Taem samwan mekem wanfala serious promis, maet hem barava promis for duim samting, or hem mekem wanfala oath or vow. And maet hem swear lo nem blo God tu. Maet olketa raetem promis hia or talem nomoa.

Samfala tingse hem rong for mekem serious promis bikos Jesus sei: “No mekem promis long wei for swear long eni samting . . . Sapos iu sei ‘iu bae duim samting,’ iu mas duim datwan. Sapos iu sei ‘iu bae no duim samting,’ then no duim datwan, bikos eni nara wei moa hem followim Satan.” (Matt. 5:33-37) Bat Jesus savve samfala faithful man blo God bifor olketa mekem olketa serious promis, and tu Law blo Moses sei olketa Israelite mas mekem samfala serious promis. (Jenesis 14:22, 23; Eksodas 22:10, 11) And Jesus savve Jehovah tu mekem samfala serious promis. (Heb. 6:13-17) So Jesus no minim bae iumi no mekem eni serious promis. Bat wanem Jesus minim nao hem for no mekem promis nating. Iumi mas evritaem duim wanem iumi promisim, bikos hem nao wanem Jehovah laekem.

So sapos iu ting for mekem eni serious promis, wanem nao bae iu duim? First samting, mek sure iu fit for duim wanem iu promis for duim. Sapos iu no sure, bae hem gud for iu no mekem promis. Bible sei: “Hemi moabeta fo yu no mekem eni promis bikos hemi nogud tumas fo mekem promis an yu nating falom wanem yu bin promis fo duim.” (Eklesiastes 5:5) Next samting, tingim samfala Bible principle wea join witim datfala promis, and datwan bae helpem iu for disaed followim konsens blo iu. Distaem bae iumi storyim samfala Bible principle.

Samfala serious promis no againstim wanem God laekem. Olsem example, taem tufala Jehovah’s Witness marit, tufala mekem marit promis. Diswan hem serious promis or vow. Datfala boy and gele talem promis front lo God and olketa wea attendim marit hao tufala bae lovem, lukaftarem, and respectim each other. And tufala promis for duim datwan for full laef blo tufala. Then tufala kamap hasband and waef, and marit blo tufala hem shud for full laef blo tufala. (Jenesis 2:24; 1 Cor. 7:39) So disfala marit promis hem fitim wanem God laekem.

Samfala serious promis hem againstim wanem God laekem. Olsem example, wanfala Christian bae no mekem oath for iusim weapon for defendim kantri or for stop for worshipim God, bikos datwan bae againstim wanem God laekem. From iumi olketa Christian “no olsem pipol long world,” iumi no join lo olketa war and raoa blo world.​—John 15:19; Aesaea 2:4; Jas. 1:27.

 Samfala serious promis hem depend lo konsens blo each wan. Bifor iumi mekem wanfala serious promis, maet hem gud for ting raonem kaonsel blo Jesus for “givim go bak long King samting wea hem bilong King, and givim go bak long God samting wea hem bilong God.”​—Luke 20:25.

Olsem example, maet wanfala Christian apply for kamap citizen or hem laekem passport, bat then hem faendemaot hem mas mekem oath for loyal lo kantri. Sapos datfala oath garem eni samting insaed wea againstim law blo God, datfala Christian bae disaed for no mekem oath bikos lo konsens blo hem. Bat maet gavman blo datfala kantri letem hem for changem samfala toktok insaed lo oath hia for fitim konsens blo hem.

Maet konsens blo datfala Christian letem hem for mekem datfala oath wea change bikos lo principle lo Rome 13:1, wea sei: “Iufala evriwan mas stap anda long olketa wea rul.” So maet Christian hia disaed hem olraet for mekem datfala oath, bikos hem fitim wanem God laekem iumi for duim.

Sapos olketa sei iumi mas swear lo wanfala samting or apim hand taem iumi mekem wanfala oath, iumi mas followim konsens blo iumi. Olsem example, taem olketa lo Rome and Scythia bifor mekem promis, olketa savve swear lo sword blo olketa wea representim God blo war. And pipol blo Greece savve apim hand for point go lo heven taem olketa mekem oath. Diswan showimaot olketa tingim hao god blo olketa lukluk kam and olketa mas givim ansa for wanem olketa talem and duim.

Olketa Jehovah’s Witness bae no swear lo eni samting wea join witim false worship. Bat hao sapos iu lo kot and olketa talem iu for putim hand lo Bible and promis for talem tru samting? Datwan bae fitim bikos Bible talem hao samfala faithful man bifor savve putim hand lo leg blo narawan taem olketa mekem promis. (Jenesis 24:2, 3, 9; 47:29-31) Sapos iu swear lo Bible, hem important for tingim hao iu promis front lo God bae iu talem tru samting. So taem olketa askem iu eni kwestin, iu mas talem tru samting.

Iumi no laek for duim eni samting wea bae spoelem hao iumi fren witim Jehovah. So taem iumi ting for mekem wanfala serious promis iumi shud prea abaotem datwan, and mek sure iumi no duim eni samting wea bae spoelem konsens blo iumi or brekem eni Bible principle. And tu, sapos iumi disaed for mekem wanfala serious promis, iumi mas keepim datwan.​—1 Pet. 2:12