Некој дела совли те шај те сикавел кај ка керел нешто или кај на керѓа нешто хем бут пути спомнинела пе е Девле сар сведоко. Шај те дел пе совли лафенцар или писмено.

Несаве шај те мислинен песке кај тано погрешно те ден совли соске о Исус вакерѓа: „Ма ден совли нисар... Кеда ка вакерен: ’Оја‘, нека значинел ’оја‘, а кеда ка вакерен: ’На‘, нека значинел ’на‘. Сој повише адалестар, таро Бенг тано“ (Мат. 5:33-37). Џанѓола пе, о Исус џанела сине кај спрема е Мојсеескоро закони о Израелција ко несаве ситуацие ваљани сине те ден совли хем кај е Девлескере верна слуге дена сине совли (1. Мој. 14:22, 23; 2. Мој. 22:10, 11). Исто аѓаар, ов џанља кај о Јехова да ко пурано време денѓа совли (Евр. 6:13-17). Спрема акава, о Исус на мангља те вакерел кај никогаш нашти те да совли. Наместо адава, ов мангља те предупрединел е манушен те на ден совли башо тикне буќа хем башо буќа со нане важна. Уствари, секогаш ваљани те икера амен ко амаро лафи соске сием одговорна англо Јехова. Адава со вакераја ле ваљани чаче те мислина ле.

Тегани, со ваљани те кере ако некој родела тутар те де совли? Прво, ов сигурно кај шај те кере адава башо со деа совли. Ако на сиан сигурно, тегани пошукар тано те на де совли. Е Девлескоро Лафи предупрединела амен: „Пошукар тано те на де лафи, него те де лафи хем пало адава те на исполнине ле“ (Проп. 5:5). Дујто, размислин башо несаве библиска начелија кола сој поврзиме адалеа хем пало адава одлучин спрема тли совест. Кола тане несаве таро акала библиска начелија?

Кеда нане против е Девлескири волја те дел пе совли. На пример, е Јеховаскере сведокија дена завет кеда кхувена ко брако. Акала заветија тане јекх врста совли. Англо Девел хем англо са о мануша сој присутна, и бори хем о џамутро ветинена песке кај ка манген пе, ка ценинен пе хем ка поштујнен пе са џикоте о солдуј тане џивде. (Иако на вакерена сарине о иста лафија, ама сепак дена завет англо Девел.) Адалеа овена ром хем ромни, хем ленгоро брако ваљани те трајнел цело живото (1. Мој. 2:24; 1. Кор. 7:39). Ки акаја ситуација, и совли со дела пе башо брако нане против е Девлескири волја.

Кеда тано против е Девлескири волја те дел пе совли. На би овела шукар јекх христијани те дел совли кај ка бранинел и држава аѓаар со ка користинел оружје, или кај ка откажинел пе тари пли вера ко Девел. Адава тано спротивно тари е Девлескири заповед. О христијања на ваљани те овен „дело таро свето“, хем адалеске на биринаја нисави страна ко несогласувања  хем војне таро акава свето (Јован 15:19; Иса. 2:4; Јак. 1:27).

Понекогаш те дел пе совли тано мукхло ки совест. Понекогаш, англедер те да несави совли, ваљани шукар те размислина башо е Исусескоро совет: „Иранен е цезарескоро е цезареске, а е Девлескоро е Девлеске“ (Лука 20:25).

На пример, те вакера кај јекх христијани кова со мангела те овел ле државјанство или пасоши, дознајнела кај родела пе лестар те дел совли кај ка овел лојално е државаке. Ако ки адаја пхув и совли баши лојалност вклучинела те дел лафи кај ка керел нешто сој против е Девлескоро закони, лескири совест сој обликујми спрема и Библија нане те дозволинел леске те дел асавки совли. Сепак, о властија шај те дозволинен леске те менинел несаве лафија, те шај лескири совест те дозволинел леске те дел адаја совли.

Те дел пе асавки меними совли баши лојалност шај те овел спрема о начело со аракхљовела ко Римјаните 13:1, коте со пишинела: „Секова мануш нека овел подложно е властенге“. Адалеске, ов шај ка одлучинел кај нане ништо погрешно ко адава те дел совли соске ов само керела адава со родела лестар о Девел.

Исто аѓаар ваљани те шуне тли совест кеда ваљани те ане одлука дали ка де совли коте со родела пе тутар те користине несаво предмети или те кере несаво гести. О пуране Римјајна хем о Скитија дена сине совли ко пумаре мачија хем ко пумаро девел е војнакоро сар гаранција кај вакерена о чачипе. А о Гркија џикоте дена сине совли ваздена сине пумаро вас упре ко небо. Аѓаар признајнена сине кај иси несави бари сила упре која со дикхела со керена, хем со вакерена о мануша хем англи касте ка овен одговорна башо пумаре постапке.

Џанѓола пе, јекх слуга е Јеховаскоро нане те дел совли англо несаво државно симболи кова сој поврзимо е ховавне религијаја. Ама со ако сиан ко судо хем некој родела те чхиве тло вас упри Библија хем те де совли кај вакереа о чачипе? Шај ка одлучине те кере адава соске и Библија керела лафи башо несаве верна слуге кола со денѓе совли аѓаар со керѓе несаво гести (1. Мој. 24:2, 3, 9; 47:29-31). Ако деа асавки совли, важно тано те на бистре кај деа совли англо Девел кај ка вакере о чачипе. Ваљани те ове спремно те вакере о чачипе ко било саво пучибе со ка пучен тут.

Амаро амалипе е Јеховаја тано аменге бут важно. Адалеске, ако некој родела те да совли, ваљани те молина амен хем шукар те размислина дали адалеа ка грешина против амари совест или ка пхага несаво библиско начело. Ако одлучинеа те де совли, ваљани те ове сигурно кај ка шај те исполнине адава со ветинеа (1. Пет. 2:12).