Gu sambanya sa gu thula “gu tumbisa gu gira gilo nyo khaguri dzimbe dzitepo na hi gu khumbhuga lina la Nungungulu . . . kha nga fakazi.” Hi nga sambanya khu malito mwendro khu gu lova.

Vambe adzina va nga pimisa gu khavo si vivbide gu sambanya kholu Jesu a nga khuye: “Mu nga tshuki mu sambanya . . . Ina wago, wu na khale ina; Ahihi wago wu na khale ahihi. Kholu satshavbo si hambanago ni isoso sa guta khiyo ga oyu nya guvivbe.” (Mat. 5:33-37) Lisine gu Jesu a di gu dziti gu khuye Nayo wa Mosi wu di gu gimbeleyana ni sisambanyo nyo khaguri nigu sithumi nyo tumbege sa Nungungulu si di yede gu sambanya ga simbe siemo. (Gen. 14:22, 23; Ekiso. 22:10, 11) Uye a di gu dziti gambe gu khuye ambari Jehovha a di gu sambanyide. (Hebh. 6:13-17) Jesu kha nga ba a vbweta gu ganeya gu khuye ethu kha hi yeli gu sambanya. Wulangani nya isoso, uye a di gengedza vathu gu khuye kha va yeli gu sambanya khu silo nya mba phasa. Satshavbo hi tumbisago hi yede gu si tadzisa kholu khiso Jehovha a vbwetago gu khuye hi gira.

Ginani u yedego gu gira wa gu lombwa gu sambanya? Gupheya, tiyisega gu khuwe u na si kodza gu gira esi u lombidwego gani. Wa gu ba wu si tiyisege, tshukwana u si sambanyi. Lito la Nungungulu la gu hi gengedza khilo: “I tshukwana gumba dzi girela gifungo, guvbindra gu gira gifungo u si gi landrisi.” (Muh. 5:5) Khavbovbo, wona matshina nya Milayo nya Bhibhiliya ma thumago avba nya esi u lombidwego gu tumbisa, khu gu landreya u hunga gu gira gilogyo na wu dzi seketeya avba nya livhalo lago li hevbudzidwego gwadi. Khu yavbini matshina nya Milayo nya Bhibhiliya u nga ma thumisago?

Simbe sisambanyo si ngu gimbidzisana ni gugola ga Nungungulu. Khu giyeyedzo, Dzifakazi dza Jehovha dzi ngu gira situmbiso tepo dzi tshadhago. Situmbiso soso, si ngu gira gipandre nya sisambanyo. Mbeli ga Nungungulu ni ga ava va fakazago mutshadho, noivha ni noivho va ngu tumbisana gu haladzana, gu khathaleyana ni gu ningana githawo nigu khavo va na gira isoso “womini gwawe watshavbo.” (Yimbe mipatwa adzina kha yi na nga ganeya yatshavbo malito yaya tepo va tshadhago, ganiolu va gu gira gitumbiso gegi mbeli ga Nungungulu.) Khu kharato, avo va gu khala mwama ni mwangadzi nigu avo va yede gu simama na va tshadhide womini wawe watshavbo. (Gen. 2:24; 1 Kor. 7:39) Gitumbiso gi girwago khava va tshadhago gi ngu vbwetega, nigu gi ngu gimbeleyana ni gugola ga Nungungulu.

Simbe sisambanyo kha si gimbileyani ni gugola ga Nungungulu. Khu giyeyedzo, Makristo nya lisine kha ma sambanyi gu phara siphisa gasi gu vhikeya litigo lawe mwendro va diga gukhodwa ga Nungungulu. Kholu gu gira isoso, si di hadzi gu wonwa kha nga gu ndraga milayo ya Nungungulu. Makristo ‘kha ma lumbi litigo,’ khu kharato ayo kha ma dzi bedzedzeyi omu nya mayunga. — Joh. 15:19; Isa. 2:4; Jak. 1:27.

