1. Mang boch ban’en nrayog ni ngad nameged ni fan ko pigpig rodad ngak Jehovah?

 GADAD e tin riyul’ e Kristiano e rib t’uf Jehovah rodad. Gad baadag ni ngad pied e tin th’abi fel’ rodad ni fan ko pigpig rodad ngak. Machane faanra ngad rin’ed urngin ban’en nrayog rodad ni fan ngak Jehovah, mab t’uf ni ngad nameged boch ban’en ni fan ko pigpig rodad ngak ni bod ni ngad maruweliyed boch i fel’ngin e Kristiano, ma gad fil boch e salap nrayog ni ngad maruwelgad ngay, ma gad gay boch e kanawo’ nrayog ni ngad rin’ed boch ban’en riy ni fan ngak yugu boch e girdi’.

2. Mang fan nsusun e ngad nameged boch ban’en ni fan ko pigpig rodad ma gad athamgil u rogon nrayog rodad ni ngad rin’ed?

² Mang fan nsusun e ngad adaged ni ngad mon’oggad ko pigpig rodad ngak Jehovah? Bin th’abi ga’ i fan e bochan ni gad baadag ni ngad felfelan’naged e Chitamangidad ni bay u tharmiy. Ma felfelan’ Jehovah u nap’an nra guy ni gad be fanay e pi salap rodad nib fel’ rogon ni fan ko pigpig rodad ngak. Maku reb e, gad baadag ni ngad mon’oggad ko pigpig rodad ya nge yag ni yoor e kanawo’ ni ngad ayuweged e pi walagdad riy. (1 Thess. 4:9, 10) Bin riyul’ riy e demtrug n’umngin nap’an ni kad nanged e tin riyul’, ma gad gubin nrayog ni ngad mon’oggad ko pigpig rodad. Ere ngad weliyed rogon nrayog ni ngad rin’ed e re n’ey.

3. Mang e pi’ apostal Paul e athamgil ngak Timothy ni nge rin’ nrogon ni bay ko 1 Timothy 4:12-16?

³ Yugu aram rogon ni kab pagel Timothy u nap’an ni yoloy apostal Paul e gin som’on e babyor nge pi’ ngak, machane ke n’uw nap’an ni ke mang reb e piilal. Yugu aram rogon miki pi’ Paul e athamgil nga laniyan’ ni nge ulul ni nge mon’og ko pigpig ni be tay. (Mu beeg e 1 Timothy 4:12-16.) Ga ra lemnag e n’en ni yog Paul, ma ga ra nang riy ni baadag ni nge mon’og Timothy u l’agruw e kanawo’, ni aram e nge maruweliy boch i fel’ngin e Kristiano ni bod e t’ufeg,  nge michan’, ma nge machalbog e ngongol rok, ma ngki mon’ognag e salap rok u rogon ni ma beeg e babyor u fithik’ e girdi’ ni yoor, nge rogon ni ma pi’ e athamgil nga lanin’uy, nge rogon ni ma weliy fan e thin rok Got. Ngad weliyed e n’en ni rin’ Timothy ya nge dag rogon nrayog ni ngad mon’oggad ko pigpig rodad ngak Jehovah ni faan gad ra nameg boch ban’en nrayog ni ngad rin’ed. Ku gad ra weliy boch e kanawo’ nrayog ni ngad yoornaged e tin gad be rin’ riy ni fan ko machib.

4. Mang e ayuweg Timothy ni nge yag ni maruwel Jehovah ngak nib fel’ rogon nrogon ni be yog e Filippi 2:19-22?

⁴ Mang e ayuweg Timothy ni nge yag ni maruwel Jehovah ngak nib fel’ rogon? Aram e pi fel’ngin e Kristiano ni immoy rok nrib manigil. (Mu beeg e Filippi 2:19-22.) Rayog ni ngad guyed ko n’en ni yog Paul u murung’agen Timothy ni ir be’ nib sobut’an’, mab yul’yul’, ma ma tiyan’ ko maruwel rok, ma rayog ni ngan taga’ ngak. Ku ir be’ ni ma t’ufegey ma ri ma lemnag e pi walag. Aram fan nib t’uf rok Paul ma de tuntun ni nge pi’ boch e maruwel ngak nib mo’maw’. (1 Kor. 4:17) Ku arrogodad ni faan gad ra maruweliy e pi fel’ngin ni baadag Jehovah, ma aram e gad ra t’uf rok me yag ni ngan maruwel ngodad u lan e ulung nib fel’ rogon.​—Ps. 25:9; 138:6.

