou ovasia o te seketi, me se a te atamai e mafau‵fau latou e mafai o fakaakoako koe ki ei. Kafai e mafau‵fau latou me e ‵tau o fakamasani koe ki te auala e faipati io me akoako atu ei koe, fesili atu ki a latou ke taku mai se atamai fakapito e ‵tau o galue koe ki ei. Tenā ko galue ei koe ki ei. E fai pefea ne koe te mea tenā?

9. E taumafai pefea koe ke fakataunu tou fakamoemoega i te fakaakoako ki se atamai fakapito?

⁹ Taumafai ke fakataunu tou fakamoemoega. Kāti e manako koe ke momea aka tou atamai i te akoako atu. E mafai o sukesuke faka‵lei koe ki te polosiua ko te Ke Atamai i te Faitau mo te Akoako Atu. Kafai e isi sou tōfiga i te fakatasiga i loto i te vaiaso, e mafai o fakamolemole atu koe ki se taina apo ke fakalogologo ki tou tōfiga mai mua o te fakatasiga kae tuku atu ne manatu fesoasoani. Ke fakatoka faka‵lei ki ou tōfiga mai mua o te taimi ke lavea mai ne tino a tou galue malosi mo tou fakatuagagina.—Faata. 21:5; 2 Koli. 8:22.

10. Taku mai se tala e uiga ki te auala e mafai o momea aka te ‵tou ‵lei i se atamai fakapito telā e taumafai tatou ki ei.

¹⁰ Kae e a māfai a te atamai e manako koe o galue ki ei, se mea telā e faigata ki a koe? Ke mo a ma ‵fiu vave! Ne faigata ki te taina ko Garry ke faitau faka‵lei. E masaua ne ia a lagonaga ma i te taimi ne faitau atu a ia i se leo maluga i fakatasiga a te fakapotopotoga. Kae ne tumau eiloa tena taumafai ki ei. Ne fai mai a ia me ona ko akoakoga ne maua ne ia, ko mafai nei ne ia o fai a lāuga i Fale Tapuaki, fono o seketi, mo fono ‵lasi!

11. E pelā mo Timoteo, ne a mea ka fesoasoani mai ke toka ‵lei tatou mō nisi tiute?

 ¹¹ E mata, ne fai a Timoteo e pelā me se failauga apo io me se faiakoga tu ‵kese? E se fai mai i te Tusi Tapu. Kae e mautinoa me ne gasolo aka eiloa te magoi o Timoteo i te faiga o ana tiute ona ko tena fakalogo ki pati fakatonutonu a Paulo. (2 Timo. 3:10) I se auala tai ‵pau, kafai e ati aka ‵tou atamai, ka toka ‵lei tatou mō nisi tiute.

12. Ne aoga pefea ki a koe a te fesoasoani o nisi tino?

¹² E maua ne tatou katoa a mea aoga mai te fesoasoani o nisi tino. Kafai e ulu tatou i te fa‵kaimasaki, e fia‵fia tatou māfai ko āsi mai a toeaina kolā e aofia i Komiti Fesokotaki mo Fa‵kaimasaki io me ko Potukau Asiasi Tino Ma‵saki. Kafai ko fe‵paki tatou mo se tulaga faigata, e loto fakafetai tatou māfai e fakaaoga ne se toeaina ana taimi ke fakalogologo kae fakamafanafana mai. Kafai e manakogina ne tatou a te fesoasoani i te faiga o se akoga faka-te-Tusi Tapu, e fia‵fia tatou māfai e kau mai se paenia apo kae fai ana manatu. A taina mo tuagane katoa konei e fia‵fia o fesoasoani mai ki a tatou. E mafai o maua ne tatou te fiafia tenā māfai e loto fia‵fia tatou ke tavini atu ki ‵tou taina. “E sili atu te fiafia o te tino telā e tuku atu ana mea i lō te maua ne ia,” ko pati a Iesu. (Galu. 20:35) Kafai e manako koe ke uke au mea e fai i tau taviniga i auala konei io me ko nisi auala tai ‵pau, ne a mea ka fesoasoani atu ke fakataunu ou fakamoemoega?

