Umulapo, “kulaya ukucita fimo kabili limo kulaba no kulomba ukuti Lesa abe nte.” Umulapo kuti twaulemba nelyo kuti twaulanda fye.

Abantu bamo batontonkanya ukuti calibipa ukulapa umulapo pantu Yesu atile: “Mwilalapa nakalya . . . Lekeni Ee wenu abe Ee, na Iyo wenu abe Iyo; pantu icacila pali ifi cafuma ku mubifi.” (Mat. 5:33-37) Yesu alishibe Amafunde ya kwa Mose ayalandile ukuti inshita shimo umuntu kuti alapa umulapo kabili na babomfi ba kwa Lesa aba cishinka balilapilepo imilapo. (Ukute. 14:22, 23; Ukufu. 22:10, 11) Alishibe no kuti Yehova alilapilepo imilapo. (Heb. 6:13-17) Kanshi Yesu taloseshe mu kuti tatufwile ukulapa imilapo. Lelo alesoka fye abantu ukukanalapa imilapo na pa milandu iishacindeme. Tulingile ukulacita fyonse ifyo twalaya ukucita pantu e fyo Yehova afwaya ukuti tulecita.

Nomba kuti mwacita shani nga bamweba ukulapa umulapo? Ica kubalilapo, mulingile ukushininkisha ukuti muli no kucita ico mwalapa. Nga tamushininkishe ukuti mukafikilisha, kuti cawama ukukanalapa. Icebo ca kwa Lesa citusoka ukuti: “Cawama ukukanalaya, ukucila ukulaya no kukanafikilisha.” (Luk. Mil. 5:5) Ica bubili, muletontonkanya pa mashinte ya mafunde ayalanda pa co mulelapa, lyena mulepingulapo ukubomfya kampingu yenu iyo mwasambilisha bwino. Mashinte nshi aya mafunde ayo mwingatontonkanyapo?

Imilapo imo taipusana ne fyo Baibolo ilanda. Ku ca kumwenako, Inte sha kwa Yehova balalapa imilapo ilyo baleupana. Balalapa kuli Yehova e lyo na pa menso ya nte ishingi ukuti bakulatemwana, ukusungana bwino no kubeela umo no munankwe akatiina kabili bakatwalilila ukucita ifi ilyo lyonse bakekala aba mweo. (Bamo abopana nalimo te kuti balande imilapo filya fine fye yaba lelo nabo bene balalapa kuli Lesa.) Pa numa ya kulapa, balaba umulume no mukashi kabili balatwalilila ukuba umulume no mukashi mpaka imfwa. (Ukute. 2:24; 1 Kor. 7:39) Imilapo ya cupo yaliba fye bwino kabili tayapusana ne fyo Lesa afwaya.

Imilapo imo ilapusana ne fyo Lesa afwaya. Umwina Kristu te kuti alape ukuti akulacingilila icalo cakwe ukubomfya ifyanso ne lyo ukulapa ukuleka ukubombela Lesa. Ukucita ifi kwalipusana na mafunde ya kwa Lesa. Apo Abena Kristu te “ba muli ici calo,” kanshi ifyalo nga filelwa no kukansana tatuibimbamo.—Yoh. 15:19; Esa. 2:4; Yako. 1:27.

Pa kulapa imilapo imo tufwile ukubomfya kampingu. Inshita shimo ilyo tatulalapa umulapo tulingile ukutontonkanya pa  fyo Yesu atufundile. Atile: “Peeleni ifya kwa Kaisare kuli Kaisare, ne fya kwa Lesa kuli Lesa.”—Luka 20:25.

Tutile Umwina Kristu alefwaya ukuba umwana calo nelyo alefwaya ukupoka icitupa, lelo bamweba ukuti ilyo ashilaba umwana calo nelyo ukupoka icitupa afwile ukulapa umulapo wa kutungilila ubuteko. Nga ca kuti mu kulapa umulapo wa kutungilila ubuteko muli ico calo mwaba no kulacita ifyo amafunde ya kwa Lesa yalesha, ninshi kampingu yakwe iyo asambilisha Baibolo te kuti imusuminishe ukulapa uyo mulapo. Lelo ubuteko kuti bwamusuminisha ukwalulako amashiwi yamo mu mulapo pa kuti kampingu yakwe imusuminishe.

Ukulapa umulapo uo ba-alulako amashiwi kuti kwaumfwana ne shinte lye funde ilyaba pa Abena Roma 13:1 apatila: “Umuntu onse alenakila ubuteko.” Kanshi Umwina Kristu kuti apingulapo ukuti cili fye bwino ukulapa ukucita ifyo Lesa afwaya Abena Kristu bonse ukulacita.

Na kabili mulingile ukubomfya kampingu nga ca kuti bamweba ukuti pa kulapa umulapo mulingile ukupangako icishibilo cimo. Ku kale abena Roma na ba Sukuti balebomfya ulupanga pa kulapa, icalolele mu kuti balebomfya icishibilo ca kwa lesa wa nkondo pa kulangilila ukuti ifyo umuntu alelanda fya cine. AbaGriki baleimya ukuboko mu muulu pa kulapa. Ukucita ifi kwalelenga baishiba ukuti kwaliba uwakwata amaka uumona ifyo abantu balanda ne fyo bacita kabili uo bakalubululako.

Kwena, Umwina Kristu te kuti alape ukubomfya icishibilo ca calo icili conse icafuma ku kupepa kwa bufi. Nomba kuti mwacita shani nga ca kuti mu cilye bamweba ukubika ukuboko kwenu pali Baibolo pa kuti mulape ukuti mwalalanda icine? Ifi nga e fyo caba, kuti mwapingulapo ukucita ifyo bamweba pantu na mu Malembo mwaliba ababomfi ba kwa Lesa abacitilepo ifishibilo fimo pa kulapa imilapo. (Ukute. 24:2, 3, 9; 47:29-31) Calicindama ukulaibukisha ukuti nga mwalapa umulapo muli iyi nshila ninshi mulelapa pa menso ya kwa Lesa ukuti mwalalanda icine. Mulingile ukuipekanya ukwasuka icine amepusho yonse ayo balamwipusha.

Apo twalitemwa sana Yehova, tulingile ukupepa no kutontonkanyapo sana ilyo tushilalapa umulapo uuli onse uo batweba ukulapa. Tulingile ukushininkisha ukuti nga twalapa uyo mulapo kampingu yesu tayakaletucusha nelyo twakaana ukukonka amashinte ya mafunde ya mu Baibolo. Kanshi nga mwapingulapo ukulapa umulapo, mulingile ukushininkisha ukuti mwafikilisha uyo mulapo.—1 Pet. 2:12.