ЭСКЕРОН ПОННА СТАТЬЯ 18
Кызьы быръёно но быдэсъяно духовной ужпумъёсты?
«Ваньзэ тае сюлэмдэ поныса быдэсъя, та бордын ул, тынад азинсконэд ваньмызлы адӟиськымон мед луоз» (1 ТИМ. 4:15).
84-ТӤ КЫРӞАН Ми тыршиськомы, кытын кулэ юрттэт
ТА СТАТЬЯЫН a
1. Кыӵе духовной ужпумъёс пуктыны луэ?
МИ ХРИСТОСЛЭН дышетскисьёсыз бере, ми Иеговаез яратӥськомы. Милям потэ солы самой умойзэ сётэммы. Ужан-тыршонын лэсьтэммы потэ ке ваньзэ, мае быгатӥськомы, духовной ужпумъёс пуктоно b. Кылсярысь, тыршоно сямъёсмес умоятыны, малы ке вылезлы дышетскыны но мукетъёсызлы юрттыны.
2. Малы милемлы духовной ужпумъёс пуктоно но соосты быдэсъяно?
2 Малы милям потэ Иеговалы эшшо но умойгес ужаммы-тыршеммы? Нырысь ик, милям инмысь Атаймес шумпоттэммы потэ. Куке ужан-тыршонын ми лэсьтӥськомы ваньзэ, мае быгатӥськомы, Иегова шумпотэ. Со сяна, духовной ужпумъёс пуктыса, ми вын-агайёсмылы но сузэр-апайёсмылы эшшо но тросгес пайда ваёмы (1 Фес. 4:9, 10). Кӧня аръёс гинэ ми Иеговалэн Адӟись-Ивортӥсьёсыз медам луэ, милемлы азьланяз но духовной ужпумъёс пуктоно. Мар со понна кароно?
3. Мар карыны Павел Тимофейлэсь мылкыдзэ ӝутӥз? (1 Тимофейлы 4:12—16).
3 Куке апостол Павел Тимофейлы нырысетӥ гожтэтсэ гожтӥз, Тимофей, егит арлыдыз шоры учкытэк, тӧро вал ини. Озьы ке но Павел солэсь мылкыдзэ ӝутӥз эшшо но умойгес Иеговалы ужаны-тыршыны. (Лыдӟе 1 Тимофейлы 4:12—16.) Павеллэн гожтэтысьтыз адӟиське, со Тимофеез ӧтиз кык удысъёсын ужаны: 1) солы азьланяз но будэтоно вал яратонзэ, осконзэ но дун-чылкыт луонзэ; 2) тыршоно вал калык азьын эшшо но умойгес лыдӟиськыны но соосты дышетыны. Тимофейлэсь примерзэ эскерыса, ми тодомы, кызьы, духовной ужпумъёс пуктыса, эшшо но умойгес ужаммы-тыршеммы но эшшо но тросгес лэсьтэммы луоз.
ХРИСТИАН СЯМЪЁСТЫ БУДЭТЭ
4. Малы Тимофей Иеговалы ужан-тыршонын трос лэсьтыны быгатӥз? (Филиппыослы 2:19—22).
4 Малы Тимофей ужан-тыршонын трос лэсьтыны быгатӥз? Со христиан сямъёсты туж умой возьматӥз. (Лыдӟе Филиппыослы 2:19—22.) Павел Тимофей сярысь вераз, со зӥбыт-востэм, оскымон но тыршись адями шуыса. Тимофей вын-агайёсты но сузэр-апайёсты яратӥз, соос сярысь сюлмаськиз. Соин ик Павел Тимофеез туж дунъяз но солы секыт ужъёс оскиз (1 Кор. 4:17). Ми но христиан сямъёсты будэтӥмы ке, Иегова милемыз эшшо но золгес яратоз но ми кенешлы тросгес пайда ваёмы (Пс. 24:9; 137:6).
