E kabwarabwaraaki te taetae n tuea bwa “te berita ae matoatoa, te katanoata ae kakawaki, ke te berita ibukini kakororaoan am taetae ni bau. E karaoaki naba aei n aran te Atua, bwa e aonga n riki te Atua bwa te tia kakoaua n am taetae n tuea.” E kona ni karaoaki te taetae n tuea rinanon te taetae ke n te koroboki.

Tabeman, a iangoia bwa e bure karaoan te taetae n tuea ibukina bwa e taekina aei Iesu: “Tai tuea naba teutana . . . Ma ngkana kam atonga ‘Eng’ ao nanona eng, ao ami ‘Tiaki’ nanona tiaki, bwa a riki mairoun teuare buakaka taeka aika raka riki nakon aikai.” (Mat. 5:33-37) E bon ataia Iesu ae a taetae n tuea tibun Iteraera ngkoa n te Tua rinanoni Mote, ao anne naba ae a kakaraoia ana toro te Atua aika kakaonimaki. (KBwaai 14:22, 23; TeOti. 22:10, 11) E ataia naba ae e kakaraoa te taetae n tuea Iehova i bon irouna. (Ebera 6:13-17) Ngaia are e aki nanonna Iesu bwa ti aki riai n taetae n tuea. Ma e kauringira bwa ti na aki taetae n tuea i aoni baika a aki kakawaki ke baika akea uaaia. Ti riai n iangoi kakororaoani baike ti taekini, bwa te mwakuri ae tabu ao ti riai naba ni bwabwaina te koaua n ara taetae.

Ma tera ae ko na karaoia ngkana ko a tuangaki bwa ko na taetae n tuea i aon te bwai teuana? Te moan, taraia raoi bwa ko na boni kona ni kakororaoa te bwai ae ko na taetae n tuea i aona ke ko aki. Ngkana ko nanououa, e raoiroi riki ae ko aki taetae n tuea. E kauringira te Baibara n aei: “E raoiroi riki ae ko aki taetae ni bau nakon ae ko taetae ni bau ao ko aki kakoroa bukina.” (TeMin. 5:5) Imwina, ukeri booto n reirei man te Baibara aika irekereke ma te taetae n tuea anne, ao karaoa ae boraoi ma mataniwin nanom are e a tia ni kataneiaaki n ana taeka te Atua. Baikara tabeua booto n reirei man te Baibara aikai?

Taetae n tuea tabeua aika boraoi ma nanon te Atua. N te katoto, a taekina te taetae ni bau taanga aika kaain Ana Tia Kakoaua Iehova ngkana a mareaki. Te taetae ni bau n aron aei boni berita aika irianaki n te taetae n tuea. E taekina ana taeka ni bau te tia mare te mwaane ao te tia mare te aine i matan te Atua ao taani kakoaua. N angiin te tai, a berita bwa a na kawakinia ao ni karineia i marenaia “ni karokoa tokini maiuia.” (A kona ni kaokoro taekan aia taeka ni bau tabemwaang, ma a bon taetae ni bau naba i matan te Atua.) Imwin anne, a atongaki bwa te buu te mwaane ao te buu te aine ao a kabaeaki ni kabane maiuia n aia mare. (KBwaai 2:24; 1Kor. 7:39) Te taetae n tuea n te mare e boni boraoi ma nanon te Atua.

Taetae n tuea tabeua aika aki boraoi ma nanon te Atua. Te Kristian ni koaua, e na bon aki taetae n tuea, ibukini kamanoan abana ni kamanenaani bwaai ni buaka, ke ibukini kakeaan te Atua irouna. Karaoan aei, e na bon urua ana tua  te Atua. A bon “aki arona aroia kaain te aonnaba” Kristian, ngaia are ti bon aki riai ni kairekerekeira ma itabarara ao kauntaeka ake iai.—Ioa. 15:19; Ita. 2:4; Iak. 1:27.

Taetae n tuea tabeua aika kaineti ma te mataniwinnano. N tabetai, ti riai moa n nenera raoi ana reirei ni kairiri Iesu are “angani Kaitara akana ana bwai Kaitara, ma angan te Atua akana ana bwai te Atua,” imwain ae ti baireia bwa ti na karaoa te taetae n tuea.—Ruka 20:25.

N te katoto, iangoa te Kristian ae kanoaa te booma ibukini kaainakin te aba ke ibukin te bwatiboti, ao e a ataia imwina bwa e riai moa ni karaoa te taetae n tuea ibukini kakaonimakina. Ngkana te taetae n tuea n te aba anne e kaitaraa Ana Tua te Atua, e na bon aki kariaia mataniwin nanona, ae e a tia ni kataneiaaki n te Baibara, bwa e na taetae n tuea. Ni kaitaraan anne, e kona naba ni kariaia te tautaeka ikanne bwa e na biti taeka tabeua n te taetae n tuea, bwa e aonga n aki tabetabe mataniwin nanona iai.

E kona ni boraoi karaoan anne ma te boton reirei are n I-Rom 13:1 are kangai: “Ke a a aantaeka aomata nako irouia ake a mwiokoaki n te mwaaka n tautaeka.” Ngaia are e kona ni baireia te Kristian bwa e na akea buren te taetae n tuea n te bwai ae e a tia ni kariaia te Atua bwa a na karaoia Kristian.

E kakawaki naba bwa ti na ongeaba ni mataniwin nanora are e kataneiaaki n te Baibara, ngkana ti a tuangaki bwa ti na kamanena te bwai teuana ibukin ara taetae n tuea ke ti na kateitea kain ara taetae n tuea. A kamanenai aia kabaang n taetae n tuea, kaain Rom ao Tekute rimoa, are nanona bwa a neboa mwaakan Atuan te buaka ibukin onimakinan ana taetae ni bau temanna. Kaaini Kuriiti a katea baia n nako karawa ngkana a na taetae n tuea. A kaotia iai bwa iai te Atua temanna i karawa ae nori baika taekinaki, baika riki ao aomata ake a na kaekaa bukinaia irouna.

E aki kona ana toro te Atua n taetae n tuea n te bwai teuana ae kona n irekereke ma te taromauri ae kewe. Ma tera arom ngkana ko a kateaki n te kaboowi, ao n tuangaki bwa ko na katokaa baim i aon te Baibara ao n taetae tuea ibukin taekinan te koaua? Ngkana ngaia anne, ko kona ni kariaia karaoan anne ibukina bwa a kaotaki naba n te Baibara taekaia naake a kakaonimaki aika kateitea kain aia taetae n tuea. (KBwaai 24:2, 3, 9; 47:29-31) Ma ko riai n uringnga ae ngkana ko taetae n tuea, ko a boni berita i matan te Atua bwa ko na taekina te koaua. Ko riai ngkanne n tauraoi ni kaekai titiraki ni kabane ma te koaua.

Ibukina bwa e kakawaki iroura ara iraorao ma Iehova, ti riai n tataroi ao n iaiangoi taetae n tuea ake ti tuangaki bwa ti na karaoi, bwa a na aki urui mataniwin nanora ke ana boto n reirei te Baibara. Ngkana ko baireia bwa ko na karaoa te taetae n tuea teuana, taraia raoi bwa ko na boni kakoroa nanona.—1Bet. 2:12.