1. Nuuni halchchana danddayiyo ayyaanaabaa halchchoti awugeetee?

 NUUNI tumu Kiristtaaneta gidiyo gishshawu, Yihoowa keehi siiqoos. Nuuni Yihoowa haggaazuwan nuussi danddayettida ubbabaa oottanawu koyoos. SHin nuuni nuussi danddayettida ubbabaa Yihoowawu oottanawu A ufayssiya eeshshati deˈiyoogeeta, maaddiya hiillata tamaariyaageetanne harata maaddiyo ogeta koyiyaageeta gidiyoogaa mala ayyaanaabaa halchchota nuuni halchchana koshshees.

2. Nuuni ayyaanaabaa halchchuwaa halchchidi hegaa polanawu minni oottana koshshiyoy aybissee?

² Nuuni Yihoowawu loytti haggaaziyaageeta gidanawu koyiyoy aybissee? Waanna gaasoy, saluwan deˈiya nu siiqo Aawaa ufayssanawu koyiyoogaa. Yihooway nuuni nu imotaanne eraa awu loytti haggaazanawu goˈettiyoogaa beˈiyo wode ufayttees. Hegaa bollikka, nuuni nu ishanttanne michchontta loytti maaddanawu ayyaanaaban diccanawu koyoos. (1 Tas. 4:9, 10) Nuuni tuman deˈido wodee ay keena gidikkokka, nuuni ubbay ayyaanaaban diccana danddayoos. Nuuni hagaadan waati oottana danddayiyaakko ane beˈoos.

3. Koyro Ximootiyoosa 4:12-16y yootiyoogaadan, kiitettida PHawuloosi Ximootiyoosi waatanaadan minttettidee?

³ Kiitettida PHawuloosi ba koyro dabddaabbiyaa Ximootiyoosawu xaafido wode, he gooba yelagay meezee deˈiyo cima. SHin PHawuloosi I aggennan Yihoowawu loytti haggaaziyaagaa gidanaadan A minttettiis. (1 Ximootiyoosa 4:12-16 nabbaba.) PHawuloosi xaafidobaa neeni nabbabiyo wode, Ximootiyoosi  naaˈˈu ogetun ayyaanaaban diccanaadan I koyidoogaa akeekana. Hegee siiquwaa, ammanuwaanne geeshshatettaa mala Xoossaa ufayssiya eeshshati deˈiyoogaa gidiyoogaanne asaassi nabbabiyoogaa, asaa zoriyoogaanne tamaarissiyoogaa mala hiillata dichchiyoogaa. Nuuni oottana danddayiyoobata halchchiyoogee Yihoowawu loytti haggaaziyaageeta gidanaadan nuna waati maaddana danddayiyaakko bessiya Ximootiyoosa hanotaa pilggana. Nuuni loytti haggaazana danddayiyo amarida ogetakka pilggana.

4. Piliphphisiyuusa 2:19-22y yootiyoogaadan, Ximootiyoosi Yihoowawu loytti haggaazanaadan oottidabay aybee?

⁴ Ximootiyoosi Yihoowawu loytti haggaazanaadan oottidabay aybee? Awu Xoossaa ufayssiya loˈˈo eeshshati deˈiyoogaa. (Piliphphisiyuusa 2:19-22 nabbaba.) Ximootiyoosi bana ziqqi oottiyaagaa, ammanettiyaagaa, minni oottiyaagaanne aawatettaa poliyaagaa gidiyoogaa PHawuloosi abaa yootidobaappe akeekana danddayoos. I ishantta siiqiisinne etassi keehi qarettiis. Hegaappe denddidaagan, PHawuloosi Ximootiyoosa siiqiis; qassi gita aawatettaa awu immanawu mammottibeenna. (1 Qor. 4:17) Hegaadankka, nuuni Yihooway siiqiyo eeshshati deˈiyoogeeta gidiyo wode, I nuna siiqana, qassi nuuni gubaaˈiyawu loytti oottana.—Maz. 25:9; 138:6.

5. (a) Neeni neessi deˈanaadan koyiyo Xoossaa ufayssiya eeshshaa waata doorana danddayay? (b) Misiliyan qonccidaagaadan, issi yelaga michchiyaa haratussi kaseegaappe aaruwan qarettanawu halchchada hegaa polanawu waataydda deˈay?

⁵ Neeni neessi deˈanaadan koyiyo eeshshaa doora. Neeni giigissana koshshiya eeshshaabaa qoppa, qassi woossa. Neeni giigissana koyiyo issi eeshshaa doora. Leemisuwawu, ne mala Kiristtaanetuyyo loytta qarettana woy eta loytta maaddana danddayaasa. Woykko kaseegaappe aaruwan haratuura saruwan deˈiyaagaanne atto giyaagaa gidanawu baaxetana danddayaasa. Neeni giigissana danddayiyoobata mata laggee yootanaadan oychchiyoogee nena maaddana danddayees.—Lee. 27:6.