Валаны тырше, кыӵе сямдэс умоятыны кулэ (Учке 5-тӥ но 6-тӥ абзацъёсты.)
5. а) Кызьы валано, кыӵе сяммес милемлы умоятыны кулэ? б) Учке суредэз. Мар юрттэ сузэрлы мукетъёссэ валаны?
5 Ужпум пуктэ. Иеговалы вӧсяське но малпаське, кыӵе сямдэс тӥледлы умоятыны кулэ. Быръе одӥг сямез но со вылын ужалэ. Кылсярысь, тыршиськоды-а тӥ кенешысьтыды вын-агайёсты но сузэр-апайёсты валаны но соослы юрттыны? Быгатӥськоды-а тӥ споръяськытэк улыны но вань сюлмысьтыды простить карыны? Оскымон эштылэсь юалэ, кулэ-а тӥледлы та удысъёсын мае ке тупатыны (Мад. 27:6).
6. Мар кароно, кыӵе ке сямдэс умоятон понна?
6 Ужпумдэс быдэстыны тырше. Мар тӥледлы юрттоз? Кылсярысь, пыр-поч эскере сямез, кудзэ тӥляд умоятэмды потэ. Шуом, тӥ дышетскиськоды адямиосты простить карыны. Мар бордысен кутсконо? Та пумысен Библиын вань умой но урод примеръёс. Малпаське, малы та примеръёс тӥледыз дышетыны быгато. Туж умой пример, кызьы мукетъёссэ простить кароно,— со Иисус Христос (Лука 7:47, 48). Иисус адямиослэн янгышъёссылы саклыксэ ӧз висъя. Со адӟыны тыршиз, мае умойзэ соослэн лэсьтэмзы луэ. Нош фарисейёс адямиосты ултӥяса возизы (Лука 18:9). Та примеръёс вылын малпаськыса, юалэ асьтэлэсь: «Адямиослэн кыӵе сямъёссылы мон саклыкме висъясько?» Тӥледлы кинэ ке простить карыны секыт ке, малпаське, кыӵе умой сямъёсыз вань со адямилэн, но соосты гожтэ. Собере малпаське: «Мар малпа та адями сярысь Иисус? Со та адямиез простить карысал-а?» Таӵе эскерон юрттоз тӥледлы мукет сямен учкыны адями шоры, кудӥзлы тӥляд кӧтӝожды вань. Дыр ортчемъя, тӥледлы адямиосты простить карыны капчигес луоз.
МАЛЫ КЕ ВЫЛЕЗЛЫ ДЫШЕТСКЕ
Дышетске Эксэйлык юртэз эскерыны-тупатъяны (Учке 7-тӥ абзацез.) e
7. Кызьы вын-агайёс но сузэр-апайёс пыр Иегова бадӟым ужъёс лэсьтэ? (Мадёнъёс 22:29).
7 Эшшо одӥгез умой ужпум — малы ке вылезлы дышетскыны. Малпаське вын-агайёс но сузэр-апайёс сярысь, кудъёсыз филиалъёсты, конгрессъёсты ортчытон юртъёсты но Эксэйлык юртъёсты пукто. Соос пӧлысь тросэз нырысь пуктӥськыны уг быгато вал. Но пуктӥськон ужъёсы пыриськыса но быгатӥсь адямиосын ӵош ужаса, соос пуктӥськыны дышетскизы. Кызьы ми адӟиськомы суредысь, вын-агайёс но сузэр-апайёс организацимылэсь юртъёссэ эскерыны-тупатъяны дышетско. Та ужась-тыршисьёс пыр Иегова, «пумтэм вапумъёсысь Эксэй», но Иисус Христос, «эксэйёс пӧлысь Эксэй», бадӟым ужъёсты лэсьто (1 Тим. 1:17; 6:15; лыдӟе Мадёнъёсты 22:29). Милям вань сюлмысьтымы лэсьтэммы потэ ваньзэ, мае быгатӥськомы, Иеговаез данъян понна (Иоанн 8:54).
