1. ¿Baʼax metasil jeʼel u páajtal k-tsʼáaik ichil k-kuxtaleʼ?

 TOʼONEʼ jach k-yaabiltmaj Jéeoba yéetel taak k-meyajtik le u maas maʼalobil ku páajtaleʼ. Chéen baʼaleʼ utiaʼal ka páajchajak k-beetkeʼ kʼaʼabéet k-tsʼáaik metas ichil k-kuxtal, jeʼex k-maas maʼalobkíintik k-modos, k-kanik k-beet uláakʼ baʼaloʼob yéetel k-kaxtik baʼax jeʼel u páajtal k-beetik yoʼolal u maasileʼ. b

2. ¿Baʼaxten unaj k-ilik k-tsʼáaik metas ichil k-kuxtal yéetel k-tsʼoʼokbeskoʼob?

² ¿Baʼaxten unaj k-ilik k-tsʼáaik metas ichil k-kuxtal yéetel k-tsʼoʼokbeskoʼob? Tumen k-kʼáat k-lúubul utsil tiʼ Jéeoba, k-Taata yaan teʼ kaʼanoʼ. Jéeobaeʼ jach ku kiʼimaktal u yóol kéen u yil táan u meyajtoʼon tuláakal baʼax k-ojel utiaʼal k-meyajtik. Tsʼoʼoleʼ k-beetik xan beyoʼ tumen taak k-maas áantik le sukuʼunoʼoboʼ (1 Tes. 4:9, 10). Le consejoʼob tu tsʼáaj Pablo tiʼ Timoteooʼ ku yeʼesikeʼ kex jeʼel bukaʼaj tiempo joʼopʼok k-meyajtik Dioseʼ tuláakloʼon jeʼel u páajtal k-mejorareʼ. Koʼoneʼex ilik bix jeʼel u páajtal k-beetkeʼ.

3. ¿Baʼax consejo tu tsʼáaj Pablo tiʼ Timoteo? (1 Tim. 4:12-16).

³ Kex táankelem Timoteo le ka túuxtaʼab le yáax carta tiʼ tumen Pablooʼ tsʼoʼok wa jaypʼéel años joʼopʼok u beetik u ancianoil. Kex beyoʼ aʼalaʼabtiʼ tumen Pablo ka u yil u maas maʼalobkíintik bix u meyajtik Jéeoba (xok 1 Timoteo 4:12-16). Baʼax u kʼáat kaʼach Pabloeʼ ka mejorarnak Timoteo tiʼ kaʼapʼéel baʼal. Yáaxeʼ ka u yil u maas eʼesik jatsʼuts modos jeʼex yaabilaj, fe yéetel u yantaltiʼ junpʼéel kuxtal limpio tu táan Dios. U kaʼapʼéeleʼ ka u yil u maas maʼalobkíintik baʼaxoʼob ku beetik, jeʼex le bix u xook tu táan u maasiloʼ, bix u tsʼáaik consejo yéetel bix u kaʼansaj. Teʼ xookaʼ yaan k-xakʼaltik u ejemplo Timoteo yéetel yaan k-ilkeʼ le u tsʼáaik metas máak ichil u kuxtaloʼ jeʼel u yáantik progresareʼ.  Le kéen tsʼoʼokkeʼ yaan xan k-ilik jujunpʼéel bix jeʼel u páajtal k-maas meyajtik Dioseʼ.

4. Jeʼex u yaʼalik Filipenses 2:19-22, ¿baʼaxten Jéeobaeʼ tu tsʼáaj nukuch meyajoʼob tiʼ Timoteo?

⁴ ¿Baʼaxten Jéeobaeʼ tu kʼubéentaj nukuch meyajoʼob tiʼ Timoteo? Tumen Timoteoeʼ jach jatsʼuts kaʼach bix u modos (xok Filipenses 2:19-22). Le baʼax tu yaʼalaj Pablooʼ ku yeʼesikeʼ Timoteoeʼ juntúul máak kabal u yóol, ku yeʼesik yaabilaj, j-meeyjil yéetel ku béeytal u confiar máak tiʼ. Letiʼeʼ u yaabiltmaj kaʼach le sukuʼunoʼoboʼ yéetel ku preocuparkuba tu yoʼolaloʼob. Le oʼolal jach yaabiltaʼab tumen Pablo yéetel kʼubéentaʼabtiʼ nukuch meyajoʼob (1 Cor. 4:17). Leloʼ ku yeʼesiktoʼoneʼ wa k-ilik xan u yantaltoʼon le jatsʼuts modos uts tu tʼaan Jéeobaoʼ letiʼeʼ yaan u yaabiltikoʼon yéetel yaan u tsʼáaiktoʼon uláakʼ meyajoʼob teʼ múuchʼuliloʼ (Sal. 25:9; 138:6).

