1. Ri nga ḓivhetshela zwipikwa zwifhio tshumeloni ya Yehova?

 SAMUSI ri Vhakriste vha ngoho, ri funa Yehova nga maanḓa. Ri ṱoḓa u ita zwoṱhe zwine ra nga kona tshumeloni ya Yehova. Fhedzi uri ri zwi kone ri tea u ḓivhetshela zwipikwa tshumeloni yawe, zwi ngaho u vha Vhakriste vha khwine, u guda vhutsila vhune ra nga vhu shumisa na u wana nḓila dza u shumela vhaṅwe. *

2. Ndi ngani ri tshi tea u ḓivhetshela zwipikwa tshumeloni ya Yehova na u shuma nga maanḓa uri ri zwi swikelele?

² Ndi ngani ri tshi tea u khwinisa nḓila ine ra shumela ngayo Yehova? Ndi ngauri ri ṱoḓa u takadza Khotsi ashu wa ṱaḓulu. Yehova u a takala musi a tshi vhona ri tshi shumisa vhukoni hashu tshumeloni yawe. Zwiṅwe hafhu, ri ṱoḓa u ita zwo engedzeaho tshumeloni ya Yehova uri ri kone u thusa vhahashu nga ho engedzeaho. (1 Vhathes. 4:9, 10) Roṱhe ri nga khwinisa nḓila ine ra shumela ngayo Yehova, hu sa londwi uri ri na miṅwaha mingana ri ngohoni. Kha ri vhone uri ri nga zwi ita hani.

3. Samusi zwo sumbedzwa kha 1 Timotheo 4:12-16, muapostola Paulo o ṱuṱuwedza Timotheo uri a ite mini?

³ Naho Timotheo o vha a tshi kha ḓi vha muswa musi muapostola Paulo a tshi mu ṅwalela vhurifhi ha u thoma, ho vha ho no fhela tshifhinga tshilapfu Timotheo e muhulwane tshivhidzoni. Naho zwo ralo, Paulo o mu ṱuṱuwedza uri a bvele phanḓa a tshi khwinisa nḓila ine a shumela ngayo Yehova. (Vhalani 1 Timotheo 4:12-16.)  Musi ni tshi humbula nga ha zwe Paulo a zwi amba, ni ḓo zwi ṱhogomela uri o vha a tshi khou ṱoḓa Timotheo a tshi ita mvelaphanḓa nga nḓila mbili. Ya u thoma, nga u vha Mukriste wa khwine a re na lufuno, lutendo na o kunaho. Ya vhuvhili, nga u khwinisa vhutsila hawe ha u vhalela vhaṅwe, u ṱuṱuwedza na u funza. Ri ḓo haseledza tsumbo ya Timotheo uri ri vhone nḓila ine u ḓivhetshela zwipikwa tshumeloni ya Yehova zwa nga ri thusa ngayo u vha vhashumeli vhawe vha khwine. Ri ḓo dovha ra amba nga ha nḓila dzine ra nga dzi shumisa uri ri ite zwo engedzeaho vhuḓinḓani.

4. U ya nga Vhafilipi 2:19-22, ndi mini zwo itaho uri Yehova a shumise Timotheo?

⁴ Ndi mini zwe zwa ita uri Yehova a shumise Timotheo? O vha e Mukriste wavhuḓi. (Vhalani Vhafilipi 2:19-22.) U ya nga zwe Paulo a zwi amba, ri kona u vhona uri Timotheo o vha a tshi ḓiṱukufhadza, a tshi fhulufhedzea, e mushumi wa biko nahone a tshi fhulufhelea. O vha a tshi funa vhathu nahone e na ndavha na vhahawe. Zwenezwi zwo ita uri Paulo a fune Timotheo na uri a si shavhe u mu ṋea mishumo i konḓaho. (1 Vhakor. 4:17) Nga hu fanaho, arali ra lingedza u ita zwine Mudzimu a zwi funa, Yehova u ḓo ri funa nahone ri ḓo ṋewa mishumo yo engedzeaho tshivhidzoni.—Ps. 25:9; 138:6.

