ALATIKE AKO 18
ʼE Feafeaʼi Hatatou Fai Ia He ʼu Fakatuʼutuʼu Pea Mo Fakahoko?
“Ke ke fakakaukauʼi lelei te ʼu meʼa ʼaia, ke ke tokaga tafito ki ai, ke sisio lelei ai te hahaʼi fuli ki tau lakalaka ki muʼa.”—1 TIM. 4:15.
KATIKO 84 Gaue ʼAki He Lotolelei
TE ʼU MANATU FAKANOUNOU a
1. Kotea la ia te ʼu fakatuʼutuʼu fakalaumalie ʼe feala ke tou fai?
KO TATOU ko te kau Kilisitiano moʼoni. Koia ʼe tou ʼoʼofa mamahi ai ia Sehova. ʼE tou loto fuli ke lelei tukupau ia tatatou tauhi ʼae kia Sehova. Koia ʼe tonu ai ke tou fai ia he ʼu fakatuʼutuʼu fakalaumalie. Ohage la ke tou maʼu ia te ʼu kalitate Fakaʼatua pea mo ako ke tou maʼu ia he ʼu fealagia ʼe ʼaoga pea ke tou kumi he ʼu faigamalie ke tou tokoni ai ki ʼihi. b
2. He koʼe ʼe tonu ke tou fai ia he ʼu fakatuʼutuʼu fakalaumalie pea mo faiga malohi ke tou fakahoko?
2 He koʼe ʼe maʼuhiga ke tou tuputupu ʼi te faʼahi fakalaumalie? ʼUluaki, he ʼe tou fia fakafiafiaʼi ia te loto ʼo tatatou Tamai ʼae ʼi selo. ʼE fiafia ia Sehova moka sio mai ʼe tou fakaʼaogaʼi katoa ʼotatou fealagia pea mo ʼotatou faiva ʼi tana tauhi. Lua, ʼe tou fia tuputupu ʼi te faʼahi fakalaumalie ke tou tokoni ai ki ʼotatou tehina mo tuagaʼane. (1 Tes. 4:9, 10) ʼE feala kia tatou fuli ke tou tuputupu ʼi te faʼahi fakalaumalie, tatau aipe pe ʼe tou foʼofoʼou peʼe kua fualoa tatatou ʼi te moʼoni. Tou vakaʼi pe ʼe feafeaʼi hatatou fakahoko ia te faʼahi ʼaia.
3. Ka tou lau ia 1 Timoteo 4:12-16, kotea ʼae neʼe ui e te apositolo ko Paulo kia Timoteo ke ina fai?
3 ʼI te temi ʼae neʼe fai ai e te apositolo ko Paulo ia tana ʼuluaki tohi kia Timoteo, ko Timoteo neʼe ko te tagata ʼafeā kua fotufotuʼa ʼi te faʼahi fakalumalie. Kae logo la te faʼahi ʼaia, neʼe fakalotomalohiʼi ia ia e Paulo ke hoko atu ia tana tuputupu ʼi te faʼahi fakalaumalie. (Lau ia 1 Timoteo 4:12-16.) Ka tou fakakaukauʼi ia te ʼu palalau ʼa Paulo ʼe tou tokagaʼi ai neʼe loto e Paulo ke tuputupu ia Timoteo ia aluʼaga ʼe lua: ʼuluaki ke ina maʼu ia te ʼu kalitate Fakaʼatua ohage ko te ʼofa, te tui, te aga maʼa. Lua, ke hikihiki ake ia te lelei ʼo tana lautohi mo tana faitokoni pea mo tana faiakonaki. Tou fakakaukauʼi ia te faʼifaʼitaki ʼo Timoteo pea mo vakaʼi pe feafeaʼi hatatou fai ia he ʼu fakatuʼutuʼu fakapotopoto ʼe tokoni mai anai ke tou tuputupu ʼi te faʼahi fakalaumalie. ʼE tou vakaʼi anai pe feafeaʼi hatatou fakalahi ʼatatou ʼu gaue fakaminisitelio.