8. Кызьы валано, малы тӥ дышетскыны быгатӥськоды?
8 Ужпум пуктэ. Малы тӥ дышетскыны быгатӥськоды? Та сярысь юалэ кенешысьтыды тӧроослэсь яке ёросэз чакласьлэсь. Соос тӥледлы ӵектыны быгато дышетскыны эшшо но умойгес речьёс вераны но дышетыны. Юалэ соослэсь, мар бордын тӥледлы ужаны кулэ. Мар юрттоз тӥледлы пуктэм ужпумдэс быдэстыны?
9. Мар юрттоз тӥледлы малы ке вылезлы дышетскыны?
9 Ужпумдэс быдэстыны тырше. Шуом, тӥляд потэ эшшо но устогес дышетӥсь луэмды. Соку умой луысал пыр-поч эскерыны «Дышетскы устогес лыдӟиськыны но дышетыны» брошюраез. Тӥледлы сётэм ужез дасякуды, куре кылзыны тӥледыз агаез, кудӥз умой речьёс вераны быгатэ. Со вералоз, мае тӥледлы тупатыны кулэ. Умой речьёс верам сяна, дышетске тыршись но оскиськымон адями луыны (Мад. 21:5; 2 Кор. 8:22).
10. Мар кароно, милемлы малы ке вылезлы дышетскыны секыт ке? Вералэ пример.
10 Нош мар кароно, тӥледлы малы ке вылезлы дышетскыны секыт ке? Киостэс эн лэзе. Кылсярысь, Гэри агайлы секыт вал ӝог но вольыт лыдӟиськыны. Куке сое пумиськонын сцена вылысен мае ке лыдӟыны куро вал, со туж сюлмаськиз. Та шоры учкытэк, со тросгес лыдӟиськыны тыршиз. Солы юрттӥзы агайёс, кудъёсыз умой лыдӟиськыны быгато, но публикациосысьтымы визь-кенешъёс. Табере Гэри агай сокем уг сюлмаськыны ини, озьы ик конгрессъёсын но речьёс вера.
11. Кызьы ми, Тимофей сямен, ужан-тыршонын эшшо но тросгес лэсьтыны быгатомы?
11 Быгатӥз-а Тимофей умой речьёс вераны но умой дышетӥсь луыны? Библиын та сярысь номыр уг вераськы. Но ми оскиськомы, Павеллэн визь-кенешез Тимофейлы юрттӥз кенешысь ужъёсты эшшо но умойгес быдэсъяны (2 Тим. 3:10). Ми но малы ке вылезлы дышетскимы ке, соку Иеговалы ужан-тыршонын эшшо но тросгес лэсьтыны быгатомы.
МУКЕТЪЁСЫЗЛЫ ЮРТТЫНЫ ТЫРШЕ
12. Кызьы вын-агайёс но сузэр-апайёс милемлы юртто?
12 Милемлы мукетъёсызлэн юрттэтсы кулэ. Кылсярысь, куке ми эмъюртын кыллиськомы, ми туж тау кариськомы вын-агайёслы, кудъёсыз эмъюртъёсын герӟаськонъя комитетъёсын ужало-тыршо. Куке ми шуг-секытъёсын пумиськиськомы, ми тау кариськомы тӧроослы, кудъёсыз милемлы дырзэс висъяло, милемыз кылзо но буйгато. Озьы ик ми туж шумпотӥськомы, милям пионеръёсмы вань шуыса. Соос дась милемын ӵош Библиез дышетонамы мыныны но милемлы визь-кенеш сётыны. Вань та вын-агайёс но сузэр-апайёс шумпотыса юрттыны дась. Ми но шумпотомы, мукетъёсызлы юрттыны тыршимы ке, малы ке шуоно Иисус вераз: «Басьтон сярысь, сётыны умойгес» (Ап. уж. 20:35). Мар тӥ карыны быгатӥськоды, вын-агайёслы но сузэр-апайёслы эшшо но тросгес пайда ваемды потэ ке?