 Makristo ma yede gu hunga gu khayo ma na gira sisambanyo nyo khaguri mwendro ne guya khu mavhalo yawe. Dzimbe dzitepo, hi yede gu dundrugeya gwadi khu wusingalagadzi wa Jesu wu khuwo: “Ningelani ga Sezari iso si gu sa Sezari, ni ga Nungungulu iso si gu sa Nungungulu” na hi si hungi gu gira gisambanyo nyo khaguri. — Luka 20:25.

Khu giyeyedzo, nga dundrugeya Mukristo nyo khaguri a vbwetago gu gira pasaporte, khavbovbo a tugula gu khuye a yede gu gira gisambanyo nya gu a tumbega. Abari gu ga litigo laye gisambanyo gyogyo gya gu ndraga milayo ya Nungungulu, livhalo laye li hevbudzedwego khu Bhibhiliya kha li na nga mu dzumeleya gu gira isoso. Mufumo adzina wu nga dzumeleya gu khuwo a vbindrugedza malito nya gisambanyo gasi livhalo laye li mu dzumeleya gu gira gisambanyo.

Gu gira gisambanyo nya gu tumbege gi nga vbindrugedzwa malito nyo khaguri adzina gi nga pwana ni litshina nya nayo li gomogo umo ga Varoma 13:1 ligu khilo: “Muthu ni muthu gu vbwetega a yingela vathangeli va vegidwego khu nayo.” Khu kharato, adzina Mukristo a nga hunga gu khuye kha sa vivba gu sambanya gu gira gilo egi Nungungulu a vbwetago gu khuye Makristo ma gira.

Khya lisima gambe gu engisa livhalo lago li hevbudzidwego khu Bhibhiliya wa gu lombwa gu thumisa gilo mwendro gestu nyo khaguri tepo u girago gisambanyo. Varoma va gale ni Vasita mwendro vathu va vbavbandze, va di gu thumisa dzixiphadha dzawe gasi gu gira gisambanyo va lomba tshivba ga Nungungulu nya dzinyimbi gasi gu wona gu tumbega ga muthu wule. Vagreki va di gu khusedza mandza tepo va nga ba va gira sisambanyo. Avo va di gu dziti gu khavo gu na ni Nungungulu nya tshivba, oyu a wonago ni gupwa esi si ganedwago ni esi si girwago, oyu vathu vatshavbo va yedego gu hongola gwaye va ya dzi lamuleya.

Khu lisine, githumi nyo khaguri gya Jehovha kha gi yeli gu sambanya khu gilo gi gimbeleyanago ni wukhozeyi nya malipha. Ganiolu, ginani u yedego gu gira tribhunali ya gu gu lomba gu vega limandza lago vbatshani nya Bhibhiliya u bwe u sambanya gu ganeya lisine? Ga giemo gegi, uwe adzina u nga hunga gu gira isoso, kholu umo nya Milowo gu ngu ganedwa khu vathu nyo tumbege va nga sambanya khu gu gira gestu nyo khaguri. (Gen. 24:2, 3, 9; 47:29-31) Si na ni lisima gu dundruga gu khuwe abari gu wa gu vbweta gu gira gisambanyo nyo khaguri, uwe wa gu sambanya mbeli ga Nungungulu gu khuwe u na ganeya lisine. U yede gu dzi dongiseya gwadi gasi gu hlamula khu gu tumbega ni gevbini giwudziso adzina u nga girwago.

Khu kotani nya olu wupari wathu ni Jehovha wu gu na ni lisima gwathu, ethu hi yede gu gombeya hi bwe hi dundrugeya gwadi maningano ni gevbini gisambanyo hi na lombwago gu gira, hi tiyisega gu khethu kha gi dwanisani ni livhalo lathu mwendro matshina nya milayo nya Bhibhiliya. Wa gu hunga gu gira ni gevbini gisambanyo, uwe u yede gu gi tadzisa. — 1 Ped. 2:12.