Okucîgasha kwahugwîrwe oku “biba binwa bizibu-zibu birhanalimo muzaha, erhi ciragane cakujira bintu bilebe, kanji-kanji Nnâmahanga ye orhôlwa . . . nka muhamirizi.” Omuntu anacîgasha omu kuderha erhi omu kuyandika.

Hali abantu bakarhanya mpu kuli kubi okucîgasha bulya Yezu adesire ntya: “Murhacîgashaga ciru n’ehitya . . . Mukâderha kwone erhi: Neci, nisi erhi nanga, bulya ebilushire ebyo binwa erhi birhenzire emw’olya Mubi.” (Mt. 5:33-37, Mashi Bible) Kobinali, Yezu al’imanyire oku Irhegeko lya Musa lyal’ihûnyire Abaisraheli oku bakacîgasha omu kanga kalebe, na bakozi baguma na baguma bishwekerezi ba Nnâmahanga bacîgashire. (Murh. 14:22, 23; Lub. 22:10, 11) Na kandi al’imanyire oku Yehova naye acîgashire. (Hb. 6:13-17) K’okuderha oku Yezu arhal’idesire oku rhurhakacîgasha ciru n’ehitya. Lubero n’oko, alonzagya okurhurhonda oku rhurhakag’icîgashira ebintu birhali by’obulagirire erhi birhagwerhi nda na mugongo. Ngasi mango rhushinganine rhukahikiriza eciragane cirhu bulya ntyo ko Yehova aba alonzize rhujire.

Bicigi oshinganine ojire erhi bakakubwira oku ocîgashe? Burhangiriza oshinganine omanye bwinja-bwinja erhi wahikiriza ebi wacîgashaga. Erhi wakabona oku orhabihikirize kwanaba kwinja orhacîgashaga. Akanwa ka Nnâmahanga karhurhonzire ntya: “Okurhâhâna eciragane kwo kukulu kulusha okuhâna eci omuntu arhâhikîrize.” (Muh. 5:5, Mashi Bible) Na kandi, wanalonza amakanuni g’Ebibliya gakakolesibwa mw’ebi okola wacîgasha, na buzinda wanakulikira ezamiri yawe ekomerezibwe n’Amandiko. Rhuganirire makanuni maguma na maguma.

Hali okucîgasha kuba kupatine n’obulonza bwa Nnâmahanga. Kwa lwiganyo, erhi Bahamirizi babirhi ba Yehova baja omu buhya, banahânane ebiragane. Ebyo biragane kuba kucîgasha. Omuhya mulume n’omuhya mukazi banalaganane embere za Nnâmahanga n’embere z’abandi bantu bali aho oku basimana, bazigirana, bakengana, n’oku bajira ntyo “ensiku zoshi z’akalamo [kabo].” (Hali abandi barhôlana barhaderha ebyo binwa byo n’ebyo, cikone nako kuba kucîgasha embere za Nnâmahanga.) Banababwire oku bakola mulume n’omukazi n’oku obuhya bwabo bushinganine bube mulungano gw’ensiku zoshi. (Murh. 2:24; 1 Kr. 7:39) Eciragane c’obuhya ciba cishinganine cinaba cipatine n’obulonza bwa Nnâmahanga.

Haba okucîgasha kurhaba kupatine n’obulonza bwa Nnâmahanga. Omukristu w’okuli arhashinganini acîgashe omu njira ya ntyo, kwa lwiganyo, okuhalira ecihugo cage omu kukolesa ebikolanwa by’okulwa ivita erhi kucîgasha mpu alahira obuyemere bwage muli Nnâmahanga. Okujira ntyo kwanaba kuvuna amarhegeko ga Nnâmahanga. Abakristu barhaba “cigabi c’er’igulu,” co cirhumire barhacihira omu nshombo n’amavita g’er’igulu.​—Yn. 15:19, NWT; Iz. 2:4; Yk. 1:27.

 Hali okucîgasha ezamiri ya muntu mulebe yakayemera cikone ey’owundi elahire. Embere rhucîgashe, hali amango kwakaba kwa bulagirire rhurhanye bwenene kw’er’ihano Yezu ahânaga erhi aderha ntya: “Ebya Sezari bigaluliragi Sezari, n’ebya Nyamuzinda mubihe Nyamuzinda.”​—Lk. 20:25.

Orhanye kwa lwiganyo, Mukristu mulebe ahûne okuba cikala wa cihugo cilebe, erhi alonze okuhâbwa epaseporo. Cikone bamubwire oku embere bamuhe yo, ashinganine acîgashe ly’ayerekana oku ali mwishwekerezi kuli eco cihugo. Erhi akaba mw’eco cihugo okucîgasha kwa ntyo kuhiziremo okujira kantu kalebe kabonekine n’obwalagale oku kapingine n’irhegeko lya Nnâmahanga, ezamiri yage nkomereze n’Ebibliya yanamuhanza okujira ako kantu. Cikone eguvernema yanamuyemerera okukubûla nderho ndebe z’oko kucîgasha ly’ezamiri yage emuyemerera acîgashe.

Okukubûla nderho ndebe z’okucîgasha ly’omuntu ayerekana oku ali mwishwekerezi oku cihugo cage, kwanapatana n’akanuni kali omu Abaroma 13:1, kadesire ntya: “Ngasi muntu akayumva abarhegesi bamukulire.” Co cirhumire, Omukristu anabona oku kurhali kubi okucîgasha okujira kantu kalebe Nnâmahanga ahûnyire Abakristu oku bajire.

Na kandi, ezamiri yanakurhabala erhi bakakubwira oku okolese kantu kalebe erhi kujira cimanyiso cilebe amango okola wacîgasha. Abaroma ba mîra n’Abasitike bakag’icîgasha omu kukolesa engorho zabo, n’okujira ntyo kwali kushenga obuhashe bwa hinnâmahanga hy’obunywesi hy’okulwa ivita, kwanal’iyerekine oku omuntu wacîgashaga kobinali adesire okuli. Abagiriki bakag’ihira amaboko enyanya nka bakola bacîgasha, omu kujira ntyo bakag’iyerekana oku hali hinnâmahanga hilebe hyakag’ibona ebi bakag’iderha n’ebi bakag’ijira n’oku abantu bahiha eraporo.

Kobinali, ntakantu koshi-koshi kagwerhe olushangi n’idîni ly’obunywesi, omukozi wa Nnâmahanga ashinganine akolese amango akola acîgasha. Cikone gurhigi wakajira erhi oku tribinali bakakuhûna oku ohume oku Bibliya ly’ocîgasha oku ebi waderha biri by’okuli? Omu kanga ka ntyo, wanahiga okujira ntyo bulya Ebibliya eganirire bakozi balebe bishwekerezi ba Nnâmahanga bacîgashire omu kujira cimanyiso cilebe. (Murh. 24:2, 3, 9; 47:29-31) Kuli kwa bulagirire okukengera oku erhi wakacîgasha omu njira ya ntyo, onabe erhi oyerekine embere za Nnâmahanga oku waderha okuli. Oshinganine ocirheganye okushuza omu njira y’okuli ngasi idoso bakudosa.

Bulya rhunabone obwîra bwirhu haguma na Yehova oku buba bwa ngulo ndârhi, rhushinganine rhukarhanya bwenene kugerera isala amango rhwamahûnwa okucîgasha. Omukuyemera n’obwalagale oku okujira ntyo kurhazinze ezamiri yirhu erhi kuvuna amakanuni g’Ebibliya. Erhi wakahiga okucîgasha, oshinganine ohikirize ebi wacîgashaga.​—1 Pt. 2:12.