5. (a) Ni nga khetha hani zwine na tea u zwi khwinisa kha vhumuthu haṋu? (b) Samusi zwo sumbedzwa kha tshifanyiso, wahashu ane a kha ḓi vha muswa u khou shumela hani kha tshipikwa tshawe tsha u pfela vhaṅwe vhuṱungu?

⁵ Khethani tshipikwa tshine na ṱoḓa u tshi swikelela. Rabelani nahone ni humbule nga ha uri ndi mini zwine na ṱoḓa u zwi khwinisa kha vhumuthu haṋu. Khethani tshithu tshithihi tshine na nga ṱoḓa u khwinisa khatsho. Sa tsumbo, ni nga khetha u shumela kha u vha muthu ane a pfela vhuṱungu kana muthu ane a vha na lutamo lwa u thusa vhahawe. Kana na shumela kha u vha na mulalo na vhaṅwe na u hangwela. Ni nga thuswa nga u humbela khonani yaṋu uri a ni vhudze zwine na nga khwinisa khazwo.—Mir. 27:6.

6. Ni nga swikelela hani tshipikwa tsha u khwinisa vhumuthu haṋu?

⁶ Shumelani kha uri ni swikelele tshipikwa tshaṋu. Ni nga zwi ita hani? Ni nga guda nga ha zwine na khou ṱoḓa u khwinisa kha vhumuthu haṋu. Kha ri ri ni khou ṱoḓa u vha muthu ane a hangwela vhaṅwe. Ni nga thoma nga u vhala na u humbulisisa nga ha tsumbo dzi re Bivhilini dza vhathu vhe vha hangwela vhaṅwe  na vhe vha si hangwele vhaṅwe. Humbulani nga ha tsumbo ya Yesu. O vha o ḓiimisela u hangwela vhaṅwe. (Luka 7:47, 48) O vha a sa livhisi ṱhogomelo kha vhukhakhi havho, nṱhani hazwo o vha a tshi sedzesa vhukoni havho. Vhafarisei vho vha vha sa fani na Yesu ngauri vhone vho vha “vha tshi dzhia vhaṅwe vhe si tshithu.” (Luka 18:9) Musi no no elekanya nga ha dzenedzo tsumbo, ḓivhudziseni uri: ‘Ndi dzhia hani vhaṅwe? Musi ndi tshi vha sedza, ndi livhisa ṱhogomelo kha zwifhio?’ Arali zwi tshi ni konḓela u hangwela muṅwe muthu, lingedzani u ṅwala fhasi zwithu zwavhuḓi nga ha onoyo muthu. Ni ḓivhudzise uri: ‘Yesu u dzhia hani onoyo muthu? Naa a nga mu hangwela?’ Arali na ita zwenezwo, zwi nga shandula nḓila ine na humbula ngayo. Mathomoni, ri nga tea u shuma nga maanḓa uri ri hangwele muthu we a ri khakhela. Fhedzi arali ra dzula ri tshi shumela khazwo, ri ḓo fhedzisela ri vhathu vhane vha hangwela nga hu leluwaho.

7. U tendelana na Mirero 22:29, Yehova u shumisa vhathu vha re na vhutsila nga nḓila-ḓe ṋamusi?

⁷ Ni nga ḓivhetshela tshipikwa tsha u guda vhuṅwe vhutsila. Humbulani uri hu ṱoḓea vhathu vhangana musi hu tshi fhaṱiwa zwifhaṱo zwa Bethele, Holo dza Maguvhangano na Holo dzine ra ṱanganela khadzo. Vhunzhi ha vhenevha vhathu vho guda vhutsila nga u shuma na vhahashu vha re na tshenzhelo. Samusi zwo sumbedzwa kha tshifanyiso, vhahashu vha khou guda vhutsila vhune ha nga vha thusa u ṱhogomela Holo dza Maguvhangano na Holo dzine ra ṱanganela khadzo. Yehova Mudzimu ane a vha “Khosi ya lini na lini” na Kristo Yesu ane a vha “Khosi ya mahosi,” vha khou shumisa vhathu vha re na vhutsila u swikelela zwithu zwihulwane. (1 Tim. 1:17; 6:15; vhalani Mirero 22:29.) Ri ṱoḓa u shuma nga maanḓa na u shumisa vhutsila hashu uri ri hulise Yehova, hu si riṋe vhaṋe.—Yoh. 8:54.

