1. ¿Xi meta zanda quixhe íquenu ugaandanu?

 LAANU ca ni dxandíʼ xpinni Cristu guizáʼ nadxiinu Jehová ne racaláʼdxinu gudiʼnu laabe ti serviciu de ni jma galán. Peru para ganda gúninu ni la? caquiiñeʼ quixhe íquenu ugaandanu xiixa meta, casi gápanu xiixa cualidad ni naquiiñeʼ gapa ca xpinni Cristu, gápanu ti habilidad ne guyúbinu modo gacanenu xcaadxi. *

2. ¿Xiñee naquiiñeʼ quíxhenu xiixa meta ne gúninu stipa pur ugaandanu ca ni?

² ¿Xiñee naquiiñeʼ quíxhenu xiixa meta ne gúninu stipa ugaandanu ni yaʼ? Primé la? purtiʼ racaláʼdxinu gusiéchenu ladxidóʼ Bixhózenu ni nuu guibáʼ. Riecheʼ Jehová ora riquiiñenu ca habilidad ni nápanu para gúninu ni ná. Peru laaca racaláʼdxinu guni progresarnu para ganda gacanenu ca hermanu jma (1 Tes. 4:9, 10). Ndiʼ rusiidiʼ laanu, neca maʼ zinenu stale iza de cayúninu ni ná Jehová o coʼ, guiranu naquiiñeʼ guni progresarnu. Guidúʼyanu xi zacané laanu gúninu ni.

3. ¿Xi conseju bidii Pablo Timoteo lu 1 Timoteo 4:12-16?

³ Neca joven Timoteo dxi bicaa apóstol Pablo primé carta stiʼ ra nuube, maʼ zinebe ti tiempu de nácabe ancianu. Neca zaqué guluuruʼ Pablo gana laabe guni progresarbe ndaaniʼ xquidxi Jehová (biindaʼ 1 Timoteo 4:12-16). Pa guiníʼ íquenu ca diidxaʼ ni bicaa Pablo, zudiʼnu cuenta racaláʼdxibe guni Timoteo chupa cosa. Primé la? naquiiñeʼ gusihuínnibe cualidad ni napa ca xpinni Cristu, casi gannaxhiibe binni, gápabe fe ne gápabe ti  conducta galán. Ne guiropa la? naquiiñeʼ guni mejorarbe modo ruundabe nezalú binni, gudiibe conseju ne gusiidibe jma jneza. Guidúʼyanu ximodo zanda gacané ejemplu stiʼ Timoteo laanu quíxhenu meta ni zanda ugaandanu ne ni zacané laanu guni progresarnu ndaaniʼ xquidxi Dios. Laaca zadúʼyanu xcaadxi modo zanda gúninu jma lu xhiiñaʼ Dios.

4. Casi ná Filipenses 2:19-22, ¿xiñee guizáʼ biquiiñeʼ Jehová Timoteo?

⁴ ¿Xiñee biquiiñeʼ Jehová Timoteo? Purtiʼ gúpabe cualidad guizáʼ sicarú (biindaʼ Filipenses 2:19-22). Pur ni bicaa Pablo de Timoteo, zanda guidúʼyanu gúcabe ti hombre humilde, leal, ni runi dxiiñaʼ ne ni zanda gápacabe confianza. Biʼniʼ tratarbe ca hermanu que né cariñu ne dxandíʼ bizaláʼdxibe laacaʼ. Ngue runi, guizáʼ gunnaxhii Pablo Timoteo ne bidiibe laa asignación nagana purtiʼ gúpabe confianza laa (1 Cor. 4:17). Pa gápanu cualidad ni riuulaʼdxiʼ Jehová, zannaxhiibe laanu ne jma zaquiiñebe laanu ndaaniʼ congregación (Sal. 25:9; 138:6).

5. a) ¿Ximodo zanda gánnanu paraa naquiiñeʼ guchaʼnu? b) ¿Ximodo rusihuinni hermana ni rihuinni lu imagen ca racalaʼdxiʼ gacané xcaadxi?

