1. Ovimãho vipi viespiritu tu pondola oku tumbika?

 OMO Tuakristão vocili, tu sole calua Yehova. Tu yongola oku linga eci ca velapo kupange waye. Oco tu tẽle oku linga eci ca velapo kupange wa Yehova, tu sukila oku tumbika ovimãho ndeci, oku kuata ovituwa Viukristão, oku lilongisa ovoloño akuavo kuenda oku sanda olonjila vioku kuatisa vakuetu. *

2. Momo lie tu tumbikila ovimãho viespiritu loku likolisilako oku vi tẽlisa?

² Momo lie tu yonguila oku kala afendeli vawa via Yehova? Catete, momo tu yongola oku sanjuisa Isietu wokilu ukuacisola. Yehova o sanjuka eci a mola okuti tu kasi oku talavaya lovoloño etu oco tu tẽlise upange waye. Handi vali, tu yongola oku kula konepa yespiritu oco tu tẽle oku kuatisa ciwa vamanjetu. (1 Tes. 4:9, 10) Ndaño tu kasi ale vocili vokuenda kuotembo yalua, vosi yetu tu sukila oku kula konepa yespiritu. Tu konomuisi ndomo tu ci linga.

3. Ndomo ca tangiwa ku 1 Timoteo 4:12-16, nye upostolo Paulu a vetiya Timoteo oku linga?

³ Eci upostolo Paulu a soneha ukanda watete ku Timoteo, ndaño okuti Timoteo wa kala umãlehe, wa kala ale ukulu umue wekongelo wa loñoloha. Pole, Paulu wo vetiya oco amameko oku kala ufendeli uwa wa Yehova. (Tanga 1 Timoteo 4:12-16.) Osimbu o tanga olondaka via Paulu, o ka limbuka okuti, eye wa yonguile okuti Timoteo amamako oku kula volonjila  vivali: oku kuata ovituwa Viukristão ndeci ocisola, ekolelo loku pua etondelo kuenda oku mioñolola uloño waye koku tangela omanu, koku lungula kuenda koku longisa. Tu konomuisa ongangu ya Timoteo oco yi tu kuatise oku tumbika ovimãho via pita pokati, loku amamako oku kala ufendeli uwa wa Yehova. Tu konomuisavo olonjila vimue tu pondola oku vokiya upange wetu woku kunda.

4. Ndomo ca tangiwa kukanda ku Va Filipoi 2:19-22, nye ca kuatisa Timoteo oku kala ufendeli umue uwa wa Yehova?

⁴ Nye ca kuatisa Timoteo oku kala ufendeli umue uwa wa Yehova? Eye wa kuata ovituwa viwa Viukristão. (Va Filipoi 2:19-22.) Olondaka Paulu a tukula viatiamẽla ku Timoteo via lekisa okuti, eye wa kala omunu umue embombe, ukuacili, onalavayi yiwa kuenda wa koleliwile. Eye wa kala ukuacisola kuenda wa enda oku tata ciwa vamanji. Omo liaco, Paulo wa solele Timoteo kuenda ka kuatele ohele yoku eca kokuaye ovikele ka via lelukile. (1Ko 4:17) Cimuamue haico okuti, Yehova o ka tu sola kuenda tu ka kala omanu vawa vekongelo, nda tua kuata ovituwa Yehova a sole.—Os 25:9; 138:6.

5. (a) O pondola oku nõla ndati ovituwa Viukristão o yongola oku kuata? (b) Ndomo ci lekisiwa vociluvialuvia, manji umãlehe wa likolisilako ndati oku tẽlisa ocimãho caye coku lekisa ohenda ku vakuavo?

⁵ Nõla ocituwa cimue o yongola oku kuata. Likutilila kuenda sokolola kovituwa viove o sukila oku mioñolola. Nõla ocituwa cimue o pondola oku tiamisila utima. Ndeci, anga hẽ o pondola oku nõla oku lekisa vali ohenda, ale oku kuata onjongole yoku kuatisa vamanji? Anga hẽ o sukila oku kala ukuambembua ale ukuakuecela? Ove o pondola oku pinga kekamba limue lia koleliwa, oco a ku sapuile olonepa o sukila oku mioñolola.—Olo 27:6.

