1. Ino aby karazan̈a tanjon̈o arapan̈ahy mety hataonao?

 TIA Jehovah mare atsika ten̈a Kristianin̈y. Ke atsika koa fa manompo izy, ny farany tsara baka amintsika fo tiantsika hamezan̈a izy. Ino raha han̈ampy atsika hahavita zen̈y? Mila manan̈a tanjon̈o arapan̈ahy atsika. Azontsika atao iziô ohatra mifen̈y hanan̈a toetry tsara, na mitady hevitry han̈ampian̈a olo, avio izikoa misy fahaizan̈a manokan̈a ilain̈a amy fanompoan̈a, tsy misalasala foeky atsika mianatra izio.

2. Nan̈ino ma atsika tokony hanan̈a tanjon̈o arapan̈ahy ndreky hifen̈y mare hanakatra zen̈y?

² Ino marin̈y ma antony mahavy atsika tihifen̈y hankatsara fanompoantsika Jehovah? Voanalohany, fotony atsika tihamparavoravo Babantsika andan̈itry an̈y io. Ravoravo Jehovah izikoa ampiasaintsika amy fanompoan̈a aby lan̈iany fahaizan̈a ndreky talenta anan̈antsika. Faharoe man̈araka zen̈y, tihan̈ano erakany vitantsika atsika han̈ampian̈a piaramanompo. (1 Tes. 4:9, 10) Na efa ela atsika nahita fahamarin̈ana na vo tsy ela, mila mifen̈y handroso arapan̈ahy fo atsika jiaby. Alô zahavantsika akory mety hahavitantsika zen̈y?

3. Koa zahan̈a 1 Timoty 4:12-16, nampirisihiny Paoly han̈ino i Timoty?

³ Mbala tanora i Timoty taminy apostoly Paoly nanoratra taratasy voanalohany handeha taminany. Fa Timoty tamy zen̈y fo efa antipan̈ahy zadraharaha. Ndray zen̈y, mbala nampirisihiny Paoly handroso arapan̈ahy fo izy. (Vakia 1 Timoty 4:12-16.) Anao koa fa mandiniky raha nivolan̈iny Paoly io, ho hitanao fa nisy raha aroe nirahiny nifen̈any Timoty. Voanalohany, nirahiny nifen̈y hanan̈a toetry tsara i Timoty. Ôtry ataony fitiavan̈a,  finoan̈a, ndreky mifen̈y hadio fitondranten̈a. Faharoe, nirahiny koa i Timoty hankatsara fahaizan̈a efa anan̈any. Ambaka ataony fahaizan̈a mamaky teny ndreky mandrisiky olo han̈ano raha, baka io fahaizan̈a mampianatra. Nan̈ino ma fanan̈antsika tanjon̈o arapan̈ahy han̈ampy atsika handroso? Ino aby fomba sasany mety hankatsarantsika fanompoan̈antsika? Handiniky modely nambelany Timoty atsika misy ahaizantsika valiny fan̈ontanian̈a aby zen̈y.

4. Koa zahan̈a Filipianina 2:19-22, nan̈ino ma i Timoty nazony Jehovah nampiasain̈a tsarabe?

⁴ Nan̈ino ma i Timoty nazony Jehovah nampiasain̈a tsarabe? Fotony izy nanan̈a toetry tsara ten̈a miavaka. (Vakia Filipianina 2:19-22.) Hitantsika tamy raha nivolan̈iny Paoly momba izy fa izy olo nanetry ten̈a, tsy nivadiky, nikaly asa, baka io mafatoky. Be fitiavan̈a koa i Timoty, sady nitady raha nahatsara piaramanompo. Ke nanjary tiany Paoly mare izy. Tsy nisalasala foeky i Paoly nan̈amia izy andraikitry sarotro mare. (1 Kor. 4:17) Karaha zen̈y koa atsika. Ho tiany Jehovah ndreky ho azony ampiasain̈a tsarabe atsika, izikoa atsika mifen̈y hanan̈a toetry tiany.​—Sal. 25:9; 138:6.

5. a) Izikoa tianao ho hay ino toetry mbala mila ankatsarainao, ino raha mila ataonao? b) Ranabavy tanora amy sary io tihampitombo fahaizany mitepô olo. Ino raha nataony baka ho takany tanjon̈onany zen̈y?

