Dagam ai hpe “ahkyak shatai nna tara shang ndau shana ai (sh) lama ma galaw na matu Karai Kasang a mying hpe gang nna ga sadi jaw ai” ngu lachyum hpaw ma ai. Ga hte, laika hte dagam mai ai.

“Dagam dala rai lu na myit dai n rai . . . Na a ga gaw, Rai sa, nga yang rai u ga, N rai, nga yang, n rai u ga; dai hta lai ai ga nlang hte gaw n kaja ai wa hte seng nga ai” ngu Yesu tsun da ai majaw, dagam ai gaw shut ai ngu nkau shadu ma ai. (Mat 5:33-37) Mawshe Tara hku nga yang, masa lam nkau hta, Israela ni tup hkrak dagam ra ai lam, Karai a mayam nkau dagam wa ai lam, Yehowa nan mung dagam wa ai lam ni hpe Yesu chye ai. (Nin 14:22, 23; Pru 22:10, 11; Heb 6:13-17) Dai majaw, dagam ai baw tsep kawp n mai galaw ai ngu Yesu tsun ai n mai byin ai. N ahkyak ai lam ni, lachyum n nga ai lam ni a matu dagam ai baw n galaw na matu sadi jaw nga ai re. Tinang tsun dat ai ga hte maren grin na matu shakut ra ai. Dai zawn Yehowa galaw shangun mayu ai.

Lama na, dagam na matu hpyi shawn hkrum ai nga yang gaw gara hku kun? Shawng nnan, tinang tsun ai hte maren gaja wa galaw lu na kun? ngu ai hpe atsawm chye hkra galaw u. N chye yang, n dagam ai gaw kaja htum re. “Dagam nna rap n raw ai hta, n dagam ai nga na, grau mai nga ai” ngu Chyum Laika hta sadi jaw da ai. (Hpj 5:5) Dagam ai lam gaw, Chyum Laika npawt tara ni hte maren, re ai, n re ai hpe san jep u. Dai hpang, Chyum Laika hte shaman da ai myit nsam hte maren galaw u. Chyum Laika npawt tara nkau gaw hpa ni rai kun?

Dagam ga nkau gaw Karai myit ra ai hte hkrak sha re. Ga shadawn, Yehowa Sakse ni gaw, dinghku de ai shaloi ga sadi tawn ma ai. Dai ga sadi mung dagam ga amyu mi re. Num nnan hte la nnan gaw, “asak hkrung nga dingsa” langai hte langai tsawra matsan dum nna, hkungga mat na ngu Karai Kasang hte sakse ni a man hta ga sadi jaw ma ai. (Yan la nkau gaw, dai hte maren raw n tsun tim, Karai a man hta ga sadi tawn ma ai.) Shan gaw, madu jan, madu wa byin mat sai. Prat tup rau nga ra ai. (Nin 2:24; 1 Ko 7:39) Dai zawn dinghku ga sadi tawn ai gaw Karai a myit ra ai lam hte hkrak sha re.

Dagam ai ga nkau gaw Karai a myit ra ai lam hte n htan shai ai. Ga shadawn, laknak lang nna mungdan hpe makawp maga na matu (sh) Karai a ntsa tawn ai makam masham hpe kau da na matu zawn re ai dagam ai ga hpe, Hkristan ajet ni galaw na n re. Dai gaw, Karai a tara hpe ninghkap ai hte bung ai. Hkristan ni gaw, ‘mungkan ga hte seng ai ni n re.’ Dai majaw, dang rang hkat ai lam ni, majan ni hta n lawm ai.​—Yhn 15:19; Esa 2:4; Yak 1:27.

Dagam ai ga nkau gaw tinang a myit nsam hte seng ai. N dagam shi yang, “Kehta hte seng  ai hpe gaw, Kehta hpe ya mu: Karai Kasang hte seng ai hpe mung, Karai Kasang hpe ya mu” ngu ai Yesu a ga hpe atsawm myit yu ra ai aten ni nga chye ai.​—Luk 20:25.

Ga shadawn, mung masha byin na matu, maigan de pru hkawm lekmat lu na matu, sadi dung ai lam dagam ra ai ngu saga. Dai mungdan hta, dai zawn dagam ai gaw, Karai a tara hte n htan shai ai lam yawng hpe galaw na matu, ga sadi jaw ai lachyum rai yang, Chyum Laika hte shaman da ai myit nsam gaw, dagam na matu ahkang jaw na n re. Raitim, dagam ga hta lawm ai ga si ni hpe galai shai nna tsun na matu, asuya ahkang jaw ai nga yang, myit nsam gaw dagam na matu ahkang jaw chye ai.

Ga si galai shai da ai dagam ga tsun ai gaw, Roma 13:1 hta lawm ai “shinggyim masha nlang hte gaw, daru magam ahkang aya lu ai ni a npu e a taw nga mu” ngu ai npawt tara hte hkrak sha re. Dai majaw, dai hku dagam ai gaw, Karai hpyi shawn da ai hte maren galaw ai majaw, n shut ai ngu Hkristan langai dawdan mai ai.

Dagam ai shaloi galaw ai arawn alai, lang ai arai ni hte seng nna mung, Chyum Laika hte shaman da ai myit nsam tsun ai hku hkan na matu ahkyak ai. Moi prat Roma hte Sit-ti-yan masha ni gaw, nhtu ni hte dagam ma ai. Lachyum gaw, hpyen nat hpara hpe shanhte kamhpa ai lam dagam ai re. Grik ni gaw, lata hpe lamu de ladawn nna dagam ma ai. Galaw ai lam, tsun shaga ai lam ni hpe yu nga ai wa, masha ni jahpan dan ra na dagu nga ai madu nga ai hpe hkap la ai lachyum re.

Yehowa a mayam langai gaw, dagam ai shaloi, shut shai ai nawku dawjau lam hte seng ai amyu sha masat dingsat ni hpe lang na n re. Raitim, jaw ai hku tsun na ngu Chyum Laika buk ntsa lata mara nna, dagam na matu, tara rung kaw na hpyi shawn wa yang gaw gara hku kun? Dai aten ni hta, hpyi shawn ai hte maren galaw na matu dawdan mai ai. Chyum Laika hta, hkum hkrang arawn alai hte dagam wa ai sadi dung ai ni a lam lawm ai. (Nin 24:2-4, 9; 47:29-31) Dai hku dagam ai gaw, jaw ai hku tsun na ngu Karai a man hta, dagam ai re ai hpe myit dum na matu ahkyak ai. San wa chye ai ga san shagu hpe jaw ai hku htai na matu shajin da ra ai.

Karai Kasang hte hku hkau lam hpe manu shadan ai majaw, tinang a myit nsam hte Chyum Laika npawt tara ni hpe n tawt lai hkrup hkra, anhte galaw na ngu dawdan da ai dagam ga yawng hpe, atsawm akyu hpyi nna sawn maram ging ai. Dagam na ngu nang dawdan ai nga yang, dai hte maren byin hkra shakut ra ai.​—1 Pe 2:12.