Oruyano ru kahururwa otja “omatjivisiro omananḓengu tjinene nge tjitwa kotjiveta, poo omakwizikiro wokutjita otjiṋa, potuingi nge tamuna Mukuru . . . otja ohatoi poo omuhongonone.” Nowo mape ya aye tjitwa kotjinyo poo aye tjangwa.

Ovandu tjiva mape ya ave ripura kutja onavi okutjita oruyano mena rokutja Jesus wa tja: “Amu yana ko . . . Omambo weṋu ngaye rire ii, ii na indee, indee; warwe aehe ngu mamu hungire ye za kOmunaurunde.” (Mat. 5:33-37) Otjiperi kutja Jesus aa tjiwa kutja Omatwako nga yandjerwe ku Moses aaye yandjere Omuisrael okutjita oruyano mozongaro kaaṋi, nokutja ovakarere va Mukuru ovaṱakame aave tjiti otuyano. (Gen. 14:22, 23; Eks. 22:10, 11) Eye wina aa tjiwa kutja Jehova aa tjiti otuyano. (Hebr. 6:13-17) Ku nao, Jesus kaa hee kutja eṱe katu sokutjita oruyano. Posi yokutja, eye wa rakiza ovandu kutja ave tjiti oruyano rwoviṋa mbi he ri ovinanḓengu poo rwoviporoporo. Eṱe aruhe matu sokuyenenisa oviṋa mbi twa kwizike, mena rokutja iho otjiṋa Jehova tje undjira ku eṱe.

Nu hapo, mo sokutjita vi indu tji wa ningirwa okutjita oruyano? Rutenga, ripurira ko nawa kutja oviṋa mbi mo yana mo yenene okuvitjita tjiri. Indu tji mo keyakeya, ma rire nawa okuhinokutjita oruyano. Embo ra Mukuru ra rakiza kutja, “okokuwa okuhinokutjita omakwizikiro komurungu wokuyetjita nokuhinokuyeyenenisa.” (Omuzuv. 5:5) Okuzambo, tara komirari vyOmatjangwa mbi mavi hitasana noruyano ndu mo sokutjita. Nu u toorere ko omikambo mbi mavi hitasana nomeritjiviro woye womomutima nga zikamena kOmatjangwa. Omirari tjiva mbi ri mOmatjangwa ooviṋe?

Otuyano tjiva tu hitasana nombango ya Mukuru. Otjotjihorera, Ovahongonone va Jehova ve tjita omakwizikiro indu tji mave kupasana. Omakwizikiro nga ye ri otja oruyano. Omurumendu ngu ma kupu nomukazendu ngu ma kupwa, ve kwizika komurungu wa Mukuru na komurungu wovandu, kutja mave suverasana, mave yozikasana, nu mave raisasana ondengero. Nu ve kwizika kutja mave tjiti nao “ngunda [owo] aveyevari ave nomuinyo.” (Ovakupasane varwe mape ya ave ha hungire omambo ngo porukupo rwawo, posi yokutja owo ngunda ve tjita oruyano komurungu wa Mukuru.) Okuzambo owo ve tjiukisiwa otja omurumendu nomukazendu, nu mave sokukara morukupo oure womiinyo vyawo. (Gen. 2:24; 1 Kor. 7:39) Indji ondyero ombwa, ohirona nu ndji hitasana nombango ya Mukuru.

Otuyano tjiva tu pirukira ombango ya Mukuru. Omukriste watjiri ka tjiti oruyano tjimuna rwokukara norupa movita mokurwira ehi, poo oruyano rwokuisa okukarera Mukuru. Okutjita nao maku tjiti kutja u pirukire omatwako wa Mukuru. Ovakriste kamaave yenene okukara norupa mozombata na movita vyouye mbwi. Owo ‘tjinga ave he ri ovouye mbwi.’—Joh. 15:19; Jes. 2:4; Jak. 1:27.