FAIGA KE KE MAʼU IA TE ʼU KALITATE FAKAʼATUA
4. Ka tou lau ia Filipe 2:19-22, he koʼe neʼe ʼaoga ia Timoteo kia Sehova?
4 He koʼe neʼe ʼaoga ia Timoteo kia Sehova? Neʼe maʼu e Timoteo ia te ʼu kalitate Fakaʼatua. (Lau ia Filipe 2:19-22.) Ka tou lau ia te ʼu fakamatala ʼae neʼe fai e Paulo ʼo ʼuhiga mo Timoteo, ʼe tou tokagaʼi ai ko Timoteo neʼe ko te tagata neʼe agavaivai mo agatonu mo faʼa gaue pea mo tuha mo te falala. Neʼe ko he tahi neʼe agaʼofa pea neʼe hoha tuʼumaʼu pe ʼo ʼuhiga mo ʼona tehina. Koia, neʼe ʼofa ai ia Paulo ia Timoteo pea neʼe ina foaki age ki ai ia he ʼu gaue maʼuhiga. (1 Ko. 4:17) ʼO toe feia pe mo tatou, kapau ʼe tou faiga ke tou maʼu ia te ʼu kalitate Fakaʼatua, ʼe tou nonofo ovi anai kia Sehova pea ʼe ʼi ai anai totatou ʼaoga ki te kokelekasio.—Pes. 25:9; 138:6.
Kotou fakakaukauʼi pe kotea ia te kalitate Fakaʼatua ʼe kotou fia maʼu (Vaka’i te palakalafe 5-6)
5. (1) ʼE feafeaʼi hakotou iloʼi pe kotea la ia te kalitate Fakaʼatua ʼe kotou fia maʼu? (2) Ohage ko tona ha ʼi te pāki, kotea ʼae ʼe fai e te tuagaʼane ke ina maʼu ia te kalitate ʼae ko te lotomahino?
5 Kotou fakakaukauʼi lelei ia te fakatuʼutuʼu ʼae ʼe kotou fia fai. Kotou faikole kia Sehova ke tokoni atu ke kotou mahino pe kotea ia te ʼu fetogi ʼe tonu ke kotou fai. Kotou fakakaukauʼi he kalitate ʼe kotou fia maʼu. Ohage la ʼe lagi ʼe kotou fia maʼu ia te lotomahino peʼe ke kotou fia tokoni ki ʼokotou tehina mo tuagaʼane. ʼE lagi ʼe kotou loto ke kotou kumi tuʼumaʼu ia te tokalelei pea mo ʼihi. Peʼe ke ʼaua naʼa kotou faiga ke tuʼu tuʼumaʼu pe ʼakotou ʼu tonu. ʼE feala pe ke kotou kole ki hokotou kaumeʼa ke ina ui atu pe kotea la ia te ʼu fetogi ʼe tonu ke kotou fai.—Taag. 27:6.
