1. მუნერ სულიერ მიზნეფ შემლებნა მიღდან?

 ჩქი, მუჭოთ ჭეშმარიტ ქრისტიანეფს, მანგარო მიჸორა იეჰოვა დო მოკონა, ნამ შემლებნან თინა ვაკეთათ თიშო. თექ ქეშმალებუანინ, საჭირო რე, მიღდან სულიერ მიზნეფ, მუნერით რე ქრისტიანულ თვისებეფიშ გავითარება, კონკრეტულ უნარეფიშ დოგურაფა დო შხვეფიშ მომსახურებაშო საშვალებეფიშ გორუა. *

2. მუშენ ოკო მიღდან სულიერ მიზნეფ დო მუშენ ოკო იფხანდათ თინეფიშ მიოჭირნაფალო?

² მუშენ რე საჭირო სულიერო წიმი ულა? მთავარ მიზეზ თინა რე, ნამდა მოკონა, გურ გუხარათ ჩქინ ზეციერ მუმას. იეჰოვა ბედნერ რე, მუჟამსით ორწყე, ნამდა ჩქინ ნიჭ დო უნარეფს სრულას იბრინუანთ თიშ მსახურებას. თეს გეძინელ, მუჟამსით სულიერო წიმი მეურთ, შემლებნა უმოსო მივეხვარათ და დო ჯიმალეფს (1 თეს. 4:9, 10). ვა უღჷ მნიშვნელობა, მუზმა ხან რე ჭეშმარიტებას ვორეთინ, ჩქი არძას შემლებნა სულიერო წიმი ულა. მორთ ქობძირათ, მუჭო რე თენა შეიოლებერ.

3. მუჭოთ 1 ტიმოთეშ 4:12—16-ის ჭარჷ, მუშ კეთება ელუჩ ტიმოთეს პავლე მოციქულქ?

³ მუჟამსით პავლე მოციქულქ პირველ წერილ მეჭარ ტიმოთეს, თე ახალგაზრდა კოჩ უკვე გამოცდილ უხუცეს რდჷ, მარა თიქ იშენით ელუჩ, გეუჯგუშკო იეჰოვაშ მსახურებას (წეკითხით 1 ტიმოთეშ 4:12—16). პავლეშ სიტყვეფს  ქიდვეკვირებუთ-და, ქობძირუნთ, ნამდა თის ოკოდ, ტიმოთექ გეუჯგუშკო ჟირ მხარეს: თიცალ თვისებეფიშ გავითარებას, მუნერით რე ჸოროფა, რწმენა დო სიწმინდე დო თიცალ უნარეფიშ გავითარებას, მუნერით რე სახალხოთ კითხირ, რჩევაშ მეჩამა დო გურაფა. ჩქი გუვარჩიენთ ტიმოთეშ მაგალითის დო ქობძირუნთ, მუჭო შემლებნა რეალურ მიზნეფით სულიერო წიმი ულა. თეს გეძინელ, თის ხოლო გუვარჩიენთ, მუჭო შემლებნა მსახურებას გაუჯგუშება.

4. მუჭოთ ფილიპელეფიშ 2:19—22-ს ჭარჷ, მუშ საშვალებათ შეულებუდ ტიმოთეს გიმადირთკო იეჰოვას?

⁴ ტიმოთეს ძვირფას ქრისტიანულ თვისებეფიშ საშვალებათ შეულებუდ გიმადირთკო იეჰოვას (წეკითხით ფილიპელეფიშ 2:19—22). მუჭოთ პავლე ეჭარუნს ტიმოთეს, თინა რდჷ თანდაბალ, ართგურ, მოხანდე დო საიმენდო პიროვნება. თინა ჸოროფა დო მზრუნველობას გიმირჩქინანდჷ და დო ჯიმალეფიშ მიმართ. შედეგო პავლეს უჸორდ ტიმოთე დო რთულ დავალებეფს ანდენდჷ თის (1 კორ. 4:17). თეშნერო, ჩქი ხოლო ვეჸოროფებუთ იეჰოვას დო უმოსო გიმვოდირთუთ კრებას, მუჟამსით ვავითარენთ ქრისტიანულ თვისებეფს (ფსალმ. 25:9; 138:6).

5. ა) მუჭო შეილებნა გინოჭყვიდათ, ნამ ქრისტიანულ თვისებაშ გაუჯგუშება გოსაჭირნა? ბ) მუჭოთ ილუსტრაციაშე იძირე, მუს ორთჷ და თიშო, ნამდა უმოსო მიშელას შხვეფიშ მდგომარეობაშა?

