Cikonke nkwaamba naa kusyomezya kucita cintu cimwi cakusinizya ncobeni, kanji-kanji ikucitwa kwiinda mukubelesya zina lya Leza. Cilakonzya kwaambwa naa kulembwa buya.

Bamwi balakonzya kuyeeya kuti taciluzi kukonka nkaambo Jesu wakaamba kuti: “Mutakonkezyi naaceya . . . kwaamba kwanu kuti ‘Inzya’ akube inzya, akuti ‘Peepe’ akube peepe, nkaambo aayindilila aali yaaya azwa kumubi.” (Mt. 5:33-37) Masimpe, Jesu wakalizyi kuti Mulawo wa Musa wakalikuzumizya kukonka mubukkale bumwi alimwi akuti babelesi ba Leza basyomeka bakali kukonka. (Matl. 14:22, 23; Kul. 22:10, 11) Alimwi wakalizyi kuti Jehova lwakwe wakali kukonka. (Heb. 6:13-17) Aboobo Jesu kunyina naakaamba kuti tatweelede kukonka. Muciindi caboobo, wakali kucenjezya kuti tatweelede kukonka mumakani aatayi koomoonga. Tweelede kuzuzikizya cikonke cesu nkaambo Jehova uyanda kuti katucita oobo.

Pele ino ncinzi ncomukonzya kucita kuti mwaambilwa kukonka? Cakusaanguna, amube masimpe kuti mulakonzya kucizuzikizya cikonke canu. Kuti kamutali masimpe, inga cainda kubota kutakonka. Ijwi lya Leza licenjezya kuti: “Cilainda kubota kutakonka muciindi cakukonka kumane tocizuzikizyi.” (Muk. 5:5) Cabili, amubone njiisyo zyamu Bbaibbele izyaamba kujatikizya kukonka, kumane amucite kweelana amanjezyeezya aanu aayiisyidwe. Ino ninjiisyo nzi zimwi zyaamba makani aakukonka?

Zikonke zimwi zileeendelana akuyanda kwa Leza. Mucikozyanyo, Bakamboni ba Jehova balakonka ciindi nobakwatana. Ooyu musyobo umwi wacikonke. Kumbele lya Leza alimwi abakamboni, sibwiinga anabwiinga balakonka kuti banooyandana akulemekana kufwumbwa buyo kuti kabapona.” (Nokuba kuti banabukwetene bamwi tabaambi majwi aaya cacigaminina ciindi nobakwatana, pele balakonka kumbele lya Leza.) Mpoonya balaba mulumi amukaintu, alimwi beelede kuzumanana kabakwetene mubuumi bwabo boonse. (Matl. 2:24; 1Kor. 7:39) Cikonke cili boobu cililuzi, alimwi cileendelana akuyanda kwa Leza.

Zikonke zimwi tazyeendelani akuyanda kwa Leza. Munakristo wakasimpe tayelede kukonka kutegwa akwabilile cisi kwiinda mukubelesya zilwanyo naa kuleka kusyoma muli Leza. Kucita boobo inga kwaba kutyola milawo ya Leza. Banakristo ‘tabali banyika,’ aboobo tatweelede kujatikizyigwa mumazwanga naa munkondo.—Joh. 15:19; Is. 2:4; Jak. 1:27.

Zikonke zimwi zilacitwa kweelana amanjezyeezya aamuntu. Zimwi ziindi, ambweni inga twayandika kubikkila maano kulanga-langa zijatikizyidwe mucikonke kweelana amajwi aa Jesu aakuti  “amupe Kaisara zintu zya Kaisara, pele zintu zya Leza amupe Leza.”—Lk. 20:25.

Mucikozyanyo, mbuti kuti Munakristo walembela kuba sicisi naa uyanda kubweza pasipoti mpoonya waambilwa kuti weelede kupa cikonke cakusyomeka? Kuti mucisi eeco kukonka kubikkilizya kucita cintu cimwi cilibonya antangalala kuti nkutyola mulawo wa Leza, manjezyeezya aakwe ayiisyidwe Bbaibbele taakonzyi kumuzumizya kucita boobo. Nokuba boobo, mfwulumende ilakonzya kumuzumizya kucinca majwi aali mucikonke kutegwa manjezyeezya aakwe amuzumizye kukonka.

Kulomba kucinca majwi aali mucikonke cakusyomeka kuleendelana anjiisyo iijanika ku Baroma 13:1, iyaamba kuti: “Muntu uuli woonse kalibombya kubeendelezi.” Aboobo Munakristo ulakonzya kubona kuti kunyina cilubide kukonka kucita cintu cimwi Leza ncayanda kuti Banakristo boonse kabacita.

Cilayandika kutobela manjezyeezya ayiisyidwe Bbaibbele kuti walombwa kubelesya cintu cimwi naa kutambika munzila imwi ciindi nokonka. Bana Roma bansiku alimwi abana Sikuti bakali kukonka kubelesya mapanga, ikutondezya nguzu zya leza wankondo akuti muntu ooyo iwakonka wakali kumusyoma leza ooyo cakumaninina. Ba Giriki bakali kutambika janza kujulu ciindi nobakali kukonka. Kwiinda mukucita boobu, bakali kutondezya kuti kuli leza uuli aanguzu uuswiilila nzyobakali kwaamba akulangilila izyakali kucitika alimwi akuti bantu bakali kuyoolyaambilila kulinguwe.

Masimpe kuti, mubelesi wa Jehova takonzyi kukonka kumbele lyacitondezyo cili coonse cacisi ciswaangene abukombi bwakubeja. Pele ino kuti munkuta mwalombwa kubikka janza atala a Bbaibbele akukonka kuti mulapa bumboni bwamasimpe? Mubukkale oobo mulakonzya kusala kucita oobo, mbwaanga Magwalo alatwaambila kuti babelesi ba Leza ibasyomeka bakacita oobo ciindi nobakali kukonka. (Matl. 24:2, 3, 9; 47:29-31) Cilayandika kuyeeya kuti ciindi nomukonka, mulakonka kumbele lya Leza kuti mulaamba masimpe. Mweelede kulibambila kwiingula cakusyomeka mubuzyo uuli woonse ngomukonzya kubuzyigwa.

Mbwaanga cilongwe cesu a Jehova cilayandika kapati, tweelede kupaila alimwi akuyeeya cakulomya kujatikizya cikonke cili coonse ncotwaambilwa kukonka, akuba masimpe kuti cileendelana amanjezyeezya eesu naa njiisyo zyamu Bbaibbele. Kuti mwasala kukonka, mweelede kuzuzikizya cikonke eeco.—1Pet. 2:12.