⁵ Mifidiana tanjon̈o avoafaritry tsarabe. Mivavaha amy Jehovah anao, baka io diniha ino toetrinao mbala mila hankatsarain̈a. Diniha ino toetry araiky mbala tianao hanan̈ana. Ohatra iziô, anao mety mifen̈y baka hitombo fahaizanao mitepô olo, na baka anao han̈iry mare han̈ampy piaramanompo. Na koa, anao mety miezaka ho tia fihavanan̈a ndreky han̈ambela hadisovan̈anolo. Mety mangataka hevitry amy kamarady atokisanao anao, misy ahaizanao fomba mety hankatsaranao toetrinao.​—Ohab. 27:6.

6. Ino raha mety hataonao izikoa anao tihankatsara toetrinao?

⁶ Ataova raha hatakaranao tanjon̈onao. Fomba araiky mety han̈anaovanao zen̈y, ianara tsarabe toetry tianao hankatsarain̈a io. Karakory izikoa nisy olo nan̈ano raha halanao, ke sarotro aminao han̈ambela hadisovan̈anany? Izikoa zen̈y, maro tantaranolo nahavita namela heloko ndreky tantaranolo tsy nan̈ambela hadisovan̈a koran̈iny Baiboly ao. Nan̈ino izikoa mba mangala fotoan̈a hely anao handinihan̈a tantara aby zen̈y? Iritrireta baka  modely nambelany Jesosy. Izy vôn̈ono han̈ambela hadisovan̈anolo. (Lioka 7:47, 48) Jesosy nifantoko tamy raha tsara mety ho vitanolo fo fa tsy taminy hadisovan̈andro. Iro Fariseo aby io ndraiky tsy karaha zen̈y, avio iro tsy nan̈isy fôtiny olo foeky. (Lioka 18:9) Anao koa fa baka nandiniky ohatra aby io, iritrireta ty: ‘Ino raha avy amy jerinaka, zaho koa fa mieritreritry momba olo araiky? Ino toetry tsara anan̈any ke tiako hifantohan̈a fo?’ Izikoa mbala sarotro aminao man̈ambela hadisovan̈anolo araiky, soràta ino aby toetry tsara anan̈any. Baka io miniminia: ‘Izikoa Jesosy tamy plasinaka, akory eky fiheverany izy? Mety nambelany Jesosy edy ma hadisovan̈anany?’ Han̈ampy anao han̈ova fomba fisain̈ananao raha zen̈y. Amy voanalohany, mety tsy ho mora amintsika han̈ambela hadisovan̈anolo nan̈ano raha nampaneloko atsika. Kanefa izikoa atsika mifen̈y fo, ho moramora amintsika han̈ambela hadisovan̈a izikoa fa mandeha fotoan̈a.

7. Nan̈ino ma raha koran̈iny Ohabolana 22:29 io ahitan̈a fa Jehovah mampiasa olo mahay?

⁷ Ty koa tanjon̈o hafa mety takarinao: Ianara aby lan̈iany raha hitanao fa mety ilain̈a amy fanompoan̈a. Diniha baka! Maro iziô piasa ilain̈a han̈ôrin̈y Betela ndreky hiasa Tran̈o Fan̈anaovan̈a Fivoriambe ndreky Tran̈o Fivorian̈a. Maro amindro piasa aby io nanjary nahay asa io tsarabe iro koa fa niaraka niasa tamy rahalahy ndreky ranabavy zadraharaha. Karaha hitantsika amy sary io, samby mety mianatra mikobaby Tran̈o Fan̈anaovan̈a Fivoriambe ndreky Tran̈o Fivorian̈a aby atsika jiaby, na rahalahy zen̈y na ranabavy. ‘Panjakany Mandrakizay’ i Jehovah. Jesosy Kristy ndraiky ‘Panjakany Panjaka.’ Iro mampiasa olo mahay sady zatra asa, ke maro raha miavaka vitandro. (1 Tim. 1:17; 6:15; vakia Ohabolana 22:29.) Tokony hiasa mare atsika sady hampiasa fahaizan̈antsika tsarabe, fotony atsika tihan̈amia voninahitry Jehovah, fa tsy ain̈intsika tômpiny.​—Jaona 8:54.

