Peteĩ persóna ojapóva peteĩ huraménto “oñekompromete jepi ojapotaha álgo, térã oasegura siertoha la heʼíva. Peteĩ huraménto ningo iserioiterei pórke pe persóna ojapóva upéva omoĩ voi Ñandejárape de testígo ohechauka hag̃ua siertoha la heʼíva”. Pe persóna ohuráva ikatu ojapo upéva heʼívo peteĩ mbaʼe térã oskrivívo upéva.

Oĩ opensáva kristianokuéra ni mbaʼevéicharõ ndohurái vaʼerãha pórke Jesús heʼi vaʼekue: “Ani ni mbaʼevéicharõ pehura. [...] Pejéramo: ‘Si’, upéva si vaʼerã, ha pejéramo: ‘No’, upéva no vaʼerã, pórke pe nokumplíriva iñeʼẽ ohechauka oĩmaha Satanás poguýpe” (Mat. 5:33-37). Péro Jesús ningo oikuaa vaʼekue pe léi omeʼẽ vaʼekue Moisés heʼi hague Ñandejára siervokuéra ohura vaʼerãha unas kuánta kósare, ha oĩ vaʼekue voi unos kuánto ojapóva upéva (Gén. 14:22, 23; Éx. 22:10, 11). Avei oikuaa vaʼekue Jehová voi ohura hague heta vése (Heb. 6:13-17). Upévare ñaimekuaa segúro Jesús ndeʼiséi hague ndovaleiha jahura mbaʼevetére. Upéva rangue haʼe heʼise vaʼekue ndovaleiha jahura oimeraẽ mbaʼe reírente. Haʼe ohechauka porã si o si ñakumpli vaʼerãha umi mbaʼe jaʼéva, pórke upéva iñimportanteterei Ñandejárape g̃uarã.

Upéicharõ, ¿mbaʼépa jajapo vaʼerã ojeʼéramo ñandéve jahura vaʼerãha peteĩ mbaʼe? Primeroite, ñaime vaʼerã segúro ikatutaha ñakumpli la jaʼéva. Ha nañaiméirõ segúro, iporãvéta ndajajapóinte upe huraménto. Upévare la Biblia heʼi ñandéve: “Ikuentave nereprometéi mbaʼeve reiko rangue rejapo peteĩ promésa ha upéi nerekumplíri” (Ecl. 5:5). Upéi ñaanalisa avei mbaʼépa ñanemboʼe la Biblia umi huraméntore, ha jareko enkuénta la ñane konsiénsia heʼíva ñandéve jadesidi mboyve. ¿Mbaʼéichapa la Biblia ñandegia jaikuaa hag̃ua mbaʼépa jajapo vaʼerã koʼã kásope? Jahechamína.

Algúno huraménto oĩ porã Ñandejárape g̃uarã. Por ehémplo, umi testígo de Jehová ojapo jepi peteĩ promésa omenda vove, ha jaʼe porãséramo g̃uarã upéva haʼe hína peteĩ huraménto. Haʼekuéra oñekompromete Ñandejára renondépe ha avei umi testígo renondépe “ojoayhutaha, okuidataha ojuehe ha ojorrespetataha oikove aja entéro”. Ikatu oĩ umi matrimónio ndeʼíriva peichaite voi la omendáta vove, péro haʼekuéra ojagarránte hína avei upéva upe kompromíso Ñandejára renondépe. Upéi ojeʼe vove haʼekuéra haʼemaha “marido y mujer”, ojagarra peteĩ kompromíso odurátava tóda la vída (Gén. 2:24; 1 Cor. 7:39). Ñandejára oguerohory peichagua kompromíso, ha ndopytavaíri henondépe peteĩ isiérvo ojapóramo peichagua huraménto.

Algúno huraménto oĩ vai Ñandejárape g̃uarã. Por ehémplo, peteĩ kristiáno ndohuramoʼãi ohotaha gerrahápe odefende hag̃ua ipaís, térã ndohuramoʼãi ndahaʼemoʼãveimaha testígo de Jehová. Koʼã mbaʼe ningo tuichaiterei ojoavy la Biblia heʼívandi. Umi kristiáno tee ndoikói “umi hénte ko mundopegua oikoháicha”, ha upévare ñande ni mbaʼevéicharõ nañañentremetéi umi provléma oĩvare ko múndope (Juan 15:19; Is. 2:4; Sant. 1:27).