5. (a) Uw rogon ni ngam dugliy ko bin ngan i fel’ngin e Kristiano e ga baadag ni ngam maruweliy? (b) Uw rogon ni be maruweliy fa bin baaram e walag nib pin nib bitir e n’en be nameg ni aram e nge nang rogon laniyan’ yugu boch e girdi’ nrogon ni be m’ug ko sasing?

⁵ Mmel’eg ban’en ni ngam nameg. Mmeybil mag lemnag ko gin ngan u rarogom e ba t’uf ni ngam mon’og riy. Mmel’eg reb e fel’ngin ni ga baadag ni ngam maruweliy. Bod nsana rayog ni ngam dugliy ni ngam mon’og u rogon ni ngam nang rogon laniyan’ be’ ara rogon ni ngarim adag ni ngam ayuweg e pi walag. Fa reb e rayog ni ngam guy rogon ni ngaum awnag e gapas u thilmed yugu boch e girdi’ nge rogon ni ngaum n’ag fan e kireb ni kan rin’ ngom. Rayog ni nga mog ngak reb e fager rom nib pagan’um ngak ni nge yog boch ban’en ngom nrayog ni ngam mon’og riy.​—Prov. 27:6.

6. Uw rogon ni ngam maruweliy reb e fel’ngin ni nge yag ngom?

⁶ Mmaruweliy e n’en ga be nameg. Uw rogon nrayog ni ngam rin’ e re n’ey? Reb e kanawo’ e aram e ngam fal’eg i fil murung’agen e re fel’ngin ni ga baadag ni ngam maruweliy. Susun e kam dugliy ni ngam maruweliy ni ngam mon’og u rogon ni ga ma n’ag fan e kireb ni kan rin’ ngom. Som’on e rayog ni ngam beeg murung’agen boch e girdi’ ni bay u Bible ni ur n’aged fan e kireb ni kan rin’ ngorad nge piin nda ur rin’ed e re n’ey, mag fal’eg i lemnag. Am lemnag e n’en ni rin’ Jesus. I m’agan’ ngay ni nge n’ag fan e kireb ni ke rin’ e  girdi’ ngak. (Luke 7:47, 48) Da i par ni be lemnag e oloboch rorad ya i lemnag e tin nrayog ni ngar rin’ed. Machane pi Farise u nap’an Jesus e ur lemnaged ni “tin ni ka bay e girdi’” e dariy rogorad. (Luke 18:9) Tomuren ni kam fal’eg i lemnag e pi n’ey, mag fithem ni nge lungum: ‘Mang e gu ma guy u rarogon yugu boch e girdi’? Tin ngan i fel’ngirad e gu ma mel’eg ni nggu sap ngay?’ Faanra be mo’maw’ ni ngam n’ag fan e kireb rok be’, mag guy rogon ni ngam yoloy nga but’ urngin i fel’ngin facha’ ni ga manang. Ngemu’ mag fithem ni nge lungum: ‘Uw rogon e cha’ney u wan’ Jesus? Gur, ra n’ag fan e kireb rok?’ Gad ra rin’ e re n’ey, ma rayog ni ngad yal’uweged rogon e lem rodad. Som’on e sana rayog nib t’uf ni ngad athamgilgad nib gel ya nge yag nda n’aged fan e kireb ni ke rin’ be’ ngodad. Machane faan gad ra ulul ni ngad guyed rogon ni ngad mon’oggad, ma ra munmun ma ra mom ni ngaud n’aged fan e kireb ni ke rin’ be’ ngodad.

7. Mang boch e kanawo’ ni ma fanay Jehovah e pi walag riy ni yad ba salap ko maruwel e ngiyal’ ney nrogon nib puluw ko Proverbs 22:29?

⁷ Ku reb e ban’en nrayog ni ngam nameg e aram e ngam fil boch e salap nrayog ni ngam maruwel ngay. Am lemnag urngin e girdi’ nib t’uf ni ngar toyed boch e naun u Bethel, nge pi Assembly Hall, nge pi Tagil’ e Liyor. Boor i yad e kar filed boch e salap ni bochan e yad ma maruwel boch e walag u taabang ni yad manang rogon i rin’ e pi maruwel ney. Pi walag ni baaray ni bay yaarad ko sasing e yad be fil boch e salap nib t’uf ni nge yag ngorad ya nge yag nra pied e ayuw ni ngan ngongliy e yungi n’en ke kireb ko pi Assembly Hall nge Tagil’ e Liyor. Ireray boch e kanawo’ ni ma fanay Jehovah Got ni ir fare “Pilung ni bay i par ndariy n’umngin nap’an” nge Jesus Kristus ni “ir e Pilung ko pi pilung” e pi walag ney ni yad ba salap ko maruwel ni ngar rin’ed boch ban’en ni yira ngat ngay. (1 Tim. 1:17; 6:15; mu beeg e Proverbs 22:29.) Gad baadag ni ngad maruwelgad nib gel ma gad fanay e pi salap rodad ni fan e ngan pining e sorok riy ngak Jehovah ma gathi gadad.​—John 8:54.

