Iech solaharimos si cana varecon phenel anda sea o ilo că va cherela ciaces iech anumime buchi hai butivar silo cărdo angla o Del. Daștil te avel phendo sau scriime.

Chichiva pachian că si nasul te cheras iech solaharimos anda codoia că o Isus phendea: „Na solaharen niciechdata … Cana den duma, «da» te avel «da» hai «na» te avel «na», că so si mai but sar cadala avel catar codo nasul”. (Mat. 5:33-37) Si ciaces, o Isus jianelas că i Legea mozaico manghelas catar le israeliți te cheren anumime solaharimata hai că chichiva slujitori le Devlesche chiar cărde solaharimata. (Gen. 14:22, 23; Ex. 22:10, 11) Vo jianelas că chiar o Iehova zuriardea pesche promisiuni prin solaharimos. (Evr. 6:13-17) Cadea că, dichas claro că o Isus ci phendea că sea le solaharimata sile nasul. Vo dea duma andal solaharimata cai cherenas-pe anda buchia cai ci sas cadea de importanto. Cadea că, trebul te cheras so phenas hai te las sama te încăras amaro cuvânto, anda codoia că o Iehova camel te cheras cadea.

Atunci so trebulas te cheras cana manghel-pe amendar te cheras iech solaharimos? Mai anglal, trebul te gândisaras-ame mișto dacă daisaras te încăras amaro solaharimos. Dacă nici, o mai mișto avelas te na cheras codo solaharimos. O Cuvânto le Devlesco phenel amenghe te las sama: „Mai mișto te na cheres niciech solaharimos sar te cheres iech solaharimos hai te na încăres-les”. (Ecl. 5:5) Pala codoia, trebul te dichas le principii biblico anda codo solaharimos hai te cheras cadea sar phenel amenghe amari conștiința sicadi andai Biblia. Save si chichiva anda cadal principii?

Solaharimata cai sile cadea sar camel o Del. Iech solaharimos sar cado si codo cai le Martori le Iehovasche phenen-les angla so te căsătorin-pe. O jamutro hai i bori solaharen angla o Del hai angla le manușa că va iubina-pe, va lena sama iech pe aver hai va sicavena pachiv iech averesche „chichi timpo [va] traina ande iech than pi phuv”. (Daștil-pe că chichiva ci va alosarena te phenen exacto cadal cuvintea, tha oriso va phenena va avela iech solaharimos angla o Iehova.) Pala codoia, si phendo anda lende că sile rrom hai rromni, hai lenghi căsătoria trebul te avel iech phanglimos cai încărel sea i viața. (Gen. 2:24; 1 Cor. 7:39) Cadal solaharimata sile lașe, anda codoia că sile cărde cadea sar camel o Del.

Solaharimata cai ci sile cadea sar camel o Del. Iech ciacio creștino ci va cherela iech solaharimos prin savo phenel că va ferila pesco them, hai caște cherel cadaia va folosila arme sau că va mechela pesco pachiamos ando Del. Dichiol-pe mișto că cadal solaharimata sile contra so phenel amenghe o Del te cheras. Le creștini ci trebun ‘te  cheren partea andai lumea’, cadea că ci șion-pe ande lache marimata hai halimata. (Ioan 15:19; Is. 2:4; Iac. 1:27)

Solaharimata cai sile cărde pala i conștiința. Poiechdata, cana trebul te alosaras dacă cheras sau nici iech solaharimos, trebul te dichas o sfato cai dea-les o Isus: „Den le Cezarosche so si le Cezarosco, tha le Devlesche so si le Devlesco”. (Luca 20:25)

Te phenas că iech creștino așunel că, caște avel-les i cetățenia ieche themeschi sau te avel-les iech pașaporto, trebul te phenel iech solaharimos anda codo them. Dacă ando solaharimos codole themesco vo trebul te phenel că va cherela buchia cai aven contra le legi le Devlesche, i conștiința le creștinoschi ci va mechela-les te phenel-les.

Tha dacă si lesche mechlo te phenel iech solaharimos ande savo parudea le cuvintea cai aven contra i legea le Devleschi, cadaia daștil te avel pala o principio anda Romani 13:1, cai phenel-pe: „Orisavo manuș te avel supuso ca le autorități mai bare”. Cadea, iech creștino daștilas te pachial că ci cherel chanci nasul dacă solaharel te cherel vareso cai o Del manghel-les lestar deja.

I conștiinta va ajutila ieche creștinos vi cana trebul te solaharel le vasteia pe iech buchi sau cana trebul te cherel iech gesto. Andel puraimata, le romani hai le sciți solaharenas pe lenghe săbii hai acharenas le devles le marimasco caște sicaven că camenas te cheren ciaces cadaia. Le greci vazdenas pengo vast caring o cerii cana solaharenas. Cadea, von jianenas că existil iech del cai dichelas so phenenas hai so cherenas, hai angla savo trebulas te den socoteala.

Si ciaces, iech slujitoro le Iehovasco ci va solaharela po simbolo ieche themesco cai siles phanglimos la închinareaia neciaci. Tha, dacă iech creștino silo andi instanța hai manghel-pe lestar te solaharel că phenel o ciacimos le vasteia pe iech Biblia? Cana si cadea, vo daștil te alosarel te cherel cadaia, anda codoia că i Biblia del duma anda exemplea slujitorenghe le Iehovasche cai cărde iech gesto cana solaharde. (Gen. 24:2, 3, 9; 47:29-31) Tha iech creștino ci trebul te bâstrel că, dacă cherel iech solaharimos sar cado, vo promitil angla o Del că va phenela o ciacimos. Cadea că trebul te avel pregătime te del răspunsuri pala o ciacimos.

Anda amende si zurales cuci amaro amalimos le Iehovaia, anda codoia, angla so te cheras iech solaharimos, va avela te mangas-ame le Iehovasche te del-ame goghiaverimos hai va avela te dichas mișto so daisaras te cheras ande codoi situația. Cadea, daisaras te avas siguri că încăras amari conștiința uji hai că ci cheras chanci nasul andel iacha le Iehovasche. Tha te na bâstras că, iech data so cărdeam iech solaharimos, trebul te încăras-les. (1 Pet. 2:12)