Gwauhamata metauna anina be, “ta ese gau ta ia hagugurua totona pepa dekenai ia torea o ia gwauraia, bona nega momo Dirava be iena hereva hamomokania tauna bamona ia gwauraia.”

Reana haida idia laloa gwauhamata metauna ita karaia be kerere, badina Iesu ia gwau: “Namona be emui ‘Oibe’ be oibe bona emui ‘Lasi’ be lasi, to bema hereva ma haida umui gwauraia, unai be Satani amo ia mai.” (Mat. 5:33-37) Oibe, Iesu ia diba Mose Ena Taravatu ia gwau gau haida dekenai Israela taudia be gwauhamata metauna idia karaia bona Dirava ena hesiai taudia be unai idia karaia danu. (Gen. 14:22, 23; Eso. 22:10, 11) Bona ia diba Iehova be gwauhamata metaudia ia karaia danu. (Heb. 6:13-17) Unai dainai, Iesu ena hereva anina be gwauhamata metauna ita karaia diba. Bona ia hahedinaraia anina lasi gaudia bona badina maorona lasi gaudia dekenai gwauhamata metauna ita karaia lasi. Iehova ia ura nega ibounai ita karaia gwauhamata ita badinaia be namo.

Bema haida idia gwau gwauhamata metauna ta oi badinaia, dahaka do oi karaia? Ginigunana be, oi karaia gwauhamata oi badinaia be namo. Bema oi daradara, unai gwauhamata metauna oi karaia lasi. Baibel ia gwau: “Namo lasi gwauhamata oi karaia, badina dika oi gwauhamata ma oi hagugurua lasi.” (Had. 5:5) Bena, do oi badinaia gwauhamata dekenai Baibel ena hakaua herevadia oi laloa, bona unai hegeregerena emu lalomamina oi badinaia. Unai hakaua herevadia haida be dahaka?

Gwauhamata metaudia haida be Dirava ena ura ida idia hegeregere. Hegeregere, Iehova ena Witnes taudia idia headava neganai, Dirava bona taunimanima vairanai idia gwauhamata ta ta do idia lalokau henia bona hemataurai heheni, bona “edia mauri dinadia ibounai lalonai, unai bamona do idia karaia.” (Haida be idia headava neganai unai bamona hereva idia gwauraia lasi, to Dirava ena vairanai gwauhamata idia karaia.) Bona idia be headava tau bona hahine ai idia lao. Edia mauri dinadia ibounai lalonai, unai bamona do idia noho. (Gen. 2:24; 1 Kor. 7:39) Unai headava gwauhamata be maoro, bona Dirava ena ura idia badinaia.

Gwauhamata metaudia haida be Dirava ena ura ida ia hegeregere lasi. Keristani momokani tauna ese unai bamona gwauhamata metauna ia karaia lasi, hegeregere, tano ta gimaia totona tuari kohudia ia gaukaralaia o Dirava dekenai ena abidadama ia rakatania. Unai ia karaia neganai, Dirava ena taravatu ia utua. Keristani taudia be “tanobada taudia bamona lasi,” unai dainai tanobada ena heiriheiri karadia bona tuari lalonai idia vareai lasi.​—Ioa. 15:19; Isa. 2:4; Iam. 1:27.

 Gwauhamata metaudia haida be lalomamina hegeregerena do ita karaia. Nega haida, gwauhamata metauna ta ita do karaia lasi neganai Iesu ena sisiba ita laloa namonamo, ia gwau, “Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.”​—Luka 20:25.

Hegeregere, Keristani tauna be sitisen pepa eiava paspot ia hahonua neganai, ia itaia gwauhamata metauna ta do ia karaia be namo. Bema do ia karaia gwauhamata metauna ese Dirava ena taravatu ia utua, Baibel amo ia hadibaia lalomamina ese do ia durua unai ia karaia lasi totona. To, gavamani ese maoro ia henia iena lalomamina hegeregerena gwauhamata metauna ena hereva haida ia haidaua, unai amo ia badinaia diba.

Bona do ia haidaua gwauhamata metauna be Roma 13:1 ena hakaua herevana ida ia hegeregere, ia gwau: “Namona be taunimanima ibounai be gavamani henunai do idia noho.” Unai amo Keristani tauna ese ia karaia gwauhamata be Dirava ena hakaua herevana ia badinaia diba.

Bema gwauhamata metauna karaia totona oi idia hamaoroa gau ta eiava imana amo toa ta oi karaia, Baibel amo oi hadibaia lalomamina oi badinaia be namo. Guna Roma bona Sitis taudia be tuari kaia idia dogoatao bona gwauhamata idia karaia, unai ena anina be edia tuari diravana idia abidadama henia. Grik taudia be gwauhamata metauna idia karaia totona edia imana idia abia isi. Badina idia diba guba ai siahu gauna ta ia noho bona ia ese idia gwauraia gaudia bona karaia gaudia hegeregerena idia do ia kota henia.

Oibe, bese abia isi karadia be tomadiho koikoi ena kahana ta dainai, Iehova ena hesiai tauna ese unai kara ia durua lasi. To bema kota dekenai oi idia hamaoroa emu imana be Baibel latanai oi atoa bona oi gwauhamata hereva momokani do oi gwauraia, dahaka do oi karaia? Unai nega ai, unai bamona oi karaia diba, badina Baibel ese ia hahedinaraia abidadama taudia be gwauhamata metauna ta idia karaia totona edia imana amo toa idia karaia. (Gen. 24:2, 3, 9; 47:29-31) Namona be oi laloatao, bema unai bamona gwauhamata metauna oi karaia, oi be Dirava dekenai oi gwauhamata hereva momokani do oi gwauraia. Oi hegaegae namonamo, unai amo do idia henia henanadai be mai momokani ida oi haerelaia diba.

Iseda hetura karana Iehova ida be mai anina bada, unai dainai bema ita idia hamaoroa gwauhamata metauna ita karaia, unai ita gurigurilaia bona laloa dobu, unai amo ita karaia gwauhamata ese iseda lalomamina do ia hadikaia lasi eiava Baibel ena hakaua herevadia do ia utua lasi. Bema oi ura gwauhamata metauna oi karaia, oi badinaia be namo.​—1 Pet. 2:12.