Echilapo chaliri “chilagane chiserere, chirhali cha ntyantya, omuntu aliri ajira chiyerekene okw’ayeneza eby’aderhere; chaliri chazigana kuba buhamirizi . . . embere za Mungu.” Echilapo chakajirirwe n’obunu changwa banayandika.

Baguma bakawaza oku kuli kubi okujira echilapo bulala Yesu aderhaga mpu: “Murhalapaga chiro . . . Si muleke ‘Nechi’ wenyu abe nechi, ‘Nanga’ wenyu, anabage nanga, bulala echaderherwe enyanya w’ahola chirhengerere k’olala mubi.” (Mt. 5:33-37) Kweri, Yesu alimenyere bwinja Esheriya ya Musa yalihemere okujira bilapo biguma, hali n’abakozi bimana ba Mungu balijirire ebilapo. (Mwa. 14:22, 23; Kut. 22:10, 11) Analimenyere bwinja ku Yehova naye analapa. (Ebr. 6:13-17) Bobuno, Yesu arhalonzaga kuderha oku rhurhahira rhukajira echilapo. S’ahubwe, aliri ahanula abantu barhayinjaga balapa eju y’ebintu bya busha-busha birhagwerhe echi bimalire. Rhukwanene kuyeneza ebi rhwaderhere bulala ntyo ku Yehova alonzeze.

Lero si, gurhe wakajira nka bamakubwira ojire echilapo? Ech’oburhanzi, ochizere oku wayeneza ebi waderha. Akaba ogwerhe engangane, kwakaba kwinja orhalapaga. Echinwa cha Mungu chihanwire ntya: “Kuli kwinja orhalaganyaga ahali h’okulaganya eby’orhayeneza.” (Muh. 5:5) Kandi, olole amakanuni me Biblia mashambere oku chilapo bakubwirire ojirage, naho oje warhola ensimikiro nk’okw’ezamiri yawe ekoomezwe bwinja yakubwirire. Makanuni mahe maguma mw’amola?

Hali ebilapo bifarhene n’obulonza bwa Mungu. Omufano, Abahamirizi ba Yehova banajira echilagane amango bamajira obuhya. Echola chilagane banajira chili chilapo. Embere za Mungu n’embere z’abantu, omuhya-mulume n’omuhya-mukazi banalaganya oku bazigirana, balembana, banakengane; n’oku bajira ntyo “esiku zoshi bombi [baba] balamire.” (Hali okw’abandi bashabene bakaba barhaderhere ebila binwa byen’ebi amango bamashabana, aliko chiro akaba ntyo, bajirire echilagane embere za Mungu.) Eyi bakala bali mulume n’omukazi, banakwanene kulama haguma akalamo kabo koshi. (Mwa. 2:24; 1 Ko. 7:39) Echola chilagane chiyemererwe, chikwanene, chinafarhene n’obulonza bwa Mungu.

Hali ebilapo birhafarhene n’obulonza bwa Mungu. Omukristu arhakwanene kujira echilapo, nk’ech’okulwira echihugo changwa ech’okuhakana obwemere bwage mu Mungu. Okujira ntyo kuli kuvuna amarhegeko ma Mungu. Abakristu barhakwanene kuba “chigabi che gulu,” che chirhumire rhurhakachiheba omu buhaka bwabo n’omu ntambala zabo.​—Yoh. 15:19; Isa. 2:4; Yak. 1:27.

Hali ebilapo bihemere okukolesa ezamiri. Mango maguma, hali oku byakahema rhugerereze bwinja echilapo omu kukolesa ehano lya Yesu liderhe  mpu, “muhe Kaizari ebya Kaizari, aliko ebya Mungu, mubihe Mungu.”​—Lu. 20:25.

Omufano: Rhuderhe ok’Omukiristu yalonza echiratasi ch’okuhamira omu chihugo chabene changwa yalonza ech’okubalama omu bindi bihugo (passeport), naho anayunva ku bimuhemere ajire echilapo ch’okukenga amarhegeko m’emunda aja. Akaba okujira echola chilapo ch’echihugo kuli kulaganya oku hali bintu biguma ayemerere kw’akola bivunire esheriya ya Mungu, ezamiri yage ekoomezwe ne Bibilia erhakayemera achijira. Aliko abakulu bakamuyemerera ahindamule ebinwa aderha omu chilapo, na ntyo anachijira n’ezamiri echere.

Okujira echilapo chahindamwirwe mw’ebinwa ch’okukenga amarhegeko m’echihugo, kwakaba kufarhene n’akanuni kali mu Waroma 13:1, kaderhere: “Buli muntu achichise bufi oku bakulu b’enyanya.” Bobuno Omukristu akwanene kugerereza bwinja y’arhalaganya okujira echintu chivunire amarhegeko ma Mungu.

Kandi, byakahema okukolesa ezamiri amango bamakuha echintu walapirako changwa bakubwire mp’ojire chimenyeso chilebe omu kulapa. Abaroma ba mira n’Abasikiti baliri balapira oku ngorho zabo, kwaliri kuderha okw’emisi ya mungu w’evita eshahule omuntu yeshi-yeshi wakacha omu ch’alaganyize. Abagiriki nabo bali baheba efune enyanya eyi bakajirire echilapo. Okujira ntyo, kwaliri kwayerekana oku barhegerere bwinja ku Mungu ali abona ebili byaderhwa n’okukolwa, na yenyine yenji wabaza abantu oku bi bajirire.

Kweri, omukozi wa Yehova arhakwanene kulapira oku chimenyeso choshi-choshi ch’echihugo chihuzenye n’emparamyo y’obubeshi. Gurhe si wakajira nk’oku tribinali bamakubwira ohume oku Biblia olape oku waderha obukweri? Omu hali eli nk’eyola, wakayemera bulala Amandiko mashambere oku bandi bakozi bimana ba Mungu balijirire echilapo eyi hali aha bahumire. (Mwa. 24:2, 3, 9; 47:29-31) Kuli kwinja okuyibuka oku, nka wamajira echilapo chili nk’echola, ey’oli walapa embere za Mungu oku waderha obukweri. Bikuhemere ochirheganye okushubiza buzira kubesha ku buli chibazo bakubaza.

Bulala rhufarhire obwira bwerhu haguma na Yehova na fune ebiri, rhukwanene kusalira n’okugerereza bwinja buli chilapo barhubwirire rhujire, rhwanachizera oku chirhazingisa ezamiri yerhu changwa mpu chivune amakanuni me Biblia. Okabona oku wajira echilapo, orhafundaga kuchiyeneza.​—1 Pe. 2:12.