⁵ გიღდან კონკრეტულ მიზან. ქილოცით დო დეფიქრით, მუ გაფნა გაუჯგუშებელ თქვან პიროვნებას. გეგშაგორით კონკრეტულ თვისება, ნამუთ გოკონა გაუჯგუშათ. მაგალთო, შილებე თქვან დუდშე ქიმუშუათ, ნამდა უმოსო შეგალებუან შხვეფიშ მდგომარეობაშა მიშულაქ ვარდა უმოს მტკიცაშე გეგნოჭყვიდათ თანამორწმუნეეფიშ ელარნა. ვარდა შილებე გოსაჭირდან, რდათ უმოს მშვიდობიანეფ დო მპატიებელეფ. ქოკითხით სანდო მეგობარს აზრ, მუს შეილებნა გეუჯგუშათ (იგავ. 27:6).

6. მუჭო შეილებნა ქიმიოჭირინუათ თქვან მიზანს დო გავითარათ ნამდგაინ თვისება?

⁶ მონდომა ვა დარკათ თქვან მიზანიშ მენჭირნაფას. მუჭო შეილებნა თეშ კეთება? ართ-ართ საშვალება რე, ტომბაშე გეგმირკვიათ თი თვისებეფ, ნამდგაშ გაუჯგუშება გოკონა. მაგალთო, თქვა შილებე გეგნოჭყვიდათ, რდათ უმოს მპატიებელ. თეშ ოკეთებელო, შეილებნა წეკითხათ თინეფიშ მაგალითეფ, მით  სრულაშე პატიენდჷ შხვეფს დო თინეფიშ ხოლო, მით თეს ვართუდ დო უკულ დეფიქრათ თე მაგალითეფშე. დეფიქრით იესოშე. თინა ირიათო მზათ რდჷ, ქაპატუკო შხვეფს (ლუკ. 7:47, 48). თის ყურადღება შხვეფიშ შეცდომეფშა ვარინ, თიშა გინუღუდ, მუდგაშ კეთება შეულებდეს. თეშ გინაწონს, ფარისეველეფს მუთუნო ვემიორჩქუდეს შხვეფ (ლუკ. 18:9). თე მაგალითეფშე დაფიქრებაშ უკულ თქვან დუდის ქოკითხით: „შხვეფიშ ნამ თვისებეფშა გინომიღ ყურადღება?“. მითინიშ პატიება ქოიჭირან-და, ქეცადით, თი პიროვნებაშ არძა ჯგირ თვისება გეგმოჭარათ. თეშ უკულ დეფიქრით: „მუჭო უჯინე იესო თე პიროვნებას? ქაპატიენდუო თინა? დუდშე შილებე გამჭირდან, ვაპატუათ თის, მიდგაქ მოწყინებაფეს, მარა ჩქინ დუდიშ გაუჯგუშებას ვემვოტენთ-და, უმოსო შემალებედან იჸი პატიება“.

7. მუჭოთ იგავეფიშ 22:29-შე იძირე, მუჭო ირინუანს იეჰოვა უნარიან მსახურეფს?

⁷ ხოლო ართ მიზან, მუთ შეილებნა გიღდან, რე საჭირო უნარეფიშ დოგურაფა. დეფიქრით, მუზმა თანამშრომელ რე საჭირო ბეთელიშ დო შხვა შენობეფიშ ოშენებელო. თინეფშე ბრელქ, მით მშენებლობას მსახურენს, გამოცდილ და დო ჯიმალეფწკუმა ართო მუშობათ დიგურუ საქმე. მუჭოთ სურათშე იძირე, ქოთ ჯიმალეფ დო ქოთ დალეფ გურაფლენა თიცალ უნარეფს, ნამუთ საჭირო რე დარბაზეფიშ მიკალუაფარო. თე დო ხოლო შხვა საშვალებეფით იეჰოვა ღორონთ, „მარადიულობაშ მეფე“, დო იესო ქრისტე, „მეფეეფიშ მეფე“, დიდებულ საქმეეფს ასრულენა უნარიან მსახურეფიშ ხეთ (1 ტიმ. 1:17; 6:15; წეკითხით იგავეფიშ 22:29). ჩქი მოკონა, ბრელ იფხანდათ დო ჩქინ უნარეფ იეჰოვაშ განდიდებელო გეგმიბრინუათ და ვართ ხოლო ჩქინ დუდიშ (იოან. 8:54).

8. მუჭო შეილებნა გინოჭყვიდათ, ნამ უნარიშ გაუჯგუშება გოსაჭირნა?

