1. Бараалгалга кандыг сорулгаларны салып болур?

 ХРИСТОСТУҢ алыс шын эдерикчилери болгаш, Иеговага дыка ынак бис. Ынчангаш Аңаа эң экини бериксеп турар бис. Бир эвес бисте бар шупту салым-чаяанывысты үндүр ажыглаар дизивиссе, бараалгалга сорулгаларны b салыр херек. Чижээ, Бурганга таарымчалыг шынарларны сайзырадып, ажыктыг арга-мергежилдерни өөренип база өскелерге дузалаар аргаларны дилеп болур бис.

2. Бараалгалга сорулгаларны салып, оларны чедип алыр дээш, чүге чүткүүр ужурлуг бис?

² Чүге чаңгыс черге турбайн, бараалгалга экижиир ужурлуг бис? Чүге дээрге дээрде ынакшылдыг Адавысты өөртүрүн күзээр бис. Кажан бис бүгү салым-чаяанывысты болгаш арга-шинээвисти Иеговага бараан болур дээш ажыглаарывыска, Ол аажок өөрүп турар. Оон ыңай чүткүлдүг бараалгап тургаш, бүзүрээн акы-угбаларывыска оон-даа хөй ажык-дузаны чедирип турар бис (1 Фес. 4:9, 10). Алыс шынны каш-даа чыл бурунгаар билип алган болзувусса, шуптувус бараалгалга чедиишкиннерни кылыр дээш кызар ужурлуг бис. Ону кылырынга биске чүү дузалаарын сайгарыптаалыңар.

3. Павел Тимофейни чүүже оттурган? (1 Тимофейге 4:12—16).

³ Павел элчин Тимофейге бирги чагаазын бижип турда, Тимофей чеже-даа аныяк бол, дуржулгалыг удуртукчу чораан. Ындыг-даа бол, Павел ону бараалгалга оон-даа өзүп-мандыырынче оттурган. (Номчуптуңар: 1 Тимофейге 4:12—16.) Павелдиң сөстеринден алырга, ол Тимофейни:  1) Бурганга таарымчалыг шынарларны сайзырадып, ынакшылдың, бүзүрелдиң база арыг-чаагай чоруктуң үлегери болурунче, 2) оон-даа эки номчуур, суртаалдаар, өөредир дээш, башкылаар арга-мергежилин экижидеринче кыйгырып турар. Бурганга бараалгалга чедиишкинниг болур дизе, чедип ап шыдаар сорулгаларны салыр херек деп Тимофейниң чижээнден көөр бис. Оон ыңай бараалгалга хөйнү кылыр кандыг аргалар барын билип алыр бис.

4. Тимофей Иегованың караанга чүге үнелиг бараалгакчы турган? (Филипчилерге 2:19—22).

⁴ Тимофей Иегованың караанга чүге үнелиг бараалгакчы турган? Чүге дээрге ол Аңаа таарымчалыг шынарларны сайзырадып, экижидип алган. (Номчуптуңар: Филипчилерге 2:19—22.) Павел Тимофейни биче сеткилдиг, бердинген, кызымак болгаш бүзүрелдиг кижи кылдыр санап турган. Тимофей ха-дуңмазынга ынак чораан база олар дээш сеткилинден сагыш човап турган. Ынчангаш Павел ону үнелеп, аңаа нарын даалгалар дагзырындан кортпаан (1 Кор. 4:17). Бис база Бурганга таарымчалыг шынарларны сайзырадыр болзувусса, Ол биске оон-даа ынак болур. Оон ыңай бис акы-угбаларга оон-даа ажыктыг апаар бис (Ыд. ыр. 24:9; 137:6).

5. а) Кайы шынарны сайзырадырын канчаар тодарадып алырыл? б) Чурукту көрүңер. Угбавыска оон-даа кээргээчел болурунга чүү дузалап турар?

⁵ Тода сорулганы салып алыңар. Иеговага мөргүп тура, Аңаа таарымчалыг кандыг шынарны сайзырадырын боданыңар. Экижидиксеп турар шынарыңарны шилип алыңар. Силерге кээргээчел чорук болгаш чыышта акы-угбаларга дузалаар күзел чедишпейн турар бе? Азы өскелер-биле маргыжар сундулуг силер бе? Сеткилиңерден өршээри силерге берге бе? «Чүнү экижидип алыр болзумза эки?» деп эжиңерден айтырып болур силер (У. ч. 27:6).

6. Бурганга таарымчалыг шынарны сайзырадыр сорулганы чедип алырынга силерге чүү дузалаар?