5. 1) ¿Bix jeʼel k-ojéeltik baʼax modosil unaj k-maas jatsʼutskíintikeʼ? 2) Jeʼex u chíikpajal teʼ fotooʼ, ¿baʼax ku beetik juntúul x-lóoʼbayan utiaʼal u kaxtik u yutsil u maasil?

⁵ Unaj k-yéeyik baʼax metail ken k-tsʼáa ichil k-kuxtal. Jeʼel u páajtal k-orar tiʼ Jéeoba utiaʼal u yáantkoʼon k-il baʼax modosil unaj k-maas maʼalobkíintikeʼ. Maʼ xaaneʼ yaan k-tsʼáaik cuentaeʼ unaj k-maas kaxtik u yutsil u maasil wa unaj u maas síijil t-puksiʼikʼal k-áantkoʼob. Wa maʼ xaaneʼ yaan k-ilkeʼ kʼaʼabéet k-maas kaxtik jeetsʼelil yéetel unaj k-ilik k-maas perdonartik u maasil. Tsʼoʼoleʼ jeʼel u páajtal k-kʼáatik tiʼ juntúul k-amigo baʼax modosil unaj k-maas jatsʼutskíintikeʼ (Pro. 27:6).

6. ¿Baʼax jeʼel u yáantkoʼon k-maas maʼalobkíint junpʼéel modos yaantoʼoneʼ?

⁶ Unaj k-tsʼáaik k-óol k-beet le meta tsʼoʼok k-chʼaʼtuklikoʼ. ¿Bix jeʼel u páajtal k-beetkeʼ? Yáaxeʼ jeʼel u páajtal k-xakʼalxoktik wa baʼax yoʼolal le modos taak k-maas maʼalobkíintikoʼ. Por ejemploeʼ wa taak k-maas perdonartik u maasileʼ maʼalob ka k-xok u ejemplo le máaxoʼob ku chʼaʼchiʼitaʼaloʼob teʼ Biblia tu perdonartoʼob u maasiloʼ bey xan tiʼ le máaxoʼob maʼ tu beetoʼoboʼ. Le kéen tsʼoʼokkeʼ unaj k-tuklik baʼax ku kaʼansiktoʼon. Jesúseʼ jach junpʼéel maʼalob ejemplo tiʼ máax tu perdonartaj u maasil (Luc. 7:47, 48). Letiʼeʼ maases chʼíik u yil le jatsʼuts modos yaan tiʼ u maasiloʼ maʼ tiʼ le baʼaloʼob maʼ maʼalobtak ku beetkoʼoboʼ. Maʼ tu beetaj jeʼex le fariseoʼoboʼ, letiʼobeʼ ‹ku taaskoʼob kaʼach mix baʼalil u maasil máakoʼob›  (Luc. 18:9). Le kéen tsʼoʼokok k-tuukul tiʼ le ejemploʼobaʼ maʼalob ka k-tukle: «¿Bix in wilik u maasil? ¿Baʼax maases kin wiliktiʼob?». Wa k-tsʼáaik cuenta ku talamtal k-perdonartik wa máaxeʼ maʼalob ka k-beet junpʼéel lista tiʼ le jatsʼuts modos yaantiʼoʼ yéetel ka k-tukle: «¿Bix u yilaʼal tumen Jesús? ¿Jeʼel wa u perdonartaʼaleʼ?». Wa k-beetik leloʼ jeʼel u yáantkoʼon k-kʼex bix k-tuukuleʼ. U jaajileʼ juntúul máax u beetmajtoʼon loobeʼ maʼ xaaneʼ jeʼel u talamtal k-perdonarkeʼ, chéen baʼaleʼ wa k-ilik k-beetkeʼ yaan xan u suuktal k-perdonartik uláakʼ baʼaloʼob.

7. ¿Bix u usartik Jéeoba le máaxoʼob u yojel u beetoʼob wa baʼax meyajiloʼ? (Proverbios 22:29).

