Shuj diccionariopica, jurana nishpaca “Taita Diosta testigo churashpa imatapash prometinatami” nijun (Diccionario de uso del español de María Moliner). Shuj juramentotaca shimilla o shuj documentopi escribishpapashmi ruraita usharin.

Jesusca: “Nunca na juramentunachu canguichi […]. Ari nishpaca, chai ari nishcataca cumplinami canguichi. Cutin na nishpaca, chai na nishcataca cumplinami canguichi. Imata nishcata na cumplishpaca, Diablopa munaitami ruranajunguichiman” nircami (Mat. 5:33-37). Huaquin gentecunaca cai shimicunata ricushpami juramentunaca nali cashcata pensan. Jesusca Moisesman cushca Leypi israelitacunata huaquin cosascunapi juramentocunata rurachun mandashcata, shinallata Taita Diosta ali sirvijcunapash huaquin viajecunapi juramentushcataca alimi yacharca (Gén. 14:22, 23; Éx. 22:10, 11). Shinallata Jehová Diospash juramentocunata ruran cashcataca alimi yacharca (Heb. 6:13-17). Jesusca juramentuna nali cashcataca na nijurcachu. Ashtahuangarin imatapash na pactachi ushana cashpata, na juramentuna cashcatami yachachijurca. Chaimandami imata pactachisha nishpapash pactachina capanchi. Jehová Diosca imata juramentushpapash pactachichunmi munan.

Shinaca pipash juramentuchun mañajpica ¿imatata rurana capangui? Imata juramentugrijushpaca pactachi ushanatami ricuna capangui. Pactachi ushanata na seguro cashpaca, na juramentunachu capangui. Bibliapica: “Imatapash rurashapachami nishca jahua na pactachingapaj randica, imatapash na nishpami ashtahuan ali” can ninmi (Ecl. 5:5). Imata juramentugrijushpapash chai juramentomandaca imatashi Bibliapica nijun nishpami aliguta ricuna capangui. Chai jipami imamanda juramentogrijushpapash concienciapi ali sintirishpaca shuj decisionda japina capangui.

Huaquin juramentocunaca Taita Diospa ñaupapica alimi ricurin. Por ejemplo, shuj pareja cazaragrijushpaca huaquin shimicunata nishpami juramentun. Noviocunaca ishcandillatami tucui causaipimi cuidasha, respetasha, huañushpami separarishun nishpa juramentun. Shina nishpami Taita Diospa ñaupajpi, gentecunapa ñaupajpi shuj promesata ruran. (Huaquin llactacunapica na cai shimicunatapacha nishpapash cazarashpaca maimandami Taita Diospa ñaupajpi shuj juramentota ruran). Chai juramentota rurashca jipami huañuicaman causangapaj nishpa cazarashpa cusahuarmi quidan (Gén. 2:24; 1 Cor. 7:39). Cazarajushpa shina juramentunaca Taita Diospa ñaupapica alimi ricurin.

Cutin huaquin juramentocunaca Taita Diospa ñaupapica nali ricurinllu. Por ejemplo, Jesusta catijcunaca llactata difindingapaj guerracunaman rishunmi nishpa, Taita Diosta sirvinatapash saquishunmi nishpaca na juranllu. Chaicunapi jurashpaca Bibliapi mandashcacunataca na pactachinajunmanllu. Jesusta catijcunaca na cai mundopa ruraicunapi chapurimandami imapash fiñanajuicunapi, macanajuicunapica na chapurin (Juan 15:19; Is. 2:4; Sant. 1:27).

 Huaquin juramentocunata ruranapica cada unomi ñucanchi concienciapi ricuna capanchi. Jesusca paipa catijcunataca “Roma llactapa reyman pagana cashcataca Roma llactapa reyman pagaichi. Cutin, Taita Diosman cuna cashcataca Taita Diosman cuichi” nircami. Shinaca shuj juramentota nara rurashpallatami Jesusta catijcunaca cai consejocunapi pensarina can (Luc. 20:25).

Por ejemplo, shuj llactapi causangapaj pasaporteta llujchijujpi chai llactapi leycunata respetashami nishpa juramentota rurana tucushcanman. Pero chai juramentocunapica Taita Diospa mandashcata huashaman saquina ricurijpica, chai juramentotaca Jesusta catijcunaca na rurapanchimanllu. Huaquinbica gobiernocunaca gentecunapa concienciata respetashpa juramentocunataca cambianllami.

Jehovapa mandashcacunata na huashaman saquina cosascunapi juramentocunata cambiajpica autoridadcunata respetashpa juramentunaca alimi can. Romanos 13:1​pipash: “Ñucanchita mandanajuj autoridadcunataca tucui gentecunami cazuna capanchi” nijunmi. Chaicunata ricushpami Jesusta catijcunaca huaquin cosascunapi juramentunaca na imapash malo cajta yuyaita ushapanchi.

Imapash cosascunata utilizashpa juramentunapipash cada unomi ñucanchi concienciapi ricuna capanchi. Roma llactamanda gentecunaca paicunapa nishcacuna ciertopacha cashcata ricuchingapaca espadata utilizashpami juramentun carca. Espadata ricuchishpa juramentushpaca guerracunata ganachij dios tiashcapi crishcatami ricuchin carca. Cutin griego gentecunaca paicunapa nishcacuna ciertopacha cashcata ricuchingapaca maquicunata cieloman alsashpami juramentun carca. Shinami paicunata shuj dios ricujushcata, paicunapa juramentota na pactachijpica chai dios paicunata castigana cashcata ricuchin carca.

Testigo de Jehovacunaca llactapa banderacunata utilizashpaca na juramentupanchichu. Shinapash shuj tribunalpi juezcunapa ñaupapi ciertopacha nijushcata ricuchichun Bibliapi maquita churashpa juramentui nijpica ¿imatashi rurapanchiman? Chaicunapica talvez juramentunatami decidipanchiman. Bibliapipash ciertopacha nijushcata ricuchingapaca Taita Diosta sirvijcunapash imatapash utilizashpa juramentushcatami parlan (Gén. 24:2, 3, 9; 47:29-31). Juezcunapa ñaupajpi shina juramentugrijushpaca Taita Diospa ñaupajpi imatapash nigrijushcatami yaipi charina capanchi. Chaimandami imata tapuchijpipash, imata nigrijushpapash cabalguta contestangapaj aliguta uyashpa tigrachina capanchi.

Testigo de Jehovacunaca Jehová Dioshuan ali amigo cangapa munaimandami shuj juramentota nara rurashpallata Jehová Diosta mañashpa aliguta pensarina capanchi. Jehovapa mandashcacunata pactachishpa, ñucanchi concienciapipash ali sintiringapami munapanchi. Shinaca imata rurasha nishpa juramentushca cashpapash chai juramentushcacunataca pactachinami capanchi (1 Ped. 2:12).