 Ovakriste mave sokurityera oveni otja komeritjiviro wawo womomutima kutja mave tjiti otuyano tjiva poo indee. Povikando tjiva eṱe matu hepa okuripura nawa ohunga neronga ra Jesus ndi tja “yandjeye ovyombara kombara, nu imbi ovyaNdjambi yandjeye ku Ndjambi”, ngunda atu hi ya tya kutja matu tjiti oruyano poo indee.—Luk. 20:25.

Otjotjihorera, ngatu tje Omukriste ma tjiti omaningiriro wokurira omuture wehi poo okumuna opasporta, neye a munu kutja okutjita nao maku hepa kutja ma tjite oruyano rwokutja ma rire omuṱakame kehi. Ma tjiti vi? Ndoovazu mehi ndo, oruyano rwokurira omuṱakame kehi, omakwizikiro wokutjita otjiṋa tji matji pirukire omatwako wa Mukuru, omeritjiviro we womomutima nga zikamena kOmatjangwa kamaaye yenene okumuyandjera okutjita oruyano ndwo. Posi yokutja, ohoromende mape ya ai yandjere Omukriste okurundurura omambo woruyano ndwo, kutja omeritjiviro we womomutima ye mu yandjere okutjita oruyano ndwo.

Oruyano rwokurira omuṱakame kehi ndwa rundururwa kaṱiṱi, mape ya aru hitasana nomurari mbu ri mOvaroma 13:1, mbu tja: “Omundu auhe nge riwise kehi youhonapare.” Ku nao, Omukriste mape ya a munu kutja kanavi okutjita oruyano ndu maru hitasana na imbi Mukuru mbye undjira ko kOvakriste okutjita.

Wina, ounanḓengu okukara nonḓuviro komeritjiviro woye womomutima nga zikamena kOmbeibela, indu tji wa ningirwa okuungurisa otjiṋa poo okuraisa nomake ngunda amo tjiti oruyano. Ovaroma voruveze orukuru novandu varwe, aave tjiti oruyano mokutamuna engaruvyo nu oro aari ungurisiwa otjotjiraisiro tjomasa wa mukuru wovita, nu wina aatji raisa ouṱakame womundu ngo. Ovagrike aave yere eke meyuru, indu tji mave tjiti oruyano. Mokutjita nao, owo aave yakura kutja pe nomundu omunamasa ovandu avehe ku ve sokuzira. Nu wina owo aave kambura kutja omundu omunamasa ngo, u munu imbi mbi ve hungira na imbi mbi ve tjita.

Otjiperi kutja ovakarere va Jehova kave tjiti oruyano koviungurisiwa ngamwa mbi yandja ondengero kehi, nu mbi notjiṋa nomerikotameneno woposyo. Posi yokutja, mo tjiti vi indu tji wa ningirwa motjombanguriro okutwa ko eke kombanda yOmbeibela nokuyana kutja mo yandja omahongonona wouatjiri? Mongaro otja indjo, ove mape ya o tye okutjita nao, mena rokutja Omatjangwa ye hungira ohunga novakarere ovaṱakame mba tjita oruyano mokuraisa neke. (Gen. 24:2, 3, 9; 47:29-31) Ounanḓengu okutjiwa kutja indu tji mo tjiti oruyano otja indo, ove mo yana komurungu wa Mukuru kutja mo hungire ouatjiri. Ove mo hepa okuyandja eziriro rouatjiri kepuriro arihe ndi mo purwa.

Mena rokutja tu vara oupanga wetu ku na Jehova otjotjihuze, eṱe matu sokukumba nokuripurira ko nawa, indu tji twa ningirwa okutjita oruyano. Nu matu sokukondja kutja oruyano rwetu aru ha zunḓa omeritjiviro wetu womomutima, poo okuteya omirari vyOmbeibela. Indu tji wa tye okutjita oruyano, mo sokuruyenenisa.—1 Petr. 2:12.