Mutyipo ushintululwanga bu “binenwa, nansha mulao musumininwe wa kulonga bintu kampanda, divule dine utyipwanga padi Leza . . . bu kamoni.” Ubwanya kutyipwa kukanwa nansha kulembwa.

Bantu bamo babwanya kulanga’mba, i bibi kutyipa mutyipo mwanda Yesu wānenene amba: “Kufwaninwepo kutyipa [mutyipo] ino kinenwa kyenu ‘En-en’ kikale’nka en-en, wenu ‘Aa’ nandi aa, mwanda kya kutentekela pa bino kitambanga kudi yewa mubi.” (Mat. 5:33-37) Na bubine, Yesu wādi uyukile amba Bijila bya Mosesa byādi bilomba kutyipa mutyipo mu myanda kampanda, ne amba bengidi ba Leza ba kikōkeji bātyipile mutyipo. (Ngo. 14:22, 23; Div. 22:10, 11) Kadi wādi uyukile amba Yehova mwine wādi utyipa mutyipo. (Bah. 6:13-17) Nanshi Yesu kādipo usaka kunena’mba ketufwaninwepo kutyipa mutyipo. Inoko, wādi udyumuna bantu baleke kutyipa mutyipo pa bintu byampikwa mvubu nansha mu muswelo wampikwa kwendela’mo. Tufwaninwe kumona kufikidija binenwa byetu bu kintu kikola. Tufwaninwe kulonga byobya byotulaya kulonga.

Ino le ukalonga namani shi abakunena kutyipa mutyipo? Dibajinji, jingulula shi ubwanya kulonga byobya byotyipa kulonga. Shi kubwanyapo, i biyampe kuleka kutyipa mutyipo. Kinenwa kya Leza kitudyumuna’mba: “I kipite buya uleke kupika mpiko kupita’ko kupika mpiko ne kufikidija’yo mpika.” (Mus. 5:5) Dya bubidi, langulukila pa misoñanya ya mu Bible īsambila pa kutyipa mutyipo, kupwa longa bintu kukwatañana na mutyima obe wa mundamunda mufundijibwe. Le i misoñanya’ka imoimo?

Mityipo imoimo i mikwatañane na kiswa-mutyima kya Leza. Kimfwa, Batumoni ba Yehova bapikanga mpiko pobesonga. Ino mpiko i mutyipo. Ba musoñañani ne musongwa, belayanga ku meso a Leza ne a batumoni amba bakesanswa ne kwilēmeka, ne amba bakalonga namino “kitatyi kyonso kyobakekala bōmi.” (Ba mulume ne mukaji bakwabo nabo kebabwanyapo padi kunena bino binenwa pobesonga, ino bekalanga bapika mpiko ku meso a Leza.) Mu uno muswelo banenanga amba, ke ba mulume ne mukaji ne kadi bakekala besonge mu būmi bwabo. (Ngo. 2:24; 1 Ko. 7:39) Mpiko ya busongi i myendele’mo, kadi ikwatañene na kiswa-mutyima kya Leza.

Mityipo imoimo keikwatañenepo na kiswa-mutyima kya Leza. Mwine Kidishitu wa bine kakatyipepo mutyipo, kimfwa, wa kwingidija mata mwanda wa kulwila yabo ntanda, nansha wa kutuna lwitabijo lwandi mudi Leza. Kulonga namino i kutyumuna mbila ya Leza. Bene Kidishitu kebafwaninwepo kwikala “ba ino ntanda,” o mwanda kebabwanyapo kwikuja mu tuvutakanya twa ino ntanda.—Yoa. 15:19; Isa. 2:4; Yak. 1:27.

 Mityipo imo ityipwanga mungya mutyima wa mundamunda. Kyaba kimo mu mwanda utala mutyipo, tufwaninwe kulangulukila pa madingi a Yesu a amba, “futai bintu bya Kesala kudi Kesala, ino bintu bya Leza nabyo kudi Leza.”​—Luka 20:25.

Kimfwa, fwatakanya’po shi mwine Kidishitu usaka kwikala na mukanda wa bu mwinē kibundi, nansha mukanda wa kwenda nao ntanda bene (passeport). Ino wayuka’mba ufwaninwe kutyipa mutyipo wa kukōkela. Shi mu mine ntanda’ya uno mutyipo i wa kulonga bintu mu muswelo utyumuna bijila bya Leza, mutyima wandi wa mundamunda mufundijibwe na Bible ukamulengeja aleke kutyipa’o. Inoko, padi ba lupusa babwanya kumwitabijija ashinte binenwa mwanda wa kulēmeka mutyima wandi wa mundamunda.

Kutyipa mutyipo mushintwe wa kukōkela ba lupusa kubwanya kukwatañana na musoñanya udi mu Bene Loma 13:1, unena’mba: “Muntu ense akōkele bininge ba lupusa batabukile bukatampe.” Nanshi mwine Kidishitu ubwanya kumona’mba, ke bibipo kutyipa kulonga kintu kyobalombele kala bene Kidishitu kulonga kudi Leza.

Kadi i biyampe kukōkela mutyima wa mundamunda mufundijibwe shi abakunena kwingidija kintu, nansha kujinya kipindi kya ku ngitu pa kutyipa mutyipo. Bene Loma ba pa kala ne Basesha bādi batyipila pa kipete, kintu kyādi kilombola’mba muntu waingidija kiyukeno kya leza wa bulwi, mwanda wa kulombola’mba i ukulupilwa. Bangidiki bādi bōlola kuboko kwabo mūlu pobatyipa mutyipo. Mu uno muswelo, bādi betabija’mba mūlu mudi muntu udi na bukomo bwa kwivwana byobanena ne kumona byobalonga, kadi kudi aye ko kukeshintulwila bantu.

Shako mwingidi wa Yehova kakatyipilapo ku kintu kikwatañene na mutōtelo wa bubela. Ino le bikekala namani shi abakunena ku kidye kutūla kuboko kobe pa Bible ne kutyipa’mba usa kuleta bukamoni bwa bine? Mu uno muswelo, ubwanya kutyipa, mwanda Bible utela’nka ne bantu ba kikōkeji bātyipile na kulonga kilongwa kampanda. (Ngo. 24:2, 3, 9; 47:29-31) I biyampe uvuluke amba, shi ubatyipe uno mutyipo ubatyipe ku meso a Leza amba, usa kunena bubine. Ufwaninwe kwiteakanya pa kulondolola na bubine kipangujo kyo-kyonso kyobabwanya ku kwipangula.

Byotumwene na bulēme kipwano kyotupwene na Yehova, tufwaninwe kulombela ne kulangulukila bininge pa mutyipo obetunena kutyipa, na kujingulula shi keusapo kujilula mutyima wetu wa mundamunda nansha misoñanya ya mu Bible. Shi ubakwata butyibi bwa kutyipa mutyipo, ufwaninwe kufikidija’o.​—1 Pe. 2:12.