Gudiloga gudi mukotelesa “gulaya ha gutshita ndaga ya giamatshidia . . . gutuama dia Nzambi nu gutuama dia athu.” Yajiya gukhala yasonegewa nga yazuelewa gukano.

Athu ajiya gutangiza egi idi ndaga yabola ha gudiloga handaga Yesu wazuelele egi: “Udilogigo . . . Mbimbi yenu ‘Ayi’ ikhale ayi, ‘Ndo’ ikhale ndo, handaga mbimbi jianaza gungima jiana katuga gudi muthu wabola.” (Mat. 5:33-37) Idi yadiago egi Yesu wakhalele mujiya egi Mukhuala wa Moize wakhalele mutoga ha gudiloga mu ndaga imoshi ngenyi nu akombeledi a Yehowa agujinginyina akhalelele nji gudiloga. (Gis. 14:22, 23; Guz. 22:10, 11) Wakhalele nji mujiya egi Yehowa wana gudiloga nji. (Heb. 6:13-17) Yesu gatshiginyilego guzuela egi tuajiyilego gudiloga. Uvi, wazuelele ngenyi ha gutemesa athu hagula akhadigo mulaba gudiloga mu ndaga ishigo nu ndando. Tudi naye gutagenesa ndaga tudi mulaya handaga idi nu ndando yavula. Tudi naye gukotelesa ndaga tudi muzuela.

Itshi udi naye gutshita gula agutoga ha gudiloga? Thomo udi naye gujiya gula mbawutagenesa ndaga udi gudiloga ha gukalagala. Gula udi mumona egi mbawushigo mutagenesa ndaga yene na bemba gudiloga. Biblia idi muzuela egi: ‘Gutuna gulaya gudi guabonga gubalega egi wulaye uvi gungima nu gutagenesa ndo ndaga wazuedi.’ (Mulo. 5:5) Henyaha tuzuelelenu malongo a Biblia adi muzuelela gudiloga nu luholo tuajiya gukalagala ndaga mugudivua nu mutshima wetu wa phelegeta. Malongo atshi a Biblia ana zuelela ndaga yene?

Gudiloga guko guana gudivua nu gutshigina gua Nzambi. Ha gufezegesa Matemue a Yehowa ana gudilaya tangua ana gudizula mu ulo. Gudilaya guene gudi mukatshi dia ndaga ana kalagala hagudiloga. Gutuama dia Nzambi nu gutuama dia athu ana gudilaya egi mbaadizumba, mbaakhala gudinemesa, mbaalandula gukhala hamoshi “mu monyo wawo wagasue.” Tangua yala nu mukhetu ana gudilaya ana monesa egi ulo wawo mbawulandula gukhala tangua adi nu monyo. (Gis. 2:24; 1 Kol. 7:39) Gudilaya gua luholo elu guana khala mugudivua nu gutshigina gua Nzambi.

Gudiloga guko guanago gudivua nu gutshigina gua Nzambi. Muklisto wa giamatshidia gajiyilego gudiloga hagulua ita mukunda nu gifutshi giawo nga ha gubemba gukombelela Nzambi. Gutshita ngenyi guana shiya mikhuala ya Nzambi. Esue Aklisto tushigo “athu a ha mavu awa,” hene tushigo naye gudinginyisa mu milonga ya ha mavu awa.—Yone 15:19; Yesh. 2:4; Yak. 1:27.

Gudiloga guko guana tadila gutshigina gua muthu. Hene matangua ako, tuajiya gutadila muabonga ndaga tudi mutshigina gudiloga ha  gudivua nu ndaga eji jiazuelele Yesu egi, “hanenu ima ya Sezale gudi Sezale, uvi ima ya Nzambi gudi Nzambi.”—Luka 20:25.

Ha gufezegesa, tangiza egi phangi mumoshi udi mutshigina guzula passeport ya gifutshi giko nu amuwambela egi udi naye gudiloga handaga mikhuala ya gifutshi giene yana toga ngenyi. Gula mugifutshi giene gudiloga guana kotelesa egi udi naye gulaya hagukalagala ndaga idi mushiya mukhuala wa Nzambi, mutshima wa phelegeta wa phangi muene mbawumukuatesa hagutuna gudiloga. Mafumu aleta agifutshi giene ajiya gutshigina egi asombegesa mbimbi jia gudiloga guene mugudivua nu gutshigina guenji.

Gusombegesa mbimbi jia gudiloga guajiya gudivua nu ndaga jidi mu Roma 13:1 idi muzuela egi: “Muthu wagasue udi naye gutumagela mafumu a leta.” Hene Muklisto wajiya guzula desizio dia gudiloga mu ndaga imoshi inyi Nzambi wahanele gale Aklisto njila ya gutshita.

Idi nu ndando ha gutumagela malongo a Biblia gula atutoga ha gukalegela gima gimoshi ngenyi nga gutshita ndaga imoshi tangua tudi gudiloga. Mutangua dikulu ha gudiloga enya Roma nu enya Scythe akhalele mutamega ngolo jia nzambi ya ita ha gumonesa egi ndaga adi muzuela jidi diago jia giamatshidia. Enya Greke akhalele muthuphula mago gosa tangua akhalele gudiloga. Gutshita ngenyi guakhalele guakuatesa ha gukotelesa egi gudi nu nzambi yawo udi mutala ndaga adi muzuela nu adi mutshita, nu muene mbawusophesa athu.

Mukombeledi wa Yehowa gajiyilego gudiloga gutuama dia gifuanesa nga gima gimoshi gidi mumonesa gifutshi mugudivua nu gikombelelo gia mambo. Uvi itshi wajiya gutshita gula gu tribinale agutoga hagumba mago aye holu dia Biblia ha gulaya egi ndaga udi muzuela idi ya giamatshidia? Wajiya gukalagala ndaga adi gugutoga handaga Biblia yana zuelela akombeledi a Yehowa agujinginyina atshitshile ndaga ya luholo lumoshi ha gudiloga. (Gis. 24:2, 3, 9; 47:29-31) Idi nu ndando ha guwunguluga egi gula wadiloga ngenyi udi mulaya gutuama dia Nzambi egi mbawuzuela giamatshidia. Udi naye gudilondega ha guhana mvutu nu giamatshidia giagasue mu mihu yagasue mbaaguhula.

Tuana zula ufuta wetu nu Yehowa nu ndando yavula hene tudi naye gutadila muabonga ndaga yagasue adi gututoga ha gudiloga nu gukamba gujiya gula mbatushigo mushiya mikhuala ya Biblia. Gutuama dia guzula desizio dia gudiloga udi naye gujiya gula mbawutagenesa ndaga udi mulaya.—1 Phet. 2:12.