1. Zvinangwa zvipi zvatingagara nazvo?

 NGEKUTI tiri Akristu ezvirokwazvo, tinoda maningi Djehovha. Ndiyo ndaa, tinoda kumupasa zvakanakisisa zvedu. Asi kuti timupase zvakanakisisa zvedu, tinodikana kugara no zvinangwa pakunamata, zvakaita hingana kusakurira unhu we ciKristu, kufundira mishobo mipsva ye kuita zviro uye kupsvaka mishobo ye kubetsera amweni. *

2. Ngei tinodikana kugara no zvinangwa zvekunamata uye topeta masimba kuti tizvidzadzise?

² Ngei tinodikana kupfarira kubudirira pakunamata? Maka-maka ngekuti tinoda kupfadza Baba edu e kudenga ano rudo. Djehovha anopfara maningi paanotiona teciseenzesa zviro zvatinokwanisa kuita kuti timuseenzere. Cikonzero cimweni cinoita kuti tide kubudirira pakunamata, nge cekuti nge kuita kudaro tinonyasa kubetsera hama no hanzvadzi dzedu. (1 Ate. 4:9, 10) Tese isusu tingarumbwa teciita zviri zvese kuti tibudirire pakunamata. Zvino ngatione kuti zano ra Pauro ringatibetsera kudini.

3. Maererano na 1 Timoti 4:12-16, Pauro wakakohomedzesa Timoti kuti aitei?

³ Pauro paakatarira Timoti tsamba yake yekutanga, Timoti wainga ari mukuru ano ruziyo. Kunyazi zvakadaro, Pauro wakamukohomedzesa kuti arumbwe ecibudirira pakunamata. (Erengai 1 Timoti 4:12-16.) Pamunonga mecierenga masoko a Pauro kuna Timoti, imwimwi mucakwanisa kuona kuti iyena waida kuti Timoti abudirire pakunamata pa matii mairi: kusakurira mawara e ciKristu akaita hingana rudo, kutenda, ruceno, kutunhudzira mushobo wake we kuerengera anhu, kufundisa, uye kuita  mharidzo. Muezaniso wa Timoti ucatibetsera kuona kuti kana tecida kubudirira pakunamata, tinodikana kugara no zvinangwa zvatinokwanisa kudzadzisa. Ticaonawo mishobo yatingaitira Djehovha zvakawanda.

4. Maererano na Afiripi 2:19-22, cinyi caiita kuti Timoti agare museenzi wa Djehovha anobetsera?

⁴ Cinyi caiita kuti Timoti agare museenzi wa Djehovha anobetsera? Mawara e ciKristu aainga nawo. (Erengai Afiripi 2:19-22.) Hingana zvakapanganidzwa na Pauro nge zva Timoti, tinokwanisa kuona kuti iyena waidzidodosa, wainga akagondeka, waiseenza no simba uye waithembeka. Iyena waida zvezvirokwazvo hama no hanzvadzi uye wainga akagadzirira kuabetsera. Ndiyo ndaa Pauro wainga asikathyi kupasa Timoti mabasa anoshupha. (1Ako. 4:17) Hino, kana tikasakurira mawara e ciKristu, ticanyasa kuseenzeswa no ungano uye Djehovha acatidawo maningi.—Pis. 25:9; 138:6.

5. (a) Cinyi cicamubetsera kuti musanangure wara ramunoda kutunhudzira kupangidza? (b) Hinga zviri kupangidzwa pa mifanikiso, zvinyi zvirikuizwa no hanzvadzi yecidjaha kuti itunhudzire kupangidza usisi?

⁵ Sanangurai cinangwa cimwe. Kumbirai rubetso Djehovha kuti mukwanise kuona kuti zviro zvipi zvamunodikana kugadzirisa pa unhu wenyu. Pedzepo sanangurai wara rimwe uye petai masimba kuti mutunhudzire kuripangidza. Pamweni mungaona kuti munodikana kufundira kugara no usisi uye kubetsera hama no hanzvadzi dzenyu. Mungafundira kugara munhu anopangidza runyararo uye anorekerera here? Ciro cingamubetsera nge ce kubvunzisa shamwari yamunogonda kuti ndipapi pamunodikana kugadzirisa.—Zvie. 27:6.