8. Ino raha han̈ampy anao hahita fahaizan̈a mbala tokony hanan̈anao?

⁸ Tanjon̈o avoafaritry tsarabe fidiana. Diniha ino fahaizan̈a mbala tokony hanan̈anao. Ino raha han̈ampy anao han̈ano zen̈y? An̈ontania antipan̈ahy amy fiangonan̈anaro na koa piandraikitry faritrinaro ino raha iritriretindro fa mila ifen̈anao. Izikoa iro mivolan̈a fa tokony hifen̈y anao hankatsara fahaizanao man̈ano kabaro ndreky fahaizanao mampianatra, iraha volan̈indro mazava tsarabe aminao ino raha tokony hankatsarainao. Baka io mifen̈a mare anao hankatsara raha zen̈y. Akory han̈anaovanao zen̈y?

9. Akory mety hatakaranao tanjon̈onao?

⁹ Ataova raha hatakaranao tanjon̈onao. Ohatra ndraiky anao tihankatsara fahaizanao mampianatra, ianara tsarabe bokikely Mifen̈a Mare amy Vakiteny Avio Fampianaran̈a. Lera anao mahazo anjara amy fivorian̈a andavanandra, omàn̈a aloha be izio. Baka io mety miangavy rahalahy araiky mahay koa anao hitandren̈y anjaranao io tsialohaloha ndreky han̈amia torohevitry anao. Kanefa, tsy tokony fahaizan̈anao fo ny raha hahaizanolo anao, fa mila mifen̈y koa anao hanjary olo mafatoky ndreky mazoto miasa.​—Ohab. 21:5; 2 Kor. 8:22.

10. Man̈ameza ohatra ahitan̈a fa tsy mila mora rivan̈a atsika izikoa fa mianatra raha araiky.

¹⁰ Akory ndraiky basy izikoa raha tianao ho hay io tsy man̈avanan̈a anao letrizay? Aza rivan̈a! Diniha baka tantarany Garry. Tsy nahay namaky teny izy taloha. Azony onon̈o fa nen̈atra mare izy tandraraiky izikoa fa nan̈ohatra namaky teny tampivorian̈a. Fa nifen̈y fo izy nankatsara vakiteninany. Nivolan̈a izy fa nohony  fampiofanan̈a nazony, izy iziô efa mahavita man̈ano kabaro amy Tran̈o Fivorian̈a ndreky amy fivoriambeny faritry ndreky vondroparitry!

11. Ino raha han̈ampy atsika hahavita be amy fanompoan̈a, karaha nataony Timoty?

¹¹ Ke Timoty ma nanjary ten̈a nahay nan̈ano kabaro ankitin̈y? Ten̈a nahay nampianatra koa ma izy? Tsy tantarainy Baiboly raha zen̈y. Fa ny raha azo antoko, vitany tsarabe nan̈ano andraikitry maventy nankin̈iny taminany, fotony izy nan̈araka torohevitriny Paoly. (2 Tim. 3:10) Karaha zen̈y koa atsika. Izikoa mifen̈y fo atsika mampitombo fahaizan̈antsika, ho maro koa raha ho vitantsika amy fanompoan̈a.

12. Akory aby mety han̈ampianolo anao?

¹² Mahazo hatsaran̈a atsika izikoa fa misy olo man̈ampy atsika. Izikoa iziô anao marary amy lôpitaly, ravoravo anao izikoa misy antipan̈ahy an̈isany Komity Mifandray amy Lôpitaly na an̈isany Antokonolo Pamangy Marary mamangy anao. Akory ndraiky izikoa raha hafa manahiran̈a anao? Misaora ravoravo donko anao izikoa misy antipan̈ahy be fitiavan̈a mahafoe fotoan̈a hitandrin̈esan̈a anao ndreky hampahirezan̈a anao! Akory ndraiky izikoa anao mila fan̈ampian̈a amy fampianaran̈a Baiboly? Misaora ravoravo koa donko anao izikoa misy pisava lalan̈a vôn̈ono hiaraka hampianatra aminao sady man̈amia torohevitry anao! Hay be fa ankasitraka izy mare anao. Ravoravo iro piaramanompo amintsika aby io man̈ampy atsika. Ho ravoravo karaha iro io koa atsika izikoa atsika mitady fomba han̈ampian̈a iro. Jesosy lastio efa nivolan̈a fa ‘man̈amia raha olo ten̈a mampasambatra tozay mahazo raha baka aminolo.’ (Asa. 20:35) Izikoa anao tihampitombo fanompoan̈anao, ke han̈ano iro raha aby io na raha hafa miramiran̈a amindro io, ino raha han̈ampy anao hanakatra tanjon̈onao?