6. Kotea ʼae ʼe tonu ke tou fai mo kapau ʼe tou fia maʼu ia he kalitate Fakaʼatua?
6 Kotou faiga ke kotou fakahoko ia takotou ʼu fakatuʼutuʼu. Kotea ʼae ʼe tonu ke kotou fai? ʼE feala ke kotou fai he ʼu fekumi ʼi te Tohi-Tapu ʼo ʼuhiga mo te kalitate ʼae ʼe kotou fia maʼu. Ohage la kapau ʼe kotou fia maʼu ia te lotomahino ʼe feala ke kotou lau pea mo metitasio ki he ʼu fakamatala ʼi te Tohi-Tapu ʼo ʼuhiga mo ni hahaʼi neʼe aga fakamolemole pea mo ʼihi neʼe mole aga fakamolemole. Ohage la ko Sesu, neʼe ko te tagata neʼe lotofakamolemole. (Luka 7:47, 48) Neʼe mole ina tokagaʼi ia te ʼu vaivaiʼaga ʼo te hahaʼi kae neʼe ina tokagaʼi ʼonatou kalitate. Neʼe mole hage ia Sesu ko te kau Faliseo ʼae neʼe ‘natou meʼa noaʼi ia te hahaʼi.’ (Luka 18:9) Ka tou lau ia te ʼu fakamatala ʼaia, ʼe feala ke tou fai ia te ʼu fehuʼi ʼaeni: ‘Kotea koa ʼae ʼe au tokagaʼi ʼi ʼoku tehina mo tuagaʼane? Kapau ʼe faigataʼa kia au taku fakamolemole ki he tahi tana aga, kotea la te ʼu kalitate ʼe au tokagaʼi ʼi te kilisitiano ʼaia? Kotea la ia te manatu ʼa Sesu ʼo ʼuhiga mo ia? ʼE ina fakamolemole anai koa ia tana aga?’ Ka tou ako feia ia te Tohi-Tapu, ʼe feala ai ke tou fetogi ia tatatou faʼahiga manatu. ʼI te kamata, ʼe lagi faigataʼa hatatou fakamolemole ki he tahi neʼe ina fai mai he aga ʼe kovi. Kae kapau ʼe tou hoko atu ʼatatou faiga, ʼe tou liliu anai ko he tahi ʼe lotofakamolemole.
KOTOU AKO HE GAUE PEʼE KE KOTOU MAʼU HE ʼU FEALAGIA
Kotou kole ke kotou kau ki te ʼu gaue ʼae ki te taupau ʼo te Fale Fono (Vaka’i te palakalafe 7) e
7. Ka tou lau ia Taʼaga Lea 22:29, ʼe fakaʼaoagaʼi feafeaʼi e Sehova ia te kau gaue faiva ia ʼaho nei?
7 Ko te tahi fakatuʼutuʼu ʼe feala ke kotou fai ke kotou ako he gaue. Kotou fakakaukauʼi age muʼa ia te kau gaue ʼae ʼe ʼaoga ke natou laga ia te ʼu fale ʼo te Petele peʼe ko te ʼu Fale Fono. Tokolahi te kau gaue neʼe natou ako ia te gaue pea mo ʼonatou tehina ʼae kua faiva ʼi te gaue ʼaia. Ohage pe ko tona fakaha ʼi te pāki, ko ni tehina mo tuagaʼane ʼe natou ako ia te taupau ʼo te ʼu fale ʼae ʼe fai ai te ʼu Fakatahi Lalahi peʼe ko te ʼu Fale Fono. ʼE fakaʼaogaʼi ai natou e Sehova ʼAtua ‘te Hau ʼo te heʼe gata’ pea mo Sesu Kilisito, “te Hau ʼo te ʼu hau,” moʼo fakahoko ni gaue fakaofoofo. (1 Tim. 1:17; 6:15; lau ia Taʼaga Lea 22:29.) ʼEi, ʼe tou fia gaue kinakina pea mo fakaʼaogaʼi ʼotatou fealagia moʼo fakakololiaʼi ia Sehova kae mole ko tatou.—Soa. 8:54.
8. Kotea la te fakatuʼutuʼu ʼe feala ke kotou fai ke feala hakotou maʼu ia he fealagia?
8 Kotou fakakaukauʼi lelei ia te fakatuʼutuʼu ʼae ʼe kotou fia fakahoko. Kotea la ia te kalitate ʼe kotou fia maʼu? Kotou fakalavelave ki te kau tagata ʼafeā ʼo te kokelekasio peʼe ko te tehina taupau ʼo te siliko pe kotea la ia te kalitate ʼae ʼe tonu ke kotou gaueʼi. Kapau ʼe ina ui atu ko te poto palalau peʼe ko te faiakonaki, kotou fakalavelave age ki ai pe kotea la ia te kalitate ʼae ʼe tonu ke kotou tokaga tafito ki ai. Kotou fehuʼi age pe kotea ʼae ʼe tonu ke kotou fai.
