1. ¿Bin ya skʼan te ya kakʼ ta koʼtantik spasele?

 TE BITʼIL j-abatotik yuʼun te Diose kʼux ta koʼtantik te Jehová sok ya jkʼan ya kakʼ jbatik ta abatinel ta stojol jich te bin-utʼil ya skʼan stukele. Jaʼ yuʼun ya skʼan te ay bin ya kakʼ ta koʼtantik te ya jpastike, jich bitʼil te ya jlekubtes te jtaleltik, ay bin ya jnoptik spasel ta lek sok ya jletik bin-utʼil ya jkoltaytik te yantike. b

2. ¿Bin yuʼun ya skʼan te ay bin ya kakʼ ta koʼtantik spasel sok te ya jpastik tulan ta skʼotesel ta pasel?

² ¿Bin yuʼun ya skʼan te ay bin ya kakʼ ta koʼtantik spasel sok te ya jpastike? Melel ya jkʼan ya kakʼbeytik stseʼelil yoʼtan te jTatik Jehová. Ya smulan te ya jtuuntestik spisil te bin ya jnaʼtik spasel kʼalal ya x-abatinotik ta stojole. Jaʼnix jich ya jkʼantik te ya xlekubxan te jtaleltik yuʼun ya xjuʼ ya jkoltaytikxan-a te kermanotaktike (1 Tes. 4:9, 10). Chikan jayebix tiempo yakotik ta snopel te smelelil kʼop, jpisiltik ya skʼan te ya xmukʼubxan te schʼuunel koʼtantik. Kiltik te bin-utʼil ya xjuʼ ya jpastike.

3. ¿Bin consejo la yal te Pablo ta stojol te Timoteo ta 1 Timoteo 4:12-16?

³ Jchʼiel keremto-a te Timoteo kʼalal te Pablo la stsʼibaybey te sbabial carta, te jaʼ sbiil yichʼoj te Timoteo, ochemix ta anciano-a. Pero te Pablo la stijbey yoʼtan te yakuk slekubtesxan te bitʼil ya x-abatin ta stojol Jehová (kʼopona 1 Timoteo 4:12-16). Teme ya jnop ta koʼtantik te bin la yal te Pablo, ya xkʼot ta koʼtantik te ay cheb te bin ya skʼan ya slekubtesxan te Timoteo. Te sbabiale, jaʼ te yakuk yakʼ ta ilel taleliletik jich bitʼil te kʼuxul oʼtanil, te chʼuunel oʼtanil sok te manchuk ya sle smule. Te schebale, jaʼ te yakuk slekubtes te bitʼil ya skʼopon  jun ta komonsitil, te bitʼil ya yakʼ tojobtesel sok nojptesel. Ta artículo ini ya kiltik te ejemplo yuʼun te Timoteo, sok teme ay bin ya kakʼ ta koʼtantik spasel, ya skoltayotik yuʼun ya xmukʼubxan te schʼuunel koʼtantik. Jaʼnix jich ya kiltik cheʼoxebuk te bin ya xjuʼ ya jpastikxan ta stojol te Diose.

4. Jich bitʼil ya yal Filipenses 2:19-22, ¿bin yuʼun te Jehová la stuuntes ta lek te Timoteo?

⁴ ¿Bin yuʼun te Jehová la stuuntes ta lek te Timoteo? Jaʼ yuʼun te la yakʼ ta ilel lekil taleliletike (kʼopona Filipenses 2:19-22). Ta swenta te bin la yal te Pablo ta stojol te Timoteo, ya xchiknaj ta ilel te ay spekʼelil yoʼtan, jun yoʼtan yakʼoj sba, tulan ya x-aʼtej sok ya x-ichʼawan ta wenta. La yakʼbey yil yutsil yoʼtan te hermanoetik sok ay skʼoplal ta yoʼtan. Jaʼ yuʼun te Pablo kʼax kʼux ta yoʼtan sok la yakʼbey spas tulan aʼteliletik (1 Cor. 4:17). Jaʼnix jich te joʼotik teme ya jchʼitestik taleliletik te ya smulan te Jehová, kʼuxotikxan ta yoʼtan sok ya stuuntesotikxan ta lek ta congregación (Sal. 25:9; 138:6).

5. 1) ¿Bin-utʼil ya jnaʼtik te bin talelil ya skʼan ya jlekubtestikxane? 2) ¿Bin ya spas te jchʼiel hermana te ya xchiknaj ta foto yuʼun ya yakʼxan ta ilel te ya snaʼbey yoʼbolil sba te yantike?

