Olibela, nipangano nneriwana va “anamwinjhi, malabo owinjhiva onereya mburo woweela obe mburo mmodhene wathima.” Podi owogiwa obe olebiwa.

Athu amodha enubuwela wihina kahiyo yapama olibela mwaha Yesu awogile egi: ‘Kamulibelege ebewene . . . Mwaahiye madhu enyu owi “hee” etapulelege hee, “naari” akale naari; dhatedhene dhinakwaranye madhu yala sa Mbure.’ (Mat. 5:33-37) Ebaribari wihina Yesu ahinona wi nlamulo na Moses nowakongomedha amwaana Ezarayeli, olibela mowiwanana ni mudhidhi enafwanyiwiwa teto adhaari oororomeleya a Mulugu yaherana ndo. (Gén. 14:22, 23; Êx. 22:10, 11) Nuliyeya ahinona wihina ni Yehovaya ahilibela. (Heb. 6:13-17) Mowindo Yesu kaafuna awoge egi muthu kalibelege. Ohiya eyo, oliye afuna awoge wi kahiyo yapama olibelelaga ethu bure-bure sapama nalibela nakwanelihege nlibelihu. Siyeyo Yehova anafuniye wihina nerena.

Ki walobiwa wihina olibele? Ohunerena ethu-sithu, orajhihe okanna ebaribari akala onere wakwaneliha ethu owogiliye. Akala kunna ebaribari, sapama oomala ohiwa olibela ebewene. Madhu a Mulugu enihina: ‘Sapama ohulibela ohiya olibela ebewene vano kuherana.’ (Ecl. 5:5) Wamala, woone dholaga dha mBibliyani dhiniwanana niyele olibeliwe. Windo, werena yothoma eniwanana ni mubuwelo wawo. Mbwenye dholaga baani dha mBibliyani dhinukavihere?

Makalelo mamodha oolibela enowiwanana ni efunelo ya Mulugu. Motajhiha, Anamona a Yehova enowerana nipangano yaafunaga otela. Nipangano nna, makalelo mamodha oolibela vamentoni va Mulugu ni athu enakalavo. Mulobwana ni muhiyana enoolibela wihina enerege odhivelana, ovahana thima orihana ni murima wamutene “enaakalegiwa vamodha.” (Anamatelana amodha podi wera kinawoga madhu mamodhave yatelanaga. Naarive dhigarive ndo, enoolibela vamentoni va Mulugu.) Vowindala enotelana okala mulobwana ni muhiyana. Okala ootelanene ofiyedha okwa wewa. (Gén. 2:24; 1 Cor. 7:39) Olibela onereya athu yatelanaga, onowiwanana ni efunelo ya Mulugu.

Makalelo mamodha oolibela kiniwanana ni efunelo ya Mulugu. Mukiristawu eebaribari, kanalibela wihina abarele elabo yaye enawana koddo obe kanapaganya wihina kaginadha gikala mukiristawu. Werana ndo yakale waviriganiha malamulo a Mulugu. Makiristawu kinakosa epaddi yelabo. Kinivolosiha mukoddoni newene kinakanganela muselu weelabo. — João 15:19; Isa. 2:4; Tia. 1:27.

Makalelo mamodha oolibela ethu muthu anathomiye yeka. Malabo mamodha nihinathi olibela, nnofwanelela wubuwela pama ethu awogile Yesu egi: ‘Mmulive Sezare ele eri ya Sezare,  mbwenye ya Mulugu mmulive Mulugu.’ — Lucas 20:25.

Motajhiha, podi wera mukiristawu anoloba wihina akale mwana murala a sidadi anafuniye okalaga obe amulebe pasaporti. Mbwenye onowoona wihina egi ande dhatedhene dhendho, anofwanelela olibela mororomeleya. Akala olibela wa mukiristawu ola, anofwanelela opaganya werana ethu yaaviriganihe malamulo a Mulugu, mubuwelo waye oxagihiwe ni dholaga dha mBibliyani kawamurumedhe werana anafuniye. Mbwenye podi wera guvernu onorumedha wihina awakakanihe madhu ala oolibela wihina yiwanane ni mubuwelo waye.

Osaddula olibela onavolowelavo ororomeleya, podi wiwananaga ni yolaga ya Romanos 13:1 enawoga yegi: ‘Athu aatene, yawiwelelege anamathonga avadhulu.’ Mowindala mukiristawu podi othoma. Kavo ethu yabure olibela enavolowelavo ethu Mulugu ananilobiye wihina nerena.

Ohiya eyo, sapama olabihedha mubuwelo wawo oxagihiwe ni dholaga dha mBibliyani akala mudhidhi onalibelegiwe kinulobe wihina oware ethu, ovenyihe nlada obe okokore. Mudhidhi wa aRomano ni wakudda Sitas yalibelelesa masupadda ewa, elobaga kopolo dha Mulugu ewa a koddo ninga makalelo oororomeliha wihina enawoga ebaribari. Akudda Gresiya yalibelaga, yavenyihesa nlada odhulu. Mowindala aliwa yororomela wihina odhulu wihikala kopolo enoona dhatedhene dhinawogiwa ni dhinereya enafwaneleliwa omoova.

Mudhaari a Yehova kanafwanelela olibela alabihedhaga ekwamuthu obe naari ethu-sithu eniwanana ni gereja yowoota. Ki wahakale otiribunale vano yuloba wihina omparele Bibliya awo ni olibele wihina onere owoga ebaribari, were ddi? Yuloba ni makalelo yayo, we podi werana. Woona wihina Bibliya onowawoga adhaari akale oororomeleya, yalibele egaparele ethu. (Gén. 24:2, 3, 9; 47:29-31) Mbwenye yathima fuwubuwela wihina walibela ni makalelo yala, onolibela vamentoni va Mulugu ni onere owoga ebaribari. We onofwanelela wiwegeredha pama wihina wawakule makoho aatene enafuniwa wukoha.

Iyo nnovaha thima vanlubale wandana ninnihuna ni Yehova, bumwahaya nnofwanelela olobela ni opendda pamadhene nihinathi olibela ethu-sithu. Enohoweleya nikale pasope wihina nihitakalihe mubuwelo wehu nixagihiwihu ni dholaga dha mBibliyani. Akala we onafuna olibele, enofwanelela okanne ebaribari wi onere wakwanihedha.—1 Ped. 2:12.