⁶ Сорулгаңарже чүткүңер. Аңаа чүү дузалаар? Мындыг арганы ажыглап болур силер. Сайзырадып алыксаан шынарны баштай янзы-бүрү талалардан шинчилеңер. Чижээ, улусту өршээри силерге берге болза, чүүден эгелеп ап болур? Библияда улусту белени-биле өршээп турган база өршээвейн чораан улустуң чижектери хөй. Оларның төөгүлери силерни чүү чүвеге өөредип турарын боданыңар. Чугаажок, өршээринге хамаарыштыр эң-не эки үлегерни Иисус Христос көргүскен  (Лк. 7:47, 48). Ол улустуң частырыгларынче эвес, а оларның эки талаларынче кичээңгей салыр турган. А фарисейлер «өскелерни куду көрүп», кижи кылдыр санавас чораан (Лк. 18:9). Ол удурланышкак чижектерниң дугайында бодангаш, бодуңардан айтырыңар: «Мен улуста бир дугаарында чүнү эскерер-дир мен? Оларның кандыг шынарларынче кол кичээнгей салыр-дыр мен?» Бир кижини өршээп чадап турар болзуңарза, ооң эки шынарларын кызып сактып тургаш, бижип алыңар. Оон: «Иисус бо кижиниң дугайында чүнү бодап турар? Ол ону өршээр бе?» деп боданыңар. Шак мындыг арга бисти хомудадыпкан улусту өршээринге база угаан-бодалывысты өскертиринге дузалаар. Билдингир чүүл, улусту дораан өршээп өөренип алыры белен эвес. Ынчалза-даа бо арганы ажыглап тургаш, улусту сеткилиңерден өршээп өөренип алыр силер.

7. Бодунуң ажыл-херээнге мергежээн улус Иеговага өндүр улуг херектерни бүдүреринге канчаар дузалажып турар? (Чугаалар 22:29).

⁷ Оон ыңай кандыг-бир ажыктыг арга-мергежилге өөренир сорулганы салып болур. Бүгү делегейде салбырларның, Хурал залдарының болгаш Шуулган залдарының тудугларында ажылдап чоруур акы-угбаларның дугайында боданып көрүңер. Оларның хөй кезииниң тудуг ажылынга дуржулгазы чок турган, ынчалза-даа бодунуң ажыл-херээнге мергежээн акы-угбалар-биле эгин кожа ажылдажып тургаш, олар хөй чүвеге өөренип алганнар. Чурукта көргүскени дег, акылар-даа, угбалар-даа организациявыстың оран-саваларын септеп, хандырарынга өөренип ап турар. «Мөңге Хаан», Иегова Бурган, болгаш «хааннарның Хааны», Иисус Христос, ол кызымаккай ажылчыннарның холу-биле өндүр улуг херектерни бүдүрүп чоруур (1 Тим. 1:17; 6:15—16; номчуптуңар: Чугаалар 22:29). Бис база арыг сеткиливистен ажылдап, бодувусту эвес, а Иегованы алдаржыдар дээш, арга-мергежиливисти ажыглаарын күзээр-дир бис (Ин. 8:54).

8. Кайы арга-мергежилди сайзырадырын кым айтып берип болур?

⁸ Тода сорулганы салып алыңар. Силерге кандыг арга-мергежилди сайзырадыр болза эки? Ооң дугайында хуралдың удуртукчузундан азы кожуун хайгааракчызындан айтырып болур силер. Чижээ, олар силерге чугааланыр азы башкылаар арга-мергежилди сайзырадып, экижидер болзуңза эки деп чугаалап болур. Ынчалза-даа чүнү сайзырадырын тодаргайы-биле айтырып алыңар. Оон салып алган сорулгаңарже бичиилеп чүткүңер. А ону кылырда чүнү канчаарыл?

9. Бир-ле арга-мергежилди сайзырадыр сорулганы чедип алырынга силерге чүү дузалаар?

⁹ Сорулгаңарже чүткүңер. Чижээ, башкылаар арга-мергежилиңерни экижидип алырын шиитпирлеп алган дижик силер. Ынчаарга «Номчуур болгаш өөредир арга-мергежилиңни сайзырат» деп брошюраны эки чукшуп шинчилээр болзуңарза эки. Ажыл хүнүнде болур чыышка даалга күүседириниң мурнунда, канчаар белеткенип турарыңарны дыңнаар кылдыр, дуржулгалыг илеткелчини дилеңер. Ол силерге чүнү экижидип ап болурун айтып бээр. Чүгле чечен-мерген башкы эвес, а кызымаккай болгаш бүзүрелдиг кижи боор дээш кызыңар (У. ч. 21:5; 2 Кор. 8:22).