6. Munodikana kuitei kuti musakurire wara re ciKristu?

⁶ Petai masimba kuti mugumire cinangwa cenyu. Mungazviita kudini? Umwe we mushobo ngewekufunda wara ramunoda kutunhudzira kupangidza. Ngatimboti imwimwi munoda kufundira kugara munhu anorekerera nokukasika. Hino imwimwi mungafunda mu Bhaibheri miezaniso ye anhu airekerera no aya ainga asikarekereri. Ngo muezaniso, rangarirai nge zva Djesu. Ayena ainga asina cinetso kuti arekerere amweni. (Ruka 7:47, 48) Djesu ainga asikakandi ndangariro dzake pa zvishaishi zve amweni, asi aisanangura kuona zviro zvakanaka zvaaiita. Ayena ainga akasiyana no Afarisi “aiona anhu amweni hingana asikabetseri.” (Ruka 18:9) Mumasure me kurangarira miezaniso miiri idzi, dzibvunzisei kuti: ‘Ngazvipi zvandinoona pa anhu amweni? Kodi ndinosanangura  kukanda ndangariro dzangu pa mawara aanawo here?’ Kana zviri kumushuphira kurekerera munhu, edzai kutara mindanda we mawara aanawo. Pedzepo dzibvunzisei kuti: ‘Djesu anoona kudini munhu uu? Djesu aizomurekerera here?’ Kuita izvona kungamubetsera kuti mucinje mushobo wenyu wekurangarira. Zvingaita kuti pakutanga, imwimwi mungatodikana kuseenza no simba kuti mukwanise kurekerera munhu unonga amushaishira. Asi kana mukarumbwa meciseenza no simba, zvicamuitira nyore kuti mukwanise kurekerera anhu amweni.

7. Maererano na Zvierengo 22:29, Djehovha anoseenzesa kudini aseenzi anokwanisa kuita basa?

⁷ Cinangwa cimweni camungagara naco, nge ce kusakurira mushobo mupsva wekuita zviro. Cimborangarirai nge zve adzipiri anodikanwa pa zviwakwa zve Bheteri, Nyumba dze Magungano uye Nyumba dze Umambo. Akawanda e adzipiri aya akakwanisa kuita mabasa ngekuseenza pamwepo no hama dzaiziya kare basero uye dzainga dzino maeshiperiensiya. Hama no hanzvadzi dzirikufundira mabasa kuti dzigadzirise Nyumba dze Umambo uye dze Magungano. Ngekudaro, Djehovha Mwari, “Mambo asina magumo,” uye Djesu Kristu, “Mambo we . . . madzimambo,” arikuita zviro zvinoshamisa eciseenzesa anarume no anakadzi anokwanisa kuita mabasa. (1 Tim. 1:17; 6:15; erengai Zvierengo 22:29.) Isusu tinoda kuseenza no simba uye kuseenzesa zviro zvatinokwanisa kuita kuti tikudze Djehovha haiwa isusu.—Juau 8:54.

8. Cinyi cicamubetsera kuti musanangure mushobo mupsva wekuita zviro?

⁸ Sanangurai cinangwa cimwe. Mungasakurira mushobo upi mupsva wekuita zviro? Zvakadini kubvunzisa akuru e mu ungano kana kuti muonereri we nharaunda kuti mungasakurira mushobo upi wekuita zviro. Ngo muezaniso, pamweni awona angamubvunza kuti munodikana kutunhudzira mushobo wenyu wekufundisa. Kana zviri izvona, akumbirei kuti amubetsere kuona kuti ngapapi kamare pamunodikana kugadzirisa. Pedzepo senzai no simba kuti mugadzirise panodikanwepo. Asi ngazvipi kamare zvamunodikana kuita kuti muzvikwanise?

9. Mungaitei kuti mutunhudzire mushobo wenyu wekufundisa?

⁹ Petai masimba kuti mugumire cinangwa cenyu. Ngatimboti imwimwi murikuda kutunhudzira mushobo wenyu wekufundisa. Imwimwi mungafunda uye mungapeta masimba kuti museenzese mafundo ari mu broshura rinozwi Shingairira Kuverenga Nekudzidzisa. Kana mukapaswa dii rekuita pa misangano ye pakati pe sumana, ifundirei no hama imweni, uye ikumbirei kuti imubvunze paya pamunodikana kugadzirisa. Kunyazi taakutokwanisa kufundisa, tinondodikana kunyasa kugadzirira matii atinopaswa.—Zvie. 21:5; 2 Ako. 8:22.

10. Kodi zvingabviradi kamare kusakurira mushobo mupsva wekuita zviro kunyazi uwona wecitishuphira? Pasai muezaniso.

¹⁰ Asi zvakadini kana zvecimushuphira kusakurira mushobo mupsva wekuita zviro wamunonga masanangura? Musarembe! Hama inozwi Garry yainga isikanyasi kukwanisa kuerenga. Iyona yakabhuya kuti yaipsveruka maningi payaierenga no izwi guru pa misangano. Asi iyona yakapeta masimba kuti ikwanise kuerenga. Uye nge ndaa ye rowedzo raakatambira, nyamasi uno iyona inoita mharidzo mu ungano, pa magungano e nharaunda uye pa magungano e mutanha!