6. Neessi issi eeshshay deˈanaadan waatana danddayay?

⁶ Ne halchchuwaa polanawu baaxeta. Neeni hegaa waata oottana danddayay? Issi ogee neeni giigissanawu koyiyo eeshshaa loytta xannaˈiyoogaa. Neeni kaseegaappe aaruwan haratussi atto gaanawu halchchadasa gaada  qoppa. Etabay Geeshsha Maxaafan odettido haratussi coo atto giidaageetubaanne atto giibeennaageetubaa nabbabiyoogaaninne hegaa wotta dentta qoppiyoogan doommana danddayaasa. Yesuusi oottidobaa qoppa. I haratussi atto gaanawu eeno giis. (Luq. 7:47, 48) Qassi I eta mooruwan gidennan, eti oottana danddayiyooban xeelaa wottiis. SHin, Yesuusa wode deˈida Parisaaweti ‘hara asa ubbaa karoosona.’ (Luq. 18:9) He hanotata wotta dentta qoppa simmada, nena hagaadan oychcha: ‘Taani haratubaa qoppiyoobay aybee? Taani xeelaa wottiyo eta eeshshati awugeetee?’ Neeni issi urawu atto gaanawu metootikko, he urawu deˈiya loˈˈo eeshshata ubbaa xaafanawu mala. Yaatada, nena hagaadan oychcha: ‘Yesuusi he uraa waati xeellii? I awu atto gaanee?’ Nuuni yaatikko, nu qofaa laammana danddayoos. Nuuni nuna yiilloyida urawu atto gaanawu koyro heeran metootana danddayoos. SHin nuuni nu eeshshaa giigissanawu aggennan baaxetikko, sinttanawu kaseegaappe aaruwan atto gaana.

7. Leemiso 22:29 maaraadan, Yihooway ha wodiyan gooba oosanchchata ayba ogetun goˈettii?

⁷ Neeni halchchana danddayiyo hara halchchoy maaddiya hiillaa tamaariyoogaa. Beeteele keettata, Gita SHiiquwaa Addaraashatanne SHiiquwaa Addaraashata keexxanawu keehi daro oosanchchati koshshiyoogaa qoppa. He oosanchchatuppe daroti meezee deˈiyo ishanttuuranne michchonttuura oottiyoogan hiillata tamaaridosona. Misiliyan qonccidaagaadan, ishanttikka michchonttikka, Gita SHiiquwaa Addaraashatanne SHiiquwaa Addaraashata bottokoniyoogan maaddanawu koshshiya hiillata tamaaroosona. Hagaaninne hara ogetun, ‘merinaa Kawoy’ Xoossaa Yihoowaynne “kawotu Kawoi” Yesuus Kiristtoosi gooba oosanchchata goˈettidi maalaalissiyaabata oottoosona. (1 Xim. 1:17; 6:15; Leemiso 22:29 nabbaba.) Nuuni nuna gidennan, Yihoowa bonchchissanawu minni oottanawunne nu hiillaa goˈettanawu koyoos.—Yoh. 8:54.

8. Neeni tamaarana hiillaa waata doorana danddayay?

⁸ Neeni tamaaranawu koyiyo hiillaa doora. Neeni tamaarana danddayiyo hiillay aybee? Ne gubaaˈe cimatinne geella ne woradaa xomoosiyaagee neeni tamaariyaakko loˈˈo giidi qoppiyo hiillay aybakko eta oychcha. Leemisuwawu, eti neeni haasayaa haasayiyoonne tamaarissiyo hiillaa dichchanaadan yootikko, haasayaa haasayanawu neessi koshshiya eeshshaa neeni akeekanaadan maaddana mala eta oychcha. Yaatada, hegaa giigissanawu minna ootta. Hegaadan waata oottana danddayay?

9. Issi hiillaa tamaaranawu halchchidobaa waata polana danddayay?

⁹ Ne halchchuwaa polanawu baaxeta. Neeni gooba asttamaare gidanawu koyadasa gaada qoppa. Nabbabanawunne Tamaarissanawu Keehippe Minna giya brooshuriyaa loytta xannaˈana danddayaasa. Saaminttawu gidduwan shiiqiyo shiiquwan neessi kifilee imettiyo wode, shiiquwaappe kase ne haasayaa siyidi ne giigissanaabaa yootanaadan issi gooba ishaa oychchana danddayaasa. Neeni minna oottiyaagaanne ammanettiyaagaa gidiyoogaa asay eranaadan ne kifiliyaa kasetada giigetta.—Lee. 21:5; 2 Qor. 8:22.