13. Kafai ko fakatoka se fakamoemoega totino, se a te mea e ‵tau o masaua ne tatou?

¹³ Fakaeteete ke mo a ma kausaki atu ki se fakamoemoega se mautinoa. E pelā mo te mea tenei, kāti ka mafaufau ifo koe, ‘Au e manako ke uke aku mea e fai i te fakapotopotoga.’ Kae kāti e faigata ke iloa atu te auala ke fakataunu se fakamoemoega penā, kae e se mafai foki o iloa atu me ko oti ne fakataunu ne koe te mea tenā. Tela la, ke filifili se fakamoemoega mautinoa. E mafai foki o tusi ki lalo ne koe te fakamoemoega tenā mo te auala e mafaufau koe ke fakataunu ei.

14. Kaia e ‵tau ei o toka tatou o fai a fakama‵fuliga māfai ko fakatoka ‵tou fakamoemoega?

¹⁴ E ‵tau foki o toka tatou o fai a fakama‵fuliga ki ‵tou fakamoemoega. Kaia? Me e se pule katoatoa atu tatou ki ‵tou fakanofonofoga. Ke fai se fakatusaga: Ne fesoasoani atu  te apositolo ko Paulo ke fakatu te fakapotopotoga fou i te fakai o Tesalonia. Kae mautinoa me ne fakamoemoe a ia ke nofo i konā kae fesoasoani atu ki Kelisiano ‵fou. Kae ne faimālō a Paulo ne tino ‵teke ke tiaki ne ia te fakai tenā. (Galu. 17:1-5, 10) Moi ne nofo a Paulo, penei ko fai ne ia ke ‵tu a ola o ana taina i se tulaga fakamataku. Kae ne seki ‵fiu vave a Paulo. I lō te fai penā, ne fai ne ia a fakama‵fuliga ona ko tulaga konā. Fakamuli ifo, ne uga atu ne ia a Timoteo ke fesoasoani atu ki manakoga faka-te-agaga o taina tali‵tonu fou i Tesalonia. (1 Tesa. 3:1-3) Ko tafaga la te fia‵fia o tino Tesalonia me ne loto fiafia a Timoteo o tavini atu i te koga ne manakogina ei tena fesoasoani.

15. E mafai pefea o pokotia ‵tou fakamoemoega ona ko nisi fakanofonofoga? Fakamatala mai.

¹⁵ E mafai o tauloto ne tatou ne mea aoga mai mea ne ‵tupu ki a Paulo i Tesalonia. Kāti e kausaki atu tatou ki se tauliaga i te taviniga, kae e se mafai o maua ne tatou ona ko nisi fakanofonofoga. (Fai. 9:11) Kafai tenā loa te mea e tupu ki a koe, ke toka o ‵fuli tou fakamoemoega ki se mea telā e mafai o fakataunu ne koe. Tenā eiloa te mea ne fai ne te tauavaga ko Ted mo Hiedi. Ona ko tulaga o masaki ne ‵tau o tiaki ne lāua te Peteli. Kae ne fakamalosi aka lāua ne te lā a‵lofa ki a Ieova ke ‵sala ki nisi auala ke fakalauefa atu te lā taviniga. Muamua la, ne paenia tumau lāua. Fakamuli ifo, ne ‵tofi lāua ke fai pelā me ne paenia fakapito, kae ne akoako a Ted ke fai pelā me se ovasia fesoasoani o te seketi. Kae ne mafuli te aofaki o tausaga e mafai o fai ei se tino mo ovasia o te seketi. Ne iloa aka ne Ted mo Hiedi me ko tō ma‵tua lāua ki te tauliaga tenei. E tiga loa te lā fanoa‵noa, ne iloa ne lāua me mafai eiloa o tavini atu ki a Ieova i nisi auala aka. Ne fai mai a Ted, “Ne tauloto māua ke mo a ma ‵saga tonu atu fua ki se vaega e tasi o te taviniga.”

