Ka a kaa ér or bum yô, mba kaan ér or la nan “tôndo zwa shin nan er iceghzwa sha mimi u nan cii ér nana er ma kwagh. Ka i bum ken iti i Aôndo ér . . . ngu orshiada.” Mba bumun sha kwaghôron shin sha u ngeren a nger.

Alaghga mbagenev vea hen ér aluer or bum yô nan er kwaghbo, sha ci u Yesu yange kaa ér: “De bumun nen ga kuaa . . . Kpa zum u ne kaa ner ‘Een’ yô, i lu een heregh, shi ‘Ei’ wen kpaa, a lu ei heregh. Kwagh u a hembe nahan cii yô, a due hen Iferor.” (Mat. 5:33-37) Kpa Yesu yange fa er Atindi a Mose la tese ér Mbaiserael ve bumun sha ashighe a i gbe u vea er nahan, man er mbacivir Aôndo mba jighjigh mba sha ayange a tsuaa la kpa bumun yô. (Gen. 14:22, 23; Eks. 22:10, 11) Yesu shi fa ér Yehova iyol na kpa a bumun. (Heb. 6:13-17) Sha nahan yô, Yesu lu yangen a yange ior u bumun ga. Kpa lu tan a ta icin ér ior ve de bumun dang dang ga. Gba u se nenge u eren kwagh u se ôr sha zwa wase la ser ka icighan kwagh. Kwagh u se ôr yô, a gba u se er un keng keng.

Nahan aluer i kaa ér we u bum yô, u er nena? Hiihii yô, gbidye kwar nenge, aluer ka u u fatyô u eren kwagh u lu bumun la yô. Aluer u ngu a akperan a tan sha mi yô, guda de bumun ga. Mkaanem ma Aôndo ta se icin ér: “Guda ma u tsegha zwa ga, a u u tsegha zwa man u er sha mi ga la.” (Orpa. 5:5) U dondon yô, time sha akaawan a Bibilo a a zua sha kwagh u i kaa ér we u bum la, nahan aluer imoshima you i Bibilo i tsaase i la lumun yô, bum, kpa aluer i lumun ga yô, de bumun ga. Ka akaawan a Bibilo a han nahan aa wase se shighe u i kaa ér se bumu?

Akaa agen a se bumun la zua sha awashima u Aôndo. Ikyav i tesen yô, Mbashiada mba Yehova ka vea eren ivese yô, kwase man nom ve er iceghzwa shighe u i lu zuan ve ivese la. Iceghzwa i ka ve er la ka gbenda ugen u bumun. Kwase man nom ka ve er iceghzwa sha ishigh ki Aôndo man sha ashe a ior ér vea doo ayol a ve, shi vea wa hanma ve ikyo, shi vea naan hanma ve icivir “ken ayange a ve uhar ve lu uma la cii.” (Noov man kasev mbagenev yô, shighe u i lu zuan ve ivese la, alaghga vea ôr kwagh nahan vough ga, kpa ve bum sha ishigh ki Aôndo.) Ka vea bumun nahan cii yô, maa i kaa ér ve hingir nom man kwase, shi ka u ivese ve la ia lu igbekeke. (Gen. 2:24; 1 Kor. 7:39) Iceghzwa i ivesegh ne ka i sha inja, man i vough, shi i zua sha awashima u Aôndo.

Akaa agen a ior ve bumun la zua sha awashima u Aôndo ga. Orkristu u mimi nana fatyô u bumun akaa agen ga. Ikyav i tesen yô, mayange nana bum ér nana tôô ikyav mbi tswamev nana za nôngo ityav sha ci u tar u nan lu ker la ga. Shi mayange nana bum ér nana de u civir Aôndo ga. Sha ci u aluer nan er nahan yô, nan per atindi a Aôndo. Gba u Mbakristu vea “lu ior i tar ne ga.” Nahan mayange se fatyô u nyôron iyol ken ayôôso a ior i tar ne shin ityav mbi tar u nôngon la ga.—Yoh. 15:19; Yes. 2:4; Yak. 1:27.