13. Кыӵе луыны кулэ ужпум?
13 Со сяна, ужпумды валамон луыны кулэ. Шуом, тӥляд потэ кенешын тросгес лэсьтэмды. Но тазьы гинэ малпаса, кызьы валано, мар кароно, ужпумдэс быдэстон понна? Кызьы валано, ку со быдэстэмын луоз? Соин ик умой-умой валалэ, мае тӥляд быдэстэмды потэ. Умой луысал ужпумдэс гожтыны но малпаны, мар кароно сое быдэстон понна.
14. Малы дась луоно ужпумъёсмес тупатыны?
14 Куддыръя ужпумъёсмес тупатоно луэ, малы ке шуоно югдуръёс вошъясько. Кылсярысь, апостол Павел Фессалоника кырын кенеш кылдытӥз. Солэн туж потэ вал, дыр, отчы кылемез но юрттэмез вын-агайёслы но сузэр-апайёслы, кудъёсыз али гинэ христианъёс луизы. Но пумитъяськонъёс сэрен Павеллы Фессалоникаысь кошконо луиз (Ап. уж. 17:1—5, 10). Со отчы кыльысал ке, вын-агайёслы но сузэр-апайёслы изъян ваемын луысал. Павеллы малпанъёссэ воштоно луиз ке но, солэн мылкыдыз ӧз куашка. Фессалоника карысь кенешлы юрттон понна, Павел отчы Тимофеез ыстӥз (1 Фес. 3:1—3). Со кенешысь вын-агайёс но сузэр-апайёс туж шумпотӥзы, Тимофей соослы юрттыны дась вал шуыса.
15. Малы куддыръя ужпумъёсмес воштоно луэ? Вералэ пример.
15 Учыр, кудӥз Павелэн Фессалоника карын луиз, милемыз тросэзлы дышетыны быгатэ. Оло нош, кин ке но духовной ужпум пуктӥз вал но, югдуръёсыз воштӥськемен сэрен, сое быдэстыны уг быгаты ини (Екк. 9:11). Тӥляд но озьы ик луиз ке, асьтэлы мукет ужпум пуктэ, сыӵезэ, кудзэ быдэстыны быгатоды. Озьы ик каризы Тед но Хайди кузпалъёс. Урод тазалыксы сэрен соослы Вефильысь кошконо луиз. Но соос Иеговаез азьло сямен ик яратӥзы. Соин ик малпазы, кытын табере соослэн ужамзы-тыршемзы луоз. Нырысь соос пионеръёс вал. Собере соосты нимысьтыз пионеръёс луыса ужаны-тыршыны ыстӥзы. Тед дышетскиз ёросэз чакласьлэн воштӥсез луыса ужаны-тыршыны. Но собере организациямы воштӥськонъёс лэсьтэмын вал, кудъёсыз герӟаськемын вал ёросэз чакласьёслэн арлыдэнызы. Соин сэрен Тед но Хайди та ужан-тыршонэ пыриськыны ӧз быгатэ ини. Соослэн мылкыдзы куашказ ке но, соос тодӥзы, мукет сямен но Иеговалы ужаны-тыршыны луэ шуыса. Тед вера: «Ми валамы, Иеговалы ужаны-тыршыны пӧртэм сямен дась луоно шуыса».
16. Кыӵе визь-кенеш гожтэмын Галатъёслы 6:4?
16 Куддыръя кылдэм югдурез ми воштыны ум быгатӥське. Но Иегова уг дунъя милемыз соку гинэ, куке ми кыӵе ке ужез быдэстыны быгатӥськомы. Аслэсьтыд югдурдэ мукетъёсызлэн югдуренызы ӵошатоно ӧвӧл. Хайди валэктэ: «Астэ мукетъёсыныз ӵошатӥд ке, шумпотондэ ыштод». (Лыдӟе Галатъёслы 6:4.) Малпалэ, кызьы тӥ ужан-тыршонын тросгес лэсьтыны быгатӥськоды c.
