Swɛ na “siriɔs tin we pɔsin kin tɔk, ɔ na prɔmis we pɔsin kin mek fɔ du sɔntin, ɛn bɔku tɛm dɛn kin kɔl Gɔd as witnɛs.” Sɔntɛnde dɛn kin tɔk am ɔ rayt am.

Sɔm kin tink se i nɔ fayn fɔ swɛ bikɔs Jizɔs bin tɔk se: “Una nɔ swɛ atɔl atɔl . . . Jɔs mek yu ‘Yɛs’ min yɛs, ɛn yu ‘Nɔ’ min nɔ, bikɔs ɛnitin apat frɔm dis kɔmɔt frɔm di wikɛd wan.” (Mat. 5:​33-37) Jizɔs bin no se di Lɔ we Gɔd bin gi Mozis bin se di Izrɛlayt dɛn fɔ swɛ we i kam to sɔm tin dɛn, ɛn Gɔd in fetful savant dɛn bin de swɛ. (Jɛn. 14:​22, 23; Ɛks. 22:​10, 11) I bin no bak se Jiova insɛf sɛf bin de swɛ. (Ibru. 6:​13-17) So Jizɔs nɔ bin de tɔk se wi nɔ fɔ ɛva swɛ. Bɔt i bin de wɔn pipul dɛn nɔ fɔ swɛ bɔt tin dɛn we nɔ rili impɔtant ɔ fɔ di rɔng rizin. Wi fɔ du wetin wi dɔn prɔmis fɔ du ɔltɛm, bikɔs na dat Jiova want wi fɔ du.

So wetin fɔ du if dɛn aks yu fɔ swɛ? Fɔs, mek shɔ se yu go ebul fɔ du wetin yu dɔn swɛ se yu go du. If yu nɔ shɔ, i go bɛtɛ fɔ mek yu nɔ swɛ. Gɔd in Wɔd wɔn se: “I bɛtɛ lɛ yu nɔ prɔmis dan fɔ prɔmis ɛn nɔ du wetin yu se.” (Ɛkli. 5:​5) Dɔn, tink bɔt Baybul prinsipul dɛn we gɛt sɔntin fɔ du wit di swɛ we yu dɔn swɛ, ɛn du wetin yu kɔnshɛns we di Baybul dɔn tren alaw yu fɔ du. Wetin na sɔm pan dɛn Baybul prinsipul dɛn ya?

Sɔm swɛ dɛn nɔ kin go agens wetin Gɔd want. Fɔ ɛgzampul, Jiova Witnɛs dɛn kin mek vaw we dɛn de mared. Dɛn vaw dɛn ya na wan we, we pɔsin de swɛ. Bifo Gɔd ɛn ɔda witnɛs dɛn, di yawo ɛn di ɔkɔ kin prɔmis fɔ lɛk, valyu, ɛn rɛspɛkt dɛnsɛf, ɛn dɛn go du am “te dɛn day.” (Ɔda yawo ɛn ɔkɔ nɔ kin tɔk ɔl dɛn wɔd dɛn ya we dɛn de mared, bɔt dɛn kin stil mek vaw bifo Gɔd.) Dɛn kin kam fɔ bi maredman ɛn mareduman, ɛn dɛn mared kin kɔntinyu fɔ de da we de te dɛn day. (Jɛn. 2:​24; 1 Kɔr. 7:​39) Dis arenjmɛnt na di rayt tin, ɛn i nɔ de agens wetin Gɔd want.

Sɔm swɛ dɛn de agens wetin Gɔd want. Tru Kristian nɔ go swɛ fɔ yuz wɛpɔn fɔ fɛt fɔ in kɔntri ɔ fɔ kɔmɔt biɛn Gɔd. If i du dat, i go go agens Gɔd in lɔ dɛn. Kristian dɛn nɔ fɔ “tan lɛk di pipul dɛn na di wɔl,” so wi nɔ fɔ put an pan dɛn agyumɛnt ɛn fɛt-fɛt.—Jɔn 15:​19; Ayz. 2:​4; Jems 1:​27.

 Sɔm swɛ dɛn gɛt fɔ du wit wi kɔnshɛns. Sɔntɛnde, wi nid fɔ tink gud wan bɔt Jizɔs in advays we se fɔ “gi Siza wetin na Siza in yon ɛn gi Gɔd wetin na Gɔd in yon” bifo wi disayd if wi fɔ swɛ ɔ wi nɔ fɔ swɛ.—Lyuk 20:​25.

Fɔ ɛgzampul, lɛ wi se Kristian aplay fɔ paspɔt ɔ fɔ bi sitizin na wan kɔntri, ɛn i kam fɔ no se i nid fɔ swɛ se i nɔ go ɛva kɔmɔt biɛn di kɔntri. If insay da kɔntri de, fɔ swɛ min se i go du sɔntin we go agens Gɔd in lɔ, in kɔnshɛns we di Baybul dɔn tren nɔ go alaw am fɔ swɛ. Bɔt sɔntɛm di gɔvmɛnt go alaw am fɔ ajɔst di wɔd dɛn we i go tɔk so dat in kɔnshɛns go alaw am fɔ swɛ.

Sɔntɛm di ajɔst we i go ajɔst di swɛ gri wit wetin de na Romans 13:​1, we se: “Lɛ ɔlman put insɛf ɔnda di wan dɛn we gɛt pawa.” So sɔntɛm di Kristian go disayd se i nɔ bad fɔ swɛ fɔ sɔntin we Gɔd ɔlrɛdi se Kristian dɛn fɔ du.

I impɔtant bak fɔ fala yu kɔnshɛns we di Baybul dɔn tren if dɛn aks yu fɔ yuz sɔntin ɔ fɔ mek wan patikyula we, we yu de swɛ. Di Roman dɛn ɛn di Sitian dɛn we bin de trade bin de yuz dɛn sɔd dɛn fɔ swɛ, ɛn dat min se dɛn bin de yuz di simbɔl we tinap fɔ wan gɔd we de fɔ wɔ, as garanti fɔ biliv di pɔsin we swɛ. Di Grik dɛn bin de es dɛn an ɔp we dɛn bin de swɛ. Dis min se dɛn bin no se pɔsin de ɔp we de notis wetin dɛn de se ɛn du ɛn we ɔl mɔtalman gɛt fɔ ansa to.

Na tru se Jiova in savant nɔ go swɛ pan ɛni kɔntri simbɔl we gɛt sɔntin fɔ du wit lay lay wɔship. Bɔt wetin yu fɔ du if dɛn aks yu na kɔt fɔ le yu an pan Baybul ɛn swɛ se yu go tɔk di tru? If dat apin, sɔntɛm yu go disayd fɔ du dat bikɔs di Baybul tɔk bɔt fetful pipul dɛn we bin du sɔntin lɛk dat we dɛn bin de swɛ. (Jɛn. 24:​2, 3, 9; 47:​29-31) I impɔtant fɔ mɛmba se if yu swɛ da kayn swɛ de, yu de swɛ bifo Gɔd se yu go tɔk di tru. Yu fɔ rɛdi fɔ tɔk di tru we dɛn aks yu ɛni kwɛstyɔn.

Bikɔs wi rili valyu wi padi biznɛs wit Jiova, wi fɔ pre ɛn tink gud wan bɔt ɛni swɛ we dɛn aks wi fɔ swɛ, ɛn mek shɔ se wi nɔ du ɛnitin we de agens wi kɔnshɛns ɔ Baybul prinsipul dɛn. If yu disayd fɔ swɛ, yu fɔ mek shɔ se yu du wetin yu swɛ se yu go du.—1 Pit. 2:​12.