11. Hingana Timoti, cinyi cingatibetsera kuti tikwanise kuita mabasa edu zvakanaka?

¹¹ Kodi Timoti wakakwanisa kugara muiti we mharidzo uye mufundisi wakanaka here? Bhaibheri aribhui. Asi tingagonda hedu kuti Timoti  wakanyasa kukwanisa kuita mabasa ake no rubetso re zano raakapaswa ndi Pauro. (2 Tim 3:10) Ngo mushobo umwewo, kana tikapeta masimba kuti tisakurire mushobo mupsva wekuita zviro, tinonga takagadzirira kuita mabasa amweni aticapaswa.

12. Hama dzimweni dzakambomubetsera kudini?

¹² Tinobetsereka maningi patinobetserhwa no anhu amweni. Ngo muezaniso, patinonga tiri mucipitari, tinopfara maningi patinovhakacirhwa no akuru anoseenza mu Comissão de Ligação com Hospitais uye Grupo de Visitas a Pacientes. Patinonga tecisongana no zvinetso mu upenyu, zvinopfadza maningi kuvhakacirhwa no mukuru ano rudo kuti atizwe uye atinyaradze. Uye patinonga tecida rubetso kuti tiitise fundo ye Bhaibheri, tinotenda maningi mupionero wagara no basa paanotiperekedza ku fundo iyona, uye otibvunza maonero ake nge zviya zvatinodikana kugadzirisa. Hama no hanzvadzi idzi dzinopfara maningi padzinotibetsera. Isusu tingazwawo mupfaro uwona ngekugara takagadzirira kubetsera hama dzedu. Djesu akati: “Kupa kuno mupfaro mukuru kudarika kupaswa.” (Zvi. 20:35) Kana mecida kuitira Djehovha zvakawanda, cinyi cicamubetsera kuti mudzadzise cinangwa icona?

13. Pamunosanangura cinangwa munodikana kuedzurirei?

¹³ Sanangurai cinangwa cimwe kuti mudzadzise. Pamweni mungarangarira kuti, ‘Inini ndaizoda kuitira ungano zvakawanda.’ Asi zvingamushuphira kuziya mushobo wekudzadzisa cinangwa icona, uye zvingamushuphirawo kuziya kuti macidzadzisa here. Ndiyo ndaa sanangurai cinangwa cakadjeka uye cakananga. Pamweni mungatotara cinangwa cakhona uye zvamunodikana kuita kuti mucidzadzise.

14. Ngei tinodikana kugara anhu anokasika patinosanangura cinangwa?

¹⁴ Tinodikana kugara anhu anokasika kuita ciito patinosanangura cinangwa. Ngei? Ngekuti anguwa yesepi yatinokwanisa kuonerera migariro yedu ye upenyu. Rangarirai muezaniso we muphostori Pauro: Iyena wakabetsera pakuumba ungano ipsva ku thaundi re Tesaronika. Uye zvezvirokwazvo wainga ano cinangwa cekubetsera hama dzeyo. Asi nge ndaa yekuteererhwa, iyena wakabambidzirhwa kubuda mu thaundiro. (Zvi. 17:1-5, 10) Kudai Pauro asikazi kubuda mu thaundiro, ungadai akakanda upenyu we hama dzake pa ngozi.  Asi kunyazi no cinjo idzi, Pauro aazi kuremba. Iyena wakakwanisa kudjairana no migariro ye zviro yainga yacinja. Nokuhamba ke nguwa, iyena wakatuma Timoti kuti apase hama dze ku Tesaronika zviro zvinodikanwa pakunamata. (1 Ate. 3:1-3) Zvezvirokwazvo hama no hanzvadzi dzakapfara maningi ngekuti Timoti wakadzipira kuti adzibetsere.