8. Uw rogon ni ngam dugliy ko bin ngan e salap e ngam guy rogon nge yag ngom?

⁸ Mmel’eg ban’en ni ngam nameg. Mang reb e salap nrayog ni ngam guy rogon ni nge yag ngom? Mu fith e piin piilal u lan e ulung rom nge en ma lekag e ulung ko mang salap e yad be lemnag nrayog ni ngam guy rogon ni nge yag ngom. Bod ni faanra ka rogned ngom ni ngam mon’og u rogon ni ga ma pi’ e welthin nge rogon ni ga ma fil ban’en ko girdi’, ma gog ngorad ni ngar ayuweged gur ni ngam nang ko mang e ba t’uf ni ngam maruweliy u rarogon e welthin ni yima pi’. Ngemu’ mag athamgil u rogon nrayog rom ni ngam mon’og. Uw rogon nrayog ni ngam rin’ e re n’ey?

9. Uw rogon ni ngam maruweliy reb e salap ni nge yag ngom?

⁹ Mmaruweliy e n’en ga be nameg. Susun e ga baadag ni ngam mon’og u rogon ni ga ma fil ban’en ko girdi’. Rayog ni ngam fal’eg i fil fare ke babyor ni Mmon’og u Rogon ni Ngam Skulnag Be’. Faanra bay e welthin rom u nap’an e muulung u lan e wik, ma rayog ni nga mog ngak reb e walag ni pumoon nib salap i pi’ e pi welthin ney ni nge motoyil ko welthin rom u m’on riy me yog boch ban’en nib t’uf ni ngam mon’og riy. Mu fal’eg rogon e welthin rom u m’on riy ya nge yag ni guy e girdi’ ni ga ma tiyan’um ko maruwel rom ma rayog ni ngan taga’ ngom.​—Prov. 21:5; 2 Kor. 8:22.

10. Mu weliy ban’en ni ke buch rok be’ ni be dag rogon nrayog ni ngad maruweliyed reb e salap ni nge yag ngodad.

¹⁰ Uw rogon ni faanra ga be nameg ni ngam salap u ban’en nib mo’maw’ rogon ni ngam rin’? Dabi mulan’um! Bay reb e walag ni pumoon ni ka nog Garry ngak nib mo’maw’ ngak ni nge beeg e babyor. Ka ma yib ngan’ gelngin e tamra’ ni ma tay u nap’an nra guy rogon ni nge beeg e babyor nib ga’ laman u nap’an e muulung. Yugu aram rogon miki ulul ni nge guy rogon ni nge mon’og.  Chiney e ma yog ni skul ni tay e pi walag ni pumoon ngak ni yad ba salap ko welthin nge pi n’en ni fil u lan e pi babyor rodad e ke ayuweg ni nga i pi’ e welthin u nap’an e muulung, nge pi assembly, nge convention!

11. Mang e ra ayuwegdad ni ngad yoornaged e tin gad be rin’ ni fan ko pigpig rodad ngak Jehovah ni bod Timothy?

¹¹ I yag ni nge mang Timothy be’ nib salap i pi’ e welthin ma kub salap u rogon ni ma fil ban’en ku be’, fa? Der yog e Bible. Dariy e maruwar riy ni mon’og u rogon ni i rin’ e maruwel ni kan pi’ ngak ni bochan e fol ko fonow ni pi’ Paul ngak. (2 Tim. 3:10) Ere ku arrogodad ni faan gad ra maruweliy boch e salap ni nge yag ngodad, ma aram e rayog ni ngad yoornaged e tin gad be rin’ ni fan ko pigpig rodad ngak Jehovah.