⁸ გიღდან კონკრეტულ მიზან. ნამ უნარიშ გავითარება შეილებნა? ქოკითხით თენა თქვან კრებაშ უხუცესეფს ვარდა რაიონულ ზედამხედველს. თინეფქ ჩიებაშ დო გურაფაშ უნარიშ გაუჯგუშება ქელაიჩეს-და, ქოკითხით, კონკრეტულო მუშ კეთება შეილებნა. თეშ უკულ ქიდიჭყით გაუჯგუშება. მუჭო შეილებნა თეშ კეთება?

9. მუჭო შეილებნა მიოჭირინუათ თქვან მიზანს, ნამდა გავითარათ კონკრეტულ უნარ?

⁹ მონდომა ვა დარკათ თქვან მიზანიშ მენჭირნაფას. წერმიდგინით, ნამდა გოკონა, უჯგუშ მასწავლებერქ იჸუათ. თეშ გურშენ შეილებნა ჯგირო გეგმირკვიათ ბროშურა „გაუჯგუშ კითხირ დო გურაფაშ უნარი“. კრებაშ წოხოლე გიშულაშახ შეილებნა გამოცდილ ჯიმას ქოთხუათ, ქოირჩქილან დო საჭირო რჩევეფ ქიმერჩან, ნამუთ მიგეხვარებნა გაუჯგუშებას. ქეცადით, ხვალე უნარიანიშ ვარინ, მოხანდეშ დო საიმენდოშ სახელ გიღდან (იგავ. 21:5; 2 კორ. 8:22).

10. ქიმიჸონით მაგალით, მუჭო გუვაუჯგუშათ ჩქინ უნარეფ.

¹⁰ მუ ოკო ქიმინათ, მუჟამსით თიცალ უნარიშ გავირება გოკონა, ნამუთ იშენდოიშენ ჯგირო ვეგშქალენა? საჭირო რე, გურ ვეიჸოთათ. ჯიმას, ნამდგას გარი ჯოხო, უჭირდჷ კითხირ. თინა იშინანს, ნამდა მანგარ უხერხულო გინაფლენდჷ დუდის, მუჟამსით კრებაშ წოხოლე აფუდ ოკითხე, მარა გურ ვეიჸოთ დო გაგრძელ მუშ დუდშე მუშობა. ასე თინა იჩიებ, ნამდა თი დროს მეღებულ გურაფაშ შედეგო, შეულებ მოხსენებეფით გიშართას კრებას დო კონგრესეფს.

11. ტიმოთეცალო, მუ მიმეხვარებნა უმოს გუვაკეთათ იეჰოვაშ მსახურებას?

¹¹ შეიალებუო ტიმოთეს გინირთკო მანგარ ჯგირ მომხსენებელო, ვარდა არძაშ  უჯგუშ მასწავლებერო? ბიბლია თეს ვეჩიებ, მარა, მუშო ოკო რაგად, ტიმოთე უჯგუშო შეასრულენდჷ მუშ დავალებას, მუშენდა მეჸუნდჷ პავლეშ რჩევას (2 ტიმ. 3:10). თეშნერო, ჩქინ უნარეფს გუვავითარენთ-და, შემალებენა უმოს გუვაკეთათ იეჰოვაშ მსახურებას.

12. თქვა მუჭო მიგეხვარეს შხვეფქ?

¹² ირკოჩის მოსაჭირნა შხვეფშე ელარნა. საავადმყოფოს ქუმოფხვადით-და, მანგარ მარდულ იპჸუაფუთ, მუჟამსით ქუმმაკითხანა უხუცესეფ, მით „საავადმყოფოეფწკუმა თანამშრომლობაშ კომიტეტეფს“, ვარდა „პაციენტეფიშ მონახულებაშ ჯგუფეფს“ მსახურენა. ცხოვრებას სირთულეეფს ქეშეფხვადით-და, მარდულეფ იპჸუაფუთ, მუჟამსით მზრუნველ უხუცეს დროს გიმურთუნს ჩქინ რჩქილას დო გურშა ემქექუანა. შხვაშა ბიბლიაშ გურაფას მოხვარა ქუმოსაჭირნან-და, მახიოლენა, მუჟამსით გამოცდილ პიონერ, ქიმმეხვარებნა თე საქმეს დო რჩევეფს ხოლო ქომჩანა. თე და დო ჯიმალეფშა ჩქინ მოხვარას ხიოლ მოუღ. ჩქი ხოლო შემლებნა ქიბგინათ თეცალ ხიოლ შხვეფიშ მომსახურებათ. იესოქ თქუ: „შხვაშა ჯგირიშ კეთებას უმოს მეტ ბედნერობა მოუღ, ვინემ აშო მეღებას“ (საქ. 20:35). თე ვარდა შხვა მხარეთ გაუჯგუშება ქუგოკონან-და, მუჭო შეილებნა მიოჭირინუათ თქვან მიზანს?