9. Kotea ʼae ʼe tonu ke ke fai mo kapau ʼe ke fia maʼu ia he fealagia?
9 Kotou faiga ke kotou fakahoko ia takotou fakatuʼutuʼu. Kapau ʼe ke fia hikihiki ia tau faʼahiga faiakonaki, ʼe feala ke ke ako fakalelei ia te kaupepa Fai Fakamalotoloto Tau Lautohi Pea Mo Tau Faiakonaki. Pea ka tuku atu he akonaki peʼe ko he faʼifaʼitaki ke ke fai ʼi te fono ʼo te vahaʼa, kole ki he tehina ʼe faiva ke fakalogo ki tau akonaki pea mo fai atu he ʼu tokoni ʼe ʼaoga ke ke hikihiki ia tau faʼahiga faiakonaki. ʼE mole tonu pe ke ke fakaha tau fia lakalaka ki muʼa kae ʼe tonu ke ke fakaha ko koe ko he tahi ʼe faʼa gaue pea mo tuha mo te falala.—Taag. 21:5; 2 Ko. 8:22.
10. Tuku mai he faʼifaʼitaki ʼe fakaha ai ʼe feala pe ke tou lakalaka ki muʼa ke tou maʼu ai he fealagia neʼe tou faiga ki ai.
10 Kae ʼe feafeaʼi leva mo kapau ʼe faigataʼa ia tau maʼu ia te fealagia ʼae ʼe ke faiga ki ai? ʼAua naʼa ke lotovaivai. Neʼe faigataʼa ʼosi ki te tehina ko Garry ia te lautohi. Neʼe ina manatuʼi neʼe ufiufi ʼi tana lautohi leʼo lahi ʼi te ʼu fono ʼo te kokelekasio. Kae neʼe faiga tuʼumaʼu pe ke hikihiki ia te lelei ʼo tana lautohi. Kae ʼi te temi nei, ʼaki te ako ʼae neʼe ina maʼu ʼi te kautahi ʼa Sehova kua poto leva ʼi te fai ʼo te ʼu akonaki ʼi te ʼu Fale Fono pea mo te ʼu fakatahi lalahi.
11. Kotea ʼae ʼe tokoni mai anai ke tou fakahoko he tahi ʼu gaue ohage pe ko Timoteo?
11 ʼE mole ui mai ʼi te Tohi-Tapu neʼe liliu ia Timoteo ko he tagata faiakonaki peʼe faiako faiva? Kae ʼe mahino ia, ʼaki te alu ʼo te temi neʼe liliu ia Timoteo ko he tahi ʼe faiva ʼi te fakahoko ʼo tona ʼu maʼua ʼuhi pe ko tana mulimuli ki te ʼu tokoni ʼa Paulo. ʼO toe feia pe mo tatou, kapau ʼe tou faiga ke tou maʼu ia he ʼu fealagia ʼe feala anai ke tou fakahoko he tahi ʼu gaue ʼi te kautahi ʼa Sehova.
FAIGA KE KE TOKONI KI ʼOU TEHINA MO TUAGAʼANE
12. Neʼe kua tokoni atu koa la ia he ʼu tehina peʼe ko he ʼu tuagaʼane?
12 ʼE tou fiafia moka tokoni mai he tahi. Ka tou ʼi te lopitali, ʼe tou fiafia moka ʼomai ia te kau tagata ʼafeā ʼo te Komite Fakafelogoi Tahi Mo Te Lopitali ʼo ʼaʼahi tatou. Pea ka tou tau mo he faigataʼaʼia ʼe tou fiafia moka haʼu he tagata ʼafeā ʼo fakalotomalohiʼi tatou. ʼE tou fiafia moka tokoni mai ia he pionie faiva ke tou taki ia he ako Tohi-Tapu pea mo foaki he ʼu tokoni. ʼE fiafia ia te ʼu tehina mo tuagaʼane ʼi te tokoni mai kia tatou. Pea ʼe feala pe kia tatou ke tou toe maʼu ia te fiafia ʼaia mo kapau ʼe tou tokoni ki ʼotatou tehina mo tuagaʼane. Neʼe ui fenei e Sesu: “ ʼE lahi age te fiafia moka kita foaki, ʼi takita tali.” (Gaue 20:35) Kapau ʼe kotou fia tokoni ki ʼokotou tehina mo tuagaʼane, kotea ʼe tokoni atu anai ke kotou fakahoko ia te fakatuʼutuʼu ʼaia?
