Ngana é ne éyoñe môt a “bo ngaka’a na é bo jam éziñ, biyoñe biziñ a nyoñe’e Zambe ane ngaa.” A ne kuli ngaka’a éte anyu dé nge ke tili je.

Bôte béziñ be ne simesane na e nji bo mvo’é na be kane ngana, amu Yésus a nga jô na: “Môt a bo’o te ve’ele kalane minkaa . . . Nkobô wônan ô bo’o ve yaa, yaa; momo, momo! Mam ma bebe yôbe valé ma so be mbia Môt.” (Mt. 5:33-37) Yésus a mbe a yeme’e na Atiñe Moïse e mbe e sili’i na bôte be kane ngana biyoñe biziñ, a na bebo bisaé be Yéhôva béziñ be nga bo de. (Met. 14:22, 23; Nk. 22:10, 11) A mbe a yeme’e fe na Yéhôva émien a nga kane bengana. (Beh. 6:13-17) Ajô te, Yésus a nji be a kômbô’ô jô na bi nji yiane kane ngana môs éziñ, ve a mbe a kômbô’ô liti na bia yiane tabe ntyele ya bo ngaka’a asu zezé mam, nge ke asu mbia be mam. Bia yiane jeñe na bi tôé bengaka’a bia bo, amu nde Yéhôva a yi na bi bo nalé.

Jé ô ne bo nge ba jô wo na ô kane ngana? Jam ôsu, jeñe’e na ô fas nge ô ne ngule ya bo jam ete. Nge ô too ke ndi na wé bo de, e ne mfi na ô bo teke kane ngana éte. Kalate Zambe a jô na: “A ne mvaé na, ô bo te tiñeti, sa na, ô tiñeti, teke bo.” (Éc. 5:5) Jame baa, jeñe’e miñye’elane ya Kalate Zambe mi tii a ngana éte. Mvuse ya valé, bo’o avale mone môte ya nleme wôé a kate wo. Bi tame zu yene miñye’elane miziñ mi ne volô bia mfa’a ôte?

Bengana béziñ be nji bo abé mis me Yéhôva. Bengaa be Yéhôva be wô’ô bo bengaka’a môs aluk. Éyoñ ba bo bengaka’a bete, a ne ve ane ba kane ngana. Éyoñe bôte bebaé ba luk, be wô’ô bo ngaka’a mise me Zambe a mise me bôte na môt ase ya be be é nye’e nyô mbok, a semé nye a mvoñôlô nye, “nté ôse [bé] nyiñ.” (Belu’u béziñ be ne bo teke jô bifia bite éyoñe ba luk, ve be wô’ô bo avale ngaka’a ete mise me Zambe.) Mvuse ya valé, be nto nlu’an, a ba yiane tabe nalé melu mese. (Met. 2:24; 1 Bec. 7:39) Ngaka’a belu’u ba bo môs alu’u dap ja yian, a e nji bo abé mise me Zambe.

Bengana béziñ be ne abé mise me Zambe. Kristen é vo’o kane ngana na ja ye ke bo bita asu na é kamane ayoñe dé, nge ke na ja ye ke beta kañe Zambe. Avale mimboon ete da tyam atiñe Zambe. Kristen ja yiane “kandane mame ya si nyô,” ajô te, bi vo’o nyoñe ngab a mam me pôlitik a bita bia boban émo ji.​—Jean 15:19; És. 2:4; Jc. 1:27.

Bengana béziñ be tii a mone môte ya nlem. Biyoñe biziñ, da sili na Kristen é fas  melebe me Yésus ma, “va’ane César biôm bi César, a Zambe biôm bi Zambe,” asu na é yeme nge ja yiane kane ngana nge momo​—Luc 20:25.

Bi tame jô na Kristen ja kômbô ke tabe si éfe, nge ke bo passeport, éyoñe te ba jô nye na a yiane kane ngana na é tôñe metiñe ya si éte. Nge nalé a tinane na éyoñ é ke kui si éte, da ye sili na a bo jame da tyam atiñe Zambe, mone môte ya nleme wé a ye ke kañese na a bo de. Ve bijôé bi ne nye ve fane ya tyendé bifia ya ngana éte asu na é lu’an a mone môte ya nleme wé.

E kan avale ngana ete da lu’an a ñye’elan bi koone wô Beromain 13:1 wo jô na: “Môt ase a bo’o ba be tele ôsu mewôk.” Ajô te, Kristen é ne yene na e nji bo abé na é kane ngana asu jame Zambe a sili Bekristen na be bo.

Bia yiane fe vô’ôlô mone môte ya nleme wongan éyoñ ba sili bia na bi kane ngana bi bela’ane jôm éziñ, nge ke bi bo’o jam éziñ. Beromain a Bescythe ya melu mvus be mbe be kane’e ngana be bela’ane nkpwaté mekôn, mfa’a ya liti na ba kañe zambe wop ya bita, a asu na be liti na be ne tabe ndi a môt a kane ngana. Begrec be mbe be bete’e wo yôp asu na be kane ngana. Nalé a mbe a liti’i na ba yeme na Zambe éziñ a ne yôp, a na A wô’ô mam mese ba jô a mam mese ba bo, a na A ne nyô bôte ba yiane bo mewôk.

Nde fe, mbo ésaé Yéhôva a ye ke kane ngana a bela’ane mendem méziñ ya ayoñ, mme mete me tii a évus ékaña’a. Ve nge wo ke kui aba mejô, éyoñe te ba jô wo na ô beté wo wôé Kalate Zambe yôp, a kane ngana na wé kobô benya mejôô, wé bo aya? Nge nalé a kui, ô ne tyi’i na wo bo de, amu Kalate Zambe a kobô ajô bebo bisaé be Yéhôva béziñ be nga kane ngana be bo’o jam éziñ. (Met. 24:2, 3, 9; 47:29-31) Éyoñe wo kan avale ngana ete, e ne mfi na ô bo te vuane na wo kane ngana mise me Zambe na wé kobô benya mejôô. Wo yiane bo nkômesane ya yalane minsili mise bé sili wo zôsô été.

Mbôle bia nyan élate jangan a Yéhôva, bia yiane ye’elane nye ôsusua na bia kane ngana éziñ, asu na bi yemelan nge ja tyame ki atiñe Yéhôva, nge ke na ja wosane ki mone môte ya nleme wongan. Nge wo tyi’i na wo zu kane ngana na wé bo jam éziñ, wo yiane fe véé mise na ô bo de.​—1 P. 2:12.