Xaarate yaa “eˈnoonni qaale wonshinannita leellishate woy buuxisate faajjete kaajjinshe coyiˈrate. Kuni qaali mulluri gede assine laˈnanniha diˈˈikkino; duucha woyite togoo qaale eˈnannihu Magano naqaashshe assineeti.” Togoo qaale eˈnannihu coyiˈne woy borreessine ikkara dandaanno.

Mitu manni, Yesuusi “coyidhinanniri addahoro “Ee”, kaphohoro “Deeˈni” yiiyye. Hakkuyi kaˈi coyi bushuwiinni daannoho” yiino daafira xaara soˈrote yee hedanno. (Mat. 5:33-37) Yesuusi Muse Seeri mitu coyira xaara hasiissannota kulannotanna mite Maganu soqqamaano xaartino woyiti noota afino. (Kal. 14:22, 23; Ful. 22:10, 11) Qoleno Yesuusi Yihowa umisi xaarinota afino. (Ibi. 6:13-17) Hakko daafira Yesuusi horonta xaara dihasiissannoˈne yaanni nooha diˈˈikkino. Hatteentenni isi kaˈnirira woy haafa yine xaarrannikki gede qorowisiisanni no. Woˈmanka woyite, eˈnoommo qaale agadha hasiissannonke; korkaatuno Yihowa hatto assinammora hasiˈranno.

Ikkina xaaratto gede kullihero maa assa hasiissannohe? Umihunni, asseemmo yite xaarattore assa dandaattoronna teˈee buuxi. Tenne buuxa hoogittoro xaara hoogakki danchate. Maganu Qaali, “Xano wonshattokkiha ikkiro kayinni xaˈna hoogittoro woyyate” yee qorowisiisannonke. (Ros. 5:5) Layinkihunni xaarattori ledo xaadooshshe afiˈrinoha Qullaawu Maxaafiha xintu seera xiinxalli; hakkiinni Qullaawu Maxaafinni qajeelino tiiˈˈikki yaannohere assi. Tennera kaaˈlannohu mitu Qullaawu Maxaafihu xintu seeri hiikkonneeti?

Maganu fajjo ledo sumuu yitannota mite xaaro. Lawishshaho Yihowa Farciˈraasine adhantanno woyite mimmitoho qaale eˈanno. Konni garinni qaale ea xaarate. Idayichunna idayicho Maganunna mannu albaanni, “lamunku lubbotenni noo geeshsha” (Mitu minaanninna minaama adhamanno woyite konne qaale noo gedeenni diyaanno; ikkirono insa Maganu albaanni qaale eanni no) mimmito baxara, ayirrisaranna towaatara qaale eanno. Hakkuyi gedensaanni insa minaannanna minaama ikkanno; adhamansano geedonnita ikka hasiissanno. (Kal. 2:24; 1 Qor. 7:39) Kuni adhammanni woyite eˈnanni qaali Maganu fajjo ledo sumuu yaannoho.

Maganu fajjo ledo sumuu yitannokkita mite xaaro. Mittu Kiristaanchi olu uduunne qodhe gobbate gaaramate woy Maganoho noosi ammana agurate dixaaranno. Hatto assa Maganu hajajo diigate. Kiristaanu “tenne gobbare” woy alame wido diˈˈikkino; hakko daafira tenne alame gibboranna gaancera anga diwodhineemmo.—Yoh. 15:19; Isa. 2:4; Yai. 1:27.

 Tiiu fajjeenna xaarrannita mite xaaro. Mite xaaro xaarate, Yesuusi “Qeesaariha Qeesaarira uuyye; Maganunniha Maganoho uuyye!” yee amaalinonke amaale seekkine heda hasiissannonkeha ikkara dandaanno.—Luq. 20:25.

Hanni mittu Kiristaanchi mitte gobba qansicha ikkate woy paaspoorte fushshiˈrate forme wonshanni, hatte gobbara ammaname heeˈrate qaale ea hasiissannosita huwatino yine hendo. Hatte gobbara ammanamme heeˈrate xaarrannihu mitu coyi Maganu Seeri ledo sumuu yaannokkiha ikkiro, Qullaawu Maxaafinni qajeelino tiiˈˈisi xaaranno gede difajjannosi. Ikkirono hatte gobba gashshaano tiiˈˈisi ledo sumuu yaanno garinni eanno qaale biddi assanno gede fajjitaasiha ikkara dandaanno.

Konni garinni biddi assinoonni qaale ea Roomu Sokka 13:1 noohu xintu seeri ledo sumuu yitannota ikkitara dandiitanno; qummeeshshu, “Mannu baalu aleenni noo gashshaanora hajajama hasiissanno” yaanno. Hakko daafira mittu Kiristaanchi Maganu gashshaanote hajajammanni gede kulino daafira konni garinni xaara qarra diafidhino yee hedara dandaanno.

Qoleno xaaratto woyite mito uduunnicho horoonsiˈratto gede woy mitto malaate leellishatto gede xaˈminahera dandiinanni; togoo woyiteno Qullaawu Maxaafinni qajeelino tiiˈˈikki yaannore assa danchate. Hundi waro heeˈrinohu Roomu manninna Iskuteesi yinanni manni bisensanni xaaranno; insa konni garinni xaartannohu coyidhino coyi halaale ikkinota olu maganinsa albaanni leellishateeti. Giriikete manni kayinni xaaranno woyite angansa iimira qole kayisanno. Tini insa coyiˈnannirenna assinannire afanno magani nootanna mannu ooso isi albaanni xaˈmantannore ikkitinota huwattinota leellishshanno.

Hige mittu Yihowa soqqamaanchi kaphu ammaˈno ledo xaadooshshe afiˈrinohu gobbate malaatinni xaarannokkiti egennantinote. Ikkina yoote mine Qullaawa Maxaafa amadde halaale ikkinore kulte xaaratto gedella xaˈminihe? Togoo woyite hatto assate doodha dandaatto; korkaatuno Qullaawu Maxaafi ammanantinoti Maganu soqqamaano xaarate malaate horoonsidhinota kulanno. (Kal. 24:2, 3, 9; 47:29-31) Konni garinni xaaratto woyite halaale coyidhe Maganu albaanni qaale eˈanni noottota qaaga hasiissannohe. Xaˈminanniheta baalanta xaˈmo ammanante qolate qixxaawa hasiissannohe.

Yihowa ledo noonke jaalooma lowo geeshsha naandeemmo daafira aye coyeno xaarrammora albaanni huuccatto assiˈne seekkine heda hasiissannonke; qoleno xaaratto coyi tiiakki bushiishannokkihanna Qullaawu Maxaafihu xintu seeri ledo sumuu yaannoha ikkasi buuxiˈra hasiissannohe. Xaarattoha ikkiro, eootto qaale agadha hasiissannohe.—1 Phe. 2:12.