⁷ Uláakʼ meta maʼalob ka k-tsʼáa ichil k-kuxtaleʼ letiʼe k-kanik k-beet uláakʼ wa baʼaxoʼ. Tuukulnakoʼon tiʼ le sukuʼunoʼob ku yáantajoʼob utiaʼal u beetaʼal u najiloʼob Beteloʼ, le tuʼuxoʼob ku yantal asambleaʼoboʼ wa le tuʼuxoʼob ku yantal muchʼtáambaloʼoboʼ. Yaʼab tiʼ le sukuʼunoʼobaʼ tu kanaj u beetoʼob le meyajoʼ tumen múul meyajnajoʼob yéetel sukuʼunoʼob maas yaan experienciaʼob tiʼob. Jeʼex u yilaʼal teʼ fotoʼoboʼ yaan sukuʼunoʼob yéetel kiikoʼobeʼ táan u kankoʼob bix jeʼel u tsʼáaikoʼob mantenimiento tiʼ le lugaroʼob tuʼux ku yantal asambleaʼoboʼ wa le tuʼux ku yantal muchʼtáambaloʼoboʼ. Le sukuʼunoʼob yéetel le kiikoʼobaʼ ku usartaʼaloʼob tumen Jéeoba, «le Rey minaʼan xuʼulul tiʼoʼ», yéetel tumen Jesús, «u Rey le máaxoʼob ku reinaroʼoboʼ» (1 Tim. 1:17; 6:15; xok Proverbios 22:29). Le oʼolal toʼoneʼ k-tsʼáaik k-óol meyaj yéetel ku meyajtoʼon le baʼaxoʼob k-ojel k-beet utiaʼal k-alabartik Jéeobaoʼ maʼ utiaʼal k-taasikba nojbaʼaliliʼ (Juan 8:54).

8. ¿Baʼax jeʼel u yáantkoʼon k-il baʼax unaj k-maas maʼalobkíintikeʼ?

⁸ Unaj k-yéeyik baʼax metail unaj k-tsʼáaik ichil k-kuxtal. ¿Bey baʼax maʼalob ka k-il k-maas maʼalobkíintikeʼ? Utiaʼal k-ojéeltikeʼ jeʼel u páajtal k-tsikbal yéetel le ancianoʼoboʼ wa yéetel le superintendente tiʼ circuitooʼ. Wa letiʼob ku yaʼalikoʼob kʼaʼabéet k-maas maʼalobkíintik bix k-kaʼansaj wa bix k-máansik k-discursoʼobeʼ jeʼel u páajtal k-kʼáatiktiʼob jach baʼax le unaj k-mejorarkoʼ. Le kéen tsʼoʼokkeʼ k-tsʼáaik k-óol k-beete.

9. ¿Baʼax jeʼel u yáantkoʼon k-maas maʼalobkíint bix k-beetik junpʼéel baʼaleʼ?

⁹ Unaj k-tsʼáaik k-óol k-beet le meta tsʼoʼok k-chʼaʼtuklikoʼ. Wa taak k-kaʼansaj maas maʼalobeʼ jeʼel u páajtal k-xakʼalxoktik le folleto Tsʼáa a wóol xook yéetel kaʼansaj. Tsʼoʼoleʼ táanil tiʼ k-máansik junpʼéel jaats teʼ muchʼtáambaloʼ jeʼel u páajtal k-kʼáatik tiʼ juntúul sukuʼun ka u yuʼuboʼon yéetel ka u yaʼaltoʼon tiʼ baʼax unaj k-mejorareʼ. Wa k-preparartikba maʼalobeʼ yaan k-kaʼansaj maas maʼalob yéetel u maasileʼ yaan u yilkoʼobeʼ toʼoneʼ k-tsʼáaik k-óol yéetel jeʼel u páajtal u confiaroʼob tiʼ toʼoneʼ (Pro. 21:5; 2 Cor. 8:22).

10. Tsikbalt junpʼéel ejemplo ku yeʼesik baʼax jeʼel u páajtal k-beetik utiaʼal k-mejorar tiʼ baʼax k-beetkeʼ.

¹⁰ ¿Kux túun wa taak k-mejorar tiʼ junpʼéel baʼal deporsi maʼ t-tsaʼayal k-beete? Wa beyoʼ maʼ unaj u lúubul k-óoliʼ. Koʼoneʼex ilik baʼax úuch tiʼ juntúul sukuʼun ku kʼaabaʼtik Garry, letiʼeʼ maʼ tu páajtal kaʼach u jach xook tubeel. Le sukuʼunaʼ ku yaʼalikeʼ jach ku suʼlaktal kaʼach le kéen kʼaʼabéetchajak u xook teʼ muchʼtáambaloʼoboʼ, chéen baʼaleʼ kex beyoʼ tu tsʼáaj u yóol mejorar. Úuchik u yáantaʼal tumen le sukuʼunoʼob bey xan tumen le publicaciónoʼoboʼ bejlaʼeʼ letiʼeʼ ku máansik discursoʼob teʼ muchʼtáambaloʼoboʼ, teʼ asambleaʼob tiʼ circuitooʼ yéetel teʼ asambleaʼob regionaloʼoboʼ.