⁵ Jnoptik junuk talelil te ya skʼan ya jlekubtestike. Jkʼopontik te Jehová yuʼun ya skoltayotik ta snaʼel bintik talelil ya skʼan ya jlekubtestikxan. Akʼa jtsatik junuk sok jaʼuk ya xbajt ta koʼtantik slekubtesel. Yaniwan skʼan te ya jnaʼbeytikxan yoʼbolil sba o ya jkoltaytikxan te yantike. Sok yaniwan skʼan te ayukxan slamalil koʼtantik o te ya jpastik perdón. Teme ay ma jnaʼtik bin talelil ya skʼan ya jlekubtestikxane, ya xjuʼ ya jojkʼoybeytik jtul kamigotik (Prov. 27:6).

6. ¿Bin-utʼil ya xjuʼ kuʼuntik schʼitesel jun talelil?

⁶ Jpastik tulan ta skʼotesel ta pasel te bin la kakʼ ta koʼtantik spasele. ¿Bin-utʼil? Jletik información ta swenta te talelil te ya jkʼan ya jlekubtestikxane. Jnop kaʼiytik te ya jtatik ta ilel te ay bantixan ya skʼan ya jpastik perdón. Ya skoltayotik kʼalal ya jkʼopontik sok ya jnopilan ta koʼtantik te ejemplo yuʼun te ants winiketik te ya yalbey skʼoplal te Biblia te la spasbeyik perdón sok yutsil yoʼtanik te yantike sok te machʼatik ma la spasik perdone. Te Jesús jaʼ jun lekil ejemplo, melel la spasbey perdón te yantike (Luc. 7:47, 48). Ma jaʼuk ya yil te bin ma lek ya spasike, jaʼ ya yil te bin lek ya xjuʼ yuʼunik spasele. Pero te fariseoetik «mayuc scʼoblal ta yoʼtan yantic» (Luc. 18:9). Kʼalal la jnoptikix ta koʼtantik te ejemploetik-abi, jojkʼoybey jbatik: «¿Bin  yilel ya kil te yantike? ¿Bintik talelil ya jta ta ilel te ay yuʼunike?». Teme ay wokol ya kaʼiytik spasel perdón, ya xjuʼ ya kakʼtik ta jun lista spisil te lekil taleliletik ay yuʼun te ants winik-abi, sok akʼa jojkʼoybey jbatik: «¿Binwan yilel ya yil te Jesuse? ¿Yabal spasbey perdón stukel?». Teme ya jpastik te bin la kiltikix ta ora ini ya xjuʼ ya skoltayotik ta sjeltayel te bin jnopojtike. Ta sjajchibal ayniwan wokol ya kiltik te ya jpastik perdón ta stojol te machʼa ay bin ma lek la spasbotike, pero teme ya jpastik tulane, ya xjuʼ ya jlekubtestikxan te jtaleltik-abi.

7. ¿Bin-utʼil ya stuuntes te Jehová te machʼatik leknax ya spas te yaʼtelike? (Proverbios 22:29).

⁷ Yan te bin ya xjuʼ ya kakʼ ta koʼtantik spasele, jaʼ te ya xjuʼ ya jnoptik spasel jun aʼtelile. Jnop kaʼiytik ta stojol te hermanoetik te ya x-aʼtejik ta spasel te beteletik, sNail mukʼul tsoblejetik sok sNail Tsoblej. Bayal ta tul te hermanoetik-abi la snopik te bin ya snaʼik spasel ta ora ini, melel jaʼ aʼtejik sok te machʼatik ayix experiencia yuʼunike. Jich bitʼil ya kiltik ta fotoetik, te hermanoetik sok te hermanaetik yakik ta snopel bin-utʼil ya yichʼ pasel te mantenimiento yuʼun te sNail mukʼul tsoblejetik sok sNail Tsoblej. Te Jehová, «te Ajwalil te sbahtel qʼuinal ay» sok te Jesús, te «Ajwalil yuʼun ajwaliletic», jaʼ ya stuuntes te ants winiketik-abi yuʼun jich bayal bintik lek ya xlokʼ-a (1 Tim. 1:17; 6:15; kʼopona Proverbios 22:29). Jaʼ ya jkʼantik te tulan ya x-aʼtejotik sok ya jtuuntestik te bin ya jnaʼtik spasel ta yalbeyel yutsil skʼoplal te Jehová ma jaʼuk te joʼotike (Juan 8:54).

