Ntshiba kɛdikɛdi “nsala wotelo wa lo sɛkɛ, w’ohomba kana ndaka dia nsala dui dimɔtshi, mbala efula dui sɔ salemaka lo mbidja Nzambi l’atei . . . oko ɔmɛnyi.” Dui sɔ koka salema l’onyɔ kana lofunda.

Anto amɔtshi koka mfɔnya dia ekɔ kɔlɔ ntshiba nɛ dia Yeso akate ɔnɛ: “Tanyotshibake . . . [koko] ‘Eelo’ kanyu kayale eelo, ‘Keema’ kanyu kayale keema, nɛ dia kɛnɛ kaya laadiko dia laasɔ ndja oma le kanga kɔlɔ.” (Mat. 5:33-37) Lo mɛtɛ, Yeso akeyaka di’Ɛlɛmbɛ wa Mɔsɛ wakalɔmbaka dia nsala weho ɛmɔtshi w’etshibelo ndo ɔnɛ ekambi wa Nzambi wa kɔlamelo wakatshibaka. (Eta. 14:22, 23; Eto. 22:10, 11) Nde akeyaka nto dia Jehowa ndamɛ akatshibe. (Hɛb. 6:13-17) Diakɔ diele, Yeso konanga mbuta ɔnɛ hatohombe pondjo ntshiba, koko nde akahɛmɔlaka anto di’aha ntshiba l’awui wele bu ohomba kana lo yoho yahɔtɔnɛ la sangwelo diande. Sho pombaka mbɔsa tshelo ya kotshaka ɛtɛkɛta aso oko dui di’ekila. Sho pombaka kotshaka kɛnɛ kataso.

Ko ahombayɛ nsala naka wambokɔlɔmba dia ntshiba? Ntondotondo, onga l’eshikikelo dia wɛ ayokotsha kɛnɛ katshibayɛ dia nsala. Naka wɛ bu l’eshikikelo, kete honga dimɛna dia wɛ ntshiba. Ɔtɛkɛta wa Nzambi pɛmɔlaka ɔnɛ: “Ndeka dimɛna aha ntshika dɔkɔlɔkɔ lo dihole dia ntshika dɔkɔlɔkɔ ko hadikotshisha.” (Ond. 5:5) Laadiko dia laasɔ, nsɛdingola atɔndɔ wa l’Afundelo wendana l’etshibelo ndo oma laasɔ nsala akambo lo yoho yɔtɔnɛ la nkum’otema kayɛ kakekiyama. Naa atɔndɔ amɔtshi w’oma l’Afundelo l’atei awɔ?

Weho ɛmɔtshi w’etshibelo hawɔlɔshana la lolango la Nzambi. Ɛnyɛlɔ, Ɛmɛnyi wa Jehowa tshikaka dɔkɔlɔkɔ etena katshukanawɔ. Alɔkɔlɔkɔ asɔ wekɔ weho ɛmɔtshi w’etshibelo. La ntondo ka Nzambi ndo k’Ɛmɛnyi efula, atshukanyi tshikaka dɔkɔlɔkɔ dia vɔ wayokanaka ngandji, wayolanganaka ndo wayɔlɛmiyanaka lam’asawɔ ndo vɔ wayosalaka dui sɔ “l’edja tshɛ [kayowongaka] vɔ akɔ ahende la lɔsɛnɔ.” (Mbeyaka monga ko atshukanyi amɔtshi hawote ɛtɛkɛta akɔ waamɛ etena katshukanawɔ, koko ka vɔ tshikaka dɔkɔlɔkɔ la ntondo ka Nzambi.) Oma laasɔ, vɔ mongaka wadi l’omi ndo dimama diawɔ tshikalaka dimama dia lɔsɛnɔ l’otondo. (Eta. 2:24; 1 Kɔr. 7:39) Dɔkɔlɔkɔ dia ngasɔ dia lo diwala, diekɔ dimɛna ndo diɔ mbɔtɔnɛka la lolango la Nzambi.

Weho ɛmɔtshi w’etshibelo ndɔshanaka la lolango la Nzambi. Okristo wa mɛtɛ hakoke nsala weho w’etshibelo wa ngasɔ, ɛnyɛlɔ dia mamɛ wodja lo nkamba la dihomɔ dia ta kana nsɛka mbetawɔ kande le Nzambi. Naka nde nsala ngasɔ kete nde ayosekola ɛlɛmbɛ wa Nzambi. Sho Akristo “keema ase andja ɔnɛ,” diakɔ diele hatohombe ndjatambiya l’akambo ndo l’ewanu wa l’andja ɔnɛ.​—Jni. 15:19; Isa. 2:4; Jak. 1:27.