⁵ Gucaʼnu xi meta racaláʼdxinu ugaandanu. Zanda guni orarnu Jehová para guinábanu laa gacané laanu gánnanu paraa peʼ caquiiñeʼ guchaʼnu. Gulí ti cualidad ni ñuuláʼdxiluʼ ñuni mejorarluʼ. Guzéʼtenu ti ejemplu, ¿ñee caquiiñeʼ guiale de naa gacaniáʼ ca hermanu jma la? ¿Ñee caquiiñeruʼ gusihuinneʼ racalaʼdxeʼ chuaaʼ tobi si né ca hermanu la? ¿Nuaaʼ dispuestu guneʼ perdonar xcaadxi la? Zanda guinabadiidxanu ti xhamígunu gabi laanu paraaruʼ caquiiñeʼ guchaʼnu (Prov. 27:6).

6. ¿Ximodo zanda quíxhenu meta gusihuínninu ti cualidad?

⁶ Gúninu stipa ugaandanu meta ni gudíxhenu. ¿Ximodo yaʼ? Zanda guyúbinu información ni caníʼ de cualidad ni racaláʼdxinu gusihuínninu jma. Guzéʼtenu ti ejemplu, guiníʼ íquenu raca nagana para laanu guni perdonarnu ne racaláʼdxinu guchaʼnu. Galán guidúʼndanu ne guiníʼ íquenu ejemplu stiʼ ca binni ni riete lu Biblia ni biʼniʼ perdonar ne ni qué ñuni ni. Guizáʼ galán ejemplu stiʼ Jesús, purtiʼ laa biʼniʼ perdonar xcaadxi (Luc. 7:47, 48).  Qué ñuuyabe ra ruchee binni, sínuque biiyabe ca cualidad galán ni nápacaʼ. Peru, ca fariseu que biiyacaʼ «binni casi tuuxa ni qué risaca» (Luc. 18:9). ¿Xi sti cosa naquiiñeʼ gúninu yaʼ? Zanda guiníʼ íquenu: «¿Ximodo ruuyaʼ xcaadxi? ¿Ñee ruuyaʼ ca cualidad galán stícabe la?». Pa raca nagana para laanu guni perdonarnu tuuxa, zanda gúninu ti lista ra gucaʼnu ca cualidad galán napa binni ca, ne guiníʼ íquenu ndiʼ: «¿Ximodo ruuyaʼ Jesús laabe? ¿Ñee ñuni perdonar Jesús laabe la?». Pa guni estudiarnu sicaríʼ la? zacaneni laanu guchaʼnu modo riníʼ íquenu. Zándaca gaca nagana para laanu guni perdonarnu tuuxa ni bininá laanu, peru, pa gúninu stipa, chaahuiʼ chaahuiʼ jma zazíʼdinu guni perdonarnu.

7. Casi ná Proverbios 22:29, ¿ximodo riquiiñeʼ Jehová ca binni ni nanna guni xiixa dxiiñaʼ?

⁷ Sti meta ni zanda quíxhenu nga guizíʼdinu xiixa dxiiñaʼ. Guzéʼtenu ti ejemplu, guníʼ ique ca hermanu ni runi dxiiñaʼ ra ribí ca sucursal, Salón de Asamblea ne Yoo stiʼ Reinu. Stale de ca hermanu ca biziidicaʼ gúnicaʼ dxiiñaʼ purtiʼ bisiidiʼ xcaadxi ni napa experiencia laacaʼ. Casi rihuinni lu imagen ca, hombre ne gunaa caziidicaʼ gúnicaʼ dxiiñaʼ para gacanecaʼ lu mantenimientu stiʼ Salón de Asamblea ne Yoo stiʼ Reinu. Jehová, «ni qué ziuu dxi gusaana de gaca Rey», ne Jesús, «Rey stiʼ guiráʼ rey», riquiiñecabe ca binni riʼ para gúnicabe stale cosa (1 Tim. 1:17; 6:15; biindaʼ Proverbios 22:29). Nga runi, racaláʼdxinu gúninu dxiiñaʼ nadipaʼ ne iquiiñenu dxiiñaʼ ni nánnanu para gusisácanu Jehová, ne cadi laca laanu (Juan 8:54).