6. O likolisilako ndati oku tẽlisa ocimãho coku kuata ocituwa cimue?

⁶ Likolisilako oku tẽlisa ocimãho cove. O ci linga ndati? Onjila yimue, oku kũlĩhĩsa lutate ocituwa o yongola oku mioñolola. Sokolola okuti, wa nõlapo oku likolisilako oku ecela vakuetu. O pondola oku fetikila poku tanga loku sokolola kovolandu omanu va tukuiwa Vembimbiliya, vana va tẽla oku ecela vakuavo lutima wosi kuenda vana ka va tẽlele oku ci linga. Sokolola kulandu wa Yesu. Eye wa enda oku ecela vakuavo. (Luk 7:47, 48) Handi vali, ka endaile oku tiamisila utima kakulueya avo, pole, kovina va ponduile oku  linga. Pole, va Fariseo vokoloneke via Yesu va enda oku “tenda vakuavo okuti ka va kuete esilivilo.” (Luk 18:9) Noke yoku sokolola lutate kovolandu a-a, lipula ndoco: ‘Ndi tenda ndati vakuetu? Kovituwa vipi ndi nõla oku tiamisila utima?’ Nda okuti ka ca lelukile kokuove oku ecela omunu umue, seteka oku soneha ulala umue wovituwa viwa omunu waco a kuete. Noke, lipula ndoco: ‘Yesu o tenda ndati omunu waco? Anga hẽ eye nda wo wecela? Nda tua ci linga, tu ka pongolola ovisimĩlo vietu. Catete, tu sukila oku likolisilako oco tu ecele omunu ume wa tu lueyela. Pole, nda tua likolisilako oku mioñolola ocituwa caco, ci ka leluka kokuetu oku ecela.

7. Ndomo ca tangiwa kelivulu Liolosapo 22:29, Yehova o talavaya ndati la vamanji va kuete ovoloño koloneke vilo?

⁷ Ocimãho cikuavo o pondola oku tumbika, oku lilongisa uloño umue. Sokolola etendelo lialua lia vamanji va sukiliwa oco ku tungiwe Olobetele, Olonjango Violohongele Vinene kuenda Olonjango Viusoma. Valua pokati ka vamanji vaco, va lilongisa ovoloño avo poku talavaya kumue la vamanji va kuete ovoloño. Ndomo ci lekisiwa velitalatu, vamanji va kasi oku talavaya lovoloño va kuete, oco va kuatise koku semũlula Olonjango Violohongele Vinene kuenda Olonjango Viusoma. Olonjila evi kuenda vikuavo, Yehova Suku, “Soma yonahũlũlua” kuenda Yesu Kristu ‘Soma . . . Yolosoma’, va kasi oku talavaya lavamanji va kuete ovoloño, oco va linge ovopange aco. (1Ti 1:17; 6:15; Tanga Olosapo 22:29.) Tu yongola oku likolisilako loku talavaya lovoloño tu kuete, oco tu ece esivayo ku Yehova, okuti kokuetu muẽle hakoko. —Yoa 8:54.

8. O pondola oku nõla ndati ovoloño o lilongisa?

⁸ Nõla uloño umue o yongola oku lilongisa. Uloño upi o pondola oku lilongisa? Pinga kakulu vove vekongelo, ale pamue ku manji o nyũla akongelo oco va ku sapuileko ovoloño o sukila oku lilongisa. Nda va ku sapuila okuti o sukila oku mioñolola uloño wove woku vangula kuenda woku longisa, pinga kokuavo oco va tukule ocituwa cimue o sukila oku mioñolola. Noke sanda olonjila ndomo o mioñolola. O ci linga ndati?

9. Nye o sukila oku linga oco o tẽlise ocimãho coku lilongisa uloño umue?

⁹ Likolisilako oco o tẽlise ocimãho cove. Sokolola okuti, o yongola oku mioñolola uloño wove woku longisa. O sukila oku lilongisa lutate ombrochura losapi hati, Litumbika Koku Tanga Kuenda Koku Longisa. Eci o tambula onepa yimue kohongele yovokati kosemana, citava okuti o pinga ku manji umue wa loñoloha oco a yevelele onepa yaco osimbu handi kua yi lekisile kohongele kuenda oku u pinga oco a ku sapuile olonepa o sukila oku mioñolola. Fetika oku pongiya onepa yove selo, momo vamanji va ka limbuka alikolisilo wa linga kuenda utõi wa lekisa poku tẽlisa onepa yaco.—Olo 21:5; 2Ko 8:22.