10. Сайзырадып алыксаар арга-мергежиливисти экижидеринге чүү дузалаар? Чижекти чугаалаңар.

¹⁰ Ийе, чамдык арга-мергежилдерни сайзырадып алыры белен эвес. Бир-ле чүүлге салым-чаяан чок бооп болур бис. Ынчалза-даа муңгараан херээ чок! Гэри дээр акывыска дески болгаш чүгүртү номчууру берге турган. Кажан аңаа чыыштарга номчуур даалга бээрге, ол ыятканындан кирер чер тыппас турган.  Ынчалза-даа Гэри бодун чөгенчиг кылдыр санавайн, кызымаккай белеткенип турган. Амгы үеде ол дуржулгалыг номчукчуларның болгаш дептерлеривисте сүмелерниң ачызында сценага бодун дүвүрел чок алдынып, безин кожуун болгаш регион шуулганнарында илеткелдерни чугаалап турар.

11. Тимофейге дег, Иеговага хөйнү кылырынга биске чүү дузалаар?

¹¹ Тимофей тулган дээн илеткелчи азы кедергей дээн башкы апарган бе? Библияда ооң дугайында чүнү-даа биживээн. Ындыг-даа болза, Тимофей Павелдиң сүмезин херекке ап, чыышта хүлээлгелерин оон-даа эки күүседип эгелээн дээрзинге чигзинмейн барып болур бис (2 Тим. 3:10). Бис база янзы-бүрү арга-мергежилдерни сайзырадыр болзувусса, Иегова бисти долузу-биле Бодунуң ажыл-херээнге ажыглаар.

12. Кады бүзүрээн ха-дуңмавыс биске кандыг дузаны чедирип турар?

¹² Биске өске улустуң дузазы дыка херек. Чижээ, эмнээшкин эртип турар улус эмнелгелер-биле харылзажыр комитеттерде болгаш аарыг улусту кезиир бөлүктерде акыларның дузазы дээш өөрүп четтирип турарлар. Кажан бергелерге таваржы бээривиске, хуралдың удуртукчулары үезин харамнанмайн, бисти кичээнгейлиг дыңнап, оожуктуруп турар. А дуржулгалыг эгелекчилер бистиң библейжи кичээлдеривиске олуржуп, ажыктыг сүмелерни берип турар. Ол шупту акы-угбалар биске дуза кадарынга кезээде белен. Бис база ха-дуңмавыска дуза чедиреринге белен боор болзувусса, өөрүшкүнү миннир бис. «Алырынга көөрде, бээри — амыр-чыргалдыг» — деп, Иисус чугаалаан (Аж.-ч. 20:35). Акы-угбаларга оон-даа хөйнү кылыксаар болзуңарза, ону чедип алырынга силерге чүү дузалаар?

13. Сорулга салып тургаш, чүнү кичээнгейге алыр херек?

¹³ Сорулга тодаргай болбас болза канчаар? «Чыышка хөйнү кылыр болзумза эки» деп боданып турар дижик силер. Ындыг сорулганы канчаар чедип алырыл? Ону чедип алган силер деп, канчаар билип алырыл? Ынчангаш сорулга билдингир болгаш тодаргай боор ужурлуг. Безин ону бижип алгаш, канчаар чедип алырын планнап ап болур.

14. Сорулгаларны чүге эде көөрүнге белен боор ужурлуг бис?

¹⁴ Бис байдалдарны өскертип шыдавас  болгаш, чамдыкта сорулгаларывысты эде көөр апаар бис. Чижээ, Павел элчин Фессалоникада чаа чыышты тургузарынга дузалаан. Ынчангаш ол аңаа артып калгаш, Иисустуң эдерикчилери апарган улуска дузалаар сорулгалыг турган чадавас. Ынчалза-даа удурланыышкыннар ужундан ол Фессалоникадан чоруур ужурга таварышкан (Аж.-ч. 17:1—5, 10). Оон башка акы-угбалар ол дээш айыылга таваржыр турган ийик. Павел сорулгазын эде көөр ужурга таварышкан-даа болза, дүжүп бербээн. Ооң орнунга ол Тимофейни, Фессалоникада чыышты сорук киирип, бүзүрелин быжыктырзын дээш, чорудупкан (1 Фес. 3:1—3). Ол хоорайда акы-угбалар Тимофейниң дузааргак хөөнүн көргеш, аажок өөрүп четтирип турган.

15. Өскертинмес байдалдар сорулгавысче кандыг салдар чедирип болур? Чижекти чугаалаңар.