15. Migariro ye zviro yatisikakwanisi kuonerera ingapingaidza kudini zvinangwa zvedu? Pasai muezaniso.

¹⁵ Pano zvatinofunda kubva pa zviro zvakaitika no muphostori Pauro ku Tesaronika. Pamweni tiri kupeta masimba kuti titambire makomborero, asi migariro ye zviro yatisikakwanisi kuonerera ingaita kuti tisadzadzise cinangwa icona. (Mup. 9:11) Kana zviri izvona zviri kuitika kamuri munodikana kugara munhu unokasika uye kusanangura cinangwa camunokwanisa kudzadzisa. Ndizvona zvakaizwa na Ted uye Hiedi. Kazado ii yaiseenzera ku Bheteri, asi akasiya basa rawo nge ndaa ye dambudziko re uthongo. Kunyazi zvakadaro, kuda kaaiita Djehovha kakaita kuti apsvake mishobo imweni yekuitira Djehovha zvakawanda. Awona akatanga kuseenza hinga mapionero e nguwa dzese. Uye nokuhamba ke nguwa, akagadzwa kuti agare mapionero kamare. Uye Ted wairowedzwa kuti agare mubetseri we muonereri we nharaunda. Pedzepo, makore anodiwa kuti munhu agare muonereri we nharaunda akacinja. Ndiyo ndaa, zvainga zvisikacaiti kuti Ted na Hiedi aitezve basa irona. Awona akatsukwara ndizvona, asi akazwisisa kuti zvaiita kuitira Djehovha zvakawanda nge mishobo imweni. Ted unoti, “Isusu takafundira kuti atidikani kurangarira kuti tingandoseenzera Djehovha nge mushobo umwe.”

16. Tingafundei kubva pana Agaratiya 6:4?

¹⁶ Isusu atingakwanisi kuonerera zviro zvese zvinoitika mu upenyu wedu. Ndiyo ndaa tisikadikani kurangarira kuti kukosha katinoita mumadziso a Djehovha kunotsamira pa ubaba watinawo, uye atidikaniwo kuezanisa ubaba watinawo no we amweni. Hiedi unopanganidza eciti, “Ucagara usina runyararo kana ukaezanisa upenyu wako no upenyu we anhu amweni.” (Erengai Agaratiya 6:4.) Isusu tinodikana kupsvaka mishobo yatingabetsera nayo anhu amweni uye kuseenzera Djehovha. *

17. Mungaitei kuti mupaswe mabasa amweni?

¹⁷ Zvicaita nyore kuitira zvakawanda Djehovha kana imwimwi mukapsvaka kugara no upenyu usina zvakawanda uye motama kupedza mare no zviro zvisikakoshi. Imwimwi mungakwanisa kugara no zvinangwa zvidoko kuitira kuti nokuhamba ke nguwa muzokwanise kugumira zvinangwa zvikuru zvamunazvo. Ngo muezaniso,  kana cinangwa cenyu nge ce kugara mupionero we nguwa dzese, zvakadini kutanga magara mupionero we rubetso parizvino? Kana muno cinangwa cekugara mubati anoseenzera, zvakadini kutanga ngekupedza nguwa yakawanda muri mu basa rekuparidzira uye kuvhakacira hama no hanzvadzi dzacembera kana kuti dziri kurhwara? Izvi zvicamubetsera kuti mugare no maeshiperiensiya akawanda uye zvicafungura mukana wekuti muzogare no ubaba wakawanda mune ramangwana. Ngekudaro, shingai kuseenza no simba pa basa ripi haro ramunopaswa.—Aro. 12:11.

18. Hingana zvatiri kuona pa mifanikiso, tingafundei kubva pa muezaniso we hanzvadzi ii?

¹⁸ Apana munhu wakanyanya kucembera kuti agare uye agumire zvinangwa. Onai eshiperiensiya ye hanzvadzi inozwi Beverley ino makore 75. Iyona yainga ino cinetso cakakura cekuhamba nge ndaa ye cinetso ce uthongo caainga anaco. Asi iyona yaida kuitira zvakawanda Djehovha pa kampanya yekupika anhu kuti auye ku Cirangaridzo. Nge ndaa yazvo, iyona yakasanangura kugara no zvinangwa zvakananga, uye paakakwanisa kugumira zvinangwa zvaainga anazvo pa kampanya awona akapfara maningi. Muezaniso wawo wakakohomedzesa hama dzimweni kuti dziitewo zvakawanda mu basa rekuparidzira. Djehovha anokoshesa maningi basa rinoizwa nge hama no hanzvadzi dzedu dzacembera kunyazi dzisikacakwanisi kuita zvakawanda.—Pis. 71:17, 18.

19. Ngazvipi zvinangwa zvimweni zvokunamata zvatingagadza?

¹⁹ Sanangurai zvinangwa zvamungakwanisa kugumira. Petai masimba kuti musakurire mawara eciKristu anopfadza Djehovha. Fundirai mishobo mipsva yekuita zviro icaita kuti munyase kuseenzeswa na Djehovha uye no sangano rake. Uye garai mecipsvaka mikana ye kuitira zvakawanda hama dze mu ungano. * Kuita hingana Timoti, nge cikomborero ca Djehovha “kubudirira kenyu kunganyasa kuonekwa nge anhu ese.”—1 Tim. 4:15.