Jumpʼejl diccionario miʼ yʌl chaʼan cheʼ mi la cʌcʼ lac tʼan, yom i yʌl «chaʼan mi la cʌl chaʼan an chuqui mi caj lac mel (chaʼlen) i mi lac taj ti tʼan Dios bajcheʼ testigo chaʼan jiñi woli (choncol) bʌ la cʌl» (Diccionario de uso del español, de María Moliner). Iliyi mucʼ jach i mejlel la cʌl o mi lac tsʼijbun.

An muʼ bʌ i ñaʼtañob chaʼan mach weñic cheʼ mi la cʌcʼ lac tʼan come Jesús tsiʼ yʌlʌ: «Maʼañic baʼ ora yom mi laʼ taj ti tʼan chuqui tac an chaʼan mi laʼ waʼchocon laʼ tʼan [...]. Cheʼ mi laʼ wʌl chaʼan an chuqui mi caj laʼ mel, melela, cheʼ mi laʼ wʌl chaʼan an chuqui maʼañic mi caj laʼ mel, mach laʼ mel. Pejtelel jiñi yan tac bʌ muʼ bʌ i yʌjlel tilem ti Satanás» (Mat. 5:33-37). Jesús yujil chaʼan ti jiñi mandar tsaʼ bʌ aqʼuenti Moisés miʼ yʌl chaʼan jiñi israelitajob an i tajol yomʌch miʼ yʌcʼob i tʼan yicʼot chaʼan an xucʼul bʌ i wiñicob Dios tsaʼʌch bʌ i yʌcʼʌyob i tʼan (Gn. 14:22, 23; Éx. 22:10, 11). Yujil jaʼel chaʼan Jehová tsaʼʌch i yʌcʼʌ tac i tʼan (Heb. 6:13-17). Jin chaʼan, Jesús maʼañic woli (yʌquel) i yʌl chaʼan maʼañic baqui ora yom mi la cʌcʼ lac tʼan. Woli jach i yʌl chaʼan mach cheʼ jach yom mi lac toʼol acʼ lac tʼan o ti chuqui mach bʌ wen ñuquic. Tiʼ pejtelel ora yomʌch mi lac tsʼʌctesan lac tʼan come jiñʌch yom bʌ Jehová chaʼan mi lac mel.

Jin chaʼan, ¿chuqui yom maʼ mel cheʼ bʌ maʼ subentel chaʼan yom maʼ wʌcʼ a tʼan? Ñaxam bʌ, wen ñaʼtan mi mucʼʌch caj i mejlel a tsʼʌctesan. Mi mach a wujilic mi mucʼʌch caj i mejlel a tsʼʌctesan, ñumen wen cheʼ maʼañic maʼ wʌcʼ a tʼan. Jiñi i Tʼan Dios miʼ subeñonla: «Utsʼat cheʼ maʼanic maʼ waʼchocon a tʼan. Mach utsʼatic cheʼ maʼ waʼchocon a tʼan cheʼ tile ñumel jach a tʼan» (Ec. 5:5). Cheʼ jiñi, qʼuele jiñi principio tac muʼ bʌ i taj ti tʼan jiñi tʼan a wom bʌ a wʌcʼ i mele cheʼ bajcheʼ miʼ subeñet jiñi a conciencia cʌntesʌbil bʌ ti Biblia. ¿Baqui tac bʌ jiñi principio?

An muʼ bʌ i yʌcʼob i tʼan mucʼʌch bʌ i mulan Dios. Jumpʼejl ejemplo, cheʼ miʼ ñujpuñelob jiñi i testigojob Jehová miʼ yʌlob jiñi voto tac, cheʼ bajcheʼ jiñi woliʼ yʌcʼob i tʼan. Jiñi wiñic yicʼot xʼixic miʼ yʌlob tiʼ tojlel Dios yicʼot yañoʼ bʌ chaʼan mi caj i cʼuxbiñob i bʌ, mi caj i cʌntañob i bʌ ti wen yicʼot mi caj i qʼuelob i bʌ ti ñuc cheʼ bʌ cuxulobto wʌʼ ti Pañimil. (An yañoʼ bʌ mach bʌ cheʼic miʼ yʌlob bajcheʼ iliyi, pero mucʼʌch i yʌcʼob i tʼan tiʼ tojlel Dios). Cheʼ jiñi miʼ yʌjlel chaʼan ñujpuñemobix i miʼ pijtʌntel chaʼan jiñi i ñujpuñel chaʼañʌch tiʼ pejtelel ora (Gn. 2:24; 1 Cor. 7:39). Jiñi voto tac chaʼan ñujpuñel weñʌch miʼ qʼuel Dios i jiñʌch muʼ bʌ i mulan.

An muʼ bʌ i yʌcʼob i tʼan maʼañic bʌ miʼ mulan Dios. Jumpʼejl ejemplo, jiñi xñoptʼañob maʼañic miʼ yʌlob chaʼan mi caj i cʼʌñob jiñi juloñib chaʼan miʼ coltañob jumpʼejl país o chaʼan mi caj i cʌyob i ñopob Dios, cheʼ muqʼuic i melob woliʼ ñusʌbeñob i mandar tac Dios. Jiñi xñoptʼañob «mach i chaʼañobic ili pañimil», jin chaʼan maʼañic miʼ yotsañob  i bʌ ti jiñi wocol tac am bʌ ili ora (Juan 15:19; Is. 2:4; Sant. 1:27).