13. Ka tou fai he fakatuʼutuʼu, kotea ʼae ʼe tonu ke tou manatuʼi?
13 Kotou fai he fakatuʼutuʼu ʼe kotou mahino lelei ki te ʼu gaue ʼae ʼe tonu ke kotou fai. Ohage la, ʼaua naʼa kotou manatu ‘ ʼE au fia fakalahi pe taku gaue ʼi te loto kokelekasio.’ ʼE lagi faigataʼa anai takotou iloʼi pe kotea ʼae ʼe tonu ke kotou fai ke kotou lava fakahoko ia te fakatuʼutuʼu ʼaia pea mo te temi ʼae ka kotou fakahoko ai. Kotou fai he fakatuʼutuʼu ʼe kotou mahino lelei ki tona faʼahiga fakahoko. ʼE feala pe ke kotou tohi ki he pepa pea mo tohi ai pe kotea ʼae ʼe tonu ke kotou fai ke kotou kakusia ia te fakatuʼutuʼu ʼaia.
14. He koʼe ʼe tonu ke tou fakapotopoto moka tou fai ia he ʼu fakatuʼutuʼu?
14 Ka tou fai he ʼu fakatuʼutuʼu, ʼe tonu ke tou fakapotopoto. He kotea tona tupuʼaga? He ʼe feala pe ke hoko ni aluʼaga neʼe mole tou ʼamanaki ki ai. Ohage la, neʼe tokoni ia te apositolo ko Paulo ke laga ia te kokelekasio foʼou ʼo te kolo ʼo Tesalonika. Neʼe lagi manatu ke nofo ai ʼo tokoni ki te kau Kilisitiano foʼou ʼaia. Kae neʼe ʼi ai te ʼu hahaʼi neʼe natou fakafeagai kia Paulo ʼo tupu ai leva tana mavae ʼi te kolo ʼaia. (Gaue 17:1-5, 10) Ka na neʼe nofo ai la ia Paulo neʼe feala pe ke hoko he tuʼutamaki ki ʼona tehina. Kae neʼe mole lotovaivai ia Paulo. Neʼe ina kumi he tahi age ʼu puleʼaki. Ki muli age, neʼe ina fekauʼi ia Timoteo ke alu ʼo tokoni ki te kau Kilisitiano foʼou ʼaia ʼo Tesalonika. (1 Tes. 3:1-3) ʼE mahino ia, neʼe fiafia ia te kau Tesalonika ʼo ʼuhiga mo Timoteo ʼi tana lotolelei ʼae ke alu ʼo tokoni ʼi he faʼahi pe neʼe ʼaoga ki ai he tokoni.
15. Kotea la ia te ʼu aluʼaga ʼe feala ke hoko neʼe mole tou ʼamanaki ki ai ʼo tupu ai tatatou fetogi ʼatatou fakatuʼutuʼu? Kotou tuku mai he faʼifaʼitaki.
15 ʼE ʼi ai te ʼu ako ʼe feala ke tou maʼu mai ia Paulo ʼi tana ʼi Tesalonika. ʼE lagi ai he gaue ʼe tou fakaʼamu ke tou fai maʼa Sehova kae ʼe ʼi ai te ʼu aluʼaga neʼe hoko neʼe mole tou ʼamanaki ki ai ʼo tupu ai leva tatatou mole lava fai ia te ʼu gaue ʼaia. (Ekl. 9:11) Kapau koia, kotou foimo fai he tahi fakatuʼutuʼu ʼe feala ke kotou fakahoko. Ko te koga la ʼaia, neʼe fai e te taumatuʼa ʼe higoa ko Ted pea mo Hiedi. Neʼe nā gaue ʼi te Petele pea neʼe tonu leva ke nā mavae ʼuhi ko te mahaki. Kae neʼe nā ʼoʼofa pe ia Sehova, koia neʼe nā kumi ai he tahi ʼu puleʼaki ke feala ke hoko atu ia tanā gaue ʼae maʼa Sehova. ʼUluaki, neʼe nā toʼo ia tanā selevisi pionie katoa. Ki muli age leva, neʼe hinoʼi naua ke nā pionie makehe pea neʼe akoako ia Ted ke ina fai ia te gaue ʼa te taupau fakasiliko. Ki muli age leva, neʼe mole kei feala kia Ted ke ina hoko atu ia te gaue ʼa te taupau fakasiliko ʼuhi ko tonā taʼu. Neʼe feala pe ke nā lotovaivai kae neʼe nā iloʼi pe ʼe ʼi ai te tahi ʼu gaue ʼe feala ke nā fakahoko maʼa Sehova. Neʼe ui fenei e Ted: “Neʼe ma mahino ai, neʼe mole tonu ke ma faiga ki he faʼahiga gaue pe ʼe tahi.”