 Weho ɛmɔtshi w’etshibelo mendanaka la nkum’otema k’onto. Lo tena dimɔtshi, mbeyaka monga ohomba nsɛdingola la yambola tshɛ etshibelo kɛmɔtshi l’ekimanyielo k’Ɔtɛkɛta wa Nzambi, ɛnyɛlɔ dako dia Yeso diata ɔnɛ: “Nyosha Kayisa diangɔ dia Kayisa ndo nyosha Nzambi diangɔ dia Nzambi.”​—Luka 20:25.

Ɛnyɛlɔ, tɔshi di’Okristo ɔmɔtshi ambolodia dɔkima dimɔtshi diendana la wodja wende kana pasɛpɔrɔ ndo nde amboyeya dia nde pombaka nsala etshibelo dia mɛnya dia kɛnɛ kakandafunde kekɔ mɛtɛ. Naka lo wodja ɔsɔ nsala dɔkɔlɔkɔ dia ngasɔ nembetshiyaka nsala akambo lo yoho yɛnya hwe dia yekɔ lo ndɔshana la ɛlɛmbɛ wa Nzambi, kete nkum’otema kande kakekiyama la Bible hetawɔ dia nde nsala dui sɔ. Koko emboledi koka mbetawɔ dia ntshikitanya tɔtɛkɛta ta l’etshibelo kɛsɔ dia nɛmiya nkum’otema kande.

Nsala etshibelo kambotshitanyema kɛnya dia kɛnɛ kotshi onto kekɔ mɛtɛ koka mbɔtɔnɛ la tɔndɔ diele lo Rɔmɔ 13:1, diata ɔnɛ: “Onto tshɛ ayakitshakitsha l’ɛse ka ewandji wa laadiko.” Ɔnkɔnɛ, Okristo koka mbɔsa yɛdikɔ ya kana bu kɔlɔ dia nde ntshiba lo dui dimɔtshi diele Nzambi amboshilaka mbidjanga dia nsala.

Nkum’otema kekɔ nto ohomba naka wambokɔlɔmba dia nkamba l’ɛngɔ kɛmɔtshi kana dia nsala jɛstɛ mɔtshi etena katshibayɛ. Ase Rɔmɔ w’edjedja l’ase Skutiya wakatshibaka lo nkamba la tokuwa tawɔ ta ta dia mɛnya dia vɔ wakakambaka la wolo wa jambizambi yawɔ ya ta di’onto mɛnya dia nde aki onto lakawakoke mbɛkɛ otema. Ase Ngirika wakemɛka lonya l’olongo etena kakawatshibaka. Lo nsala ngasɔ vɔ wakɛnyaka dia vɔ wekɔ lo mbeya dia wolo wa nzambi kɛmɔtshi kayoyokoya l’anto ekɔ lo mɛna kɛnɛ katama ndo kasalema.

Lo mɛtɛ, okambi wa Jehowa hahombe ntshiba lo kɛnɛ kendana la dalapo dia wodja tshɛ, nɛ dia dui sɔ diekɔ la diɔtɔnganelo l’ɔtɛmwɛlɔ wa kashi. Ko kayotota naka wambokɔlɔmba lo tominadi tɔmɔtshi dia nkitsha lonya laadiko dia Bible ko ntshiba dia mɛnya dia kɛnɛ katayɛ kekɔ mɛtɛ? L’etena kɛsɔ, wɛ koka mbɔsa yɛdikɔ ya nsala dui sɔ, lam’ele Afundelo totɛka dikambo di’anto waki la kɔlamelo wakatshibe lo nsala jɛstɛ mɔtshi. (Eta. 24:2, 3, 9; 47:29-31) Ekɔ ohomba mbohɔ dia naka wɛ nsala etshibelo ka ngasɔ, kete wɛ ekɔ lo ntshiba la ntondo ka Nzambi, ɔnɛ wɛ ayota kɛnɛ kele mɛtɛ. Wɛ pombaka ndjalɔngɔsɔla dia mbuta mɛtɛ lo dimbola tshɛ diakokawɔ kooka.

Lam’ele sho mbɔsaka diɔtɔnganelo diasaso la Jehowa la nɛmɔ di’efula, sho pombaka nɔmba lo nsɛdingola etshibelo tshɛ katɔlɔmbawɔ dia nsala, ndjashikikɛ dia dui sɔ hofukutanya nkum’otema kaso kana nsekola atɔndɔ wa lo Bible. Naka wɛ ambɔsa yɛdikɔ ya ntshiba, kete wɛ pombaka nkotsha dui sɔ.​—1 Pe. 2:12.