13. Ino raha tokony alainao onon̈o, anao koa fa hifidy tanjon̈o?

¹³ Tandrema tsao tanjon̈o aminy ankapobeny fo ataonao. Karakory ma zen̈y? Anao mety hieritreritry karaha ty: ‘Mbala be raha tiako hatao han̈ampian̈a fiangonan̈a.’ Kanefa ny raha mety ho hisy, ho sarotro aminao hanakatra tanjon̈onao io, avio mety tsy hainao foeky ombian̈a izio ho takatranao. Ke mba ialàn̈a amy zen̈y, tsara izikoa ataonao mazava sady avoafaritry tsarabe tanjon̈o fidianao. Mety soratinao foeky tanjon̈onao ndreky fomba hiritriretinao hanakaran̈a izio.

14. Nan̈ino atsika tokony ho vôn̈ono han̈ova tanjon̈ontsika, mifan̈araka amy raha misy?

 ¹⁴ Ndraikindraiky atsika mety mila man̈ova tanjon̈ontsika. Nan̈ino? Fotony atsika tsy mikomandy raha jiaby mandalo amy fiain̈anantsika. Diniha baka i apostoly Paoly. Izy an̈isany nan̈ampy tamy fiforaon̈any fiangonan̈a ta Tesalonika. Hay be fa tihidôko tan̈y izy han̈ampy iro Kristianin̈y vaovao aby io. Kanefa tsy maintsy niala tan̈y izy fotony naro olo nanohitry izy. (Asa. 17:1-5, 10) Izikoa baka izy nidôko tan̈y fo, mety nidiranandra iro piaramanompo aby tan̈y. Ndray zen̈y, nitady fomba fo i Paoly nan̈ampian̈a iro, fa somary nivoàny hely fo fomba nan̈anaovany zen̈y. Nan̈iraka i Timoty izy tafara tatỳ, hankahery iro piaramanompo aby ta Tesalonika tan̈y. (1 Tes. 3:1-3) Misaora ravoravo iro Kristianin̈y ta Tesalonika aby io nahita i Timoty vôn̈ono handeha tamy tany mbala nila fan̈ampian̈a, ambaka ataony tamindro tan̈y!

15. Misy vokany amy tanjon̈ontsika ma raha sasany mandalo amy fiain̈anantsika? Man̈ameza ohatra.

¹⁵ Ino raha ianarantsika baka amy Paoly, taminizy ta Tesalonika in̈y? Mety efa miezaka atsika manakatra tanjon̈o, fa ndraikindraiky, miova tampoko fiain̈anantsika ke mety tsy ho takatrantsika tanjon̈o efa nifidintsika. (Mpito. 9:11) Izikoa zen̈y raha misy, mifidiana tanjon̈o hafa mety takarinao. Zen̈y raha nataony Ted ndreky Hiedi. Tsy maintsy niala tamy Betela iro roe fivadiany, fotony tsy salama araiky tamindro. Farandraha tiandro eky Jehovah, ke nitady fomba fo iro hampitombosan̈a fanompoan̈andro. Nan̈ano pisava lalan̈a maharitry antsendriky iro tamy voanalohany. Fa koa fa nandeha fotoan̈a, iro navoatendry pisava lalan̈a manokan̈a. Tafara, Ted nampiofanin̈y hanjary piandraikitry faritry pisolo toeran̈a. Nivoàny fandaminan̈a koa baka tiô fepetra takian̈a aminolo hanjary piandraikitry faritry. Ke tsapany Ted ndreky Hiedi fa efa mihoatrany taon̈o limity taon̈ondro, ke tsy ho afaka han̈ano fanompoan̈a io eky iro. Diso fan̈antin̈ana marin̈y ndraiky iro, kanefa hitandro fa mbala misy fomba hafa fo mety anompoandro Jehovah. Karaha ty ho Ted: “Nianaranay baka tamy raha niain̈anay fa mbala marobe karazan̈a fanompoan̈a mety ataonay.”