8. ¿Bin ya skoltayotik yuʼun ya jnaʼtik bin-a te ya jlekubtestikxane?

⁸ Jtsatik junuk te bin yakotik ta spasel te ya skʼan ya jlekubtestikxane. ¿Bin ya xjuʼ ya jlekubtestikxan? Jojkʼoybeytik te ancianoetik o jaʼniwan te superintendente yuʼun circuito yuʼun ya yalbotik bin-a te ya skʼan ya jlekubtestikxane. Teme la yalbotik te ya skʼan ya jlekubtestik te bin-utʼil ya jkʼasestik jun discurso o te kʼalal ya xnojpteswanotik, ya skʼan ya jojkʼoybeytik bin-nix-a te ya skʼan ya jlekubtestikxane. Ta patil jchʼuuntik spasel. ¿Bin-utʼil?

9. ¿Bin-utʼil lekil jpʼijubteswanej ya xkʼootik?

⁹ Jpastik tulan ta skʼotesel ta pasel te bin la kakʼ ta koʼtantik spasele. Jnop kaʼiytik te ya jkʼantik te ya xpʼijubteswanotik ta leke. Ya xjuʼ ya jkʼopontik sok ya jnoptik ta lek te folleto Jnoptik ta lek skʼoponel jun sok pʼijubteswanej. Kʼalal mato jkʼasestik te asignación ta tsoblej yuʼun olil semana, ya xjuʼ ya jkʼanbeytik jtul hermano te ayix experiencia yuʼun te akʼa schʼam yaʼiy sok akʼa yalbotik te banti ya skʼan ya jlekubtestikxane. Teme ta nailto ya jchajpantik ta lek te asignación kuʼuntik, lekil pʼijubteswanej ya xkʼootik sok ya kichʼtik ilel te tulan ya x-aʼtejotik soknix ay smukʼul yoʼtanik ta jtojoltik (Prov. 21:5; 2 Cor. 8:22).

10. Ala junuk ejemplo te bin ya xjuʼ ya apas yuʼun ya alekubtesxan te bin wokol ya awaʼiy spasele

¹⁰ ¿Bin ya xjuʼ ya jpastik teme ay bin ya jkʼan ya jlekubtestikxan te wokol ya kaʼiytik spasele? ¡Mame xlujbotik! Kiltik te bin kʼax ta stojol te hermano Garry te wokol ya yaʼiy skʼoponel te june. Yato xjul ta yoʼtan te bayal ya xkʼexaw te kʼalal ya skʼopon jun ta tsoblejetik, pero maba lujb ta spasel; la spasxan tulan. Jaʼ koltayot yuʼun te hermanoetik sok te publicacionetik, ta ora ini ya skʼasesix discursoetik ta tsoblejetik, ta mukʼul tsoblej yuʼun circuito sok mukʼul tsoblej yuʼun oxeb kʼajkʼal.

11. Jich bitʼil te Timoteo, ¿bin ya skoltayotik yuʼun ya kichʼtikxan yantik aʼteliletik?

¹¹ ¿Labal snop ta lek te Timoteo yakʼel  discursoetik sok pʼijubteswanej? Te Biblia maba ya yal, pero te bin ya jnaʼtike jaʼ te la schʼuun spasel te bin albot yuʼun te Pabloe. Jaʼ yuʼun kʼunkʼun-niwan pʼijubxan ta lek sok la spas ta lek te yaʼtele (2 Tim. 3:10). Jich bitʼil te Timoteo, teme ya xpʼijubotikxan ta lek ta spasel te kaʼteltike, jich chapalotik yuʼun ya kichʼtik yantik aʼteliletik.

12. ¿Bin-utʼil skoltayojat te yantike?