13. მუ ოკო ფშუდან ჩქინ მიზნეფწკუმა დაკავშირებით?

¹³ ეცადით, კონკრეტულ მიზნეფ გიღდან დო ვართ ხოლო ზოგად. მაგალთო, შილებე თეცალ ზოგად მიზანშე ფიქრენდათ, ნამდა უმოს გაკეთათ კრებას. მარა ძნელ გაჸინა თიშ გაგება, მუჭო მიოჭირინუათ თეცალ მიზანს დო ვართ თინა გუგაგებენა ქეშქალებუეს დო ვარ თიშ კეთებაქ. ათეშენ გიღდან კონკრეტულ მიზნეფ. შეილებნა გეგმოჭარათ თქვან მიზნეფ დო თინა, მუჭო მიოჭირინუათ თინეფს.

14. მუშენ ოკო დუხუჯუათ ცვლილებეფს, მუჟამსით მიზნეფს გიშებგორუნთ?

¹⁴ ჩქი სრულას ვა მაკონტროლებენა ჩქინ მდგომარეობა, ათეშენ, მუჟამსით მიზნეფს გიშებგორუნთ, ოკო ფშუდან, ნამდა შილებე ცვლილებეფქ მაჸუან ოკეთებელქ. მაგალთო, მოციქულ პავლექ თესალონიკეს ახალ კრებაშ ჩამოყალიბებას შეუნწყუ ხე. თის, მუშო ოკო რაგად, მიზანო აღვენუდ, ქუდოსქიდკო თექ დო ქიმეხვარკო ახალ ქრისტიანეფს. მარა მოწინააღმდეგეეფქ  ქუდატებაფუეს თე ქალაქ (საქ. 17:1—5, 10). პავლე თექ ქუდოსქიდუდ-დ,ა ჯიმალეფს ხოლო პრობლემეფს გურჩქინანდჷ. მართალ რე, თის ოულარქ აჸუ, მარა თესალონიკელ ჯიმალეფიშ მოხვარა ვემუტებ. თიქ მდგომარეობაშ თირუას ქუდუხუჯუ. უმოს გვიანო, თიქ ტიმოთე გოუტუ თესალონიკეშა, ნამდა ახალ თანამორწმუნეეფ სულიერო გამანგარკო (1 თეს. 3:1—3). თესალონიკელ ქრისტიანეფ ბედნერეფ იჸუაფდეს თიშენ, ნამდა ტიმოთე მზათ რდჷ, სოდე საჭიროება რდუნ თექ მიდართკო.

15. მუჭო შილებე მდგომარეობაშ თირუაქ, ნამუთ ვა მაკონტროლებენა, იმოქმედას ჩქინ მიზნეფშა? ქიმიჸონით მაგალით.

¹⁵ მუს ბგურაფლენთ პავლეშ შემთხვევაშე? ჩქი შილებე მიღდან რეალურ მიზნეფ, მარა მდგომარეობაშ თირუაქ, ნამუთ ჩქი ვაგმაკონტროლებენა, თინეფიშ მეჭირნაფაშ საშვალება ვა მუჩან (ეკლ. 9:11). თქვან შემთხვევას ხოლო თაშ ქორენ-და, მზათ რდათ, დოთირუათ თქვან მიზან. ზუსტას თაშ მიქცუ ართ წყვილქ, ტედი დო ჰაიდიქ. ჯანმრთელობაშ პრობლემეფიშ გურშენ თინეფს ბეთელქ აჸუეს დატებელქ, მარა იეჰოვაშ ჸოროფაქ გინაჭყვიდირაფუ, შხვანერო ეცადესკო მსახურებას უმოსიშ კეთებას. პირველ რიგის, თინეფქ ქიდიჭყეს სრულ დროთ პიონერო მსახურება, ჭიჭე ხანშა სპეციალურ პიონერეფო დენიშნეს. ტედი მამზადეს რაიონულ ზედამხედველიშ დამხმარეთ. უკულ რაიონულ ზედამხედველიშ ასაკწკუმა დაკავშირებით ცვლილებეფქ ქუმოხვად. ტედი დო ჰაიტიქ ქიმეხვადეს, ნამდა თეცალ მსახურება მეტო ვეშიალებედეს. თიშ უმკუჯინუო, ნამდა თე ცვლილებეფშა მიორჩქვანაფალქ აჸუეს, თინეფს არჩქილედეს, ნამდა შხვანერო ხოლო შეიალებედეს იეჰოვაშ მსახურება. ტედი იჩიებ: „ქიდიბგურეთ, ნამდა იეჰოვაშ მსახურებაშ ხვალე ართ ფორმაშა ვა მაფდან მთელ ყურადღება გინოღალირ“.