8. ¿Xi zacané laanu gánnanu paraa naquiiñeʼ guni mejorarnu?

⁸ Gucaʼnu xi meta racaláʼdxinu ugaandanu. ¿Paraaruʼ naquiiñeʼ guni mejorarnu yaʼ? Zanda guinínenu ca ancianu de congregación stinu o superintendente de circuito para gábicaʼ laanu paraa naquiiñeʼ guni mejorarnu. Pa gábicabe laanu guni mejorarnu ora rudiʼnu discursu ne ora rusíʼdinu, zanda guinabadiidxanu laacabe xi peʼ naquiiñeʼ gúninu. Despué, gúninu xiixa para ugaandanu meta ni gudíxhenu. ¿Ximodo zanda gúninu ni yaʼ?

9. ¿Xi zanda gúniluʼ para ugaandaluʼ meta gusiidiluʼ jma jneza?

⁹ Gúninu stipa ugaandanu meta gudíxhenu. Guníʼ ique racaláʼdxiluʼ gusiidiluʼ jma jneza. Zanda guni estudiarluʼ folletu ni láʼ Gusíʼdinu ne guidúʼndanu jma jneza. Ne, ante gudiiluʼ ti discursu lu reunión ni raca ndaaniʼ semana, zanda guinábaluʼ ti hermanu ni jma napa experiencia gucaadiaga lii ne gabi lii paraa naquiiñeʼ guni mejorarluʼ. Pa guni prepararluʼ asignación stiluʼ dede ante, zusiidiluʼ jma jneza, zuuyacabe nácaluʼ ti binni runi dxiiñaʼ ne zanda gápacabe confianza lii (Prov. 21:5; 2 Cor. 8:22).

10. Bizeeteʼ xi zanda gúninu para gápanu ti habilidad.

¹⁰ ¿Xi zanda gúninu pa racaláʼdxinu guni mejorarnu peru raca ni nagana para laanu? ¡Cadi guireʼnu gana! Guidúʼyanu ni bizaacaʼ Garry, ti hermanu ni raca nagana para laa guʼndaʼ. Laabe guniʼbe guizáʼ rituí lube ora ruundabe ra reunión, peru qué nireebe gana; bíʼnibe stipa gúʼndabe jma jneza. Pur gucané xcaadxi hermanu laabe ne ca publicación stinu, yanna maʼ randa rudiibe discursu lu reunión, asamblea de circuito ne asamblea regional.

11. Cásica Timoteo, ¿xi zacané laanu chuʼnu listu para guicaanu jma responsabilidad ndaaniʼ congregación?

 ¹¹ ¿Ñee guca Timoteo ti hermanu ni nanna gudii discursu ne ni rusiidiʼ jneza la? Qué ruzeeteʼ diʼ Biblia ni, peru nánnanu yenándabe ca conseju ni bidii Pablo laabe. Nga runi nánnanu chaahuiʼ chaahuiʼ biziidibe jma ne gunda biʼniʼ cumplirbe ca responsabilidad stibe jma jneza (2 Tim. 3:10). Cásica Timoteo, pa guizíʼdinu gúninu xcaadxi dxiiñaʼ zanda guicaanu jma responsabilidad ndaaniʼ congregación.

12. ¿Ximodo huayacané xcaadxi hermanu lii?