¹² ¡Kʼax tseʼel koʼtantik kʼalal ay machʼa ya skoltayotike! Jich bitʼil te kʼalal ayotik ta hospital ta skaj te chamel, ya yakʼ smukʼul koʼtantik kʼalal ya xkʼot te hermanoetik te ya x-aʼtejik ta Comité yuʼun Enlace ta swenta Hospital o Hermanoetik te ya x-ulaʼtaywanik ta hospital. Jaʼnix jich ya kaltik bayal wokol yuʼun kʼalal jtul anciano ya skoltayotik sok ya yakʼbotik smukʼul koʼtantik kʼalal yakotik ta skʼasesel jun tulan wokolil. Sok teme ya jkʼantik koltayel kʼalal ya kakʼtik jun nojptesel ta Biblia, kʼax lek ya kaʼiytik teme ya skoltayotik jtul precursor te ayix experiencia yuʼun soknix ya yalbotik banti ya skʼan ya jlekubtestik te kʼalal ya kakʼtik nojptesele. Te Jesús jich la yal: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hech. 20:35). Spisil te hermanoetik-abi ya x-akʼbot stseʼelil yoʼtanik kʼalal ya skoltayotik. Jaʼnix jich tseʼel koʼtantik kʼalal jich ya jpastik. Teme ya jkʼantik te jich ya x-abatinotikxan ta stojol te Jehová o yanxan bin-utʼil, ¿bin ya skʼan ya jpastik?

13. Teme ay bin ya jkʼan ya jpastike, ¿bin ya skʼan ya kichʼtik ta wenta?

¹³ Jtsatik junuk te bin ya jkʼantik spasel. Jichniwan ya jnop ta koʼtantik: «Ya jkʼan ya xkoltaywanonxan ta congregación». Pero wokolniwan ya jnaʼtik te banti ya xkoltaywanotik sok ma jnaʼtik teme juʼix kuʼuntik spasel te bin jnopojtik spasel o maʼuk. Jich yuʼun jaʼ lek te ya jtsatik junuk te bin ya jkʼantik spasele. Sok jaʼniwan lek te ya jtsʼibaytik te bin ya jkʼan ya jpastik swenta ya jkʼotestik ta pasel.

14. ¿Bin yuʼun ma skʼan ya yal te jkʼaxel ma juʼix ta jeltayel te bin la jtatik ta nopel spasele?

¹⁴ Ma skʼan ya yal te jkʼaxel ma xjuʼix ta jeltayel te bin la jtatik ta nopel spasele. ¿Bin yuʼun? Melel ma jnaʼtik te bintik ya xkʼot ta pasel ta jujun kʼajkʼale. Jich bitʼil te jpuk-kʼop Pablo koltaywan ta sjachel  te congregación ta Tesalónica, sok snopojniwan te bayal tiempo ya xjil tey-a ta skoltayel te hermanoetik te mato jaluk yochelik ta j-abat yuʼun Dios. Pero tenot lokʼel yuʼun te skontratak (Hech. 17:1-5, 10). Te manchuk lokʼuk baele la sta swokol te congregación te jichuke. Pero te Pablo ma la skom sba, ta patil la stikun bael te Timoteo yuʼun ya yakʼbey yip yoʼtan te yermanotak (1 Tes. 3:1-3). Kʼax tseʼel yoʼtan la yaʼiy sbaik te hermanoetik ta Tesalónica te kʼalal la yilik te jun yoʼtan la xkoltaywan te Timoteo te banti ya skʼanik koltayele.

15. ¿Bin ya xjuʼ ya xkʼot ta pasel sok te bin jnopoj ya jpastik te kʼalal ay bin ya xjelon ta jkuxlejaltike? Ala junuk ejemplo.

¹⁵ Ay bin ya yakʼ jnoptik te ejemplo yuʼun te Pablo sok te bin kʼax ta stojol ta Tesalónica. Ayniwan bin la kakʼ ta koʼtantik spasel ta stojol te Jehová, pero ya xjelon te jkuxlejaltik sok ma xjuʼix kuʼuntik spasel (Ecl. 9:11). ¿Bin ya jpastik? Jnoptik te bin ya xjuʼ kuʼuntik spasele. Jaʼ te bin la spasik te Ted sok te Hiedi. Ta skaj chamel lokʼik ta Betel. Pero te bitʼil kʼux ta yoʼtanik te Jehová la sleik bin-utʼil ya x-abatinikxan ta stojol. Ta nailal ochik ta precursor regular, ta patil albotik te ya x-ochik ta precursor especial sok te Ted pʼijubtesot yuʼun ya x-och ta superintendente yuʼun circuito sustituto. Pero te jayebnax jaʼbil ya xjuʼ ya x-ochik ta superintendente yuʼun circuito jelon, te Ted sok te Hiedi la yilik te ma xjuʼ ya yichʼikix te asignación-abi. Manchukme chebaj yoʼtanik jtebuk, snaʼojik te ya xjuʼ ya x-abatinikxan ta stojol te Jehová. Te Ted jich ya yal: «Kʼoem ta koʼtantik te ma junuknax te bin-utʼil ya xjuʼ ya kakʼ jbatik ta abatinel ta stojol te Jehová».