¹⁵ Павелдиң чуртталгазындан бо болуушкун биске дыка ажыктыг. Бараалгалга бир-ле сорулганы салып алгаш, байдалдың аайы-биле ону чедип шыдаваан дижик силер (Эккл. 9:11). Ындыг таварылгада чедип шыдаар сорулгадан салып алыңар. Тед биле Хайди шак ынчаар кылган. Кадыының аайы-биле олар Вефилден чоруур ужурга таварышкан. Ынчалза-даа оларның Иеговага ынакшылы өшпээн. Ынчан олар амгы байдалында кылып шыдаар чүүлүнүң дугайында боданып эгелээн. Эгезинде олар доктаамал эгелекчилер апарган. А үе эрткенде, оларны тускай эгелекчилер кылдыр томуйлап каан. А Тед кожуун хайгааракчызының оралакчызы кылдыр бараалгаар дээш, өөредилгени эртип алган. Оон кожуун хайгааракчыларының хар-назынынга хамаарыштыр негелделер өскерли берген. Ынчан оларга эргий кезип бараалгаары болдунмас деп, Тед биле Хайди билип каан. Оларга баштай хомуданчыг болган, ынчалза-даа Иеговага бараалгаар оон-даа өске аргалар бар деп, олар билип турган. Тед мынча дээн: «Бараалгалдың кандыг-бир хевиринге чаңчыккан ажыы чок деп өөренип алган бис».

16. Галатчыларга 6:4-те кандыг кичээл бар?

¹⁶ Амыдыралывыста байдалдарның шуптузун өскертип шыдавас бис. Ынчангаш бараалгалга кандыг-бир даалгаларны кылбайн турар болзуңарза, Иегова силерни үнелевейн турар деп бодаваңар. Ол ышкаш бодуңарның арга-шинээңерни өскелерниң арга-шинээ-биле деңневеңер. «Бодуңнуң чуртталгаңны өскелерниң чуртталгазы-биле деңнээр болзуңза, өөрүшкүңнү чидирип алыр сен» — деп, Хайди чугаалаан. (Номчуптуңар: Галатчыларга 6:4.) Ынчангаш бараалгалга болдунар шаа-биле хөйнү кылыр дээш, аргаларны дилеңер c.

17. Немелде даалгалар алыксап турар улус амдыгааштан тура чүнү кылып болур?

 ¹⁷ Бараалгалга немелде даалгалар алыксап турар болзуңарза, бөдүүн амыдырап, артык өре-ширеже кирбеңер. Улуг сорулгаларны чедип алырынга дузалаар бичии-бичии сорулгаларны салыңар. Чижээ, доктаамал эгелекчи болуксап турар болзуңарза, амдыгааштан тура дузаламчы эгелекчилеп болур силер. А хуралдың дузалакчызы болуксаар болзуңарза, суртаалга оон-даа хөй киржип, аарып чоруур, улгады берген акы-угбалар дээш сагыш човаңар. Шак ынчаар кылыр болзуңарза, бараалгалга дыка хөй аргалар ажыттынып келир. Силерге кандыг-даа даалга бээрге, ону кыптыгып, чүткүл-сорук-биле кылыңар (Рим. 12:11).

18. Чурукту көрүңер. Беверли биске кандыг үлегерни көргүзүп турар?

¹⁸ Кижи каш-даа харлыг тургаш, бараалгалга сорулгаларны салып, оларны чедип ап болур. 75 харлыг Беверли дээр угбавыстың чижээ ону бадыткап турар. Ооң кадыы багай болгаш, аңаа кылаштаары берге. Ындыг-даа болза, ол Сактыышкын кежээзинче улусту чалаар кампанияга идепкейлиг киржиксеп турган. Ынчангаш ол тодаргай сорулгаларны салып алган. Беверли оларны чедип алгаш, аажок өөрээн. Ооң чүткүлдүг хөөнү чыышта өскелерни дыка-ла сорук киирген. Улгады берген акы-угбаларның арга-шинээ эвээш-даа бол, Иегова оларның ажыл-херээн аажок үнелеп турар (Ыд. ыр. 70:17, 18).

19. Бараалгалга кандыг сорулгаларны салып ап болур бис?

¹⁹ Чедип ап шыдаарыңар сорулгаларны салыңар. Бурганга таарымчалыг шынарларны сайзырадыңар. Иеговага болгаш Ооң организациязынга хөйнү кылырынга дузалаар дээш, янзы-бүрү арга-мергежилдерге өөрениңер. Ол ышкаш акы-угбаларга дузалаар аргаларны дилеңер d. Иегованың ачызында Тимофей ол бүгүнү кылып шыдаан болганда, силер база кылып шыдаар силер. Ынчан силерниң «өзүлдеңерни хамык улус көрүп каар» (1 Тим. 4:15).