17. Мар али ик ини карыны луэ, азьланяз эшшо но тросгес ужан-тыршон понна?
17 Азьланяз но ужан-тыршонын тросгес лэсьтон понна, тырше огшоры но пунэмаськытэк улыны. Бадӟым ужпумъёсты быдэстон понна, пичиесь ужпумъёсты пуктэ. Кылсярысь, тӥляд пионер луэмды потэ ке, кутске юрттӥсь пионер луыса ужаны-тыршыны. Агайлэн кенешлы юрттӥсь луэмез потэ ке, солы али ик ини тыршоно тросгес тодытыны, озьы ик висись но арлыдо вын-агайёслы но сузэр-апайёслы юрттыны. Со, малы тӥ али дышетскоды, тӥледлы вуонояз но юрттоз. Кыӵе гинэ уж тӥледлы медам сётэ, сое тыршыса быдэсъялэ (Рим. 12:11).
Валамон но быдэстыны луымон ужпум пуктэ (Учке 18-тӥ абзацез.) f
18. Учке суредэз. Малы дышетскыны луэ Беверли сузэрлэсь?
18 Духовной ужпумъёсты пуктыны но соосты быдэсъяны котькыӵе арлыдын луэ. Со адӟиське 75-аресъем Беверли сузэрлэн учырысьтыз. Урод тазалыкез сэрен солы ветлыны секыт вал. Но солэн туж потэ вал Ӝытанэ ӧтёнъя кампание пыриськемез. Соин ик со аслыз быдэстымон ужпумъёс пуктӥз. Нош куке со соосты быдэстыны быгатӥз, со туж шумпотӥз. Ӟырдыт мылкыдзэ адӟыса, мукетъёсызлэн но мылкыдзы ӝутӥськиз. Арлыдо вын-агайёсмы но сузэр-апайёсмы трос лэсьтыны уг быгато ке но, соослэсь тыршемзэс Иегова туж дунъя (Пс. 70:17, 18).
19. Кыӵе духовной ужпумъёс пуктыны луэ?
19 Валамон ужпумъёс пуктэ. Будэтэ сямъёсты, кудъёсыз Иеговалы кельшо. Дышетске солы, мар юрттоз тӥледлы Иегова понна но солэн организациез понна эшшо но тросгес карыны. Вын-агайёслы но сузэр-апайёслы юрттыны тырше d. Иеговалэн юрттэменыз Тимофей ваньзэ тае быдэстыны быгатӥз. Соин ик тӥ но быгатоды. Соку тӥляд азинсконды «ваньмызлы адӟиськымон... луоз» (1 Тим. 4:15).
38-ТӤ КЫРӞАН Инмар тыныд кужым сётоз
a Тимофей ӟеч иворез быгатыса тодытэ вал. Озьы ке но апостол Павел солэсь мылкыдзэ ӝутӥз дышетскыны эшшо но умойгес тодытыны. Тимофей Павеллэн визь-кенешезлэсь кылзӥськиз но Иегова понна, озьы ик вын-агайёс но сузэр-апайёс понна эшшо но тросгес лэсьтыны быгатӥз. Потэ-а тӥляд но Иеговалы но кенешлы эшшо но тросгес пайда ваемды? Потэ ке, кыӵе ужпумъёсты со понна пуктоно но кызьы соосты быдэсъяно?
b ВАЛЭКТОН. Духовной ужпумъёс пӧлы пыре ваньмыз, мар ми карыны тыршиськомы, Иеговалы тросгес ужан-тыршон понна но сое шумпоттон понна.
c Учке «Иеговалэсь эриксэ быдэсъяны радъямын» книгаысь 10-тӥ люкетысь «Служение там, где нужна помощь» подзаголовокез.