16. ¿Bin ya yakʼ jnoptik te Gálatas 6:4?

¹⁶ Maʼyuk ta jwentatik spisil te bin ya xkʼax ta jkuxlejaltik. Jich yuʼun mame schʼay ta koʼtantik te ma jaʼuknax mukʼ jkʼoplaltik ta sit te Jehová ta swenta te jayeb aʼtelil jpasojtik ta stojole. Jaʼnix jich ma lek te jaʼ ya xbajt ta koʼtantik yilel te bintik aʼtelil yichʼojik te yantik te ma kichʼojtik te joʼotike. Te Hiedi jich ya yal: «Teme ya jpajtik te jkuxlejaltik sok te yantike, ya jchʼaytik te slamalil kʼinal» (kʼopona Gálatas 6:4). Jaʼ yuʼun te bin kʼax lekxan ya xjuʼ ya jpastike, jaʼ te ya jletik te bin-utʼil ya x-abatinotikxan ta stojol te Jehová sok ya jkoltaytik te yantike. c

17. ¿Bin ya jpastik teme ya jkʼan ya kichʼtikxan kaʼteltik ta congregación?

¹⁷ Teme ma jaʼuk ya xbajt ta koʼtantik sleel bayal jbiluktik sok ma bayaluk ya kakʼ jbetik, ya xjuʼ jtatikxan kaʼteltik ta congregación.  Jnoptik te bin ya xjuʼ ya jpastik ta ora ini yuʼun jich ay bin ya jpastikxan ta patil. Jich bitʼil teme ya akʼan ya x-ochat ta precursor regular, ¿bin yuʼun ma nailuk ya x-ochat ta precursor auxiliar? O teme ya akʼan ya x-ochat ta siervo ministerial, ¿yabal xjuʼ te ya xlokʼatxan ta scholel skʼop Dios o ya awulaʼtay te machʼatik ayix yaʼbilalik soknix te machʼatik ayik ta chamel? Spisil te bin ya anope yame xtuun awuʼun ta patil te kʼalal ya awichʼxan yantik aʼteliletik. Te bin mukʼxan skʼoplale, jaʼ te ya apas ban kʼalal ya xjuʼ awuʼun ta stojol te Jehová (Rom. 12:11).

18. ¿Bin ya yakʼ jnoptik te ejemplo yuʼun te Beverley? (Jaʼnix jich ilawil te foto).

¹⁸ Teme ayix kaʼbilaltik ma skʼan ya yal te maʼyukix bin ya xjuʼ kuʼuntik spasel ta stojol te Jehová. Jich ya yakʼ ta ilel te ejemplo yuʼun te hermana Beverley te ayix 75 yaʼbilal. Ta skaj te ay ta chamel ma xbeen ta lek. Pero yoʼtanuk te ya xkoltaywan ta campaña yuʼun te Snaʼojibal slajel te Jesuse. ¿Bin la spas? La sta ta nopel te bin ya xjuʼ yuʼun spasel, te kʼalal la skʼotes ta pasel kʼax tseʼel yoʼtan la yaʼiy sba. Te bitʼil la spas tulane la stijbey yoʼtan te yantik yuʼun ya scholikxan te skʼop Diose. Chikan ta ilel te kʼax mukʼ skʼoplal ya yil Jehová te ya spasik tulan te machʼatik ayix yaʼbilalik manchukme ay bintik ma xjuʼix yuʼunik spasel (Sal. 71:17, 18).

19. ¿Bin ya xjuʼ ya kakʼ ta koʼtantik spasel?

¹⁹ Kakʼ ta koʼtantik te bin-nix ya xjuʼ kuʼuntik spasel-ae. Jchʼitestik lekil taleliletik te ya smulan te Jehová. Jnoptik spasel aʼteliletik swenta jich ya stuuntesotik te Dios sok te organización yuʼune. Jletik bin-utʼil ya xjuʼ ya jkoltaytikxan te kermanotaktik. d Teme jich ya jpastike, te Jehová ya yakʼbotik bendición jich te bin-utʼil kʼax ta stojol te Timoteo, te yantike ya yilik te yak ta stsakel yip te schʼuunel koʼtantik (1 Tim. 4:15).