16. Ino raha ianarantsika baka amy Galatianina 6:4?

¹⁶ Atsika tsy mahafehy raha jiaby mandalo amy fiain̈anantsika. Ke mila alaintsika onon̈o fo fa tsy baka aminy asa ataontsika na fanendren̈a azontsika hahavy atsika ho valera amy Jehovah. Atsika koa tsy tokony hampiran̈a ain̈intsika aminolo manan̈a tombontsoampanompoan̈a tsy anan̈antsika. Karaha ty ho Hiedi: “Tsy ho ravoravo foeky anao izikoa anao mampiran̈a ain̈inao aminolo.” (Vakia Galatianina 6:4.) Sitrany anten̈a mitady fomba hafa  mety han̈ampian̈a olo ndreky hanompoan̈a Jehovah. b Tsisy raha bebenizen̈y!

17. Ino raha mety ataonao izikoa anao tihafeno fepetra amy tombontsoampanompoan̈a araiky?

¹⁷ Tihahazo tombontsoampanompoan̈a ma anao? Manàn̈a fiain̈ana tsotra, baka io aza mitrosa foeky izikoa tsy raha efa azony akory atao. Mifidiana tanjon̈o helihely, amy zen̈y ho moramora aminao hanakatra izio. Anao koa ohatra tiho pisava lalan̈a maharitry, man̈anaova pisava lalan̈a pan̈ampy mitohy. Akory ndraiky izikoa anao tiho pikarakara fiangonan̈a? Ampitombosa fanompoan̈anao, baka io mazotoa mamangy piaramanompo marary ndreky matoe an̈ivony fiangonan̈anaro. Tsy hampoizinao foeky tombontsoampanompoan̈a mety ho azonao afara an̈y, izikoa rango izioty anao efa mifen̈y hanan̈a traikefa aby io. Ke ataova tsarabe zay raha irahin̈y ataonao amy zioty.​—Rom. 12:11.

18. Koa sary io zahavan̈a, ino raha ianaranao baka tamy raha nataony Beverley?

¹⁸ Samby mety man̈ano tanjon̈o ndreky manakatra izio aby olo jiaby, firaka aminolo efa matoe mare. Diniha baka i Beverley. Efa 75 taon̈o ranabavy io, baka io efa tsy afaka mandeha tsarabe izy nohony aretin̈inany. Tandraraiky, nisy ezaka manokan̈a natao handrasan̈a ainvitasiony Fahatsiarovan̈a, ke izy mba tihan̈ano izio mare. Ino raha nataony? Nan̈ano tanjon̈o avoafaritry tsarabe izy. Ravoravo mare izy izikoa fa takany tanjon̈onany io. Ezakanany io baka tiô nandrisiky olo hafa hazoto hanompo. Hitantsika baka amy zen̈y fa valera amy Jehovah mare fanompoan̈a ataondro rahalahy ndreky ranabavy efa matoe aby io, ndray efa tsy be eky raha vitandro.​—Sal. 71:17, 18.

19. Ino raha han̈ampy atsika hanakatra tanjon̈ontsika amy fanompoan̈a?

¹⁹ Mifidiana tanjon̈o pôsibla ho takatranao. Mifen̈a hanan̈a toetry tiany Jehovah, beky izy ho ravoravo aminao fo. Mifen̈a hanan̈a fahaizan̈a ilain̈a amy fanompoan̈a, amy zen̈y anao ho azony Jehovah ndreky fandaminan̈a ampiasain̈a tsarabe. Mitadiava fomba isankarazany mety han̈ampian̈a piaramanompo. c Karaha tamy Timoty in̈y, hitahy anao Jehovah ke “ho hitanolo jiaby fandrosoan̈anao.”​—1 Tim. 4:15.