10. Issi hiillay neessi deˈanaadan neeni waatanaakko bessiya leemisuwaa yoota.

¹⁰ Neeni issiban gooba gidanawu halchchada hegaa polanawu metootikko, waatana danddayay? Hidootaa qanxxoppa! Gaari giyo ishay loytti nabbabana danddayenna. I gubaaˈe shiiqotun cenggurssa xoqqu ootti nabbabanawu maliyo wode keehi yeellatidoogaa hassayees. SHin I hegaa giigissanawu minni oottiis. I loohissuwaa demmido gishshawu, gubaaˈe shiiqotun,  woradaa shiiqotuninne killiliyaa shiiqotun haasayata haasayaana danddayiis.

11. Ximootiyoosaagaadan, nuuni Yihoowa haggaazuwan kaseegaappe aaruwan loytti haggaazanaadan nuna aybi maaddana danddayii?

¹¹ Ximootiyoosi haasayaa haasayiyoogaaninne tamaarissiyoogan keehi gooba gididee? Hegaabaa Geeshsha Maxaafay yootenna. SHin Ximootiyoosi PHawuloosa zoriyaa kaallido gishshawu ba aawatetta poliyoogan gooba gidiyoogee qoncce. (2 Xim. 3:10) Hegaadankka, nuuni qara gidanawu baaxetikko, Yihoowa haggaazuwan kaseegaappe aaruwan oottana danddayoos.

12. Harati nena waati maaddidonaa?

¹² Harati nuna maaddanawu darobaa oottoosona. Leemisuwawu, nuuni hosppitaaliyaa geliyo wode, Hosppitaaletuura Gattiya Konttetuninne Sahettidaageeta Oychchiya Citan oottiya cimati yiidi nuna oychchiyo gishshawu eta keehi galatoos. Nuna metoy gakkiyo wode, siiqiya cimay nuuni haasayiyoobaa siyanawunne nuna minttettanawu wodiyaa bazziyo gishshawu galatoos. Geeshsha Maxaafaa xannaˈissiyoogan nuussi maadoy koshshikko, meeze deˈiyo issi aqinye nunaara xannaˈissanawunne maaddiya qofaa yootanawu eeno giyo wode nuuni ufayttoos. Ha ishanttinne michchontti ubbay nuna maaddiyoogan ufayttoosona. Nu ishantta maaddanawu eeno giyo wode nuunikka ufayttana danddayoos. Yesuusi hagaadan giis: “Ekkiyaagaappe immiyaagee anjjettidaagaa” woy ufayttiyaagaa. (Oos. 20:35) Hagaaninne hara ogetun nuuni Yihoowawu loytti oottanawu koyikko, yaatanaadan nuna aybi maaddanee?

13. Nuuni halchchuwaa halchchiyo wode ay qoppana koshshii?

¹³ Qoncce gidennabaa halchchoppa. Leemisuwawu, ‘Taani gubaaˈiyawu loytta oottana koyays’ gaada qoppana danddayaasa. SHin he halchchuwaa waata polanaakko eranawu metootana danddayaasa, qassi he halchchidobaa polidoogaakka erennan aggana danddayaasa. Hegaa gishshawu qoncce gidida halchchuwaa halchcha. He halchchuwaanne hegaa waata polanaakko xaafanakka danddayaasa.

14. Nuuni halchchuwaa halchchiyo wode hanotaadan laammiyaageeta gidana koshshiyoy aybissee?

¹⁴ Nuuni halchchuwaa halchchiyo wode hanotaadan laammiyaageeta gidanakka koshshees. Aybissi? Nu hanotay laamettiyo wode  nuuni nu halchchidobaa ubbaa polana danddayenna gishshataassa. Leemisuwawu, kiitettida PHawuloosi Tasalonqqe kataman ooratta gubaaˈee eqqanaadan maaddiis. Qassi I yan takkanawunne mati Kiristtaane gididaageeta maaddanawu halchchidoogee qoncce. SHin, eqettiyaageeti PHawuloosa he katamaappe wolqqan kessidosona. (Oos. 17:1-5, 10) PHawuloosi yan takkiyaakko, ba ishantti qohettanaadan oottana danddayees. SHin, PHawuloosi eta maaddanawu baaxetiyoogaa aggibeenna. I laamettida hanotaa meezetiis. Mati Kiristtaane gididaageetu ammanuwaa minttanaadan Ximootiyoosa kiittiis. (1 Tas. 3:1-3) Ximootiyoosi koshshiyoosaa awanne baanawu eeno giido gishshawu Tasalonqqen deˈiya Kiristtaaneti keehi ufayttidoogee qoncce.