10. Tukula ulandu umue u lekisa ndomo tu amamako oku mioñolola uloño umue.

¹⁰ Nye o sukila oku linga nda uloño o kasi oku lilongisa ca tĩla kokuove oku u linga ciwa? Ku ka liwekepo! Manji umue o tukuiwa Garry ka tẽlele oku tanga ciwa. Eye ivaluka osõi a enda oku kuata poku tanga lolukandi kolohongele viekongelo. Pole, wamamako oku likolisilako oco a mioñolole. Cilo eye hati, omo liepindiso a tambula kaliye o tẽla oku linga olohundo Konjango Yusoma, kolohongele vimbo kuenda kolohongele viofeka!

11. Ndeci Timoteo, nye ci ka tu kuatisa oku kuata ovikele vikuavo kupange wa Yehova?

¹¹ Anga hẽ Timoteo, weya oku kala ohundi yiwa, ale ulongisi uwa? Embimbiliya ka li ci popi. Pole, ka kuli atatahãi okuti Timoteo wa  tẽlisa ciwa ocikele caye poku kapako evetiyo lia Paulu. (2Ti 3:10) Cimuamue haico okuti, nda tua amamako oku loñoloha, tu ka lekisa okuti tu yongola oku tambula ovikele vikuavo kupange wa Yehova.

12. Omanu vakuavo va siata oku ku kuatisa ndati?

¹² Vosi yetu tua siata oku kuatisiwa la vakuetu. Eci tu kasi kosipitali, tu sanjuka poku nyũliwa lakulu vekongelo va talavaya Koseketa Yoku Tetulula Ocitangi Coku Yuvula Oku Sakuiwa Losonde, ale Locimunga ci Nyũla Umue o Vela. Eci tu liyaka locitangi cimue ka ca lelukile komuenyo wetu, tu sanjuka eci ukulu umue wekongelo a sanda otembo yoku tu yevelela loku tu lembeleka. Eci tu sukila ekuatiso koku songola elilongiso limue Liembimbiliya, tu sanjuka eci ukundi umue wotembo yosi a kuama elilongiso liaco loku pangavo onepa. Vamanji vaco vosi, va sanjukila oku tu kuatisa. Tu pondola oku kuata esanju nda tu lieca olumue oku kuatisa vamanjetu. Yesu wa popia hati: “Esanju li tunda koku eca olio lia velapo, li tunda koku tambula li sule.” (Ovl 20:35) Nda o yongola oku vokiya upange wove lonjila ndeyi, ale lonjila yikuavo, nye ci ka ku kuatisa oku ci linga?

13. Eci tu tumbika Ocimãho cimue nye tu sukila oku sokolola?

¹³ Ku ka tumbike ocimãho cimue kua kũlĩhĩle ndomo o ka ci tẽlisa. Ndeci, pamue o sokolola ndoco, ‘Nda yonguile oku vokiya upange wange vekongelo.’ Pamue ci tĩla oku kũlĩha ndomo o tẽlisa ocimãho caco, kuenje o sima okuti ku pondola oku ci tẽlisa. Omo liaco, litumbikila ocimãho o tẽla. Soneha ocimãho o yongola kuenda ndomo o yongola oku ci tẽlisa.

14. Momo lie tu sukilila oku lekisa esunguluko koku litumbikila ovimãho?

¹⁴ Tu sukila oku lekisa esunguluko koku litumbikila ovimãho. Momo lie? Momo ka tua kũlĩhĩle ovina vi keya kovaso yoloneke. Ndocindekaise: Upostolo Paulu wa kuatisa koku tumbika ekongelo limue liokaliye kolupale luo Tesalonike. Kuenda eye wa yonguile oku kalako oco a kuatise Akristão vaco vokaliye. Pole, ovanyãli va kisika Paulu oku tunda volupale. (Ovl 17:1-5, 10) Nda Paulu ka tundile volupale, nda wa kapa kohele omuenyo wa vamanji. Pole, Paulu ka liwekelepo oku va kuatisa. Eye wamamako oku ci linga ndaño  ekalo liaco ka lia lelukile. Noke, wa tuma Timoteo oco a ka kuatise Akristão vokaliye vo ko Tesalonike, oku pamisa ekolelo liavo. (1Te 3:1-3) Ocili okuti, vamanji vo ko Tesalonike va yeva esanju lialua omo okuti, Timoteo wa lieca olumue oco a ka talavaye kuna kuli esukila!