8. Ni nga thuswa nga mini u khetha vhutsila vhune na nga vhu guda?

⁸ Khethani tshipikwa tshine na ṱoḓa u tshi swikelela. Ni nga guda vhutsila vhufhio? Vhudzisani vhahulwane vhaṋu vha tshivhidzo khamusi na mulavhelesi wa ḽiisela uri vha ni vhudze vhutsila vhune na nga vhu guda. Sa tsumbo, arali vha ni vhudza uri ni khwinise nḓila ine na amba na u funza ngayo, ni nga vha humbela uri vha tou ni vhudza uri ndi ngafhi hune na nga khwinisa hone. Ni shume nga maanḓa uri ni khwinise kha honoho vhutsila. Ni nga zwi ita hani?

9. Ni nga shumela hani kha u swikelela tshipikwa tsha u guda vhutsila?

⁹ Shumelani kha uri ni swikelele tshipikwa tshaṋu. Kha ri ri ni ṱoḓa u khwinisa nḓila ine na funza ngayo. Ni nga vhala bugwana Ḓiṋekedzeleni Kha U Vhala Na U Funza. Musi ni na tshipiḓa miṱanganoni ya vhukati ha vhege, ni nga humbela muṅwe wahashu a re na tshenzhelo uri a ni thetshelese musi ni sa athu u tshi ita miṱanganoni na uri a ni vhudze hune na nga khwinisa hone. Ni lugiselele zwipiḓa zwaṋu hu tshee na tshifhinga uri vhathu vha zwi vhone uri ni mushumi wa biko na uri ni a fhulufhelea.—Mir. 21:5; 2 Vhakor. 8:22.

10. Ṋeani tsumbo i sumbedzaho nḓila ine ra nga bvela phanḓa ri tshi khwinisa ngayo vhuṅwe vhutsila.

¹⁰ Ni nga ita mini arali ni na tshipikwa tsha u swikelela zwiṅwe zwithu zwine zwa ni konḓela? Ni songo fhulufhuwa. Muṅwe wahashu ane a pfi Garry o vha a sa koni u vhala zwavhuḓi. U a humbula nḓila ye a vha a tshi niwa nga ṱhoni ngayo musi a tshi lingedza u vhala miṱanganoni. Fhedzi o shuma nga maanḓa uri a khwinise. U amba uri zwe a zwi gudiswa nga vhahashu vha re na tshenzhelo na nga dzikhandiso zwo mu thusa uri a ṋee dzinyambo miṱanganoni, maguvhanganoni na mabuthanoni.

11. Ri nga thuswa nga mini u ita zwo engedzeaho tshumeloni ya Yehova u fana na Timotheo?

 ¹¹ Naa Timotheo o vha muambi makone u fhira nḓila ye a vha e ngayo? Bivhili a i ri vhudzi. Fhedzi zwi tou pfala uri Timotheo o khwinisa nḓila ye a vha a tshi ita ngayo mushumo wawe nge a shumisa nyeletshedzo ya Paulo. (2 Tim. 3:10) Na riṋe arali ra khwinisa vhutsila hashu, ri ḓo kona u ita zwo engedzeaho tshumeloni ya Yehova.

12. Vhaṅwe vho ni thusa hani?

¹² Roṱhe ri a thusiwa nga vhaṅwe. Sa tsumbo, musi ri sibadela, ri a dalelwa nga vhahulwane vhane vha vha kha Komiti Ya Vhulamukanyi Na Vhuongelo (HLC) kana vha Zwigwada Zwine Zwa Dalela Vhalwadze. Musi ri na dzithaidzo, zwi a ri takadza musi muhulwane wa tshivhidzo a tshi ḓiṋea tshifhinga tsha u ri thetshelesa na u ri khuthadza. Musi mugudiswa washu wa Bivhili a tshi ṱoḓa thuso, ri a takala musi muvulanḓila a tshi ṱuwa na riṋe kha yeneyo pfunzo na u ri vhudza zwine ra nga zwi ita. Vhenevha vhahashu vhoṱhe vha a takalela u ri thusa. Na riṋe ri nga takala arali ra ḓiimisela u shumela vhahashu. Yesu o ri: “U ṋea zwi a takadza u fhira u ṋewa.” (Mish. 20:35) Arali ni tshi khou ṱoḓa u itela Yehova zwo engedzeaho nga dzenedzi nḓila kana dziṅwe, ni nga thuswa nga mini uri ni zwi ite?

