Tok tru antap em “wanpela tokaut, o tok promis bilong inapim wanpela tokaut, na planti taim ol i kolim nem bilong God . . . olsem Witnes.” Man i ken mekim tok tru antap long rot bilong tokaut long en o raitim long pepa.

Sampela man inap ting em i rong long mekim tok tru antap bikos long tok Jisas i mekim olsem: “No ken . . . mekim tok tru antap. . . . ‘Yes’ bilong yupela i mas minim yes tasol, na ‘Nogat’ bilong yupela i mas minim nogat tasol, long wanem, ol tok yupela i skruim antap long dispela em i kam long Satan.” (Mat. 5:33-37) Jisas i save olsem Lo Bilong Moses i tok long ol man i ken mekim tok tru antap, na ol gutpela wokman bilong God i bin mekim tok tru antap long nem bilong God. (Stt. 14:22, 23; Kis. 22:10, 11) Em i save olsem Jehova yet i bin mekim tok tru antap. (Hib. 6:13-17) So tok bilong Jisas i no makim olsem yumi no ken mekim tok tru antap, nogat. Em i tok lukaut long yumi no ken mekim tok tru antap long ol liklik samting o long ol samting i no gat as bilong en. Yumi mas tingim wok bilong inapim promis bilong yumi olsem wanpela wok holi. Yumi mas truim ol tok yumi mekim.

So yu ken mekim wanem sapos wanpela i askim yu long mekim tok tru antap? Pastaim, lukim sapos yu bai truim dispela tok tru antap yu mekim o nogat. Sapos yu no klia, i gutpela yu no mekim tok tru antap. Baibel i tok lukaut olsem: “I gutpela moa long yu no mekim tok promis, dispela i winim pasin bilong mekim tok promis na yu no inapim.” (Ekl. 5:5) Bihain, skelim ol stiatok Baibel i mekim long wanpela tok tru antap, na mekim samting i stret wantaim maus bilong bel bilong yu em Baibel i skulim pinis. Wanem sampela stiatok yu ken skelim?

Sampela tok tru antap i stret wantaim laik bilong God. Olsem, Ol Witnes Bilong Jehova i save mekim tok promis long taim ol i marit. Dispela tok promis em wanpela tok tru antap. Man na meri i laik marit i save sanap long ai bilong God na ol aiwitnes na mekim tok promis bilong marit olsem ol bai laikim tru, sori, na rispektim narapela narapela na ol bai mekim olsem “inap long olgeta taim [ol] i stap wantaim.” (Ating ol narapela i no mekim wankain tok olsem taim ol i marit, tasol ol tu i save mekim tok promis long ai bilong God.) Bihain long dispela ol i tokaut olsem tupela i marit, na ol bai stap wantaim olsem marit inap long laip olgeta bilong ol. (Stt. 2:24; 1 Kor. 7:39) Dispela tok promis em i stret wantaim laik bilong God.

Sampela tok tru antap i no stret wantaim laik bilong God. Wanpela Kristen tru i no inap mekim tok tru antap bilong insait long ami na pait o long lusim bilip long God. Dispela bai brukim lo bilong God. Ol Kristen “i no [ken] insait long ol samting bilong dispela graun,” olsem na yumi no inap insait  long ol kros pait na ol woa samting bilong graun.​—Jon 15:19; Ais. 2:4; Jems 1:27.

Sampela tok tru antap em Kristen i mas larim maus bilong bel i stiaim em long mekim. Sampela taim yumi ken skelim gen wanpela tok tru antap yumi mekim long rot bilong tingim tok Jisas i mekim olsem “ol samting bilong Sisar, givim long Sisar, na ol samting bilong God, givim long God.”​—Luk 20:25.

Olsem, wanpela Kristen i aplai long kamap sitisen bilong wanpela kantri o long kisim paspot, em i mas mekim tok tru antap olsem olgeta tok em i mekim i tru. Long kain kantri olsem, sapos wanpela Kristen i mas mekim tok tru antap we i pait wantaim lo bilong God, orait maus bilong bel em Baibel i skulim pinis bai helpim em long no ken mekim. Ating gavman inap stretim gen ol tok bilong dispela tok tru antap na bai i stret wantaim maus bilong bel bilong Kristen.

Taim gavman i stretim pinis, orait Kristen i ken mekim dispela tok tru antap na dispela bai i stret wantaim stiatok i stap long Rom 13:1, olsem: “Olgeta man i mas aninit long ol gavman.” Long dispela rot, Kristen i ken save olsem samting em i mekim i stret wantaim samting God i laik em i mas mekim.

Maus bilong bel tu i mas helpim yu taim ol i askim yu long yusim imis o brukim skru o wokim han samting taim yu mekim tok tru antap. Lain Rom na lain Sitia bilong bipo i save holim bainat bilong ol bilong mekim tok tru antap long strong bilong god bilong woa olsem ol tok ol i mekim i tru olgeta na ol man i ken bilip long en. Ol Grik i save apim han i go long heven taim ol i mekim tok tru antap. Ol i luksave olsem i gat God i stap na em i lukim ol tok ol i mekim na ol pasin ol i mekim na em i save kotim ol manmeri long ol samting ol i mekim.

Ol wokman bilong Jehova i no inap mekim tok tru antap long wanpela imis o wanpela mak o wanpela samting em lotu giaman i as bilong en. Tasol olsem wanem sapos kot bilong lo i tok long yu mas putim han antap long Baibel bilong mekim tok tru antap olsem olgeta tok yu mekim i tru? Long kain taim olsem, yu ken mekim olsem, bikos Baibel i tok ol bilipman long bipo i mekim sampela samting bilong soim olsem ol i mekim tok tru antap. (Stt. 24:2, 3, 9; 47:29-31) Em i bikpela samting long tingim olsem taim yu mekim kain tok tru antap olsem, yu mekim promis long ai bilong God olsem yu bai tok tru. Yu mas redi long mekim tok tru taim yu bekim olgeta askim em ol i givim long yu.

Yumi tingim tru pasin pren bilong yumi wantaim Jehova, olsem na yumi laik skelim gut olgeta tok tru antap yumi mekim na bai em i stret wantaim maus bilong bel bilong yumi na ol stiatok bilong Baibel. Sapos yu laik mekim wanpela tok tru antap, orait yu mas redi long inapim dispela promis yu mekim.​—1 Pita 2:12.