16. Kotea te ako ʼe tou maʼu mai ia Kalate 6:4?
16 ʼE ʼi ai te ʼu aluʼaga ʼe hoko ʼi ʼotatou maʼuli neʼe mole tou ʼamanaki ki ai pea ʼe mole fakalogo ia kia tatou. Kae ʼe mole tonu ke tou manatu ʼe tou maʼuhiga ʼuhi ko te ʼu pilivilesio ʼae ʼe tou maʼu peʼe ke tou fakatatau ʼotatou pilivilesio pea mo te ʼu pilivilesio ʼae ʼe maʼu e ʼihi. ʼE fakamahino fenei e Hiedi: “ ʼE mamahi ʼotatou loto moka tou fakatatau totatou maʼuli pea mo te maʼuli ʼo ʼotatou tehina mo tuagaʼane.” (Lau ia Kalate 6:4.) Koia ʼe maʼuhiga ai ke tou fakakaukauʼi pe kotea te ʼu gaue ʼe feala ke tou fakahoko maʼa ʼihi. c
17. Kotea ʼae ʼe feala ke kotou fai ke feala hakotou fakahoko he tahi ʼu gaue ʼi te kokelekasio?
17 Kapau ʼe kotou fia fakahoko he tahi ʼu gaue maʼa Sehova, kotou fakafaigafua tokotou maʼuli pea ʼaua naʼa kotou toʼo he ʼu maʼua ʼi te fale paʼaga ki he ʼu meʼa ʼe mole hona ʼaoga. Kotou fakahoko ni gaue liliki ʼe tokoni atu anai ke kotou fakahoko ia takotou ʼu fakatuʼutuʼu. Ohage la, kapau ʼe kotou fia toʼo ia takotou selevisi pionie katoa, ʼe lagi lelei ke kotou kamata muʼa ʼaki ia te selevisi pionie vaeluaʼi temi ʼo kotou faihoholo. Pea kapau ʼe kotou fia liliu ko he faifekau fakaminisitelio, ʼe lagi lelei ke kotou fakaʼaogaʼi lahi tokotou temi ki te gaue faifakamafola peʼe ke kotou ʼaʼahi te kau mahaki pea mo te kau matuʼa ʼo te kokelekasio. Ka kotou fai te ʼu gaue ʼaia, ʼe feala pe ki ʼamuli ke kotou fakahoko he tahi ʼu gaue ʼi te loto kokelekasio. Kotou fakatotonu malohi ke kotou fakahoko lelei ia te ʼu gaue fuli ʼae ʼe foaki atu kia koutou.—Loma 12:11.
Kotou fai ia he fakatuʼutuʼu ʼe feala ke kotou fakahoko (Vaka’i te palakalafe 18) f