13. Ri tea u humbula mini musi ri tshi ḓivhetshela tshipikwa?

¹³ Ḓivhetsheleni tshipikwa tsho livhaho. Sa tsumbo, ni nga ḓivhudza uri: ‘Ndi ṱoḓa u ita zwo engedzeaho tshivhidzoni.’ Fhedzi zwi nga konḓa u ḓivha uri ni nga swikelela hani tshenetsho tshipikwa na u ḓivha arali no tshi swikelela. Nga zwenezwo, ḓivhetsheleni tshipikwa tsho livhaho. Ni nga ṅwala fhasi tshenetsho tshipikwa na nḓila ine na ḓo tshi swikelela ngayo.

14. Ndi ngani ri tshi tea u tendelana na zwiimo musi ri tshi ḓivhetshela zwipikwa?

¹⁴ Musi ri tshi ḓivhetshela zwipikwa, ri tea u tendelana na zwiimo. Ndi ngani? Ndi ngauri zwiimo zwi a shanduka. Sa tsumbo, muapostola Paulo o thusa uri hu vhe na tshivhidzo tshiswa ḓoroboni ya Thesalonika. Nahone zwi tou pfala uri o vha o ḓivhetshela tshipikwa tsha uri a dzule henefho a thuse vhenevho Vhakriste vhaswa. Fhedzi Paulo o mbo ḓi pikiswa a kombetshedzwa uri a ṱuwe kha yeneyo ḓorobo. (Mish. 17:1-5, 10) Arali Paulo a vhe a songo  ṱuwa, o vha a tshi ḓo vhea vhahawe khomboni. Fhedzi Paulo ho ngo litsha u vha thusa. O tendelana na zwiimo. O ruma Timotheo uri a thuse vhenevho Vhakriste vhaswa ngei Thesalonika uri vha vhe na lutendo lwo khwaṱhaho. (1 Vhathes. 3:1-3) Zwi tou pfala uri Vhakriste vha Thesalonika vho takala nge Timotheo a vha o ḓiimisela u ya huṅwe na huṅwe hune a ṱoḓea hone.

15. Musi zwiimo zwashu zwi tshi shanduka, zwipikwa zwashu zwi nga shanduka hani? Ṋeani tsumbo.

¹⁵ Ri nga guda zwinzhi kha zwe Paulo a zwi tshenzhela ngei Thesalonika. Ri nga ḓivhetshela tshipikwa, fhedzi zwiimo zwashu zwa mbo ḓi shanduka zwa ita uri ri si tsha kona u swikelela tshenetsho tshipikwa. (Muh. 9:11) Arali zwo tou ralo kha inwi, ḓiimiseleni u ḓivhetshela tshiṅwe tshipikwa tshine na nga kona u tshi swikelela. Ndi zwe zwa itwa nga Ted na Hiedi. Vho tea u ṱuwa Bethele nga nṱhani ha vhulwadze. Fhedzi ngauri vho vha vha tshi funa Yehova, vho ṱoḓa dziṅwe nḓila dza u ita zwo engedzeaho vhuḓinḓani. Vho thoma nga u vha vhavulanḓila vha tshifhinga tshoṱhe. Nga murahu, vha vha vhavulanḓila vho khetheaho nahone Ted a gudiswa u vha mulavhelesi wa ḽiisela a thusaho. Ho mbo ḓi swika tshifhinga tshe ha shandulwa miṅwaha ine vhathu a vho ngo tea u i fhirisa vha tshi khou shuma sa vhalavhelesi. Ted na Hiedi vho mbo ḓi zwi ṱhogomela uri miṅwaha yavho a i tsha vha tendela u shumela Yehova nga yeneyi nḓila. Naho vho vha vho kulea nungo, vho zwi ḓivha uri vha nga shumela Yehova nga dziṅwe nḓila. Ted u ri: “Ro guda uri ri nga shumela Yehova nga nḓila nnzhi.”

