Juc diccionario nishganno, juramentutaga pipis rurapäcun “Diospa jutincho imatapis cumplinanpaj cashganta” (Diccionario de uso del español, de María Moliner). Chayga canman guelgaypa o parlaypa.

Waquincunaga nin ‘mana alimi jurayga’ Jesús cayno nishganpita: “Ima nilarpis ama jurapäkunkitsu. [...] Awnirqa awnipäkunki, y mana cumplinayki kaptinqa ama awninkitsu. Jurayparaq awnirqa Satanás munashqannömi parlarkaykanki” (Mat. 5:33-37). Jesusga musyarganmi Moisés guelgashgan Ley israelitacuna juramentuta rurananpaj mandacushganta (Gén. 14:22, 23; Éx. 22:10, 11). Quiquin Jehová juramentucunata rurashgantapis musyarganmi (Heb. 6:13-17). Chauraga Jesusga manami nirganchu imaypis mana juranapaj. Sinoga payga niycargan imalapitapis yangalaga mana juranapaj. Chaymi Jehovaga munan aunicushganchita cumplipäcunanchipaj.

Chauraga, ¿imata ruranquiman juramentuta ruranayquipaj captenga? Chaypäga aunicushgayquita cumplinayquipaj tantiacuy. O ‘imanoraj canga’ nir yarparga ama juraychu. Bibliapis cayta nimanchi: “Mana cumplinaykipaq kaptinqa ama imatapis promitinkitsu” (Ecl. 5:5). Nircur Bibliapa tantiachicuynincunata ashiy y yachacushgayquinola ruray. ¿Maygantaj caycan Bibliapa tantiachicuynincunaga?

Waquin juramentucunaga Diospa voluntäninchomi caycan. Noviucuna casaracushgan junajcho auninacärin, chaypis juc juramentumi. Paycunaga auninacärin Diospa y runacunapa ricaynincho cuyacuywan y respetuwan cawacärinanpaj. (Waquincuna chaycunata ‘mana’ nirpis Diospa ricayninchoga juc juramentutami rurarcaycan). Chaymi warmiwan olgupis casadumanna ticran, mana raquicaypana cawapäcunanapaj (Gén. 2:24; 1 Cor. 7:39). Chay aunicuycunaga Jehovapa voluntäninchomi caycan.

Waquin juramentucunaga Jehovapa voluntäninpa contranchomi caycan. Cristianucunaga manami jurapäcunchu guerraman aywanapaj y Jehovapa contrancho churacänapäpis. Chayta rurarga, Jehovapa mandamientuncunata cäsucuycashwanchu. Noganchega cay mundo runacuna ima rurayninchopis mana talucanchichu (Juan 15:19; Is. 2:4; Sant. 1:27).

 Öraga juramentuta ruranapaj quiquinchipita canga. Juc cristiano imatapis manaraj aunicur, Jesús cayno nishganman yarpanman: “Césarpa kaqtaqa Césarta qoykuy. Tayta Diospa kaqtaqa Tayta Diosta qoykuy” (Luc. 20:25).

¿Juc cristiano juc naciuncho cawananpaj aywacuyta munaptin o pasaporte documentuta jorgunanpaj juc juramentutaraj mañapäcuptenga? Jehovapa contrancho imatapis ruranapaj niptenga chay juramentuta manachi ruranmanchu, chay naciunpa gobiernun cristianupa concienciantaga respetanmanmi. Jina chay gobiernu camacächishgan leytaga capaz alchapärinman conciencianraycur.

Jucnopana juramentuta rurarga Biblia nishgantapis cäsucuycashwanmi, Romanos 13:1 cayno nin: “Autoridäkunata Tayta Dios churashqa kaykaptinqa paykunata cäsukäriy”. Chauraga juc cristiano chay juramentuta rurarga ‘autoridäcunatami casucuycä’ ninman.

Quiquinchipitami canga maquinchita imamanpis churaycur o jogarcur juraptinchi. Unaycho romanucunawan escita nishgancunaga espadancunaraycurshi jurapäcoj, diosnincunatapis mañacärej ima nishgancunapis cumplicänanpaj. Griegucunana maquinta cieluman jogarir jurapäcoj. Chaycunataga rurapäcoj diosnincuna ricänanpaj ima rurashganta ima aunicushgantapis.

Jehovapa siervuncunaga, naciuncunapa simbuluncunacho manami juranchichu. ¿Imaraj canman juc juezpa naupancho Bibliaman maquiquita churarcur rasun cajlata wilacunayquipaj ‘jurapäcuy’ nipäshuptiqui? Capazchi chaytaga ruranquiman unaychopis Diospa siervuncuna imalamanpis maquinta churarcur jurashganman yarpar (Gén. 24:2, 3, 9; 47:29-31). Chayta rurarga yarpänanchimi Jehovapa ricaynincho chay juramentuta ruraycashganchita. Chaymi imata tapupämaptinchipis rasunpa cajlata wilacunanchi.

Jehovata cuyashganchiraycurmi ima juramentutapis ruranapäga, puntata payta mañacunanchi. Jinamanpis Diospa mandamientuncunapa contrancho imatapis ama rurashunchu. Chauraga imatapis aunicurga cumplinanchimi (1 Ped. 2:12).