18. Ka tou sioʼi ia te pāki, kotea te ako ʼe tou maʼu mai te faʼifaʼitaki ʼo Beverley?
18 Maʼia mo te kau matuʼa ʼe feala ke natou fai ia he ʼu fakatuʼutuʼu pea mo natou fakahoko. Ohage la, ko te tuagaʼane ʼe higoa ko Beverley, ʼi tona taʼu 75 neʼe tau mo he mahaki faigataʼa pea neʼe mole kei feala ke haʼele. Kae neʼe fia lagolago ki te tufa makehe ʼae ki te ʼAho Fakamanatu. Koia neʼe ina fai ai he ʼu fakatuʼutuʼu ke kau ki ai. Pea neʼe fiafia ia Beverley ʼi tana lava fakahoko ia tana fakatuʼutuʼu pea neʼe ko he lotofakamalohi ʼaia ki te ʼu tehina mo te ʼu tuagaʼane ke lahi age tanatou gaue ʼi te faifakamafola. ʼE leleiʼia e Sehova ia te gaue ʼae ʼe fakahoko e ʼotatou tehina mo tuagaʼane ʼae kua matuʼa logo la te mole kei lahi ʼo te ʼu gaue ʼae ʼe feala ke natou fai.—Pes. 71:17, 18.
19. Kotea ʼihi fakatuʼutuʼu fakalaumalie ʼe feala ke tou fai?
19 Kotou fai he ʼu fakatuʼutuʼu ʼe feala ke kotou fakahoko. Kotou faiga ke kotou maʼu ia te ʼu kalitate ʼae ʼe leleiʼia e Sehova. Kotou ako ke kotou maʼu ia te ʼu fealagia ʼe feala ai ke fakaʼaogaʼi koutou e Sehova pea mo tana kautahi. Kotou faiga ke kotou tokoni lahi ki ʼokotou tehina mo tuagaʼane. d Kapau ʼe kotou fai feia, pea ʼe tapuakiʼi anai koutou e Sehova ohage ko tana tapuakiʼi ia Timoteo. Pea ʼe ‘sisio lelei ai te hahaʼi fuli ki takotou lakalaka ki muʼa.’—1 Tim. 4:15.
KATIKO 38 ʼE Ina Fakamalohi Anai Ia Koe
a Ko Timoteo neʼe ko te tagata neʼe faiva ʼi te fakamafola ʼo te logo lelei. Kae logo la te faʼahi ʼaia, neʼe fakalotomalohiʼi ia ia e te apositolo ko Paulo ke hoko atu ia tana tuputupu ʼi te faʼahi fakalaumalie. Pea kapau neʼe mulimuli ia Timoteo ki te ʼu tokoni ʼa Paulo, ʼe ʼi ai anai tona ʼaoga kia Sehova pea mo tona ʼu tehina mo tuagaʼane. ʼE kotou hage koa ko Timoteo ʼo kotou loto ke lahi age takotou gaue maʼa Sehova pea mo ʼokotou tehina mo tuagaʼane? Kapau koia, kotea la ia te ʼu fakatuʼutuʼu ʼe tonu ke kotou fai pea ʼe feafeaʼi anai takotou fakahoko ia te ʼu fakatuʼutuʼu ʼaia?
b HE ʼU FAKAMAHINO: Ko te ʼu fakatuʼutuʼu fakalaumalie ʼe ko te ʼu fakatuʼutuʼu fuli ʼe tou fai ke lahi age ia tatatou ʼu gaue ʼae ʼe tou fai maʼa Sehova pea mo fakafiafiaʼi ia tona loto.
c Vakaʼi “Te Faifakamafola ʼi He Koga Meʼa ʼe Lahi Ai Te Gaue” ʼi te tohi Te Kautahi ʼAe ʼe Ina Fai Te Finegalo ʼo Sehova ʼi te kapite 10 pal. 6-9.
d Vakaʼi te kapite 60 “Ke Hoko Atu ʼAu Faiga” ʼi te tohi Ke Ke Fiafia ʼo Heʼe Gata.
e FAKAMATALA ʼO TE ʼU PĀKI: Ko he tehina ʼe ina fakaha ki he ʼu tuagaʼane ʼe toko lua ia te faʼahiga fakahoko ʼo te gaue. ʼOsi ʼaia, pea ʼe nā fakahoko leva te gaue.
f FAKAMATALA ʼO TE ʼU PĀKI: Ko he tuagaʼane ʼe nofo punupunu ʼi tona ʼapi pea ʼe faifakamafola ʼi te telefoni ʼo fakaafe te hahaʼi ki te ʼAho Fakamanatu.