16. მუს ბგურაფლენთ გალატელეფიშ 6:4-შე?

¹⁶ ჩქი ირფელ ვაგმაკონტროლებენა, მუთ ჩქინ ცხოვრებას ხვადუ. ათეშენ მნიშვნელოვან რე, მარდულობაქ ვემემდინან თი პატიშ მიმართ, ნამუთ იეჰოვაშ მსახურებას მიღნა დო ვეშუდარათ ჩქინ მსახურება შხვაშის. ჰაიდი ენწყუნს: „სქან ცხოვრებას შხვეფიშ ცხოვრებას ქეშუდარენქ-და, ხიოლ მეიდინუ“ (წეკითხით გალატელეფიშ 6:4). საჭირო რე, ბგორათ საშვალებეფ, ნამდა გეგმვოდირთათ ქოთ იეჰოვას დო ქოთ და დო ჯიმალეფს. *

17. მუ შეილებნა აკეთათ, ნამდა იეჰოვაშ მსახურებას უმოს პასუხიშმგებლობაშო რდათ მზათ?

¹⁷ იეჰოვაშ მსახურებას უმოს მეტიშ კეთება შეგალებენა, მუჟამსით გემარტივენთ ცხოვრებას დო ვეგიდვანთ აუცილებერ  ვარენ ფერ ვალეფს. გიღდან ჭიჭე მიზნეფ, ნამუთ მიგეხვარებნა დიდ მიზნეფიშ მეჭირნაფას. მაგალთო, მიზანო სრულ დროთ პიონერობა ქოიღნან-და, თეიშახ განუსაზღვრელ დროთ დამხმარე პიონერო ხომ ვემსახურენდით? ვარდა მიზანო მომსახურეობა ქოიღნან-და, უმოს დროს ხომ ვა დუთმენდით ქადაგებას ვარდა ხომ ვეძირუანდით დალახებურ დო ხანშა მიშულირ თანამორწმუნეეფს? გამოცდილება, ნამდგას ასე მიღენთ, კარს გოინჯანა უმოს მეტ პასუხიშმგებლობაშო იეჰოვას მსახურებას. გინოჭყვიდილ გაფდან, ირფელ გაკეთათ თქვან დავალებაშ შეიოსრულებერო (რომ. 12:11).

18. მუჭოთ ილუსტრაციაშე იძირე, მუს ბგურაფლენთ ბევერლიშ მაგალითშე?

¹⁸ მუდგა ასაკის ვა ვორდათინ, ირო შემლებნა მიზნეფიშ მენჭირნაფა. გუვარჩუათ ართ 75 წანერ დაშ, ბევერლიშ, მაგალით. თის ჯანმრთელობაშ სერიოზულ პრობლემა უღუდ დო ათეშ გურშენ გილულა უჭირდჷ, მარა ოკოდ, გოშინაშ ონჯუაშ კამპანიას უმოს სრულას მიღკო მონაწილება. ათეშენ კონკრეტულ მიზანშე ქიდიჭყჷ ფიქრ. თინა მანგარ ბედნერ რდჷ, მუჟამსით მიზანს ქიმიოჭირინუ. თიშ მაგალითიქ შხვეფს ხოლო გინაჭყვიდირაფუ, მეტ გუკეთებდესკო მსახურებას. იეჰოვა აფასენს ხანშამიშულირ და დო ჯიმალეფიშ ხანდას, მიდგას, მართალ რე, ბრელ ვეშულებნა, მარა ნამ შეულებნან თის შურ დო გურით ორთნა (ფსალმ. 71:17, 18).

19. ნამ სულიერ მიზნეფშე შილებე იფიფქრათ?

¹⁹ იფიქრით თიცალ მიზნეფშე, ნამდგაშ მენჭირნაფა შეილებნა. გავითარით იეჰოვაშ მოსაწონ თვისებეფ. ქიდიგურეთ უნარეფ, ნამუთ საშვალებას ქიმერჩანა, უმოსო გეგმადირთათ იეჰოვას დო თიშ ორგანიზაციას. დოგორით საშვალებეფ, ნამდა უმოსო მემსახურათ და დო ჯიმალეფს. * ტიმოთეცალო, იეჰოვაშ მოხვარათ „არძაშო არგამა იჸუაფ [თქვან] წიმი ულა“ (1 ტიმ. 4:15).