¹² ¡Guizáʼ riéchenu ora racané xcaadxi laanu! Guzéʼtenu ti ejemplu, ora nuunu ra hospital, guizáʼ riuʼnu gana ora rigánnacabe laanu, casi ca hermanu ni nuu lu Comité de Enlace né ca Hospital o Grupu de hermanu ni Riganna ca ni Huará. Ne, ora cadídinu lu xiixa guendanagana, guizáʼ rudiʼnu xquixe peʼ ora riganna ti ancianu laanu, rucaadiaga ne riguixhedxí ladxidoʼno. Ne, pa caquiiñenu tu gacané laanu gudiʼnu estudiu, riéchenu purtiʼ nuu precursor ni zanda gacané laanu gusíʼdinu jma jneza. Jesús guníʼ: «Jma nayecheʼ riuu binni ora rudii que ora ricaa» (Hech. 20:35). Dxandíʼ peʼ riuu ca hermanu riʼ nayecheʼ ora racanecaʼ xcaadxi. Laanu, laaca ziuʼnu nayecheʼ pa gúninu ni. Pa racaláʼdxinu gúninu ca cosa riʼ para gúninu jma lu xhiiñaʼ Jehová, ¿xi zacané laanu gúninu ca ni yaʼ?

13. ¿Xi cadi naquiiñeʼ gúninu ora quixhe íquenu ugaandanu ti meta?

¹³ Cadi guiníʼ siouʼ racalaʼdxuʼ ugaanduʼ xiixa meta. Mejor guníʼ xi meta nápaluʼ gana ugaandaluʼ, pa guiníʼ íqueluʼ: «Ñuuladxeʼ ñacaniaʼ ruaʼ jma ndaaniʼ congregación». Zándaca gaca nagana para lii gudiiluʼ cuenta pa cayúniluʼ xiixa para ugaandaluʼ ni o coʼ. Nga runi mejor gulí ti meta ni racaláʼdxiluʼ ugaandaluʼ. Dede zanda gucaaluʼ ni lu ti guiʼchiʼ ne gucaaluʼ xi caquiiñeʼ gúniluʼ para ugaandaluʼ ni.

14. ¿Xiñee naquiiñeʼ quíxhenu meta ni zanda ugaandanu?

¹⁴ Naquiiñeʼ quíxhenu meta ni zanda ugaandanu. ¿Xiñee yaʼ? Purtiʼ zanda  guizaaca stale cosa ni cadi cabézanu. Guzéʼtenu ti ejemplu, gucané Pablo para chuʼ ti congregación ndaaniʼ guidxi Tesalónica, ne zándaca gudixhe íquebe guiaanabe raqué ti tiempu para gacanebe ca hermanu. Peru bicaa ca enemigu stibe laabe guireebe de raqué (Hech. 17:1-5, 10). Pa ñaanabe raqué niguube xquendanabani ca hermanu que lu peligru. Peru qué niree Pablo gana, gucuá íquebe ca cosa ni zanda gúnibe, ngue runi biseendaʼ Pablo Timoteo para guquidxi fe stiʼ ca hermanu ni nacubi guca xpinni Cristu (1 Tes. 3:1-3). Nabé biecheʼ ca hermanu de Tesalónica ora bíʼyacaʼ nuu Timoteo dispuestu cheʼ ra caquiiñeʼ tu gacané.

15. Bizeeteʼ né ti ejemplu xi zanda guizaaca pa guchaa xiixa lu xquendanabáninu.

¹⁵ Zanda guizíʼdinu stale de ejemplu stiʼ Pablo ne ni bizaacabe dxi nuube Tesalónica. Zándaca racaláʼdxinu ugaandanu xiixa meta para gúninu jma lu xhiiñaʼ Jehová, peru málasi guchaa xiixa lu xquendanabáninu ne maʼ qué zanda ugaandanu ni (Ecl. 9:11). ¿Xi gúninu yaʼ? Quíxhenu sti meta ni zanda ugaandanu. Nga peʼ nga ni bizaaca Ted ne Hiedi. Gupa xidé bisaanacabe Betel pur ti guendahuará. Peru, cumu nabé nadxiicabe Jehová la? nagueendaca biyúbicabe ti modo gúnicabe jma lu xhiiñabe. Primé la? gúcacabe precursor regular, despué guca nombrárcabe precursor especial ne biʼniʼ capacitárcabe Ted para gaca superintendente de circuito sustituto. Peru cumu bichaa biaʼ iza randa raca tobi superintendente de circuito la? maʼ qué ñanda ñaca Ted sustituto ne bidii Ted ne Hiedi cuenta maʼ qué zanda guni cumplircaʼ asignación sticaʼ. Neca bireecabe gana nánnacabe zanda gúnirucabe jma lu xhiiñaʼ Jehová de xcaadxi modo. Ted guníʼ: «Maʼ bizíʼdidu nuuruʼ xcaadxi modo zanda gúnidu jma lu xhiiñaʼ Jehová».

