Erilahira kutse erilapa nibughambu “omulaghe mulito, ebinywa ebihulikirirene n’eby’erighenderako kutse endaghane ey’erikola omwatsi mulebe, ngendo nyingyi eyiri mw’eryahula oMungu . . . mw’omwimiri.” Lyanganabya ly’eribugha kutse ery’erihandika.

Abandu balebe banganalengekania bati erilahira ni kosa kundi Yesu mwabugha ati: “Susyelahiraya . . . Nikwa eribuga lyenyu libye, ega, ega, kutse iyihi iyihi, ebirengire ebi ni by’omubi.” (Mat. 5:33-37) Kwenene, Yesu abya inianasi ngoko oMughambo wa Musa abya asabire aBaisraeli erikola omulahiro w’omo mibere milebe kandi ngoko abaghombe balebe b’oMungu bataleghula mobalahira. (Enz. 14:22, 23; Eri. 22:10, 11) Kandi abya inianasi ngoko Yehova iyuwene-wene anabya akakola emilahiro. (Ebr. 6:13-17) Busana nekyo, Yesu syangabughire ati situtolere erilahira. Aliwe, abya akabwira abandu ngoko sibatolere erilahira oko myatsi eyite y’omughaso kutse omo nzira eyitehikaya oko mwatsi owatolere. Litolere itwalangira erisikya ebinywa byetu mo mubírí abuyirire. Litolere itwaberererya ebyo tukabugha.

Nikwa, litolere iwakolaki bamakusaba erilahira kutse erilapa? Eky’erimbere, utsuke erilebya nga une n’obutoki bw’erikola ebyo ukalahira uti ukendikola. Wamabya n’eritika-tika, kyanganuwana iwaleka erilahira. Ekinywa ky’oMungu kikahana kiti: “Kumbe lyowene isiwalagaki kwilaba erilaga n’eritindatuhalyo.” (Omug. 5:5) Eky’akabiri, ulebaye esyokanuni sy’eBiblia esikakanaya oko ekyo bamakusaba kw’erilahira, nikwa ukole omw’ihulikirana n’obunya-mutima bwaghu obubegheribwe. Ni kanuni nyilebe syahi sy’eBiblia esilebirye erilahira?

Eyindi milahiro inahulikirirene n’erisonda ly’oMungu. Eky’erileberyako, aBimiri ba Yehova bakakola emilaghe milito omughulu bakalunga. Erilaghana ry’endwa eryo ko rine ng’erilahira. Embere sy’oMungu n’abimiri, omulume n’omukali abakalunga bakalaghana bati bakasyanzana, erilangirana mo b’obughuli, n’erisikania, kandi bakasyakola batya “omwibyaho lyabo ryosi.” (Abandi balunga banganabula erisubirira omo binywa ebyo omw’ibitondekania ngoko bine omughulu bakalunga, aliwe nomo byangabya bitya bakakola omulaghe mulito w’embere sy’oMungu.) Neryo bakabya ibamabibya mulume n’omukali, kandi litolere ibasighala omo ndwa yabo omo ngebe yabo yosi. (Enz. 2:24; 1 Kor. 7:39) Erilaghana ry’endwa eryo n’ilaghana eritolere, kandi rihulikirirene n’erisonda ly’oMungu.

Eyindi milahiro siyihulikirirene n’erisonda ly’oMungu. Omukristo w’ekwenene syatolere erilahira, ng’eky’erilagha ati akendikolesya ebimano by’amalwa busana n’erilwira oko kihugho kiwe kutse erighana ati syakiri Mukristo. Omundu amakola atya isyatasikya ebyalayiro by’oMungu. Abakristo ‘si b’ekihugo,’ neryo sitwangayingirya omo buhaka n’omo malwa wakyo.​—Yoa. 15:19; Isa. 2:4; Yak. 1:27.

Eyindi milahiro ikakwamana n’obunya-mutima.  Oko sindi ndambi, litolere itwalengekania ndeke oko rihano lya Yesu eryabugha ati “mulihe Kaisari ebindu bya Kaisari, kandi mulihe oMungu ebindu by’oMungu.”​—Luka 20:25.

Eky’erileberyako, tubughe tuti oMukristo mulebe akasaba eribya mukalani w’omo kihugho kilebe kutse akasonda epaseporo, nikwa bamamubwira ambu asabirwe erikola omulahiro w’eribya mutaleghula oko mwami kutse oko Leta. Omo kihugho ekyo, erilahira eriri ng’eryo nibughambu omundu amalagha erisyakola omwatsi owatahambene burora-rora n’ekyalayiro ky’oMungu, obunya-mutima bwiwe obubegheribwe n’eBiblia sibwangamulighira erikola atya. Aliwe, eguvernema, yanganamulighira eribindula ebinywa by’erilahira ebyo bitoke erihulikirirana n’obunya-mutima bwiwe.

Erikola omulahiro ow’eribya mutaleghula oko mwami kutse oko Leta owabiribindulwa anganahulikirirana n’akanuni akakabanika omo Abanya Roma 13:1, akakabugha kati: “Obuli mundu akenge abatabali b’ekihugo.” Neryo oMukristo oyo anganayisogha ati sihali kosa erilahira erikola omwatsi mulebe owo oMungu abiritswa aBakristo ati bakolegho.

Kandi ni ky’omughaso erisikya obunya-mutima bwaghu obubegheribwe n’eBiblia bamabikusaba erikolesya ekindu kilebe kutse erikolesya ekitsuko kyaghu ky’omo nzira nyilebe ukakola omulahiro mulebe. Abanya Roma n’Abasikite ba kera babya ibakalahira bakakolesya emiyali yabo, ekyo kyabya kisosekanio ky’erisaba obutoki bw’omungu w’amalwa n’erikangania ngoko omundu ni w’eriyiketera. Abagiriki ibakasumbira ebyala by’elubula bakalahira. Ibakakola batya erikangania ngoko bikirirye bati hane obutoki bw’omungu obukayiteghereraya ebikabughawa n’ebikakolawa kandi ngoko abandu abo bakasyaleta emighanzo y’oko butoki obo.

Kwenene, omughombe wa Yehova syatolere erilahira kutse erilapa embere sy’ekiminisyo kyosi-kyosi ky’ekihugho ekihulikirirene n’eriramya ly’amabehi. Aliwe wangayira wuti abasohi b’etribinali bamakusaba bati uhire ebyala byaghu by’oko Biblia n’erilahira erileta obwimiri bw’ekwenene? Omo mibere eyo, wanganasombola erikola utya, kundi eBiblia yikakanaya oko bandu bataleghula balebe abalahira ibanahirire ebyala by’oko kindu kilebe. (Enz. 24:2, 3, 9; 47:29-31) Ni ky’omughaso eryibuka ngoko wamabikola omulahiro owali ng’oyo, ukabya iwukalahira embere sy’oMundu ngoko ukendibugha ekwenene. Litolere iwayiteghekania erileta ebisubiryo by’ekwenene oko buli ribulyo eryo bangakubulya.

Kundi tukalangira obwira bwetu na Yehova mo b’obughuli bunene, litolere itwalengekania omo musabe oko buli mulahiro owo tukasabawa erikola, litolere itwabya itunikirirye kwenene ngoko sy’endihalya oko kanuni sy’eBiblia kutse oko bunya-mutima bwetu. Wamabiyisogha erilahira, litolere iwayikasa eriberererya omulaghe oyo.​—1 Pet. 2:12.