Yēḵ hī chūökuṙô kilēḵngôre, ‘ngaich kilēḵngôre ayī-ö töre öi öthō öt hateung ngam ṙô re. I minë-eny ngam Tēv ṙô yip rīkre yěn kilēḵngôre.’ Mihôiṅ anga-aṅ nö kūichngen e hēk höng ṙô-òvö inrē.

Tövaich ngam kinlēḵngôre töṙô yip rīkre, kūö ngam tö ngö ṙô Yēsū: “Ui chūöku ṙô . . . Hökngen nup ṙô yīö pöri, nöng töhôṅ, nöng törö-ö.” (Mët. 5:33-37) Hö-ö pöri nö tö ngatī manah ngam ṙô Yēsū, tö hī öi sōtu chūöku ṙô kilēḵngôre. Pön akahakūö anga-aṅ tö yik tarik ngam Tēv nö ōt nuk chūök yik tarik ngam Tēv nö chūöku ṙô nö kilēḵngôre. (Ran. 14:22, 23; Man. 22:10, 11) Akahakūö inrē anga-aṅ tö Yāvē nö chūöku ṙô nö kilēḵngôre. (Hep. 6:13-17) Tö sitih manah öng pökeh ngam ṙô Yēsū? Tö hī öi ötkô höng ilök ṙētak re öi chūöku ṙô kilēḵngôre. Pön ötkô takô nup ṙô hī nö öt hateūngi yěn ngaich nö kilē-ěyö.

Sitih inlahen öm min yēḵ meh öm töölô öm chūöku ṙô kilēḵngôre? Ngam raneh, urěh sin öm ngëichköre yěm mihôiṅ min öm hateung nup ṙô re öm kilēḵngôre hēk yěm hö-ö. Ĕhten öm um kilēkngôre yěm ötkô hateungngen e. Ngöṙô ön ngam Paipöl: “Ĕhten man öm öt chūökuṙô kilēḵngôre tö meh chūökuṙô kilēḵngôre ngaich öt kē-ĕti.” (Mum. 5:5) Ngam innëtö, ngëichkö nup kinlēḵngô meh yěn sāta nö in minë inlēnö aṅmat ngam Paipöl. Nup tö sitih inlēnö? Ta-a töi ngëichken u?

Minë tö chūöku kinlēḵngô tölöng nö imat ngam Tēv Yāvē. Tö sā ngih, yěn hapīhö mina Vamënyen Yāvē, ngaich ikūö ngam Tēv hēk ikūö yip tömaṙôngö cha-a nö chūöku ṙô nö kilēḵngôre, tö cha min nö söl kinpaha re nö hangenlōn tö höö, milēḵṙen inrē. (Pòrô yip muh nö öt Vamënyen Yāvē ikūö ngam Tēv ṙô cha-a nö kilēḵngôre.) Unôichrit e ngaich cha-a nö kaheukö nö pīhöre, ngaich hòṅ söl kinpaha re cha-a nö hateung ngam ṙô re. (Ran. 2:24; 1 Kòr. 7:39) Tölöng anū-ö në nö kinlēḵngô nö imat ngam Tēv.

Minë kinlēḵngô töt sāta nö in minë lōn ngam Tēv. Ōt nup panam chūök yip tarik nö töölô nö chūöku ṙô nö kilēḵngôre nö kiyunglö panam re. Kilēḵngôre inrē töre min nö ṙāngenre nö ṙātö ellōn re nö im Tēv. Fumlal chööngö ngam Tēv pöri min ayī-ö yěi ngatī inlahen. Pöi “öt aṅ ngih panam,” ayī-ö yěi Kristīön lökten öi ötkô kēkö nup la-en ngih panam tö sā minë alaha ngam politics hēk kinyungö inrē.—Yôh. 15:19; Isa. 2:4; Yāk. 1:27.

 Minë tö chūöku kinlēḵngô kanahngen töhěng tak. Hēkpī ayī-ö hòṅ köplōn töm inlēnö kahëtö Yēsū yěi katöllö lōn re tö nup chuök hī mihôiṅ kilēḵngôre, ngam tö ngö, “kē-ĕkūö Kaisöör tö nup chehen Kaisöör. Kē-ĕkūö ngam Tēv tö nup chehen ngam Tēv.”—Lūk. 20:25.

Sā ngih töhěng inchōḵ elmat, yēḵ öp Kristīön öre nö fil mat öp fôm pön hòṅ vīlö pāspōt re. Lohten min anga-aṅ hē e nö töölô nö kilēngôre töre min nö köp nö lā rītö ngam panam chūök re nö iyöng. Yěn ōt pöri nup kinlēḵngô chūök ò nö hōtu nö filal chööngö ngam Tēv, öthō min anga-aṅ nö kilēḵngôre tö u. Ōt pöri nup sörköör mahalöngtö inṙīngö ṙô ngam kinlēḵngô hòṅ ò nö mihôiṅ nö kilēḵngôre.

Tölöng min angū-ö tö lōn ò yěn ngatī inlahen, pön sāta nö im ṙô ngam Rōma 13:1, ngam tö ngöṙô: “Kö el katòh më lātulöng chöngö yin yēḵ.”

Ṙōlheuh inrē nö töölô yip tarik nö halöinykö minë kël re hēk ōt öp chūök tī cha nö ṙātö tī re yěn kilēḵngôre. Sā inlahen yik aṅ Rōm tö yik aṅ Sökūtī inrē yěn kilēḵngôre, ngaich eltī re tī cha-a tö minë sanët re. Inmeuktö cha angū-ö nö kilēḵngôre nö ikūö ngam Tēv kumyung. Ngatī inlahen inrē yik Krīk misī yěn kilēngôre nö hachônglö kël re. Pön chumkūöṙen ngam Tēv tö ṙô cha yěn kilēḵngôre, ngëichken cha inrē nö hateung nup ṙô re. Sitih inlahen öi min ayī-ö yěi töölô ngatī inlahen? Kahngenre min ayī-ö öi ngëichkö minë inlēnö aṅmat ngam Paipöl.

Yěn töölô pöri ngòh Kristīön nö ṙātö tī re nö in nup minkahngö panam ngaich kilēḵngòre, ötlöktu anga-aṅ nö ngatī inlahen. Ngaich sitih inlahen pöri yěm töölô el Kōt öm ṙātö tī re ikui ngam Paipöl ngaich kilēḵngôre? Sön min më-eṅ ngölōn, hö-ö ön nö tövaich yěi ngatī inlahen pön ōt nuk misī chūök yik tarik ngam Tēv nö ṙātö eltīre ngaich kilēngôre. (Ran. 24:2, 3, 9; 47:29-31) Yěn hēng tak töchūöku ṙô nö kilēḵngôre, ngaich ikūö ngam Tēv anga-aṅ nö ngatī inlahen. Lökten nöng hòṅ löng nup vahënyö ò ötkô nö minyôiny.

Töpōiṙāi ngam innôlö hī in Yāvē ötkô angū-ö nö pasūḵ tökūö tī hī. Lökten yěi kilēḵngôre ngaich hòṅ vë-ekūötēv ayī-ö, ötkô öi chūöku ṙô kilēḵngôre tö nup tö mihôiṅ nö falalö tī tö minë chööngö ngam Tēv, hēk fēḵ unôich ayī-ö inrē. Yēḵ hī pöri kilēḵngôre ngaich hòṅ hateung nup ṙô re ayī-ö.—1 Pīt. 2:12.