Sumpah eme kata-kata ntah pe janji si resmi guna tuhu-tuhu ngelakoken sada hal. Biasana ersumpah kalak guna Dibata ntah pe Dibata si jadi saksina. Sumpah e banci ibelasken saja ntah pe itulis.

Lit si erpengakap maka la banci kita ersumpah perban nina Jesus, “Ula ersumpah nandangi kai pe . . . Adi kataken kena ‘Ue,’ arus ertina ue, janah adi ‘Lang,’ ertina lang, sebap kai pe selain si e rehna arah si jahat nari.” (Mat. 5:33-37) Labo maksud Jesus kita la banci ersumpah. Iteh Jesus maka menurut Undang-Undang Musa lit situasi si erban kalak Israel arus ersumpah, janah lit piga-piga umat Dibata pernah ersumpah. (Kej. 14:22, 23; Kel. 22:10, 11) Iteh Jesus ka maka Jahwe pe pernah ersumpah. (Heb. 6:13-17) Adi bage, kai nge situhuna maksud Jesus? Atena mpersingeti kita gelah ula sembarangen ersumpah ntah pe ersumpah kita kerna kai si la penting. Selain si e, arus sitepati kerina janjita ras silakoken kai si enggo sikataken. Sebap bage me si arapken Jahwe.

Adi isuruh kam ersumpah, kai si perlu ilakokenndu? Si pertama, ukuri lebe ngasup ntah lang kam ngelakoken kai si isumpahkenndu e. Adi ragu kam, pangen la padah kam ersumpah. Nina Kata Dibata, “Ulin kam la erjanji, asangken erjanji kam tapi la tepatindu.” (Peng. 5:5) Kenca si e, ukuri prinsip-prinsip Pustaka si lit hubungenna ras sumpah e, nce ban keputusen si sesuai ras pusuh peratenndu. Kai saja prinsip Pustaka si banci siukuri kerna ersumpah?

Lit sumpah si sesuai ras peraten Dibata. Contohna, bas perjabun Saksi-Saksi Jahwe, erjanji penganten si dilaki ras si diberu. Situhuna, janji kalak e termasuk sumpah. Erjanji kalak e i lebe-lebe Dibata ras saksi-saksi maka kalak e singenan, sikeleng-kelengen, ras siergan segedang geluhna. (Banci saja bas janji si bage labo seri kel kata-katana, tapi tetap kalak e erjanji i lebe-lebe Dibata.) Kenca si e, iumumken me maka duana kalak e enggo sah jadi perbulangen ras ndehara, janah lanai kalak e banci sirang segedang geluhna. (Kej. 2:24; 1 Kor. 7:39) Janji perjabun sesuai ras peraten Dibata janah cocok ibelasken kalak Kristen.

Lit sumpah si la sesuai ras peraten Dibata. Contohna, kalak Kristen la nggit ersumpah guna make senjata bas mbela negarana ntah pe guna nadingken kinitekenna. Adi sibelasken sumpah si bage, enggo silanggar perentah Dibata. Kalak Kristen “lanai jadi bagin doni enda,” emaka la banci kita ikut campur bas masalah kai pe si lit bas doni enda termasuk bas perang.​—Joh. 15:19; Jes. 2:4; Jak. 1:27.

Lit sumpah si pusuh peratenta si nentukenca banci ntah lang sibelasken sumpah e. Mon-mon, sope siban keputusen nggit ntah lang kita mbelasken  sumpah e, perlu siukuri lebe alu mbages prinsip si ikataken Jesus enda: “Bereken man Kaisar kai si jadi bagin Kaisar, tapi man Dibata kai si jadi bagin Dibata.”​—Luk. 20:25.

Contohna, katakenlah lit sekalak Kristen si ndaftar atena jadi warga sada negara ntah pe erban paspor. Kenca si e, isuruh ia ersumpah maka setia kari ia man negara e. Adi bas sumpahna e arus ia erjanji ngelakoken kai si langsung ngelanggar undang-undang Dibata, pasti la ia nggit mbelasken sumpah e perban sumpah e la sesuai ras pusuh peratenna si enggo ilatih Pustaka. Tapi, banci saja ipediat pemerentah iubahna sitik isi sumpah e gelah sesuai ras pusuh peratenna.

Banci saja iputusken kalak Kristen ndai mbelasken sumpah si enggo iubah e. Banci saja ianggapna sumpah e sesuai ras prinsip si lit bas Roma 13:1 si ngataken, “Kerina kalak arus patuh man pemerentah.” Emaka banci saja la kapna dalih ersumpah ia guna ngelakoken kai si memang enggo iperentahken Dibata.

Uga adi sanga ersumpah, isuruh kam nggunaken sada benda ntah pe erban geraken tertentu? Arus banndu keputusen si sesuai ras pusuh peratenndu. Mbarenda, kalak Roma ras kalak Skit angkatna tanna ku datas sanga ersumpah ia guna pedangna, si ngelambangken dewa perang. Tujunna guna mbuktiken maka kai si ikataken kalak e banci iteki. Adi kalak Junani, angkatna tanna sanga ia ersumpah. E ertina akui kalak e maka lit dewa si mperdiateken kai si kataken kalak e ras kai si lakokenna, janah ertanggung jawap kalak e man dewa e.

Perban kita umat Jahwe pasti la kita nggit ersumpah nggunaken lambang negara kai pe si lit hubungenna ras agama palsu. Tapi uga adi isuruh pengadilen kam namaken tanndu i datas Pustaka janah arus kam ersumpah ngataken kai si tuhu? Banci lakokenndu si e perban bas Pustaka pe lit iceritaken kerna umat Jahwe si ersumpah janahna erban geraken tertentu. (Kej. 24:2, 3, 9, ctt.; 47:29-31, ctt.) Tapi perlu siinget, adi bage silakoken, enggo ersumpah kita i lebe-lebe Dibata maka sikataken kai situhuna. Emaka arus kita siap njawap kerina penungkunen alu jujur.

Pasti meherga kel siakap hubungenta ras Jahwe, emaka adi isuruh kita ersumpah, arus siukuri lebe alu mbages ras sitotoken. Perlu sipastiken maka sumpah e sesuai ras prinsip Pustaka bage pe pusuh peratenta. Adi banndu keputusen guna ersumpah, arus tepatindu.​—1 Pet. 2:12.