11. Jeʼex úuchik tiʼ Timoteooʼ, ¿baʼax jeʼel u yáantkoʼon utiaʼal u tsʼaʼabaltoʼon uláakʼ meyajoʼob teʼ múuchʼuliloʼ?

¹¹ Le Bibliaoʼ maʼ tu yaʼalik wa Timoteoeʼ  kʼuch u kʼiinil u beetkuba juntúul maʼalob discursante yéetel kaʼansajnaj jach maʼalob, chéen baʼaleʼ k-ojleʼ tu beetaj le baʼax tu yaʼalaj Pablooʼ. Le oʼolaleʼ jujunpʼíitileʼ maas kaanbalnaj waleʼ yéetel tu beetaj maas maʼalob le baʼax ku kʼubéentaʼaltiʼoʼ (2 Tim. 3:10). Jeʼex Timoteoeʼ wa k-ilik k-maas kaanbal xaneʼ jeʼel u tsʼaʼabaltoʼon u maasil meyajoʼob teʼ múuchʼuliloʼ.

12. ¿Bix tsʼoʼok u yáantkech u maasil?

¹² ¿Máasaʼ ku kiʼimaktal k-óol kéen áantaʼakoʼon tumen u maasil? Jeʼex wa tiaʼanoʼon hospitaleʼ, ¿máasaʼ jach ku kiʼimaktal k-óol kéen xíimbaltaʼakoʼon tumen le sukuʼunoʼob yanoʼob ichil le Comité tiʼ Enlace yéetel le Hospitaloʼoboʼ wa le sukuʼunoʼob yanoʼob teʼ grupoʼob ku xíimbaltikoʼob le kʼojaʼanoʼoboʼ? Wa xan táan k-máansik junpʼéel problemaeʼ, ¿máasaʼ ku kiʼimaktal k-óol kéen k-il u jóoʼsik tiempo juntúul anciano utiaʼal u líiʼsik k-óol? Tsʼoʼoleʼ wa kʼaʼabéettoʼon áantaj utiaʼal k-tsʼáaik junpʼéel xookeʼ, ¿máasaʼ ku kiʼimaktal k-óol kéen u láakʼintoʼon juntúul precursor utiaʼal u yeʼesiktoʼon bix jeʼel k-beetkeʼ? Chéen baʼaleʼ maʼ unaj u tuʼubultoʼon le baʼax tu yaʼalaj Jesúsaʼ: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Hech. 20:35). Tuláakal le sukuʼunoʼob tsʼoʼok k-aʼalikoʼ kiʼimak u yóoloʼob tumen ku yáantkoʼob u maasil. Toʼon xaneʼ jeʼel u kiʼimaktal k-óol wa k-beetik jeʼex letiʼoboʼ. ¿Baʼax jeʼel u yáantkoʼon wa taak k-maas meyajtik Jéeoba uláakʼ bixeʼ?

13. Le kéen k-tsʼáa junpʼéel meta ichil k-kuxtaleʼ, ¿baʼax unaj k-chʼaʼik en cuenta?

¹³ Wa taak k-tsʼáaik junpʼéel meta ichil k-kuxtaleʼ yaan baʼaloʼob unaj k-chʼaʼik en cuenta. Por ejemploeʼ maʼ chéen unaj k-aʼalik: «Taak in maas áantaj teʼ múuchʼuliloʼ», baʼaxeʼ kʼaʼabéet k-jach tuklik tubeel baʼax le taak k-beetkoʼ. Tumen wa maʼeʼ mix toʼon k-ojel baʼax kʼiin unaj u káajal k-beetik yéetel mix ken k-tsʼáa cuenta wa tsʼoʼok u béeytal k-tsʼoʼokbesik. Maʼ xaaneʼ maʼalob ka k-tsʼíibt baʼax le taak k-beetkoʼ yéetel kéen tsʼoʼokkeʼ ka k-il baʼaxoʼob unaj k-beetik utiaʼal k-tsʼoʼokbesik.