16. Se a te akoakoga e tauloto ne tatou mai te Kalatia 6:4?

¹⁶ E se mafai o pule katoatoa atu tatou ki mea katoa e ‵tupu i ‵tou olaga. Tela la, se mea tāua ke mo a ma mafau‵fau tatou me e tāua fua tatou ki a Ieova ona ko ‵tou tofiga, io me mai te fakatautau o ‵tou tauliaga ki tauliaga e maua ne nisi tino. Ne fai mai a Hiedi, “Ka se fiafia eiloa koe māfai e fakatautau ne koe tou olaga ki mea e lavea ne koe i olaga o nisi tino.” (Faitau te Kalatia 6:4.) Se mea tāua eiloa ke ‵sala tatou ki auala kolā ka aoga i ei tatou. *

17. Ne a au mea e mafai o fai ke toka koe mō tauliaga i te taviniga?

¹⁷ Ke loto fiafia o tavini atu i nisi vaega o te taviniga mai te fakafaigofie o tou olaga  kae ‵kalo keatea mai te sōna faiga o kaitalafu. Fakatoka ne tamā fakamoemoega kolā ka fesoasoani atu ke fakataunu ou fakamoemoega tai ‵lasi atu. E pelā mo te mea tenei, kafai e fakamoemoe koe ke paenia tumau, e a, e mata, e mafai o tumau koe i te paenia lagolago i te taimi nei? Kafai e fakamoemoe koe ke fai pelā me se tavini fesoasoani, e a, e mafai o fakaaoga ne koe a taimi e uke i te galuega talai kae āsi atu ki tino ma‵saki mo tino ma‵tua i tau fakapotopotoga? A mea e tauloto ne koe i te taimi nei ka fesoasoani atu ke maua ne koe a tauliaga i te taviniga i aso mai mua. Ke na fakaiku aka ke fai ne koe te ‵toe mea e mafai i so se tofiga e tuku atu ki a koe.—Loma 12:11.

18. E pelā mo te ata, ne a au mea e tauloto mai te fakaakoakoga a Beverley?

¹⁸ E se tō ma‵tua tatou ke fakatoka kae ke fakataunu ‵tou fakamoemoega faka-te-agaga. Mafaufau ki te tuagane ko Beverley telā ko 75 ana tausaga. Ne maua ne ia se masaki telā ne faigata ki a ia ke sasale. Kae ne fia ‵lago katoatoa atu a ia ki te ‵kamiga o tino ki te Fakamanatuga. Tenā ne fakatoka ei ne ia a fakamoemoega mautinoa. I te taimi ne taunu ei a fakamoemoega konā o Beverley, ne fiafia malosi a ia. Ne fakamalosi atu ana taumafaiga ki nisi tino ke ga‵lue malosi foki i te galuega talai. E fakatāua eiloa ne Ieova a galuega a ‵tou taina mo tuagane ma‵tua, faitalia me ko se uke olotou mea e mafai o fai ona ko olotou fakanofonofoga.—Sala. 71:17, 18.

19. Ne a nisi fakamoemoega faka-te-agaga e mafai o kausaki atu tatou ki ei?

¹⁹ Fakatoka a fakamoemoega kolā e mafai o fakataunu. Ati aka a uiga kolā ka fakafiafia atu ki a Ieova. Tauloto ki atamai kolā ka fai ei ke aoga malosi koe ki te ‵tou Atua mo tena fakapotopotoga. ‵Sala ki auala ke tavini katoatoa atu ki ou taina mo tuagane. * E pelā mo Timoteo, mai te fakamanuiaga a Ieova, ka “lavea ‵lei ne tino katoa tou gasolo ki mua.”—1 Timo. 4:15.