12. Uw rogon ni ke ayuwegem yugu boch e girdi’?

¹² Gad gubin ni ma yib angin ngodad e n’en ke rin’ yugu boch e girdi’ ni fan ngodad. Ra kad m’argad ni gad bay u aspital, ma gad ma felfelan’ u nap’an nra yib i guydad e pi piilal ni yad bang ko fa gal ulung ni Hospital Liaison Committee ara Patient Visitation Group. Ma nap’an ni gad ra mada’nag reb e magawon nib mo’maw’, ma gad ma felfelan’ u nap’an nra tay reb e piilal e tayim ni nge motoyil ngodad me fal’eg lanin’dad. Nap’an nra t’uf e ayuw rodad u rogon ni ngad filed e Bible ngak be’, ma gad ma felfelan’ u nap’an nra un reb e pioneer ngodad nib salap ko machib u nap’an ni ngad filed e Bible ngak facha’, me yog boch ban’en nrayog ni nge ayuwegdad. Gubin e pi walag ney ni yad ba felfelan’ ngay ni ngar ayuweged gadad. Ku rayog ni nge felfelan’dad ni aray rogon ni faanra m’agan’dad ngay ni ngad ayuweged pi walagdad. I gaar Jesus: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Faanra ga baadag ni ngam yoornag e tin ga be rin’ ni fan ngak Jehovah ko pi kanawo’ ney ara yugu boch e kanawo’, ma mang e ra ayuwegem ni ngam rin’ e re n’ey?

13. Mang e susun ndab da paged talin u nap’an ni gad be nameg ban’en?

¹³ Mu guy rogon ni nge tamilang u wan’um e n’en ga be nameg. Bod nrayog ni ngam gaar u wan’um, ‘Gu baadag ni nggu yoornag e tin gu be rin’ u lan e ulung.’ Machane rayog ni nge mo’maw’ ni ngam nang rogon ni ngam rin’ e re n’ey, maku rayog ndabiyog ni ngam nang e ngiyal’ ni ke yag ni ngam rin’. Ere mu dugliy ko ri mang e ir e ngam nameg. Rayog ni ngam yoloy e re n’em nga but’ nge rogon ni kam lemnag ni ngam rin’.

14. Mang fan nib t’uf ni nge m’agan’dad ngay ni ngad thilyeged e n’en gad be nameg?

 ¹⁴ Kub t’uf ni nge m’agan’dad ngay ni ngad thilyeged e n’en gad be nameg. Mang fan? Ya dabiyog ni ngad gagiyegnaged urngin ban’en ni ma buch rodad. Baaray rogon nrayog ni ngan susunnag: I pi’ apostal Paul e ayuw ni ngan sunmiy reb e ulung nib beech u Thessalonika. Ma dabisiy ni nameg ni nge par u rom nge ayuweg e pi girdi’ nem ni ka fin ra manged Kristiano. Machane me n’igin e piin yad be togopuluw ni nge chuw Paul ko re mach nem. (Acts 17:1-5, 10) Faan gomanga de chuw ma rayog ni nge tay e yafos rok pi walagen nga thatharen e riya’. Yugu aram rogon ma de tal Paul i guy rogon ni nge ayuwegrad. Ya thilyeg rogon ni be rin’ boch ban’en ni nge m’ag ko n’en ke thil. Boch nga tomuren me pi’ Timothy nge yan ngaram nga Thessalonika ni nge ayuweg e pi girdi’ nem ni ka fin ra manged Kristiano ni nge gel e michan’ rorad. (1 Thess. 3:1-3) Ba mudugil nri felfelan’ e pi Kristiano u Thessalonika ni ke m’agan’ Timothy ngay ni nge yan i pi’ e ayuw ko gin nib t’uf e ayuw riy!

15. Uw rogon nrayog ni nge thil e n’en gad be nameg u nap’an nra thil boch ban’en ko par rodad? Mu weliy ban’en ni ke buch.

¹⁵ Rayog ni ngad filed ban’en ko n’en ni buch rok Paul u Thessalonika. Sana rayog ni kad nameged ban’en ni ngad rin’ed, machane me thil boch ban’en ko par rodad ma dabkiyog ni ngad rin’ed e n’en kad nameged. (Ekl. 9:11) Faanra ke buch e re n’ey rom, ma nge m’agan’um ngay ni ngam nameg yugu ban’en nib thil nrayog ni ngam rin’. Aram e n’en ni buch rok ba wu’ e mabgol ni ka nog Ted nge Hiedi ngorow. Thingar ra talgow ko pigpig u Bethel ni bochan e ke m’ar bagayow. Machane bochan nib t’uf Jehovah rorow, ma aram mar gayew yugu boch e kanawo’ nrayog ni ngar yoornagew e tin yow be rin’ riy ni fan ko machib. Som’on e ra tababgow ko regular pioneer. Munmun min dugliyrow ni ngar mangew l’agruw e special pioneer, min skulnag Ted ni ngaun pi’ yu ngiyal’ ni nge lekag boch e ulung. Boch nga tomuren me thil yangaren e girdi’ nrayog ni ngaun fekrad ni ngaur lekaged e ulung. Ere nang Ted nge Hiedi ni ke pag yangarrow ndabkiyog ni ngar rin’ew e biney e maruwel. Yugu aram rogon ni kireban’row, machane yow manang ni ka bay boch e kanawo’ nrayog ni ngar pigpiggow riy ngak Jehovah. I gaar Ted, “Kug filew ni gathi kemus ni taareb e kanawo’ nrayog ni nggu pigpiggow riy ngak Jehovah.”