15. Nu hanotay laamettiyo wode nu halchchoy waani laamettana danddayii? Leemisuwaa yoota.

¹⁵ Tasalonqqen PHawuloosa gakkidabaappe nuuni tamaarana danddayoos. Nuuni issibaa halchchana danddayoos, shin nu hanotay laamettiyoogee nu halchchidobaa polennaadan diggana danddayees. (Era. 9:11) Ne hanotaykka hegaa mala gidikko, neeni polana danddayiyo hara halchchuwaa halchchanawu eeno ga. Teedanne Haydo giyo azinaynne machchiyaa hegaadan oottidosona. Sahuwaa gaasuwan eti Beeteeleppe kiyana koshshiis. SHin eti Yihoowa siiqiyo siiqoy awu loytti haggaaziyo ogiyaa koyanaadan oottiis. Koyruwan, ubba wode aqinye gididosona. Hegaappe simmidi eti dumma aqinye gididosona, qassi Teedi woradaa xomoosiya ishaa gishshaa oottanawu loohiis. Guyyeppe, woradaa xomoosiyaageetu layttaara gayttidaagan hanotay laamettiis. Teedinne Hayda he aawatettan Yihoowawu oottanawu eti cimidoogaa akeekidosona. Eti hegan azzanikkonne, hara ogetun Yihoowawu haggaazana danddayiyoogaa eridosona. Teedi hagaadan giis: “Nuuni Yihoowawu dumma dumma ogiyan haggaazana danddayiyoogaa akeekida.”

16. Galaatiyaa 6:4​ppe nuuni ay tamaarana danddayiyoo?

¹⁶ Nuuni nu deˈuwan gakkiya ubbabaa teqqana danddayokko. Hegaa gishshawu, nuussi deˈiya haggaazo maataappe denddidaagan, Yihooway nuna xoqqu ootti xeellees giidi nuuni qoppana koshshenna; qassi nuussi baynna haggaazo maatay deˈiyoogeetuura nuna geeddarssennan aggiyoogee keehi koshshiyaaba. Hayda hagaadan gaasu: “Neeni ne deˈuwaa haratu deˈuwaara geeddarssikko, ufayttakka.” (Galaatiyaa 6:4 nabbaba.) Nuuni harata maaddiyoonne Yihoowawu haggaaziyo ogeta koyiyoogee keehi koshshiyaaba. *

17. Haggaazo maataa demmanawu neeni waatana danddayay?

 ¹⁷ Neeni sima deˈuwaa deˈikko, qassi koshshenna acuwan gelennan aggikko, Yihoowawu loytta haggaazana danddayaasa. Neeni mata wode gakkana danddayiyo halchchota halchchiyoogee takkada gakkana danddayiyoobata halchchanaadan nena maaddana. Leemisuwawu, neeni takkada gakkanawu halchchidoy ubba wode aqinye gidanaassa gidikko, haˈˈi aginan aginan kaafiya aqinye gidana danddayay? Neeni gubaaˈiyawu oottiyaagaa gidanawu halchchikko, loytta haggaazanawunne ne gubaaˈiyan deˈiya sahettidaageetanne cimidaageeta oychchanawu wodiyaa bazzana danddayay? Neeni haˈˈi oottiyoobay sinttappe hara haggaazo maataa demmanaadan nena maaddana danddayees. Neessi imettida ay oosuwaakka loytta oottanawu murtta.—Roo. 12:11.

18. Beverlippe ay tamaaray? (Misiliyaakka xeella.)

¹⁸ Nuuni cimidaageeta gidikkonne, ayyaanaabaa halchchuwaa halchchidi hegaa polana danddayoos. Layttay 75 gidido Beverl giyo michchee hanotaa qoppa. Hemettennaadan oottiya caddi oyqqiya harggee O sakkees. SHin, A Godaa Kahuwaa zamachan loytta oottanawu koyaasu. Hegaa gishshawu, A qoncce halchchota halchchaasu. Beverla zamachchan oottanawu halchchidobaa polido gishshawu keehi ufayttaasu. A oottidobay haratikka minni haggaazanaadan maaddiis. Cimida ishanttinne michchontti koyiyoogaa keenaa oottennaadan eta hanotay diggikkonne, eti oottiyoobaa Yihooway nashshees.—Maz. 71:17, 18.

19. Neeni halchchana danddayiyo issi issi ayyaanaabaa halchchoti aybee?

¹⁹ Neeni polana danddayiyo halchchota halchcha. Yihoowa ufayssiya eeshshati neessi deˈanaadan baaxeta. Xoossawunne A dirijjitiyawu loytta oottanawu maaddiya hiillata tamaara. Ne ishanttanne michchontta loytta maaddiyo ogeta koya. * Ximootiyoosaagaadan, Yihooway maaddin “ne dichchai asa ubbau qonccana.”—1 Xim. 4:15.