16. ¿Xi rusiidiʼ Gálatas 6:4 laanu?

¹⁶ Ruchaa stale cosa lu xquendanabáninu ne qué zanda gucueezanu ni. Nga runi cadi guiaandaʼ laanu cadi pur privilegiu ni nápanu nga rusisaca Jehová laanu. Laaca cadi galán diʼ nga guidúʼyanu tu napa xiixa privilegiu ne tu laa coʼ. Hiedi guníʼ: «Pa guchaaganu modo nabáninu ne modo nabani xcaadxi, maʼ qué zuni sentirnu galán» (biindaʼ Gálatas 6:4). Nga runi, ni jma jneza gúninu nga guyúbinu modo guni servirnu Jehová ne gacanenu xcaadxi. *

17. ¿Xi zanda gúniluʼ para gudiicabe lii jma responsabilidad ndaaniʼ congregación?

 ¹⁷ Pa guibanineluʼ huaxiéʼ cosa ne gúniluʼ stipa cadi gápaluʼ deuda la? zanda guicaaluʼ jma responsabilidad ndaaniʼ congregación. Gudixhe ique ugaandaluʼ meta nahuiiniʼ purtiʼ zacané ca ni lii ugaandaluʼ xcaadxi meta naroʼbaʼ. Guzéʼtenu ti ejemplu, pa racaláʼdxiluʼ gácaluʼ precursor regular, ¿ñanda ñuni servirluʼ de precursor auxiliar ti tiempu la? O, pa racaláʼdxiluʼ gácaluʼ siervu ministerial, ¿ñanda ñuni predicarluʼ jma, nigánnaluʼ ca hermanu ni maʼ huaniisi o ca hermanu ni huará ni nuu ndaaniʼ congregación stiluʼ la? Guiráʼ ni guiziidiluʼ yanna, zacané ca ni lii guicaaluʼ jma responsabilidad despué. Intiica si ni quixhe íqueluʼ gúniluʼ, biʼniʼ xhiiñaʼ Jehová jneza (Rom. 12:11).

18. ¿Xi rizíʼdinu de ejemplu stiʼ Beverley? (Laaca zanda gúʼyaluʼ imagen).

¹⁸ Neca maʼ huaniisinu zanda quíxhenu meta ni zanda ugaandanu. Guzéʼtenu ni bizaaca ti hermana de 75 iza ni láʼ Beverley. Cumu huarabe la? raca nagana para laabe sabe galán. Peru racaláʼdxibe guni predicarbe lu campaña para Conmemoración. ¿Xi bíʼnibe yaʼ? Gudixhe Beverley meta ni zanda ugaanda, ne ora bigaandabe ni la? guyuube nayecheʼ. Ni bíʼnibe riʼ gucané ni xcaadxi hermanu guni predicarcaʼ jma. Rusiidiʼ ca ni bizaacabe riʼ laanu rusisaca Jehová stipa ni runi ca hermanu ni maʼ huaniisi neca nuu de laacaʼ huaracaʼ (Sal. 71:17, 18).

19. ¿Xi meta zanda quixhe íquenu ugaandanu?

¹⁹ Quíxhenu meta ni zanda ugaandanu. Gápanu cualidad ni riuulaʼdxiʼ Jehová. Gápanu habilidad ti zacá ganda iquiiñeʼ Dios ne organización stiʼ laanu. Guyúbinu xcaadxi modo gacanenu ca hermanu stinu. * Pa gúninu ca ndiʼ, zaguu Jehová ndaayaʼ laanu ne cásica Timoteo, zuuyaʼ ca hermanu pabiáʼ ziyuni progresarnu (1 Tim. 4:15).