Shingo linalumbunuka “amwe maliji alemu, a vumbi, hanji maliji a kumanununa yimwe yize twalakenya, kanji-kanji kakuvuluka Zambi . . . ngwe chela.” Mahasa kuliamba mukanwa hanji kulisoneka.

Atu amwe mahasa kunyonga ngwo, chili chipi kulishinga mumu Yesu kambile ngwenyi: ‘Kanda nulishinga [hakutwala ku chuma] nichimwe . . . Liji lienu likapwe wika, ewa, ewa, hanji ka, ka, mumu yeswayo yahiana yino yakatuka kuli mwe mupi.’ (Mateu 5:33-37) Kwamba pundu, Yesu kanyingikine ngwenyi, Shimbi ya Mose kuyakakanjishile kulishinga nawa ngwo amwe tuvumbi twa Zambi ashishika ku shakulu no kalishingile. (Uputu. 14:22, 23; Kutuhu. 22:10, 11) Iye kanyingikine nawa ngwenyi, chipwe Yehova mwene kapwile ni kulishinga. (Hepre. 6:13-17) Kashika, maliji a Yesu kalumbunukine ngwo kutwatambile kulishinga nilimwe tangwa. Alioze, kanatutoweza hanga tuchine kulishinga ha yuma yize kuyishi ni ulemu hanji yize muyineha ponde. Twatamba kumanununa yize twahanjika mumu yino ye Yehova anashimbwila hali yetu.

Mba yika mulinga nyi makulweza hanga ulishinge? Chitangu, sako shindakenyo ngwo muhasa lume kumanununa yize mulakenya. Nyi kuushi ni shindakenyo ngwo mumanununa yize mulakenya, muchilita ulitwamine kulishinga. Liji lia Zambi linatutoweza ngwo: “Kulakenya ni kufweta ka, acho chipi; shinaho kanda ulakenya nichimwe.” (Chilu. 5:5) Hanyima, hengwola shimbi ja Mbimbiliya jize jakuhanjika ha shingo, mba ulinge kulita ni shimbi ye ya mbunge yakufumba ni Mbimbiliya. Shimbi jika ja Mbimbiliya jize muhengwola?

Mashingo amwe kalita ni upale wa Zambi. Chakutalilaho, ha mashimbu a umbachiso, Yela ja Yehova kakulinga chilakenyo kuli yoze analimbata nenyi. Chilakenyo chacho chili shingo. Ha tangwa lia umbachiso, nandungi ni sandungi kakulakenya kumeso ja Zambi ni atu waze akupwaho ngwo, malizanga, malilemesa ni kulivumbika “ku mwono wo weswe.” (Amwe ha umbachiso wo kakwamba maliji alisa ndambu ni wano, chipwe chocho, nihindu kalinga chilakenyo kumeso ja Zambi.) Hachino, ayo kakupwa lunga ni pwo nawa katamba kununga mu ulo wacho ndo kukufwa cho. (Uputu. 2:24; 1 Kori. 7:39) Chilakenyo cha umbachiso chalita ni upale wa Zambi.

Mashingo amwe waze kalitele ni upale wa Zambi. Mukwa-Kristu wamwenemwene, kechi kulishinga hanga akalile chifuchi ni mata hanji hanga alitwamine kufuliela muli Zambi. Nyi machilinga malimika ni shimbi ja Zambi. Akwa-Kristu katambile kulinga chihanda ku yuma ya “akwa hashi,” kashika kutwatambile kulinjisa mu vunda ya hano hashi.—Yoa. 15:19; Iza. 2:4; Tia. 1:27.

 Mashingo amwe kakutala ha shimbi ya mbunge ya mutu mwene. Ha mashimbu amwe, mutufupiwa kuhengwola kanawa limwe shingo kulita ni chiyulo cha Yesu cha kuhana “kuli Sesare yuma ya Sesare, ni kuli Zambi yuma ya Zambi.”—Luka 20:25.

Chakutalilaho, tunyongenu ngwe, ndumbu umwe kanafupu kulinga mukanda wa mu chifuchi uze muumukwasa kuya mu yifuchi yeka, chocho mamulweza ngwo, katamba kulishinga hanga asolole ngwo mashishika ku chifuchi chenyi. Nyi kulishinga cha mu chifuchi chacho chinalumbunuka kulinga yuma yize yakulimika ni shimbi ja Zambi, shimbi yenyi ya mbunge ya kufumba ni Liji lia Zambi muyimukwika kuchilinga. Nguvulu mahasa kumwita alumune maliji a shingo liacho hanga alite ni shimbi ya mbunge yenyi.

Kwalumuna maliji a shingo lia nguvulu, muchihasa kulita ni shimbi yize yili ha A-Roma 13:1 yinambe ngwo: “Mutu mweswe akazeye kuli waze ali ni poko ya kuyula.” Hachino, mukwa-Kristu mahasa kumona ngwe kukushi upi niumwe kulinga shingo ha chuma chize Zambi hanatumu kulinga.

Chili nawa chilemu kukaula shimbi ya mbunge ye ya kufumba nyi makwita hanga uzachise yimwe hanji ulahule muze unalishingi. Ku shakulu, A-Roma ni A-Seteya kanakalishinga ha tutana two, ha kuvuluka ndundo ja umwe kazambi ka jita hanga asolole shindakenyo ya ushishiko wo. A-Ngresia kapwile ni kuzundula kwoko ha kulishinga. Hachino, ayo kapwile ni kusolola ngwo kakutayiza ngwe kuli ndundo ja umwe zambi yoze wakwivwa yize anambe ni yize akulinga nawa yoze atu atamba kwononokena.

Kwamba pundu, kavumbi ka Yehova kechi kulishinga ha chuma chimwe cha chifuchi chize chinakwate ha uwayilo wa mahuza. Mba nyi makwita mu chota hanga use kwoko helu lia Mbimbiliya ni kulishinga ngwo muhana uchela wamwenemwene? Ha chikuma chino, muhasa kusakula kuchilinga, mumu yisoneko yakuhanjika hali amwe tuvumbi twa Zambi ashishika waze anakalahula ha kulishinga. (Uputu. 24:2, 3, 9; 47:29-31) Chili chilemu kwiwuluka ngwe, nyi mulinga chino, unalishingi kumeso ja Zambi ngwo muhanjika umwenemwene. Kashika, watamba kulilulieka hanga uhane makumbululo amwenemwene ha yeswayo makuhula.

Amu twakulemesa chinji usepa wetu ni Yehova, twatamba kulemba muze matwita hanga tulinge shingo lieswalio, ni kusa shindakenyo nyi shingo liacho kulishi kulimika ni shimbi yetu ya mbunge hanji shimbi ja Zambi. Nyi unambe kulishinga ha yimwe, watamba kupwa ni shindakenyo ngwo, mumanununa shingo liacho.—1 Petu. 2:12.