Kusanyika “hichikaninu chakanañayi muntu nindi wukwilamu, sweje-e kukana hamesu aNzambi . . . kulonda ekali chinsahu.” Chinateli kwikala chakuhosha mukanwa hela chakusoneka.

Antu amakwawu atoñojokaña nawu chatama kusanyika muloña Yesu wahosheli nindi: “Bayi wusanyikaku . . . Neyi muhosha nenu ‘Eña,’ chiikali eña, ‘Inehi,’ chiikali inehi, muloña mazu ejima imukushilahu anafumi kudi watama.” (Mat. 5:33-37) Hela chochu, Yesu welukili nindi Nshimbi jaMosi jetejeli kusanyika nawa ambuña aNzambi ashinshika asanyikileña. (Kutach. 14:22, 23; Kwid. 22:10, 11) Nawa welukili nindi Yehova yomweni niyena wasanyikileña. (Heb. 6:13-17) Dikwila nawu Yesu hakaanishili kusanyikaku. Ilaña wasoñamishileña kusanyika hatuyuma twanyana hela twabula kulumbuluka. Twatela kwanukaña netu kushikija mutunakani himudimu wajila. Twatela kwila mutunahoshi.

Hanu chumanyi chitwatela kwila neyi anatwili nawu tusanyiki? Chatachi, ilukenu nenu mukushikija mumukusanyika. Neyi muneluki nenu mukushikijamu wanyi bayi musanyikaku. Izu daNzambi datusoñamishaña nawu: “Chikuwaha kubula kusanyika kubadika kusanyika ilaña kwilamu nehi.” (Mukwa. 5:5) Kuhiñahu, toñojokenu hayishina yamuNsona yahosha hakusanyika, nawa ilenu kwesekeja nachinleji chenu chadizishewa. Yishinanyi yeniyi yamuNsona?

Kusanyika kukwawu Nzambi wakwitejaña. Chakutalilahu, aYinsahu jaYehova adishiikaña neyi anakudisumbula. Iku kushiika hikusanyika. Akalemba nakankaña ashiikaña hamesu aNzambi niantu nawu akadikeñaña nawa akadilemeshaña “mukuhanda kwawu kwejima.” (Antu amakwawu neyi anakudisumbula hiyahoshaña awa mazu chadiwuku, ilaña adishiikaña kumesu aNzambi.) Nkumininaku ayitenaña nawu eyala namumbanda, nawa wulu wawu wukutwalekahu mukuhanda kwawu kwejima. (Kutach. 2:24; 1 Kor. 7:39) Iku kusanyika kwatelela nawa kwesekana nankeñelu yaNzambi.

Kusanyika kukwawu Nzambi hakwitejañaku. MukaKristu walala hanateli kusanyika munsañu jidi neyi jakukiña ituña namata hela kusanyika nindi naleki kumukuhwelela Nzambiku. Neyi asanyika muyuma yamuchidiwu dikwila nawu nafumpi nshimbi jaNzambi. AkaKristu hiyatela kwikala “kabadi kakaayiku,” dichi hitwatela kudiñija muyuma yamukaayi hela muyikonkojola yamwituñaku.—Yow. 15:19; Isa. 2:4; Yak. 1:27.

 Kusanyika kukwawu kwakeñekaña muntu kuzatisha chinleji chindi. Mpinji yikwawu, henohu kanda tusanyiki twatela kutoñojoka hakufumba kwaYesu kwakwila nawu “yuma yaKesari, mwinkenu Kesari nawa yuma yaNzambi, mwinkenu Nzambi.”—Luka 20:25.

Chakutalilahu, twili netu mukaKristu nakukeña kwikala mwenimbu hela nakukeña kutambula ngiiya, ilaña yeluka nindi watela kusanyika. Neyi omu mwituña, mukusanyika mwabombela kwila yuma yambuka nanshimbi jaNzambi, chinleji chindi chadizishewa naBayibolu chikumwiteja wanyi kusanyika. Hela chochu, nfulumendi yikumwiteja kuhimpaku mazu amu adi mukusanyika kulonda esekani nachidi chinleji chindi.

Kusanyika kusanyika kunahimpiwu mazu kukwesekana nachishina chekala haARoma 13:1, hahosha nawu: “Muntu wejima ovwahileña akweti wuswa wabadika.” Kwosi chuma chidi chejima chinateli kumukañesha mukaKristu kusanyika chineli Nzambi weteja dehi kwila mwenomu.

Chinleji cheñi chinateli kumukwasha muntu kufukulahu neyi nateli kuzatisha chuma hela makasa hakusanyika. Aroma niAsikinta akunyima asanyikileña nampoku jatubali mwiwulu nakumwekesha ñovu jadiña nanzambi yawu wanjita nakumwekesha nawu amukuhweleleli. AGiriki olweleña makasa awu mwiwulu neyi anakusanyika. Elukili nawu kudi muntu wukweti ñovu wunakumona yuma yinakuhoshawu niyinakwilawu nawa wakasompesha antu kwesekeja nayuma yinakwilawu.

Hela chochu, kambuña Yehova kwila asanyika kuzatisha yifwikija yetuña yakundama kukudifukula kwakutwamba nehi. Indi neyi mudi muchota chanyiloña nawa ayileja nawu mukwati Bayibolu nawa musanyiki kulonda mushimuni wunsahu walala? Neyi chuma chamuchidiwu chimwekana munateli kukwataku chineli Nsona yashimuna akakudifukula ashinshika asanyikili kuzatisha makasa awu. (Kutach. 24:2, 3, 9; 47:29-31) Mwatela kwanuka nenu neyi munakusanyika kusanyika kwamuchidiwu, munakusanyika kumesu aNzambi nawa mwatela kuhosha chalala. Mwatela kudiloñesha chikupu kulonda mwakuli malwihu ejima akuyihulawu chakadi kutwamba.

Chineli twalemesha wubwambu wetu naYehova, twatela kulombelahu chikupu neyi anatwili nawu tusanyiki, nakumona netu kusanyika kwetu kukutuletesha kwikala nachinleji chitooka nawa hitukufumpa yishina yamuBayiboluku. Neyi mufuukulahu kusanyika mwatela kwilamu.—1 Pet. 2:12.