16. Mang e rayog ni ngad filed ko n’en be yog e Galatia 6:4?

¹⁶ Dabiyog ni ngad gagiyegnaged gubin ban’en ni ma buch u lan e yafos rodad. Ere ba ga’ fan ndab da lemnaged nib ga’ fadad u wan’ Jehovah ni bochan e maruwel ni kan pi’ ngodad, maku dab ud taareb rogonnaged gadad ngak yugu boch e walag ni kan pi’ boch e maruwel ngorad ndarud uned i rin’. I gaar Hiedi, “Faanra um taarebrogonnag e par rom ko par rok yugu boch e girdi’, ma aram e dabiyog ni ngam felfelan’.” (Mu beeg e Galatia 6:4.) Ba ga’ fan ni ngad gayed boch e kanawo’  nrayog ni ngad ayuweged yugu boch e girdi’ riy ma gad pigpig ngak Jehovah. *

17. Mang e rayog ni ngam rin’ ya nge yag ni bung rogom ni ngan pi’ boch e maruwel ngom ni fan ko pigpig rom?

¹⁷ Rayog ni nge yoor e tin ngam rin’ ni fan ko pigpig rom ngak Jehovah ni faan ga ra momnag e par rom ma dab um tay e malfith u boch ban’en ndariy rogon. Mu nameg boch ban’en nib mom ni ngam rin’ nra ayuwegem ni ngam rin’ boch ban’en ni kam nameg nib n’uw nap’an mfini yag ni ngam rin’. Bod ni faanra kam nameg ni ngam un ko regular pioneer boch ngaram, ma rayog ni ngam tabab ni ngam un ko pioneer ni ayuw u gubin e pul e chiney. Faanra ga be nameg ni ngam mang reb e ministerial servant, ma rayog ni ngam yoornag e tayim rom ni fan ko machib ma ga be yan mu guy e piin kar m’argad nge piin pilibthir u lan e ulung rom. Pi n’en ga ra fil e chiney e ra bing e kanawo’ ni ngkun pi’ boch e maruwel ngom boch nga m’on. Mu dugliy u wan’um ni ngam rin’ e re maruwel ni kan pi’ ngom u rogon feni fel’ nrayog rom.​—Rom. 12:11.

18. Mang e ga be fil ko n’en ni rin’ Beverley nrogon ni be m’ug ko sasing?

¹⁸ Demtrug yangardad ma rayog ni ngad nameged boch ban’en ni fan ko pigpig rodad ma gad rin’. Am lemnag e n’en ni rin’ reb e walag nib pin ni ka nog Beverley ngak ni 75 e duw rok. I yib ba mit e m’ar ngak nib ubchiya’ ni mo’maw’nag ngak ni nge un ko yan. Machane baadag ni nge yoornag e tin nge rin’ u nap’an ni yibe pining e girdi’ ko Puguran. Ere nameg boch ban’en ni nge rin’. Nap’an ni yag ni nge rin’ e pi n’em, ma aram me felfelan’. Rogon e athamgil ni tay ni nge rin’ e n’en ke nameg e k’aring boch e walag ni ngkur maruwelgad nib gel ni fan ko machib. Rib ga’ fan u wan’ Jehovah e maruwel ni ma rin’ e pi walag ni kar pilibthirgad ni yugu aram rogon ni boor ban’en ndabkiyog ni ngar rin’ed ni bochan rarogorad.​—Ps. 71:17, 18.

19. Mang boch ban’en nrayog ni ngad nameged ni fan ko pigpig rodad?

¹⁹ Mu nameg boch ban’en nrayog ni ngam rin’. Mmaruweliy boch e fel’ngin nib m’agan’ Jehovah ngay. Mu fil boch e salap nra bing e kanawo’ ngak e Got rodad nge ulung rok ni nge maruwel ngom nib fel’ rogon. Mu gay boch e kanawo’ nrayog ni ngam yoornag e tin ga be rin’ riy ni fan ngak pi walagem. * Faan ga ra rin’ e re n’ey, ma ra tow’athnagem Jehovah me yag ni “guy e girdi’ ni gubin ni ga be mon’og i yan” ni bod Timothy.​—1 Tim. 4:15.