14. ¿Baʼax maʼ unaj u tuʼubultoʼon le kéen tsʼoʼokok k-chʼaʼtuklik baʼax ken k-beetiʼ?

¹⁴ Chéen baʼaleʼ maʼ u tuʼubultoʼoneʼ le kéen tsʼoʼokok k-chʼaʼtuklik baʼax ken k-beeteʼ yaan horaeʼ jeʼel u jáan úuchul wa baʼaxeʼ. Por ejemploeʼ apóstol Pabloeʼ le ka tsʼoʼok u káajsik le  múuchʼulil yanchaj Tesalónicaoʼ maʼ xaaneʼ u tukultmaj kaʼach u pʼáatal tu yiknaloʼob junpʼéel tiempo utiaʼal u yáantkoʼob, chéen baʼaleʼ maʼ béeychajiʼ tumen jóoʼsaʼab teʼ kaaj tumen le máaxoʼob pʼekmiloʼ (Hech. 17:1-5, 10). Wa ka pʼáatak kaʼach teʼ kaajoʼ jeʼel u beetik kʼaas tiʼ le múuchʼuliloʼ. ¿Lúub wa túun u yóol Pablo? Maʼatech, letiʼeʼ seguernaj u tsʼáaik u yóol u meyajt Dios yéetel ka máan tiempoeʼ tu túuxtaj Timoteo utiaʼal u líiʼsik u yóol le sukuʼunoʼoboʼ (1 Tes. 3:1-3). Le sukuʼunoʼob yanoʼob Tesalónicaoʼ jach kiʼimakchaj wal u yóoloʼob le ka tu yiloʼob le jatsʼuts meyaj ku beetik Timoteooʼ.

15. Tsikbal junpʼéel ejemplo ku yeʼesik baʼax jeʼel u yúuchul yéetel le metas tsʼoʼok k-chʼaʼtuklikoʼ.

¹⁵ Jeʼex úuchik tiʼ apóstol Pablooʼ maʼ xaaneʼ toʼoneʼ kex k-tsʼaamaj junpʼéel meta ichil k-kuxtal utiaʼal k-maas meyajtik Jéeobaeʼ jeʼel u pʼáatal maʼ kun béeytal k-tsʼoʼokbesik yoʼolal junpʼéel baʼal ku jáan úuchleʼ (Ecl. 9:11). ¿Baʼax túun jeʼel u páajtal k-beetkeʼ? Jeʼel u páajtal k-tsʼáaik uláakʼ meta ichil k-kuxtaleʼ. Leloʼ bey tu beetil Ted yéetel Hiedi. Yoʼolal junpʼéel kʼojaʼanileʼ yanchaj u jóokʼloʼob Betel, chéen baʼaleʼ tumen jach u yaabiltmoʼob Jéeobaeʼ tu chʼaʼtukloʼob u meyajtikoʼob uláakʼ bixi. Yáaxeʼ tu beetaj u precursor regulariloʼob, tsʼoʼoleʼ tsʼaʼab u beet u precursor especialiloʼob yéetel Tedeʼ kaʼansaʼabtiʼ bix jeʼel u beetik u sustitutoil tiʼ circuitoeʼ. Chéen baʼaleʼ teʼ kʼiinoʼoboʼ kʼexpaj le años ku páaʼtaʼal ka yanak tiʼ juntúul sukuʼun utiaʼal ka u beet u superintendente tiʼ circuitoiloʼ. Le oʼolaleʼ Ted yéetel Hiedieʼ tu tsʼáajoʼob cuenta maʼ kun páajtal u beetkoʼob le meyaj jeʼeloʼ. Kex tu káajbal chan lúub u yóoloʼobeʼ u yojloʼobeʼ yaan uláakʼ bix jeʼel u páajtal u meyajtikoʼob Jéeobaeʼ. Tedeʼ ku yaʼalik: «Tsʼoʼok k-kanikeʼ maʼ chéen junpʼéeliliʼ bix jeʼel u páajtal k-maas k-meyajtik Jéeobaeʼ».

16. ¿Baʼax ku kaʼansiktoʼon Gálatas 6:4?