15. Ovimãho vietu vi pongoloka ndati eci ekalo lietu li pongoloka? Ci lombolola.

¹⁵ Tu pondola oku lilongisila kulandu wa Paulu ko Tesalonike. Etu pamue tu tumbika ocimãho coku kuata ocikele cimue cupange, pole, ekalo li pondola oku pongoloka okuti ka tu tẽlisa eci tua lavokaile. (Uku 9:11) Nda oco ci lipita love, sanda oku tumbika ocimãho cikuavo o pondola oku tẽlisa. Eci oco ohueli yimue yi tukuiwa Ted la Hiedi va linga. Omo liocitangi cuhayele, ovo va sukilile oku siapo o Betele. Pole, ocisola va kuatelele Yehova, ca va vetiya oku sanda olonjila vikuavo vioku vokiya upange wavo ku Yehova. Tete, ovo va talavaya ndakundi votembo yosi. Noke va linga akundi va likasi kuenda manji Ted wa pindisiwa oco a ende oku piñainya manji ukuakunyũla akongelo. Anyamo a kuata ka ca tavele vali okuti o tambula ocikele coku nyũla akongelo. Manji Ted la Hiedi va limbuka okuti va kukile calua oco va tẽlise ocikele caco. Ndaño okuti ca va kokela esumuo, pole, va kũlĩhĩle okuti va ponduile oku vumba Yehova volonjila vikuavo. Manji Ted wa popia hati, “Tua lilongisa okuti tu pondola oku vumba Yehova volonjila via litepa.”

16. Nye tu lilongisila kolondaka vi sangiwa ku Va Galatia 6:4?

¹⁶ Ka tu pondola oku tateka ovina viosi vi lipita komuenyo wetu. Omo liaco, tu sukila oku yuvula oku sokolola okuti, tu kuata lika esilivilo kovaso a Yehova omo liovikele tu kuete kupange waye kuenda ka citava okuti, tu sokisa ovikele tu kuete levi vakuetu wa kuete. Manji Hiedi wa popia hati, “Ku kuata ombembua nda wa sokisa ekalo liove lekalo liomuenyo va kuetu va kuete.” (Tanga Va Galatia 6:4.) Ci kuete esilivilo oku sanda olonjila vioku kuatisa vakuetu kuenda oku vumba Yehova. *

17. Nye o sukila oku linga oco o kuate ovikele vekongelo?

¹⁷ Oco o kuate ovikele vekongelo, amamako oku ambata omuenyo umue wa leluka kuenda yuvula olofuka. Lisila oku tẽlisa ovimãho vitito okuti vi ka ku kuatisa oku tẽlisa ovimãho vinene. Ndeci, nda ocimãho cove oku kala ukundi wotembo yosi, citava hẽ okuti cilo o talavaya ndukundi wa sokamo? Nda ocimãho cove oku kala oñuatisi yekongelo, citava hẽ okuti, o sanda otembo yoku litumbika calua kupange woku kunda kuenda oku nyũla vana  va vela la vamanji va kuka va kasi vekongelo liove? Uloño o kuete cilo, u pondola oku yikula apito ovikele akuavo kovaso yoloneke. Nõlapo oku linga eci o tẽla kovikele viosi o tambula.—Rom 12:11.

18. Ndomo ca lekisiwa velitalatu, nye wa lilongisila kulandu wa manji Beverley?

¹⁸ Anyamo tu kuete, ka a tu tateka oku tumbika kuenda oku tẽlisa ovimãho viespiritu. Kũlĩhĩsa ulandu wa manji umue ukãi o tukuiwa Beverley okuti, o kuete 75 kanyamo. Eye wa kuata ocitangi cimue cuhayele ca koka okuti, ka ci leluka kokuaye oku talavaya. Pole, eye wa yonguile oku linga calua oco a kuatise kupange ulikasi woku eca otuikanda tuelaleko Viocipito Conjivaluko. Omo liaco, eye wa tumbika ovimãho a pondola oku tẽlisa. Eci manji Beverley a tẽlisa ocimãho caye kupange waco, wa yeva esanju lialua. Alikolisilo aye, a vetiya vakuavo oku likolisilako kupange woku kunda. Yehova wa kapako upange wa vamanjetu va kuka ndaño okuti, ekalo liavo ka li va ecelela oku linga calua.—Os 71:17, 18.

19. Vipi ovimãho vimue viespiritu tu pondola oku litumbikila?

¹⁹ Litumbikila ovimãho o pondola oku tẽlisa. Sanda oku kuata ovituwa vi sanjuisa Yehova. Lilongisa ovoloño a ka ku ecelela oku linga ovopange alua vocisoko ca Yehova. Sanda olonjila vioku kuatisa calua vamanji. * Ndeci Timoteo, lesumũlũho lia Yehova, “omanu vosi va limbuka muẽle oku amako kuove.”—1Ti 4:15.