 Algúno huraménto ñandémante jadesidi vaʼerã jajapótapa térãpa nahániri. Sapyʼánte jadesidi hag̃ua upéva jareko vaʼerã enkuénta la Jesús heʼi vaʼekue: “Pemeʼẽ vaʼerã Césarpe la okorrespondéva chupe, péro pemeʼẽ vaʼerã Ñandejárape la okorrespondéva chupe” (Luc. 20:25).

Por ehémplo, ñamoĩ chupe peteĩ kristiáno ojapoha umi trámite oñenasionalisa hag̃ua peteĩ paíspe térã okonsegi hag̃ua peteĩ pasapórte, ha ojeʼe chupe upearã ojapómante vaʼerãha peteĩ huraménto pe paíspe g̃uarã. Oiméramo upe huraméntope heʼi álgo ojoavýva la Biblia heʼívandi, ikonsiénsia nopermitimoʼãi chupe ojapo upéva. Péro ikatu avei pe goviérno opermiti chupe okambiaʼimi la heʼíva pe huraméntope ani hag̃ua ojoavy la Biblia heʼívandi, ha upe kásope a lo mehór ikonsiénsia opermitíta chupe ojapo upéva.

¿Oĩ vaítapa peteĩ ermáno térã ermána odesidi ojapo upéva? Ikatu jaʼe nahaniriha pórke la Biblia heʼi Romanos 13:1-pe: “Entéro persóna ojapo vaʼerã umi autorida omandáva”. Upévare haʼe ikatu opensa upe huraménto ndorekoiha mbaʼeve ojoavýva la Biblia heʼívandi, ha en rrealida okumplitanteha peteĩ mbaʼe Jehová omandáva ñandéve jajapo hag̃ua.

Sapyʼánte oĩ avei umi ojapóva peteĩ hésto térã séña ohuráta jave. ¿Ikatúpa kristianokuéra ojapo koʼã mbaʼe? Káda únomante jadesidi vaʼerã upéva jarekóvo enkuénta ñane konsiénsia heʼíva ñandéve. Yma umi rrománo ha umi escita oipurúmi vaʼerã ijespáda ojapóta jave peteĩ huraménto. Péicha haʼekuéra ohechauka pe dios de la gérra ogarantisaha siertoha umi mbaʼe heʼíva hikuái. Umi griego katu ojepokuaa vaʼekue ohupi ipo yvága gotyo ládo ohuráta jave, ha péicha ohechauka ogueroviaha peteĩ dios haʼeha itestigokuéra, ha avei haʼekuéra ojechataha upe diósndi nokumplíriramo umi mbaʼe heʼíva térã ijapúramo.

Jaikuaaháicha, ni peteĩ testígo de Jehová ndoipurumoʼãi álgo oúva umi rrelihión japúgui térã peteĩ símbolo nasionál ojapo hag̃ua peteĩ huraménto. Péro ñamoĩ chupe peteĩ trivunálpe ojejerureha ñandéve ñamoĩ hag̃ua ñande po peteĩ Biblia ári ha jahura peteĩ mbaʼe. ¿Ikatúpa jajapo upéva? En rrealida la Biblia heʼi oĩ hague heta Ñandejára siérvo yma guare ojapo vaʼekue peteĩ hésto térã séña ohuráta jave. Asi ke káda únomante jadesidi vaʼerã jajapótapa upéva térãpa nahániri (Gén. 24:2, 3, 9; 47:29-31). Péro oĩ álgo iñimportánteva jareko vaʼerã enkuénta jajapóramo upéva. Peichagua huraménto jajapo hína Ñandejára renondépe, ha upévare si o si jaʼémante vaʼerã la verda. Upévare iñimportánte ñaime preparádo ñarresponde porã hag̃ua la oñeporandúva ñandéve ha jajasegura siertoha la jaʼéva.

Ñande ningo ñamombaʼeterei pe amista jarekóva Jehovándi. Upévare, ojejeruréramo ñandéve jahura hag̃ua peteĩ mbaʼe, primeroite siémpre ñañemboʼe vaʼerã chupe ha jajerure chupe tañandegia. Jareko vaʼerã enkuénta avei la heʼíva ñane konsiénsia ha la Biblia. Ha avei ñanemanduʼa vaʼerã jadesidíramo jajapotaha peteĩ huraménto, katuete ñakumpli vaʼerãha upéva (1 Ped. 2:12).