¹⁶ U jaajileʼ maʼ tu páajtal k-controlartik tuláakal baʼax ku yúuchul ichil k-kuxtal. Le oʼolal jach maʼalob ka k-kʼaʼajseʼ Jéeobaeʼ u yaabiltmoʼon kex jeʼel baʼaxak meyajil k-beetik ichil u kaajaleʼ yéetel maʼ unaj u joʼopʼol k-tsʼíiboltik le meyajoʼob ku beetik uláakʼ sukuʼunoʼoboʼ. Hiedieʼ ku yaʼalik: «Wa k-comparartikba yéetel u maasileʼ yaan u pʼáatal maʼ kiʼimak k-óoliʼ» (xok Gálatas 6:4). Le oʼolaleʼ maas maʼalob ka k-il baʼax jeʼel u páajtal k-beetik utiaʼal k-maas k-meyajtik Jéeobaeʼ bey xan utiaʼal k-áantik le sukuʼunoʼoboʼ. c

17. ¿Baʼax jeʼel u páajtal k-beetik wa k-kʼáat ka tsʼaʼabaktoʼon meyajoʼob maas nuuktakoʼobeʼ?

¹⁷ Wa k-ilik maʼ k-pʼaxikba yéetel k-kuxtal chéen yéetel le baʼaxoʼob jach kʼaʼabéettoʼonoʼ  jeʼel u kʼuchul u kʼiinil u tsʼaʼabaltoʼon uláakʼ meyajoʼob teʼ múuchʼuliloʼ. Chéen baʼaleʼ jeʼel u páajtal k-chʼaʼtuklik k-beetik jujunpʼéel baʼaloʼob jeʼel u yáantkoʼon k-nakpacht le metas maas nuuktakoʼoboʼ. Jeʼex wa taak a beetik a precursor regularileʼ, maʼ xaaneʼ maas maʼalob ka a yáax beet a precursor auxiliaril. Wa taak a beetik a siervo ministerialileʼ, maʼalob ka maas táakpajkech teʼ kʼaʼaytajoʼ yéetel ka a xíimbalt le sukuʼunoʼob yaan u jaʼabiloʼoboʼ wa le kʼojaʼanoʼoboʼ. Tuláakal le baʼax ken a kanoʼ jeʼel u yáantkech kéen tsʼaʼabaktech uláakʼ meyajoʼob teʼ múuchʼuliloʼ. Chéen baʼaleʼ le baʼax unaj a beetik desde beoraaʼ letiʼe a tsʼáaik u maas maʼalobil tiʼ Jéeobaoʼ (Rom. 12:11).

18. ¿Baʼax ku kaʼansiktoʼon u ejemplo Beverley? (Ilawil le fotooʼ).

¹⁸ Kex jeʼel jaypʼéel años yaantoʼoneʼ maʼalob ka k-tsʼáa metas ichil k-kuxtal. Koʼoneʼex ilik u ejemplo juntúul kiik ku kʼaabaʼtik Beverley. Letiʼeʼ 75 años yaantiʼ yéetel maʼ tu jach xíimbal tubeel yoʼolal junpʼéel kʼojaʼanil. Chéen baʼaleʼ jach taak kaʼach u táakpajal utiaʼal u invitartaʼal le máakoʼob teʼ Kʼaʼajsajiloʼ. ¿Baʼax túun tu beetaj? Letiʼeʼ tu tsʼáaj metas ichil u kuxtal, yéetel jach kiʼimakchaj u yóol ka béeychaj u tsʼoʼokbesik. Le baʼax tu beetoʼ tu péeksaj xan u maasil sukuʼunoʼob utiaʼal u maas tsʼáaik u yóoloʼob. Jéeobaeʼ jach ku kiʼimaktal u yóol ken u yil bix u tsʼáaik u yóol le sukuʼunoʼob yaan u jaʼabiloʼoboʼ (Sal. 71:17, 18).

19. ¿Baʼax metasil maʼalob ka k-tsʼáa ichil k-kuxtal?

¹⁹ Unaj k-tsʼáaik metas jeʼel u páajtal k-tsʼoʼokbesikeʼ. Maʼalob ka k-il u maas antaltoʼon le modos uts tu tʼaan Jéeobaoʼ, ka k-kan junpʼéel meyaj jeʼel u yáantkoʼon utiaʼal ka tsʼaʼabaktoʼon uláakʼ meyajoʼobeʼ yéetel maʼalob ka k-il baʼaxoʼob jeʼel u páajtal k-beetik yoʼolal u maasileʼ. d Wa k-beetik beyoʼ Jéeobaeʼ yaan u bendecirkoʼon. Tsʼoʼoleʼ jeʼex úuchik tiʼ Timoteoeʼ tuláakal máak kun ilik bix k-progresar (1 Tim. 4:15).