16. Ri guda mini kha Vhagalata 6:4?

¹⁶ Ri nga si kone u langa zwoṱhe zwine zwa itea vhutshiloni hashu. Nga zwenezwo, ndi zwa ndeme uri ri si humbule uri Yehova u ri funa nga nṱhani ha mishumo ine ra vha nayo na uri ri si ḓivhambedze na vhaṅwe vhane vha vha na mishumo ine riṋe ri sa vhe nayo. Hiedi u ri: “Arali na vhambedza vhutshilo haṋu na ha vhaṅwe a ni nga ḓo takala.” (Vhalani Vhagalata 6:4.) Ndi zwa ndeme uri ri ṱoḓe nḓila dzine ra nga thusa ngadzo vhaṅwe na u shumela Yehova. *

17. Ni nga ita mini uri ni wane ndugelo tshumeloni ya Yehova?

¹⁷ Arali na tshila nga zwiṱuku zwine na vha nazwo, na iledza na zwikolodo zwi sa ṱoḓei, ni nga kona u ita zwo engedzeaho tshumeloni ya Yehova. Ḓivhetsheleni zwipikwa zwiṱuku zwine zwa ḓo ni thusa uri ni swikelele zwipikwa zwihulwane. Sa tsumbo, arali no ḓivhetshela tshipikwa tshihulwane tsha u vha muvulanḓila wa tshifhinga tshoṱhe, naa ni nga thoma nga u  vha muvulanḓila wa tshifhinganyana lwa miṅwedzi i tshi tou tevhekana? Arali no ḓivhetshela tshipikwa tsha u vha mushumeli tshivhidzoni, naa ni nga fhedza tshifhinga tsho engedzeaho vhuḓinḓani na u dalela vha lwalaho na vhalala vha tshivhidzoni tshaṋu? Tshenzhelo ine na i wana zwino i nga ni thusa uri ni wane ndugelo dzo engedzeaho tshifhingani tshi ḓaho. Ḓiimiseleni u ita zwoṱhe zwine na nga kona kha mushumo muṅwe na muṅwe une na ṋewa wone.—Vharoma 12:11.

18. Samusi zwo sumbedzwa kha tshifanyiso, no guda mini kha tsumbo ya wahashu Beverley?

¹⁸ Ri nga ḓivhetshela zwipikwa na u zwi swikelela naho ro no vha vhalala. Kha ri ambe nga ha tsumbo ya wahashu wa tshifumakadzini ane a pfi Beverley a re na miṅwaha ya 75. O vha e na vhulwadze vhune ha ita uri zwi mu konḓele u tshimbila. Fhedzi o vha a tshi khou ṱoḓa u ita zwo engedzeaho uri a tikedze fulo ḽa u rambela vhathu Tshihumbudzoni. Nga zwenezwo, o ḓivhetshela zwipikwa zwo livhaho. O takala vhukuma musi a tshi swikelela zwipikwa zwawe kha ḽeneḽo fulo. Zwe a zwi ita zwo ṱuṱuwedza vhaṅwe uri vha ite zwo engedzeaho vhuḓinḓani. Yehova u dzhiela nṱha zwine vhahashu vha vhalala vha mu itela zwone naho zwiimo zwi tshi ita uri vha si mu itele zwo engedzeaho.—Ps. 71:17, 18.

19. Ndi zwifhio zwiṅwe zwipikwa zwine ra nga ḓivhetshela zwone tshumeloni ya Yehova?

¹⁹ Ḓivhetsheleni zwipikwa zwine na nga kona u zwi swikelela. Khwinisani vhumuthu haṋu uri ni kone u takadza Yehova. Gudani vhutsila vhune ha ḓo ita uri Yehova na ndangulo yawe vha ni shumise nga ho engedzeaho. Ṱoḓani nḓila dzine na nga shumela ngadzo vhahaṋu nga ho engedzeaho. * U fana na Timotheo, Yehova u ḓo ni fhaṱutshedza, ‘mvelaphanḓa yaṋu ya vhonwa zwavhuḓi nga vhathu vhoṱhe.’—1 Tim. 4:15.