 Akaa agen yô, ka imoshima i Orkristu ka i lumun ér nana bum shin nana de bumun ga ye. Ashighe agen yô, a gba u se hen sha kwagh u i kaa ér se bum la zulee sha u gbidyen kwagh sha kwaghwan u Yesu ne tsembelee, sha er se fa, aluer doo u se bum kwagh shon shin se bum ga yô. Yesu yange kaa ér: “Na nen Shisar akaa a a lu a Shisar la kpee, shi akaa a a lu a Aôndo yô, na nen Aôndo a kpee je.”—Luka 20:25.

Ikyav i tesen yô, tôô ase wer Orkristu nan soo u eren takeda u tesen ér nan ngu marnya u tar u nan lu ker la, gayô eren takeda u zan ken tar ugen. Nahan nan za nenge ér gba u nana bum ér nan lumun u dondon atindi a tar la. Aluer kwagh u i kaa ér nana bum la wa u nana er iceghzwa i eren ma kwagh u nan nenge wang ér a hendan a tindi u Aôndo yô, imoshima i nan i Bibilo i tsaase i la ia lumun ér nana bum ga. Nahan kpa, alaghga gomoti u tar la una lumun ér nana sôr asember a ken takeda u i nger akaa a i soo ér nana bum la sha gbenda u imoshima i nan ia kera yange nan u bumun kwagh la ga yô.

Aluer gomoti lumun ér Orkristu nana er nahan yô, iceghzwa i nan la ia zua sha kwaghwan u ken Mbaroma 13:1 la, a kaa ér: “Hanma or nana̱ wa iyol i nan sha ikyev i mbautahav mba ve hemen nan la.” Nahan Orkristu la nana nenge ér ityôkyaa ngi i nana venda u bumun kwagh u Aôndo a vande soon kera je ér Mbakristu ve eren la ga.

Heela tseegh ga, shighe u i kaa ér we u er tom a ma kwagh, shin u er ikyav zum u u lu bumun yô, a gba u u er kwagh u imoshima you i Bibilo i tsaase la i kaa ér we u er yô. Sha ayange a tsuaa la, Mbaroma kua nongoior u i yilan ér Mbasitia la bumun sanker. Sanker lu ikyav i aôndo u uitya, nahan or a bum sanker yô, i tese ér nan eren kwagh sha mimi. Mbagrika di yange vea bumun yô, ve kende uwegh sha. Sha nahan yô, ve fa je ér Aôndo ngu u a ungwan hanma kwagh u uumace ve ôron shi a nengen hanma kwagh u ve eren, shi a lu orjir u uumace cii yô.

Ka mimi, Orkristu nana lumun u eren tom a ma kwagh shin eren ikyav i zuan sha kwagh u mcivir u aiegh shighe u i kaa ér nana bum ga. Kpa aluer u za ken koti man i za na u Bibilo ér we u bum, nahan we u er shiada sha mimi yô, u er nena? Shighe u kwagh a lu nahan yô, u fatyô u tsuan wer u bum, sha ci u Bibilo ôr kwagh u ior mbagenev mba yange ve er ikyav shighe u ve lu bumun yô. (Gen. 24:2, 3, 9; 47:29-31) Kpa gema umbur wer aluer u ngu bumun sha imba gbenda la yô, u ngu bumun sha ishigh ki Aôndo jighilii wer u ôr kwagh sha mimi. A gba u u ôr hanma kwagh u i pine u cii sha mimi.

Er Yehova a doo se ishima kpishi yô, gba u se hen sha hanma kwagh u i kaa ér se bum cii, shi se er msen sha mi, sha er se palegh u bumun ma kwagh u imoshima yase i lumun ga, shin a hendan a akaawan a Bibilo yô. Aluer u bum wer u er ma kwagh yô, fa wer gba u u er kwagh la keng keng.—1 Pet. 2:12.