An muʼ bʌ i yʌcʼob i tʼan, pero miʼ chʼʌmob ti ñuc muʼ bʌ i yʌl jiñi i conciencia. Cheʼ bʌ juntiquil xñoptʼan muʼto caj i ñaʼtan mi mucʼʌch caj i yʌcʼ i tʼan o maʼañic, an i tajol yom miʼ wen ñaʼtan jiñi ticʼojel tsaʼ bʌ i yʌcʼʌ Jesús chaʼan yom mi la cʌqʼuen Cesár jiñi i chaʼan bʌ César, pero jiñi i chaʼan bʌ Dios mi la cʌqʼuen Dios (Luc. 20:25).

Laʼcu lac ñaʼtan chaʼan juntiquil xñoptʼan yom chaʼan miʼ cʌjñel chaʼan chʼoyol ti yambʌ país o yom i locʼsan i pasaporte, pero miʼ yubin chaʼan yom miʼ waʼchocon i tʼan chaʼan xucʼul mi caj i yajñel. Mi jiñi tʼan muʼ bʌ caj i yʌcʼ miʼ ñusan ti pʼis jiñi i mandar tac Dios, jiñi i conciencia cʌntesʌbil bʌ ti Biblia maʼañic mi caj i yʌqʼuen i mel jiñi. Tajol jiñi añoʼ bʌ i yeʼtel miʼ yʌcʼob chaʼan miʼ tsʼitaʼ ñijcan i tʼan muʼ bʌ caj i yʌcʼ chaʼan miʼ chʼʌm ti ñuc jiñi i conciencia.

Cheʼ miʼ tsʼitaʼ ñijcʌntel jiñi tʼan muʼ bʌ caj i yʌcʼ chaʼan xucʼul mi caj i yajñel yom miʼ taj i bʌ yicʼot jiñi principio am bʌ ti Romanos 13:1, muʼ bʌ i yʌl: «Ti laʼ pejtelel yom mi laʼ chuc laʼ bʌ tiʼ tojlel jiñi añoʼ bʌ i yeʼtel». Jin chaʼan, tajol juntiquil xñoptʼan miʼ yʌl chaʼan maʼañic i wocolel cheʼ miʼ yʌcʼ i tʼan chaʼan mi caj i mel junchajp muʼ bʌ i suben Dios chaʼan yom miʼ mel.

Jiñi laj conciencia miʼ coltañonla jaʼel cheʼ bʌ mi lac subentel chaʼan an chuqui mi laj cʼʌn o an chuqui mi lac mel chaʼan mi lac pʌs chaʼan woli la cʌcʼ lac tʼan. Ti wajali, jiñi romanojob yic’ot jiñi escitajob miʼ cʼʌñob i yespada chaʼan miʼ yʌcʼob i tʼan, cheʼ bajcheʼ iliyi miʼ cʼajtibeñob i coltaya juntiquil pʼʌtʌl bʌ Dios chaʼan jiñi guerra chaʼan miʼ pʌsob chaʼan i sujmʌch bʌ jiñi tʼan woli bʌ i yʌcʼob. Jiñi griegojob miʼ letsañob i cʼʌb ti panchan cheʼ bʌ miʼ yʌcʼob i tʼan. Cheʼ bajcheʼ jiñi yujilob chaʼan an majqui pʼʌtʌl bʌ woliʼ qʼuel chuqui miʼ melob yicʼot miʼ yʌlob, yicʼot muʼ bʌ caj i yʌqʼueñob i toj i mul mi maʼañic miʼ tsʼʌctesañob i tʼan.

I sujmʌch, juntiquil i wiñic Jehová maʼañic mi caj i yʌcʼ i tan tiʼ pam junchajp muʼ bʌ i cʼʌjñel ti jiñi mach bʌ i sujmic chʼujutesaya. Pero ¿ixcu mi tsaʼ subenti chaʼan miʼ majlel ti jumpʼejl meloñibʌl i miʼ subentel chaʼan miʼ yʌcʼ i cʼʌb tiʼ pam jumpʼejl Biblia yicʼot chaʼan miʼ yʌcʼ i tʼan chaʼan mi caj i yʌl chuqui tac i sujm bʌ? Tajol mucʼʌch i jacʼ i mel come jiñi Biblia miʼ yʌl chaʼan an i wiñicob Dios ti wajali añʌch bʌ chuqui tsiʼ meleyob o tsiʼ cʼʌñʌyob chaʼan miʼ yʌcʼob i tʼan (Gn. 24:2, 3, 9; 47:29-31, TNM). Mi tsaʼ lac mele bajcheʼ jiñi, ñuc i cʼʌjñibal chaʼan mi laj cʼajtesan chaʼan tiʼ wut Dios woli la cʌl chaʼan mi caj la cʌl chuqui i sujm bʌ. Jin chaʼan, yom mi lac wen qʼuel chaʼan mi la cʌl chuqui i sujm bʌ ti jujumpʼejl cʼajtiya muʼ bʌ lac melbentel.

Mi lac wen qʼuel ti ñuc cheʼ i yamigojonla Jehová, jin chaʼan yom mi lac chaʼlen oración yicʼot mi lac wen ñaʼtan cheʼ bʌ muʼto caj la cʌcʼ lac tʼan. La com lac chaʼlen wersa chaʼan maʼañic mi lac ñusan ti pʼis jiñi laj conciencia yicʼot jiñi principio tac am bʌ ti Biblia. Mi tsaʼ la cʌcʼʌ lac tʼan, yomʌch mi lac chaʼlen wersa lac tsʼʌctesan (1 Ped. 2:12).